పంచుకోండి
వ్యూస్
  • స్థితి: సవరణ కు సిద్ధం

కడప

ఈ పేజిలోకడప జిల్లాకి సంబంధించిన వ్యవసాయ సమాచారం అందుబాటులో ఉంటుంది.

నీటి పారుదల

వ్యవసాయ రంగానికి వూపిరి సాగునీరు. వేలాది రూపాయలు వెచ్చించి సాగుచేసిన పంట ద్వారా రైతు లోగిళ్లకు సిరులు రావాలంటే సేద్యపు జలాలు సంవృద్ధిగా ఉంటే అది సాధ్యం. కొన్ని ప్రాంతాల్లో నేటికి పూర్వం నిర్మించిన.. కట్టించిన.. తవ్వించిన కుంటలు.. చిన్న.. పెద్ద చెరువులు అన్నదాతలకు ఆదరవుగా ఉన్నాయి. పూర్వీకుల ఎంతో సదాశయంతో.. ముందుచూపుతో... భవిష్యత్తు అవసరాల దృష్ట్యా రైతుల శ్రేయస్సును దృష్టిలో పెట్టుకుని చెరువుల నిర్మాణానికి నాడు ఉపక్రమించారు.

కడప జిల్లాలో... 100 ఎకరాల ఆయకట్టు ఉన్న కుంటలు, చిన్న చెరువులు రమారమి 1,542 ఉన్నాయి. వీటి పరిధిలో 33,194 ఎకరాలు ఉన్నట్లు చిన్న నీటి పారుదలశాఖగణాంకాలు చెబుతున్నాయి. 100 ఎకరాల కంటే ఎక్కువ ఆయకట్టు ఉన్న చెరువులు సుమారు 303 ఉండగా అందులో 75,856 ఎకరాలున్నట్లు అంచనా. కడప జిల్లాలో బద్వేలు, పోరుమామిళ్ల, పోలి (రాజంపేట మండలం), వెల్లమరాజుపల్లె (చిట్వేలి మండలం), ఒంటిమిట్ట చెరువులు పెద్దవని అధికారులు చెబుతున్నారు. జిల్లాలో ఉన్న చెరువుల్లో ఎక్కువగా శ్రీకృష్ణదేవరాయల పాలనలో చేపట్టినవి

మైలవరం

జలాశయం నిల్వసామర్థ్యం ఆయకట్టు టీఎంసీలు ఎకరాలు
మైలవరం 9.960 69,722
బ్రహ్మంసాగర్‌ 17.730 1,50,000
సీబీఆర్‌ 10.030 60,000
వెలిగల్లు 4.64 24,000
అన్నమయ్య 2.23 22,500
ఎస్‌ఆర్‌-1 2.133 17,000
ఎస్‌ఆర్‌-2 2.444 10,000
ఫించా 0.327 3,776
దిగువ సగిలేరు --- 14,003
ఎగువ సగిలేరు -- 5,646
కేసీ కాల్వ --- 92 వేలు

వర్షాలొచ్చినప్పుడు కొండప్రాంతాల్లో పడిన వర్షపు చినుకులు వంకలు, వాగుల్లో ప్రవహించి చెరువుల్లో, కుంటల్లోకి చేరుతాయి. వీటిల్లో నీరు పుష్కలంగా ఉంటే సమీప గ్రామాల్లోని బావులు, బోర్లలో భూగర్భజలాల లభ్యత ఆశాజనకంగా పెరుగుతోంది. గత కొన్నేళ్లుగా పరిశీలిస్తే ఎక్కువగా సెప్టెంబరు-నవంబరులో కురిసిన వానలకే చెరువులు నిండినట్లు నివేదికలు చెబుతున్నాయి. వీటి ఆధారంగా వరి, పొద్దుతిరుగుడు, వేరుసెనగ, నువ్వుల పంటలను రైతులు సాగుచేశారు.

కడప-కర్నూలు కాల్వ

కాలువలు : కడప-కర్నూలు కాల్వ బ్రిటిష్‌కాలంలో నిర్మించారు. పదేళ్లనుంచి ఈకాల్వను ఆధునికీకరణ పనులను అంచెలంచెలుగా చేపడుతున్నారు. జమ్మలమడుగు, ప్రొద్దుటూరు, మైదుకూరు, కమలాపురం,కడప నియోజవర్గాల్లో సుమారు 92వేల ఎకరాలకు కేసీకాల్వ ద్వారా సాగునీరందుతోంది.

తెలుగుగంగ

కర్నూలు జిల్లా వెలిగోడు నుంచి బ్రహ్మంసాగర్‌ వరకు తెలుగుగంగ కాల్వను నిర్మించారు. ఈకాల్వ నీటి ప్రవాహపు సామర్థ్యం సుమారు 5000 క్యూసెక్కులు

నదులు జిల్లాలో ప్రధానంగా పెన్నానది ప్రవహిస్తుంది. ఈ నదికి ఉపనదులుగా కుందూ, చిత్రావతి, బహుదా (చెయ్యేరు), సగిలేరు, పాపాఘ్ని, గుంజన, మాండవ్య నదులు ప్రవహిస్తున్నాయి.

రాజోలి ఆనకట్ట

ఇక కుందూ నదిపై రాజోలి ఆనకట్ట, పెన్నా-కుందూ సంగమం వద్ద రాజోలి ఆనకట్టలు రైతులకు ఉపయోగకరంగా ఉంటున్నాయి.

ఆధారము: ఈనాడు

ప్రధాన పంటలు

జిల్లాలో వేరుసెనగ సాధారణ విస్తీర్ణం 1,40,339 హెక్టార్లు కాగా 1,20,1105 హెక్టార్లలో సాగవుతోంది. ఈ పంటను ప్రధానంగా రాయచోటి, ఎల్‌.ఆర్‌.పల్లి, పులివెందుల, ఎర్రగుంట్ల, కమలాపురం, బద్వేలు, జమ్మలమడుగు ప్రాంతాల్లో సాగు చేస్తారు.

వరి: జిల్లాలో కేసీ కెనాల్‌ ప్రాంతం ఆయకట్టులో 52,000 హెక్టార్లు సాగవుతోంది. వీటితో పాటు బోరుబావులు, చెరువుల కింద అదనంగా 15,230 హెక్టార్లు పండుతోంది. మొత్తం 67,230 హెక్టార్లలో సాగవుతోంది.

కంది: వర్షాధార పంట. సాధారణ విస్తీర్ణం 17,496 హెక్టార్లు. రాయచోటి, లక్కిరెడ్డిపల్లె, పులివెందుల, ఎర్రగుంట్ల, బద్వేలు ప్రాంతాల్లో కందిని అధికంగా సాగు చేస్తున్నారు.

పత్తి: సాధారణ విస్తీర్ణం 14,983 హెక్టార్లు.

శనగ: జిల్లాలో ఎక్కువ విస్తీర్ణంలో సాగవుతోంది. సాధారణ విస్తీర్ణం 55,840 హెక్టార్లు.

పొద్దుతిరుగుడు: సాధారణ విస్తీర్ణం 67068 హెక్టార్లు.

ధనియాలు: సాధారణ విస్తీర్ణం 9668 హెక్టార్లు.

ఉద్యాన పంటలు..

మామిడి: 24328 హెక్టార్లలో సాగులో ఉంది. ఏటా 164777 మెట్రిక్‌ టన్నులు దిగుబడి వస్తోంది. ఎక్కువగా కోడూరు, రాజంపేట, రాయచోటి, లక్కిరెడ్డిపల్లె ప్రాంతాల్లో సాగు చేస్తున్నారు.

చీనీ: జిల్లాలో 14518 హెక్టార్లలో సాగవుతోంది. ఏటా 241914 మెట్రిక్‌ టన్నులు దిగుబడి వస్తోంది. పంటను ఎక్కువగా పులివెందుల, కోడూరు,రాజంపేట, జమ్మలమడుగు, బద్వేలు తదితర ప్రాంతాల్లో పండిస్తున్నారు.

నిమ్మ: తెగుళ్ల కారణంగా సాగు విస్తీర్ణం తగ్గింది. ప్రస్తుతం 1870 హెక్టార్లలో సాగవుతోంది. వీటి నుంచి 24990 మెట్రిక్‌ టన్నులు దిగుబడి వస్తుంది. ఈ పంటను కోడూరు, రాజంపేట, రాయచోటి, లక్కిరెడ్డిపల్లె, బద్వేలు, జమ్మలమడుగు, పులివెందుల, కడప, ప్రొద్దుటూరు ప్రాంతాల్లో సాగు చేస్తున్నారు.

అరటి: జిల్లా నుంచి అరటి ఇతర దేశాలకు ఎగుమతి చేస్తున్నారు. ప్రస్తుతం అరటిలో టిష్యూ కల్చర్‌ మొక్కలనే వాడుతున్నారు. దుంపలను నాటే విధానాన్ని తగ్గించారు. ఈ పంట ఎక్కువగా కోడూరు, రాజంపేట, పులివెందుల, కడప ప్రాంతాల్లో సాగు చేస్తున్నారు. ప్రస్తుతం 11282 హెక్టార్లలో సాగులో ఉంది.

బొప్పాయి: జిల్లాలో 4వేల హెక్టార్ల వరకు సాగవుతోంది. పంటను కోడూరు, రాజంపేట, కడప ప్రాంతాల్లో సాగులో ఉంది.

పసుపు: జిల్లాలో పసుపు 8500 హెక్టార్లలో సాగవుతోంది. ఈ పంటను మైదుకూరు, ఖాజీపేట, కడప, కోడూరు, రాజంపేట ప్రాంతాల్లో సాగు చేస్తున్నారు.

ఆధారము: ఈనాడు

ప్రాజెక్టులు

గాలేరు-నగిరి సుజల స్రవంతి

శ్రీశైలం జలాశయంలో(కృష్ణానది) మిగులు(వరద) జలాలను 38 టీఎంసీలను తరలించాలని ప్రభుత్వం నిర్ణయం తీసుకుంది. అందులో ఒక టీఎంసీ జలాలను సుమారు 15 వేల ఎకరాలకు ఇవ్వాలనేది ప్రణాళిక. ఇక జీఎన్‌ఎస్‌ఎస్‌ ప్రధాన కాల్వకు అటు, ఇటు, సమీపంలోని గ్రామాలు, పట్టణ వాసులకు సుమారు అయిదు లక్షలమందికి 3.670 టీఎంసీలు నీరు ఇందులో నుంచే ఇవ్వాల్సి ఉంటుంది.

కర్నూలు జిల్లా అవుకు జలాశయం నుంచి సుమారు 52 కి.మీ పొడవు జీఎన్‌ఎస్‌ఎస్‌ వరదకాల్వను తవ్వుతున్నారు. 47, 48/ఎ, 49/ఎ ప్యాకేజీలుగా విభజించి పనులను చేపడుతున్నారు. తొలుత 10 వేల క్యూస్కెక్కుల ప్రవాహవేగం ఉండేలా 18 మీటర్లు వెడల్పు, సుమారు 8.5-9 మీటర్లు లోతు ఉండేలా కాల్వను తవ్వాలని నిర్ణయించారు. భవిష్యత్తులో సాగునీటి అవశ్యకత అవసరం ఉంటుందని భావించి 20 వేల క్యూసెక్కుల ప్రవాహం ఉండేలా కాల్వ వెడల్పును 18 నుంచి 36 మీటర్లు వెడల్పునకు విస్తరించారు. ఈ పనులు సాగుతున్నాయి.

వరదకాల్వ పనులను రూ.311.31 కోట్లతో చేపడుతున్నారు. ఇప్పటివరకు (2011 మార్చి) రూ.273.17 కోట్లు ఖర్చు చేశారు.

జీఎన్‌ఎస్‌ఎస్‌ పథకంలో భాగంగా మైలవరం మండలం లింగాపురం తాండ వద్ద రాళ్లగుట్టలు, కొండలు ఉన్నాయి. ఈ నేపథ్యంలో కృష్ణావరద జలాలు వెళ్లడానికి అనువుగా లేదు. దీంతో భూగర్భంలో(సొరంగం) నీరు తరలించాలని ఆకృతి తయారు చేశారు. 5.4 కి.మీ మేర తవ్వాలని నిర్ణయించారు. ఆరంభం వైపు 750 మీటర్లు(18 మీటర్లు వెడల్పు), చివరి వైపు 550 మీటర్లు పొడవు మేర 18 మీటర్లు వెడల్పుతో తవ్వారు. కానీ సాంకేతిక సమస్యలు రావడంతో సొరంగం వెడల్పును 11.35 మీటర్ల వెడల్పుకే కుదించారు. ఎడమ సొరంగం 5.4కి.మీ, (లోపల అంతార్భగంగా కుడి సొరంగం 4.01 కి.మీ) తవ్వడానికి పనులు జరుగుతున్నాయి. ఈ ప్యాకేజికి రూ.376.14 కోట్లు ఖర్చు అవుతుందని భావించగా ఇప్పటివరకు 260.8 కోట్ల విలువ చేసే పనులు జరిగినట్లు అంచనా.

జీఎన్‌ఎస్‌ఎస్‌ పథకానికి అంతర్భాగమైన, గుండెకాయలాంటి గండికోట జలాశయాన్ని నిర్మిస్తున్నారు. పెన్నానది, చిత్రావతి నదుల అనుసంధానం వద్ద జలాశయం ప్రధాన కాల్వ 24 కి.మీ తవ్వడానికి రూ.341.5 కోట్లు అంచనా కాగా. తొలుత 16 టీఎంసీల నీరే నిల్వ చేయాలని అనుకున్నారు.209 ఎఫ్‌ఆర్‌ఎల్‌ పరిమితం చేశారు. రాబోయే నీటి అవసరం మరింత పెరిగే అవకాశం ఉందని 16.85 టీఎంసీల నిల్వ సామర్థ్యంతో చేపడుతున్నారు. దీని నిర్మాణం కారణంగా ముద్దనూరు, కొండాపురం మండలాల్లో 22 గ్రామాలు ముంపునకు గురి అవుతున్నాయి. ఈ జలాశయం నిర్మాణ పనుల కోసం ఇప్పటి వరకు రూ.322.27 కోట్లు ఖర్చు అయినట్లు అధికారులు చెబుతున్నారు.

జీఎన్‌ఎస్‌ఎస్‌ మొదటి దశ రెండో ప్యాకేజీలో భాగంగా 35 వేల ఎకరాలకు సాగునీరు ఇవ్వాలనేది లక్ష్యం. ఇందులో భాగంగా ముద్దనూరు మండలంలో 10 వేల ఎకరాలకు సేద్యపు జలాలు ఇవ్వడానికి 1.6 టీఎంసీల నిల్వ సామర్థ్యం వామికొండ జలాశయాన్ని, అదేవిధంగా 25 వేల ఎకరాలకు( ఎర్రగుంట్ల, వీరపునాయునిపల్లె) మండలాల రైతుల కోసం సర్వరాయసాగర్‌ జలాశయాన్ని(3.06 టీఎంసీల) సామర్థ్యంతో చేపడుతున్నారు . జీఎన్‌ఎస్‌ఎస్‌ ప్రధాన కాల్వ 24.330 కి.మీ నుంచి 32.640/34.092 కి.మీ వరకు ప్రధాన కాల్వ, రెండు జలాశయాలు, వీటి పరిధిలో ప్రధాన, ఉప, పంట కాల్వ పనులు చేయడానికి రూ.301.858 కోట్లు అంచనా కాగా నేటికి రూ. 230.73 కోట్లు ఖర్చు చేశారు.

జీఎన్‌ఎస్‌ఎస్‌ రెండో దశలో కడప జిల్లాలో 1.20 లక్షల ఎకరాలకు సాగునీరు ఇవ్వాలి. ఏడు ప్యాకేజీలుగా విభజించారు. రూ.902.91 కోట్లు అంచనా కాగా 2006 జూన్‌ మూడో తేదీన అప్పటి సీఎం ఈ పనులకు శంకుస్థాపన చేశారు. ఇప్పటివరకు రూ.107.79 కోట్లు పని జరిగింది. ఇంకా రూ.795.12 కోట్లు పనులు చేయాల్సి ఉంది. 11.94 శాతమే ప్రగతి సాధించారు. ఏడు ప్యాకేజీలకుగాను 758 ఎకరాలను సేకరించగా ఇంకా 6,480 ఎకరాలను సేకరించాలి. అటవీభూమి 3,658 ఎకరాలను సేకరించాలి.రెండోదశ పనుల తీరు ఎక్కడ వేసినగొంగళి అక్కడే అన్నట్లు ఉంది.

అన్నమయ్య ప్రాజెక్టు

రాజంపేట మండలంలోని బాదనగడ్డపై అన్నమయ్య ప్రాజెక్టును నిర్మించారు. ఈ ప్రాజెక్టును 1976 ఏప్రిల్‌ 21న అప్పటి ముఖ్యమంత్రి జళగం వెంకళరావు ప్రారంభించారు. 2001కి ప్రాజెక్టును పూర్తి చేశారు. ఈప్రాజెక్టు అనుసంధానంగా 23.63 కిలోమీటర్ల పొడవున ప్రధాన కాలువను నిర్మించారు. రూ.8.235 కోట్ల అంచనాలతో ప్రారంభమైన ఈ ప్రాజెక్టు ఇపుడు అంచనా విలువ ప్రకారం రూ.70.4689 కోట్లను ఖర్చు చేశారు. ఈ ప్రాజెక్టు కెపాసిటీ 2.230 టీఎంసీలు. ఈ ప్రాజెక్టు నుంచి కాలువ ద్వారా రబీ, ఖరీఫ్‌కు కలిపి 22,500 ఎకరాల ఆయుకట్టుకు సాగునీరు అందించాలని నిర్ధేశించారు. 2003 అక్టోబర్‌ 30న ప్రాజెక్టు మొదటి గేటు కొట్టుకుపోయింది. దీని స్థానంలో కొత్త గేటును ఏర్పాటు చేశారు.

సోమశిల

నెల్లూరు జిల్లా సోమశిలపై సోమశిల ప్రాజెక్టు నిర్మాణానికి శ్రీకారం చుట్టారు. ఈ ప్రాజెక్టు నిర్మాణం వలన కడప జిల్లా ప్రాంతానికి ఎలాంటి ఉపయోగం లేకపోయినా పోమశిల వెనుక జలాల తీర ప్రాంతాల్లోని భూముల్లోని బోర్లల్లో నీటి మట్టం పెరుగుతుంది. సోమశిల మునక ప్రాంతాల్లోని దాదాపు ఐదారు వేల ఎకరాల ముంపు భూముల్లో పంటలు సాగులో ఉన్నాయి. ఈ ప్రాజెక్టు నిర్మాణం వలన దాదాపు 105 గ్రామాలు మునకకు గురైనవి.

వెలిగల్లు

అంచనా వ్యయం రూ. 210కోట్లు, గాలివీడు, రామాపురం, లక్కిరెడ్డిపల్లె మండలాల్లో 24వేల ఎకరాలకు సాగునీరు అందించాలని నిర్మించారు. వెలిగల్లు ప్రాజెక్టునుంచి రాయచోటికి తాగునీరు అందించేందుకు రూ. 42కోట్ల వ్యయంతో నీటి పథకం పూర్తి చేశారు. గాలివీడుకు రూ. 5కోట్లతో తాగునీరు అందించనున్నారు.

ఝరికోన

జిల్లా సరిహద్దులో నిర్మించిన ఝరికోన ప్రాజెక్టు అంచనా వ్యయం రూ. 110కోట్లు, 2,500 ఎకరాలకు సాగునీరు అందించాలనేది లక్ష్యం. సంబేపల్లెకు తాగునీరు అందించాలని ప్రతిపాదించారు. ముఖ్యమంత్రి నియోజకవర్గమైన కలికిరి మండలంలో మూడు గ్రామాలకు తాగునీరు అందించేందుకు ప్రతిపాదనలు సిద్ధం చేశారు.

నూతికోన వంక

అంచనా వ్యయం రూ. 3.50కోట్లు, 200 ఎకరాలకు సాగునీరు అందివ్వనుంది.

ఆధారము: ఈనాడు

నదులు

కడప జిల్లాకు అనంతపురం తర్వాత కరవు జిల్లాగా పేరున్నా.. జిల్లాలో నదుల భాగస్వామ్యం ఎక్కువే ఉంది. ఈ నదులన్నీ ఎక్కువ భాగం కర్ణాటక ప్రాంతంలోని అడవుల నుంచే జన్మస్థలిగా ఇక్కడికొస్తున్నాయి. జిల్లాలో ముఖ్యంగా పెన్నా, చిత్రావతి, కుందూ, చెయ్యేరు, గుంజనేరు, సగిలేరు, పాపఘ్ని, పింఛ, బహుదా, మాండవ్య, గంగనేరు వంటి నదులు సుమారు 500 కిలోమీటర్లు పైబడి విస్తరించాయి. వీటిలో చాలావరకు నదులు పెన్నాలో కలిసే ఉప నదులుగానే ఉన్నాయి. పెన్నా నుంచి వచ్చే నీరు సిద్దవటం తర్వాత నెల్లూరు జిల్లా సరిహద్దులోని సోమశిల ప్రాజెక్టుకు చేరుతుంది.

  • పెన్నా : ఈ నది కర్ణాటకలోని మైసూర్‌ కొండల్లో పుట్టి జిల్లాలోని జమ్మలమడుగు గండికోట కొండలను తాకుతుంది. అక్కడినుంచి జమ్మలమడుగు, ప్రొద్దుటూరు, కమలాపురం, చెన్నూరు, సిద్దవటం మీదుగా ప్రవహిస్తూ నెల్లూరు జిల్లాను చేరుతుంది. ఈ నది సుమారు 150 కిలోమీటర్లు పైబడి విస్తరించింది.
  • చిత్రావతి : ఈ నది కూడా కర్ణాటక రాష్ట్ర పరిధిలోని కొండల్లోనే పుట్టి జిల్లాలోని 100 కిలోమీటర్లు వరకు విస్తరించి పులివెందుల ప్రాంతం పార్నపల్లి వద్ద లోయనుంచి ప్రవహిస్తూ జమ్మలమడుగు ప్రాంతంలో గుండ్లూరు దిగువన పెన్నేరులో కలుస్తుంది.
  • పాపఘ్ని : ఈ నది కర్ణాటక ప్రాంతంలోని స్కంధగిరి కొండల్లో పుట్టి చిత్తూరు జిల్లా మదనపల్లి ప్రాంతం నుంచి కడప, అనంతపురం జిల్లాల్లోని కదిరి, గాలివీడు కొండల మధ్య జిల్లాలోకి ప్రవేశిస్తుంది. ఈ నది గాలివీడు, చక్రాయపేట, గండి, వేంపల్లి, నందిమండలం, కమలాపురం మీదుగా 150 కిలోమీటర్లు ప్రవహించి చెన్నూరు వద్ద పెన్నానదిలో కలుస్తుంది.
  • చెయ్యేరు : ఈ నది కర్ణాటకలోని కోలార్‌ జిల్లా రాయపాడు కొండల్లో పుట్టి చిత్తూరు జిల్లా మదనపల్లి ప్రాంతం నుంచి కడప జిల్లాసరిపల్లె సమీపంలో కడప జిల్లాను తాకుతుంది. జిల్లాలో సుమారో 150 కిలోమీటర్లు మేర ఈ నది విస్తరించింది. సుండుపల్లి మండలంలోని రాయవరం వద్ద బహుదా, పింఛ నదులు అనుసంధానం చేసుకుని బాలరాచపల్లి మీదుగా అన్నమయ్య ప్రాజెక్టు ముందుభాగాన మాండవ్య, గంగనేరులను కలుపుకుని సిద్దవటం మీదుగా నెల్లూరు జిల్లాలోకి ప్రవేశిస్తుంది.
  • పింఛ : చిత్తూరు జిల్లా పుంగనూరు ప్రాంతంలోని ఆవులపల్లి గుట్టల్లో నుంచి తలకోన పిల్లవంక, పాపనాశనం జలపాతాల నీటిని కలుపుకుని సుండుపల్లి మండలం పింఛ వద్ద పారుతుంది. దీనినే పింఛ నది అంటారు. ఈ నది పింఛనుంచి మరో 50 కిలోమీటర్లు ప్రవహించి బహుదానదిని అనుంధానం చేసుకుని శేషాచల కొండల మధ్య రోళ్లమడుగు ఎగువ భాగాన ప్రవహించే చెయ్యేరులో కలుస్తుంది.
  • బాహుదా : ఈ నది చిత్తూరు జిల్లా పీలేరు ప్రాంతం నుంచి కె.వి.పల్లి, ఝరిదిన్నె వద్ద జిల్లాలోకి ప్రవేశిస్తుంది. అక్కడ నుంచి మడితాడు, సుండుపల్లి, రాయవరం మీదుగా శేషాచల కొండల మధ్య ప్రవహించిచెయ్యేరులో కలుస్తుంది. ఈ నది జిల్లాలో 80 కిలోమీటర్ల మేర విస్తరించింది.
  • మాండవ్య : ఈ నది చిత్తూరు జిల్లాలోని మదనపల్లి సమీపంలోని రెక్కల కొండ వద్ద పుట్టి కడప జిల్లా చిన్నమండెం, రాయచోటి, వీరబల్లి ప్రాంతాల్లో సుమారు 100 కిలోమీటర్లు ప్రవహించి గడికోట గ్రామంలోని జాండ్రపెంట వద్ద చెయ్యేరు సంగమంలో అనుసంధానం అవుతుంది.
  • గుంజనేరు : ఇది శేషాచల కొండల్లోని మొగిలికుప్ప దగ్గర జన్మిస్తుంది. అక్కడ నుంచి శెట్టిగుంట, రైల్వేకోడూరు, చిట్వేలి, పెనగలూరు మండలాల్లో 120 కిలోమీటర్ల మేర విస్తరించి సిద్దవటం పైభాగాన పెన్నా నదిలో కలుస్తుంది.
  • సగిలేరు : ఈ నది నల్లమల కొండల్లో జన్మించి గంగాయపల్లి మీదుగా బద్వేల్‌ ప్రాంతంలో జిల్లాలోకి ప్రవేశిస్తుంది. తర్వాత తడుగు వాగును కలుపుకుని 50 కిలోమీటర్ల మేర ప్రవహించి పెన్నాలో కలుస్తుంది.

ఆధారము: ఈనాడు

3.01322556943
మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు