పంచుకోండి
వ్యూస్
  • స్థితి: సవరణ కు సిద్ధం

కర్నూల్

ఈ పేజిలో కర్నూల్ జిల్లాకి సంబంధించిన వ్యవసాయ సమాచారం అందుబాటులో ఉంటుంది.

నీటి పారుదల

జిల్లాలో ప్రధాన సాగునీటి వనరు తుంగభద్ర దిగువ కాలువ (ఎల్లెల్సీ). ఆదోని, ఆలూరు, ఎమ్మిగనూరు, మంత్రాలయం, కోడుమూరు, కర్నూలు నియోజకవర్గాల పరిధిలో విస్తరించి ఉంది. ఖరీఫ్‌ రబీలో కలిపి 1,51,134 ఎకరాలకు సాగునీరు అందాలి. తుంగభద్ర జలాశయం నుంచి జిల్లాకు 24 టీఎంసీల నీటివాటా ఉంది. గోనెగండ్ల దగ్గర హంద్రీనదిపై ఈ జలాశయం నిర్మించారు. 4.5 టీఎంసీల నీటి సామర్థ్యం. గోనెగండ్ల, కోడుమూరు, కృష్ణగిరి, దేవనకొండ మండలాల్లో 25,488 ఎకరాల ఆయకట్టు ఉంది. హెచ్చెల్సీ కింద చిప్పగిరి, ఆలూరు, హాలహర్వి గ్రామాలు లబ్ధి పొందుతున్నాయి. తుంగభద్ర నది నుంచి 3.725 టీఎంసీల నీటిని ఎత్తిపోసి 12 జలాశయాల్లో నింపి పంట చేలకు నీటిని సరఫరా చేయాలి. పనులు వివిధ దశల్లో ఉన్నాయి. పోతిరెడ్డిపాడు రెగ్యులేటర్‌ బ్యాలెన్సింగ్‌ రిజర్వాయరుకు 11.75 టీఎంసీల నీటిని మళ్లించి నంద్యాలకు తాగునీరు, 65,304 ఎకరాలకు సాగునీరు, చెన్నైకు తాగునీరు అందిస్తున్నారు. భానకచర్ల రెగ్యులేటర్‌ నుంచి ఎస్‌ఆర్‌బీసీ కాలువకు నీటిని మళ్లించి 65వేల హెక్టార్లకు సాగునీరు ఇస్తున్నారు. ఇదే కాలువ ఆధారంగా గోరకల్లు బ్యాలెన్సింగ్‌ రిజర్వాయరు, అవుకు రిజర్వాయరు వంటి పనులు చేపట్టారు. నందికొట్కూరు మాల్యాల దగ్గర ఎత్తిపోతల పథకం నిర్మించి శ్రీశైలం జలాశయం ఉపరితలంలో 40 టీఎంసీల నీటిని ఎత్తిపోసి కర్నూలు, అనంతపురం, చిత్తూరు జిల్లాల్లో 6.025 లక్షల ఎకరాలకు సాగునీరు, ఆయా గ్రామాలకు తాగునీరు ఇవ్వాలన్నది లక్ష్యం.

ఆధారము: ఈనాడు

ప్రధాన పంటలు

వ్యవసాయం

నేలలు :

జిల్లాలో ప్రధానంగా నేలలు మూడురకాలు :

  1. నల్లరేగడి నేలలు (బరువైనవి)
  2. నల్లరేగడి నేలలు (తేలిక పాటి)
  3. ఎర్రనేలలు

వ్యవసాయ భూమి వివరాలు

  • భౌగోళిక విస్తీర్ణం : 17.66 లక్షల హెక్టార్లు
  • అడవులు : 3.18 లక్షల హెక్టార్లు
  • మొత్తం సాగు విస్తీర్ణం : 9.39 లక్షల హెక్టార్లు
  • నికర సాగు విస్తీర్ణం : 8.50 లక్షల హెక్టార్లు
  • సాగుచేయని విస్తీర్ణం : 1.17 లక్షల హెక్టార్లు
  • సాగుచేయని బీడు భూమి : 0.99 లక్షల హెక్టార్లు
  • వ్యవసాయ యోగ్యం కాని భూమి : 1.00 లక్షల హెక్టార్లు
  • వ్యవసాయేతర భూమి : 0.81 లక్షల హెక్టార్లు
  • ప్రస్తుత బంజరు : 1.89 లక్షల హెక్టార్లు
  • ఖరీఫ్‌ : 6.51 లక్షల హెక్టార్లు
  • రబీ : 3.24 లక్షల హెక్టార్లు
  • జిల్లాలో వరి, జొన్న, వేరుశెనగ, పత్తి, పొద్దుతిరుగుడు పంటలు ప్రధానంగా పండిస్తారు.
  • జిల్లాలో ఎరువుల వాడకం ఎక్కువ-గుంటూరు తర్వాత ద్వితీయ స్థానం కర్నూలు జిల్లానే.

జిల్లాలో భూసార పరీక్షా కేంద్రాలు :

ఎమ్మిగనూరు, కర్నూలు, నంద్యాల, వ్యవసాయ మార్కెట్‌ యార్డులలో ఏర్పాటయ్యాయి. నంద్యాల రైతు శిక్షణా కేంద్రం, తంగడెంచ, ఎదురూరు, ఎమ్మిగనూరులలో విత్తన ఉత్పత్తి క్షేత్రాలు, ఎమ్మిగనూరులో ప్రాజెక్టు ఉద్ధరణ ప్రదర్శన క్షేత్రాలు ఉన్నాయి.

వాటర్‌ షెడ్‌:

  • జిల్లాలోని వివిధ పథకాల క్రింద అమలవుతున్న వాటర్‌షెడ్లు : 741
  • వాటర్‌ షెడ్‌ కమిటీల సంఖ్య : 741
  • జిల్లాలో అభివృద్ధి చేయాల్సిన బంజరు భూమి : 3.88 లక్షల హెక్టార్లు
  • వాటర్‌షెడ్‌ ద్వారా అభివృద్ధిలోకి వచ్చిన భూమి : 1.72 లక్షల హెక్టార్లు

ఘనీకృత వీర్య కేంద్రం

రాష్ట్రంలో నాలుగు ఘనీకృత వీర్యకేంద్రాలు ఉన్నాయి. విశాఖపట్నం, కరీంనగర్‌లతో పాటు కర్నూలు జిల్లా నంద్యాల, బనవాసిలో ఈ కేంద్రాలు ఉన్నాయి. నంద్యాలలో 1976లో ఈ ఘనీకృత వీర్య కేంద్రాన్ని సుమారు 15.27 ఎకరాల్లో నెలకొల్పారు. సుమారు రూ.75 లక్షలు వెచ్చించి ఇటీవలె నూతన ప్రయోగశాల భవనం నిర్మించారు. పదేళ్లుగా పశువీర్య డోసుల ఉత్పత్తిలో నంద్యాల ఘనీకృత వీర్య కేంద్రం ముందంజలో ఉంది. 2008లో ఈ కేంద్రానికి ఐఎస్‌ఓ ధ్రువపత్రం లభించింది. 2010, 2012లో ఆ పత్రాన్ని పునరుద్ధరించారు. కేంద్రంలో తొమ్మిది ఒంగోలు జాతి ఆబోతులు, 33 ముర్రాజాతి ఆబోతులు, 28 క్రాస్‌బ్రెడ్‌ జెర్సీ ఆబోతులు ఉన్నాయి. కేంద్రంలో మొత్తం 34 మంది సిబ్బంది పని చేస్తున్నారు.

ఆధారము: ఈనాడు

ప్రాజెక్టులు

శ్రీశైలం ప్రాజెక్టు..

రాష్ట్రానికి శ్రీశైలం ఆనకట్ట వెన్నెముక.సాగు, తాగునీటితో పాటు, జలవిద్యుత్తు వెలుగులందిస్తూ పక్క రాష్ట్రం తమిళనాడుకు కూడా తాగునీరందిస్తోంది. నల్లమలలో శ్రీశైలం ఆనకట్టను రెండు జిల్లాల మద్యన నిర్మిచారు.ఆనకట్ట కుడిగట్టు(కర్నూల్‌జిల్లా), ఎడమగట్టు(మహబూబ్‌నగర్‌ జిల్లా)లో ఉన్నాయి. ఆనకట్ట నిర్మాణానికి కావలసిన భూమిని (సిబ్బంది నివసించడానికి, కార్యాలయాలకోసం) కుడిగట్టున 1468.52ఎకరాలు, ఎడమగట్టున 890ఎకరాలను ప్రభుత్వం సమకూర్చింది. మూడవ పంచవర్ష ప్రణాళిక 1961, 1966మధ్య కాలంలో ఇక్కడ జలవిద్యుత్తు ప్రాజెక్టు ఏర్పాటుకు తీర్మానించారు.భారత తొలిప్రధాని పండిట్‌ జవహర్‌లాల్‌నెహ్రూ 24జూలై1963న శంఖుస్దాపన చేశారు. అప్పుడు మన రాష్ట్రానికి నీలంసంజీవరెడ్డి ముఖ్యమంత్రిగా వున్నారు. ఆనకట్ట నిర్మాణానికి 26.03.1964న ప్లానింగ్‌ కమిషన్‌ నుంచి అనుమతులు లభించాయి. శ్రీశైలం ఆనకట్టకు 200కి.మీ., దూరంలో హైద్రాబాద్‌, మరో రెండు ముఖ్య పట్టణాలు కర్నూల్‌, విజయవాడలు 180, 250 కి.మీటర్ల దూరంలో వున్నాయి. మన దేశంలో కృష్ణానది నాలుక ఆకారంలో 2,58,445 చదరపు కిలోమీటర్లు ప్రవహించే రెండో అతిపెద్దనది. మహారాష్ట్ర, కర్నాటక, అంధ్రప్రదేశ్‌లో 1240 కిలోమీటర్లు ప్రవహిస్తుంది. శ్రీశైలం ప్రాజెక్టుకు ఎగువున 2,06,030చదరపు కిలోమీటర్ల నీటిపరీవాహకం కల్గివుంది.

కృష్ణానదికి 14 ముఖ్యఉపనదులు: కొయిన, ఎర్లా, ఘటప్రభ, మలప్రభ, వర్న, దుద్‌గంగ, భీమ, తుంగభద్ర, డిండి, హాలియ, పెద్దవాగు, మూసి పాలేరు, మున్నేరు ఉపనదులు. కృష్ణానదికి వరదలు ప్రధానంగా జూన్‌, అక్టోబర్‌ మధ్యకాలంలో పశ్చిమ, దక్షిణ ఋతుపవనాల వల్ల అధికంగా వరదనీరు చేరుతుంది. ఆనకట్ట నిర్మాణం పూర్తయిన తర్వాత ఇప్పటి వరకూ రెండు సార్లు భారీగా వరదలు వచ్చాయి. తొలిసారి 15 అక్టోబరు 1998లో అత్యధికంగా 9.80లక్షల క్యూసెక్కుల ప్రవాహం వచ్చింది.రెండోసారి 3అక్టోబర్‌2009లో 23.50లక్షల క్యూసెక్కుల నీరు ప్రవహించింది. 19లక్షల క్యూసెక్కుల నీటిప్రవాహం తట్టుకొనే విధంగా ప్రాజెక్టు నిర్మాణం చేపట్టారు. కాని నాడు ఆనకట్ట నిర్మాణంలో పాల్గొన్న ఇంజనీర్లు, సిబ్బంది కృషి, నైపుణ్యం కారణంగా సామర్థ్యానికి మించి నీటి ప్రవాహం ఉన్నా ఆనకట్ట చెక్కుచెదరలేదు.

కృష్ణానదిపై మూడురాష్ట్రాలో 12పెద్ద ప్రాజెక్టులు నిర్మించారు. మహారాష్ట్రలో నాలుగు, భట్‌గర్‌, ధూమ్‌డ్యాం, కొయిన, ఉజ్జయిని డ్యాం. కర్నాటకలో భద్ర, మలప్రభ, తుంగభద్ర, ఆలమట్టి, నారాయణపూర్‌.ఆంధ్రప్రదేశ్‌లో జూరాల, శ్రీశైలంప్రాజెక్టు, నాగార్జున సాగర్‌, ప్రకాశంబ్యారేజ్‌ ఉన్నాయి.

మాజీ ముఖ్యమంత్రి నీలంసంజీవరెడ్డి జ్ఞాపకార్థం శ్రీశైలం ఆనకట్టను నీలంసంజీవరెడ్డిసాగర్‌ శ్రీశైలంప్రాజెక్టుగా ప్రభుత్వం నామకరణం చేసింది. ఆనకట్ట నిర్మాణం వల్ల ఎగువున 3,574 ఎకరాల తడిభూమి, 89,958 ఎకరాల మెట్టభూమి ముంపునకు గురైంది. మరో 570ఎకరాలు నీటమునిగింది. ఫలితంగా కర్నూలు జిల్లాలో 52గ్రామాలు, మహబూబ్‌నగర్‌ జిల్లాలో 65 గ్రామాలు ముంపునకు గురయ్యాయి.

శ్రీశైలంప్రాజెక్టు ఆధారంగా ఎస్‌.ఆర్‌.బి.సి., ఎస్‌.ఎల్‌.బి.సి., తెలుగు గంగ (తమిళనాడుకు త్రాగునీరందించే), గాలేరు నగరి సుజల స్రవంతి, హంద్రీనీవా సుజల స్రవంతి, వెలిగొండ ప్రాజెక్టు నిర్మించారు.

ఆనకట్ట స్పిల్‌వే 12తూములతో నిర్మించారు.12 రేడియల్‌ క్రస్టుగేట్లు ఒకొక్కటి 60అడుగులు వెడల్పు, 55అడుగులు ఎత్తు కలిగి వున్నాయి.13.20లక్షలక్యూసెక్కుల నీటిసామర్ద్యాన్ని ఈ క్రస్ట్‌గేట్ల ద్వారా దిగువకు విడుదల చేస్తారు. ఒకొక్కగేటునుంచి1.10 లక్షల క్యూసెక్కులు నీరు విడుదల చేయవచ్చు. ఆనకట్టకు రెండు రివర్‌ స్లూయిస్‌ గేట్లు వున్నాయి. క్రస్ట్‌ గేట్ల కన్నాజలాశయంలో నీటిమట్టం తక్కువగా ఉన్నప్పుడు దిగువున నీటి సమస్య ఏర్పడితే ఈస్లూయిస్‌ గేట్లద్వార రోజుకు 35,680 క్యూసెక్కుల నీటిని దిగువకు విడుదల చేయవచ్చు.

ఆనకట్ట రక్షణలో భాగంగ రెండు గ్యాలరీలను నిర్మించారు. ఒకటి పునాది భాగంలో, మరోకటి టోగ్యాలరీ. వీటిద్వార సీపేజ్‌, డై)నేజ్‌లలో నీటివూటను తోడివేస్తూ, ఈప్రాంతంలో అమర్చిన పరికరాల వల్ల ఆనకట్ట ఏమేరకు నీటి ఒత్తిడికి గురౌతుందో తెలుసుకోవచ్చు. తొలత జలాశయం నీటిసామర్ద్యం 308.08 టిఎంసీలు, పూర్తిస్దాయి నీటిమట్టం 885.0 అడుగులు. కాని 1997లో హైడ్రోగ్రాఫిక్స్‌ సర్వే ద్వార నీటిసామర్ద్యం 263.63టిఎంసీలుగా, నీటిమట్టం 885.0 అడుగులుగా నిర్దారించారు.1984లో నిర్మాణం పూర్తికాగా, 1985లో జలాశయంలో తొలిసారిగా పూర్తిస్దాయిలో నీరు చేరింది. ఆనకట్ట కుడిగట్టున నిర్మించిన విద్యుత్తు కేంద్రంలో ఏడు యూనిట్లు ఒకొక్కటి 110మెగావాట్ల సామర్డ్యంతో మొత్తం 770మెగావాట్ల విద్యుత్తు ఉత్పత్తి సామర్ద్యం కల్గివున్నాయి.

ఎడమగట్టున నిర్మించిన భూగర్బజల విద్యుత్తు కేంద్రంలో ఆరు యూనిట్ల ఒకొక్కటి 150 మెగావాట్ల చొప్పున మొత్తం 900మెగావాట్లు విద్యుత్తుఉత్పత్తి సామర్ద్యం ఉంది. ఎపి.జెన్‌కో వారు కుడిఎడమ విద్యుత్తు కేంద్రాలను కలుపుకొని శ్రీశైలం యూనిట్‌గా పిలుస్తారు.శ్రీశైలం ఆనకట్ట నిర్మాణం ఇంజనీరింగ్‌ కుకే ఇంజనీరింగ్‌ నేర్పించిందని ప్రపంచ పేరుగడించింది.ప్రస్తుతం ఆనకట్ట రక్షణ బాధ్యతలను ప్రభుత్వం రాష్ట్ర ప్రత్యేక రక్షణ దళం (ఎస్‌.పి.ఎఫ్‌)కు అప్పగించారు. మూడు షిఫ్టులలో సిబ్బంది విధులు నిర్వహిస్తుంటారు.శ్రీశైలం ఆనకట్టకు ఎగువున జూరాల 180 కిలోమీటర్ల దూరంలో ఉంది. శ్రీశైలం జలాశయం 180కి.మీ.విస్తీర్ణం కాగా రోజు కొలమానం మరో ఏడు కిలోమీటర్లు అదనం. ఆనకట్ట దిగువున నాగార్జున సాగర్‌ ప్రాజెక్టు 90 కి.మీటర్ల దూరంలో ఉంది. నల్లమలలో కొండల మధ్యన ప్రవహిస్తున్న కృష్ణానది రాష్ట్రానికి సాగు, తాగునీరుతో పాటు, జలవిద్యుత్తు వెలుగులు అందించడం ఒక ఎత్తయితే, అడవిలో వన్యప్రాణులకు నీటివనరులను అందిస్తూ, పచ్చదనంతో మానవాళి మనుగడకు దోహదపడుతోంది.

ఎల్లెల్సీ

జిల్లాలో ప్రధాన సాగునీటి వనరు తుంగభద్ర దిగువ కాలువ (ఎల్లెల్సీ). ఆదోని, ఆలూరు, ఎమ్మిగనూరు, మంత్రాలయం, కోడుమూరు, కర్నూలు నియోజకవర్గాల పరిధిలో విస్తరించి ఉంది. ఖరీఫ్‌, రబీలో కలిపి 1,51,134 ఎకరాలకు సాగునీరు అందాలి. తుంగభద్ర జలాశయం నుంచి జిల్లాకు 24 టీఎంసీల నీటివాటా ఉంది.

సంజీవయ్య సాగర్‌

గోనెగండ్ల దగ్గర హంద్రీనదిపై ఈ జలాశయం నిర్మించారు. 4.5 టీఎంసీల నీటి సామర్థ్యం. గోనెగండ్ల, కోడుమూరు, కృష్ణగిరి, దేవనకొండ మండలాల్లో 25,488 ఎకరాల ఆయకట్టు ఉంది.

ఆలూరు బ్రాంచి కాలువ (హెచ్చెల్సీ)

ఆలూరు నియోజకవర్గంలో హెచ్చెల్సీ కింద 14,250 ఎకరాలకు సాగునీరు అందాలి. చిప్పగిరి, ఆలూరు, హాలహర్వి గ్రామాలు లబ్ధి పొందుతున్నాయి. హెచ్చెల్సీ నుంచి 0.816 టీఎంసీల నీటిని కేటాయిస్తున్నారు.

గురురాఘవేంద్ర ఎత్తిపోతల పథకం

మంత్రాలయం, ఎమ్మిగనూరు, కోడుమూరు నియోజకవర్గాల్లో 50వేల ఎకరాలకు సాగునీరు ఇవ్వాలని రూ.180 కోట్లతో పథకం చేపట్టారు. తుంగభద్ర నది నుంచి 3.725 టీఎంసీల నీటిని ఎత్తిపోసి 12 జలాశయాల్లో నింపి పంట చేలకు నీటిని సరఫరా చేయాలి. పనులు వివిధ దశల్లో ఉన్నాయి.

కేసీ కాలువ

సుంకేశుల జలాశయం అనుసంధానంగా కడప కర్నూలు కాలువ (కేసీ) 306 కి.మీ పొడవున ఉంది. కడప జిల్లాలో 2,65,628 ఎకరాలకు, కర్నూలు జిల్లాలో 1,73,587 ఎకరాలకు కేసీ నీటిని ఇవ్వాలి.

తెలుగు గంగ

పోతిరెడ్డిపాడు రెగ్యులేటర్‌ బ్యాలెన్సింగ్‌ రిజర్వాయరుకు 11.75 టీఎంసీల నీటిని మళ్లించి 65,304 ఎకరాలకు సాగునీరు, నంద్యాల, చెన్నైలకు తాగునీరు అందిస్తున్నారు.

ఎస్‌ఆర్‌బీసీ

భానకచర్ల రెగ్యులేటర్‌ నుంచి ఎస్‌ఆర్‌బీసీ కాలువకు నీటిని మళ్లించి 65వేల హెక్టార్లకు సాగునీరు ఇస్తున్నారు. ఇదే కాలువ ఆధారంగా గోరకల్లు బ్యాలెన్సింగ్‌ రిజర్వాయరు, అవుకు రిజర్వాయరు వంటి పనులు చేపట్టారు.

హంద్రీనీవా

నందికొట్కూరు మాల్యాల దగ్గర ఎత్తిపోతల పథకం నిర్మించి శ్రీశైలం జలాశయం ఉపరితలంలో 40 టీఎంసీల నీటిని ఎత్తిపోసి కర్నూలు, అనంతపురం, చిత్తూరు జిల్లాల్లో 6.025 లక్షల ఎకరాలకు సాగునీరు, ఆయా గ్రామాలకు తాగునీరు ఇవ్వాలన్నది లక్ష్యం.

ఆధారము: ఈనాడు

నదులు

తుంగభద్ర: తుంగభద్ర నది కౌతాళం మండలం మేళగనూరు గ్రామం వద్ద కర్నూలు జిల్లాలోకి ప్రవేశిస్తుంది. కొత్తపల్లి మండలం సంఘమేశ్వరం వద్ద కలుస్తోంది. నదీపై 20 ఎత్తిపోత్తల పథకాలు నిర్మించారు. సుమారు లక్ష ఎకరాలకు సాగునీరు, జిల్లాలోని 171 గ్రామాలకు తాగునీరందుతోంది. 2008లో తుంగభద్ర పుష్కరాలు నిర్వహించారు. దాదాపు 4లక్షల మంది భక్తులు పుష్కర స్నానాలు చేశారు. ప్రతి 12ఏళ్లకోసారి పుష్కరాలు నిర్వహస్తారు. తుంగభద్రనది ఉగ్ర రూపానికి 1992, 2009లో వరదలు వచ్చినప్పుడు దాదాపు 37 గ్రామాలు ముంపునకుగురై భారీ ఆస్తినష్టం వాటిల్లింది. మంత్రాలయం, నాగలదిన్నె, గుండ్రేవుల, నదికైరవవాడి, మేళగనూరు, తదితర గ్రామాలు నష్టాపోయి.

కృష్ణా నది: జురాల ప్రాజెక్టు వద్ద కర్నూలు జిల్లాలో ప్రవేశిస్తోంది. అలంపూరు నుంచి సంఘమేశ్వరం వద్ద కలుస్తుంది. పోతిరెడ్డిపాడు, గంగ కాలువల కింద 3లక్షల ఎకరాల ఆయకట్టుకు సాగునీరు అందిస్తున్నారు. 68 గ్రామాలకు మంచినీటి వసతికల్పించారు. కృష్ణా నది పుష్కరాలు 2002లో వచ్చాయి. 2009లో వచ్చిన వరదలకు వెలుగోడు, నందికోట్కూరు మండలల్లోని కొన్ని గ్రామాలు నీటమునిగాయి.

కుందూ నది: ఈ నది వెలుగొడు వద్ద పుట్టి నంద్యాల గుండా పెన్నానదిలో కలుస్తోంది. దాదాపు లక్ష ఎకరాలకు పెన్నా నది నుంచి నీటి వసతి ఉంది. అనంతపురం, కడప జిల్లాల వరకు నది విస్తరించి ఉంది. 61 గ్రామాలకు తాగునీటి సదుపాయం ఉంది.

హంద్రీ నది: మద్దికెర, పత్తికొండ మధ్యన వంకలో పుట్టి ఆ తర్వాత వాగులన్ని కలిసి నదిగా ఏర్పడింది. కర్నూలులోని సంఘమేశ్వరం వద్ద కృష్ణా నదిలో కలిసిపోతోంది. గాజులదిన్నె ప్రాజక్టుద్వారా సాగునీరు నిల్వచేసి, 54372 ఎకరాలు సాగుచేస్తారు. మూడు ఎత్తి పోత్తల పథకాలు ఉన్నాయి. 70 గ్రామాల ప్రజలకు తాగునీటి వసతి ఉంది. 2009లో వచ్చిన వరదలతో 8 గ్రామాలు నీట మునిగాయి.

గుండ్లకమ్మ వాగు: జిల్లాలోని నల్లమల్ల అడవులల్లోని నల్లకాలువలో పుట్టి మర్కాపురం వద్ద ప్రకాశం జిల్లా సరిహద్దులో కలుస్తోంది. ఎక్కువగా ప్రకాశం జిల్లాకు సాగునీరందిస్తోంది. కండలేరు, సోమశిల ప్రాజక్టులు దీని కింద ఉన్నాయి.

ఆధారము: ఈనాడు

3.0080941869
మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు