పంచుకోండి
వ్యూస్
  • స్థితి: సవరణ కు సిద్ధం

గుంటూరు

ఈ పేజిలో గుంటూరు జిల్లాకి సంబంధించిన వ్యవసాయ సమాచారం అందుబాటులో ఉంటుంది.

నీటి పారుదల

గుంటూరు జిల్లాకు ప్రధాన నీటి వనరు కృష్ణానది. జిల్లాలోని రెండు ప్రధాన ప్రాంతాలకూ కృష్ణమ్మ నీరే ఆధారం. డెల్టా ప్రాంతంలో బ్రిటిష్‌ హయాంలో రూపుదిద్దుకున్న కాల్వలు ఈ ప్రాంతాన్ని సస్యశ్యామలం చేశాయి. స్వాతంత్య్రం వచ్చాక నిర్మించిన మానవ నిర్మిత మహాసాగరం నాగార్జున సాగర్‌ డ్యాం పల్నాడు ప్రాంతంలోని లక్షలాది ఎకరాలను తడుపుతూ రైతు లోగిళ్లలో కాంతిని నింపుతోంది. ఆయకట్టు చివరి ప్రాంతాలు, నీటివసతి అంతగా లేని భూములకు చిన్నాచితక ఎత్తిపోతల పథకాలు నీరందిస్తున్నాయి.

పచ్చని పంటల పశ్చిమ డెల్టా

ఒకప్పుడు బీడుభూములను తలపించిన డెల్టా ప్రాంతం ఇప్పుడు పచ్చని పంటలతో సస్యశ్యామలమయింది. దీనికి కారణం... సర్‌ ఆర్ధర్‌ కాటన్‌ 150 ఏళ్ల క్రితం కృష్ణా నదిపై విజయవాడ దగ్గర నిర్మించిన ఆనకట్టే. తర్వాత అది బ్యారేజిగా మారింది. వీటి నిర్మాణాలతోనే తెనాలి డివిజన్‌లోని కృష్ణా పశ్చిమ డెల్టా ప్రాంత ప్రజల జీవన ఆధారం మారిపోయింది. ఎందరో బ్రిటిష్‌ సాంకేతిక నిపుణులతో డెల్టా కాల్వలు రూపుదిద్దుకున్నాయి. మొదట 5.8 లక్షల ఎకరాలకు సాగునీరందించేందుకు రూపుదిద్దుకున్న కృష్ణా ఆనకట్ట క్రమంగా పెరిగి సాగు విస్తీర్ణానికి అనుగుణంగా మారిపోయింది. 1894లో ఆనకట్ట ఎత్తును మరో 3 అడుగులకు, 1925లో ఆరడుగులకు పెంచి, నీటి నిల్వకు గేట్లు కూడా నిర్మించారు. దీంతో సాగు విస్తీర్ణం 13.2 లక్షల ఎకరాలకు పెరిగింది. ఈ బ్యారేజి నుంచి ప్రధానంగా ఏడు కాల్వలను గుంటూరు జిల్లాలో సాగుకోసం రూపొందించారు. ఈ కాల్వల ద్వారా ప్రస్తుతం మాగాణి ప్రాంతమే 5.71 లక్షల ఎకరాల్లో వరి సాగవుతోంది. దీనిలో 4.99 లక్షల ఎకరాలు గుంటూరు జిల్లాలో ఉంటే, మిగిలిన ప్రాంతం ప్రకాశం జిల్లాలో ఉంది.

సాగునీరందిస్తున్న కాల్వలు

ప్రకాశం బ్యారేజి నుంచి మొదలయ్యే ప్రధాన కాల్వ దుగ్గిరాల వరకు వస్తుంది. అక్కడినుంచి ఆరు కాల్వలుగా చీలి, పశ్చిమ డెల్టాలో సాగునీటిని అందిస్తున్నాయి. వీటిలో ప్రధానంగా హైలెవల్‌ ఛానల్‌, తూర్పుకాల్వ, నిజాంపట్నం కాల్వ, పశ్చిమ కాల్వ, కృష్ణా పశ్చిమ బ్యాంకు కెనాల్‌, కొమ్మమూరు కాల్వలు సాగునీటిని అందిస్తున్నాయి. అయితే వీటిలో కొమ్మమూరు కాల్వకు సాగునీటిని అందించటంతోపాటు ఒక ప్రత్యేకత కూడా ఉంది. దీని నుంచి ప్రకాశం జిల్లాకు పడవల ద్వారా జల రవాణా కూడా ఉండేది.

ఏ ప్రాంతాలకు నీరందిస్తున్నాయంటే!

  • మెయిన్‌ కెనాల్‌ సీతానగరం నుంచి దుగ్గిరాల మధ్య దుగ్గిరాల, మంగళగిరి, తాడేపల్లి మండలాల్లో 22,172 ఎకరాలకు సాగునీరందిస్తోంది.
  • హైలెవల్‌ ఛానల్‌ దుగ్గిరాల నుంచి కొద్దిదూరం వెళ్లే కాల్వ ఒక్క దుగ్గిరాల ప్రాంతంలోనే 26,416 ఎకరాలకు నీరందిస్తోంది.
  • తూర్పుకాల్వ సీతానగరం మొదలుకుని పి.వి.పాలెం మండలం వరకు మధ్యలో దుగ్గిరాల, తెనాలి, అమృతలూరు, పి.వి.పాలెం మండలాల్లో 53,992 ఎకరాలకు సాగునీరందుతోంది.
  • పశ్చిమ కాల్వ కూడా తూర్పుకాల్వకు సమాంతరంగా వెళుతూ ఈ మండలాలతో పాటు చుండూరు, పొన్నూరు మండలాల్లో కొంత భాగం వరకు 27,588 ఎకరాల విస్తీర్ణంలో నీరందిస్తోంది.
  • నిజాంపట్నం కాల్వ కూడా తూర్పు, పశ్చిమ కాల్వల మధ్యనుంచి వీటితోపాటే సమాంతరంగా వెళుతుంది. అయితే దుగ్గిరాల మొదలుకుని నిజాంపట్నం వరకు వెళ్లే ఈ కాల్వ సాగునీటితోపాటు, నిజాంపట్నం ప్రాంతానికి తాగునీటినికూడా అందిస్తోంది. మొత్తంమీద 22,124 ఎకరాలకు సాగునీరందుతోంది.
  • కృష్ణా పశ్చిమ బ్యాంకు కెనాల్‌ దుగ్గిరాల వరకు రాకుండా మెయిన్‌ కెనాల్‌కు 12వ కి.మీటరు దగ్గరే చీలి రేపల్లె మండలం లంకెవానిదిబ్బ దగ్గర సముద్రంలో కలుస్తుంది. దుగ్గిరాల, కొల్లిపర, కొల్లూరు, వేమూరు, భట్టిప్రోలు, రేపల్లె, చెరుకుపల్లి, నగరం, నిజాంపట్నం మండలాల్లో 1,55,344 ఎకరాలకు సాగునీటిని అందిస్తోంది.
  • కొమ్మమూరు కాల్వ దుగ్గిరాల నుంచి చీలి ప్రకాశం జిల్లా చినగంజాం వరకు వెళుతుంది. దీని ద్వారా దుగ్గిరాల, తెనాలి, చుండూరు, పొన్నూరు, కర్లపాలెం, బాపట్ల మండలాల పరిధిలో 1,91,597 ఎకరాలకు సాగునీరు అందుతోంది. ఈ కాల్వ నుంచి మొత్తం 2,63,717 ఎకరాలకు నీరందుతుంటే, దీనిలో 1,91,597 ఎకరాలు మాత్రమే జిల్లాలో ఉంది.

పల్నాడు వరప్రదాయిని సాగర్‌

జిల్లాలోని పల్నాడు ప్రాంతంలో నాగార్జునసాగర్‌ కుడి ప్రధాన కాల్వ కింద పంటలు సాగు చేస్తారు. ప్రధానంగా వరి పంట సాగవుతుంది. కుడికాల్వ పొడవు 126 మైళ్లు. 0వ మైలు నుంచి 83వ మైలు వరకూ మాచర్ల, గురజాల, నరసరావుపేట, వినుకొండ, చిలకలూరిపేట, సత్తెనపల్లి, పెదకూరపాడు నియోజకవర్గాల రైతులు సాగర్‌ జలాలతో పంటలు సాగుచేస్తారు. జిల్లాలోని నరసరావుపేట, మాచర్ల, గురజాల, చిలకలూరిపేట, వినుకొండ, సత్తెనపల్లి, పెదకూరపాడు నియెజకవర్గాల్లో ప్రధాన కుడి కాల్వ (నాగార్జున సాగర్‌ జవహర్‌లాల్‌ నెహ్రూ రైట్‌ కెనాల్‌) కింద గుంటూరు బ్రాంచి కెనాల్‌, బెల్లంకొండ బ్రాంచి కెనాల్‌, అద్దంకి బ్రాంచి కెనాల్‌, పెదనందిపాడు బ్రాంచి కెనాల్‌, పమిడిపాడు బ్రాంచి కెనాల్స్‌ ద్వారా మేజరు కాలువలకు, వాటి నుంచి మైనరు కాలువల ద్వారా సాగర్‌ జలాలు పంట భూములకు చేరుతున్నాయి.

అతి పెద్ద చెరువు దొండపాడు

వినుకొండ నియోజకవర్గంలో చెరువులు కొన్ని గ్రామాల్లో సాగుకు ఉపకరిస్తున్నాయి. ఇందులో ప్రధానమైన వాటిలో దొండపాడు ఒకటి. జిల్లాలో అతిపెద్ద చెరువు. కొండల మధ్య సహజ నీటితోపాటు సాగర్‌ కాల్వల సీపేజీ నీరు అందులో చేరుతోంది. ఏడాది పొడవునా నీరు ఉంటుంది. సుమారు వెయ్యి ఎకరాలకు ఆయకట్టు సాగవుతుంది. ఆ తరువాత పెదకంచర్ల చెరువు ముఖ్యమైన వాటిలో ఒకటి. సుమారు 1500 ఎకరాలకు సాగునీరు సరఫరా అవుతోంది. కొంకేరు వాగునీరు చేరుతోంది. రెండేళ్ల క్రితం సుమారు కోటిన్నర రూపాయల ఖర్చుతో అభివృద్ధి పనులు చేశారు. ఈపూరు చెరువు కొండల అంచున ఉంది. దీని ద్వారా 500 ఎకరాలు సాగు చేస్తున్నారు. ఏడాది పొడవునా నీరు నిల్వ ఉంటుంది. కెనాల్స్‌ సీపేజీ నీరు చెరువుకు చేరుతోంది. ఇవి కాకుండా నియోజకవర్గంలో మరో 50 చెరువులు ఉన్నాయి. ఈ నియోజకవర్గంలో 16 ఎత్తిపోతల పథకాలు ఉన్నాయి. వాటి ద్వారా 10వేల ఎకరాల ఆయకట్టు సాగవుతోంది. గుండ్లకమ్మ, కొంకేరు వాగుపైన ఎక్కువ సంఖ్యలో ఉన్నాయి. మళ్లింపు పథకాలు సేద్యానికి ఉపకరిస్తున్నాయి.

ఆధారము: ఈనాడు

ప్రధాన పంటలు

కృష్ణా పశ్చిమ డెల్టా పరిధిలోని ఆయకట్టులో మాగాణి, మెట్ట భూములున్నాయి. మాగాణిలో 4.99 లక్షల ఎకరాల్లో ఖరీఫ్‌ వరి ఏటా సాగవుతోంది. ఈ విస్తీర్ణంలోనే రబీలో 2.5 లక్షల ఎకరాల వరకు మొక్కజొన్న, మినుము, వేరుశనగ పంటలు పండుతున్నాయి. మినుము పంట అమృతలూరు, చుండూరు, రేపల్లె, నగరం మండలాల్లో సాగులో ఉంటే, చెరుకుపల్లి, బాపట్ల, పిట్టలవానిపాలెం, కర్లపాలెం మండలాల్లో వేరుశనగ సాగవుతోంది. ఇదికాక ప్రధానంగా కృష్ణానది పరివాహక ప్రాంతంలో తాడేపల్లి మొదలుకుని దుగ్గిరాల, కొల్లిపర, మంగళగిరి, కొల్లూరు, భట్టిప్రోలు, రేపల్లె మండలాల్లో సుమారు లక్ష ఎకరాల వరకు వాణిజ్య పంటలు పండే మెట్ట భూములున్నాయి. ఈ ప్రాంతంలో అరటి 28వేల ఎకరాల్లో, మరో 21వేల ఎకరాల్లో పసుపు, కంద 12వేల ఎకరాల్లో, తమలపాకు 600 ఎకరాల్లో సాగువుతోంది. నిమ్మ తోటలు మరో 2500 ఎకరాల్లో, కూరగాయలు 5600 ఎకరాల్లో, మిగిలిన పంటలు మరో 30వేల ఎకరాల్లో సాగవుతున్నాయి. వీటిలో అరటి, కంద, పసుపు పంటలు అన్ని మండలాల్లో పండిస్తుంటే, తమలపాకు కొల్లూరు, భట్టిప్రోలు, పొన్నూరు మండలాల్లోనే ఎక్కువగా సాగు చేస్తున్నారు. మాగాణి ప్రాంతం ఎక్కువ శాతం కాల్వల ఆధారంగానే సాగవుతుంటే, సుమారు 80వేల ఎకరాల్లో వరి బోర్ల కింద కూడా సాగు చేస్తున్నారు. మెట్ట పంటలు మాత్రం పూర్తిగా భూగర్భ జలాలపై ఆధారపడే పండిస్తుంటారు.

నాగార్జున సాగర్‌ కుడి కాల్వ కింద గుంటూరు, ప్రకాశం జిల్లాల పరిధిలో 11,17,760 ఎకరాల్లో వరి, పత్తి, మిర్చి, పసుపు, మొక్కజొన్న తదితర పంటలు పండిస్తున్నారు. నరసరావుపేట డివిజనులో వెల్దుర్తి, మాచర్ల, నకరికల్లు, బొల్లాపల్లి మండలాల్లో బోర్ల కింద వరి, పత్తి, మిర్చి పంటలు సాగు చేస్తారు. కుడికాల్వ పరిధిలో మాచర్ల, వినుకొండ, గురజాల, సత్తెనపల్లి, పెదకూరపాడు, నరసరావుపేట, చిలకలూరిపేట నియోజకవర్గాల్లో 4,21,313 ఎకరాల్లో వరి సాగవుతుంది. 2,50,967 ఎకరాల్లో మిర్చి, పత్తి, కంది తదితర వాణిజ్య పంటలు పండిస్తున్నారు. చిలకలూరిపేట నియోజకవర్గంలో నాదెండ్ల, యడ్లపాడు, చిలకలూరిపేట మండలాల్లో కుప్పగంజి, ఓగేరు, పసుపులేరు వాగులపై ఎత్తిపోతల పథకాల ద్వారా అత్యధిక శాతం వాణిజ్య పంటల్ని సాగు చేస్తున్నారు.

గుంటూరు జిల్లాలో వ్యవసాయ, వ్యవసాయేతర భూములు, వాటిల్లో రకాలు, విస్తీర్ణం వివరాలు

  • జిల్లా భౌగోళిక పరిస్థితుల దృష్ట్యా నల్లరేగడి, ఎర్ర, ఇసుక నేలల విస్తీర్ణం 11,39,100 హెక్టార్లు
  • అటవీ భూములు 1.62 లక్షల హెక్టార్లు
  • వేస్ట్‌ ల్యాండ్‌ 34 వేల హెక్టార్లు
  • వ్యవసాయేతర భూములు 1.51 లక్షల హెక్టార్లు
  • పశువులకు మేత సాగవుతున్న భూములు 19 వేల హెక్టార్లు
  • చెట్లు, ఇతరత్రా భూములు 30 వేల హెక్టార్లు
  • సాగు యోగ్యమైనా సాగులోలేని భూములు 31 వేల హెకార్లు
  • గ్రామీణ ప్రాంతాల్లో ఇతరత్రా వినియోగంలో ఉన్న భూములు 49,592 హెక్టార్లు
  • ప్రస్తుతం సేద్యంలో ఉన్న భూములు 6,11,207 హెక్టార్లు
  • ఇందులో నల్లరేగడి నేలలు 72 శాతం
  • ఎర్రరేగడి నేలలు 17 శాతం
  • ఇసుక నేలలు 9 శాతం
  • లంక భూములు 2 శాతం
  • వర్షాధారం కింద ఉన్న పంట విస్తీర్ణం 2,24,307 హెక్టార్లు
  • నీటిపారుదల కింద ఉన్న భూములు 3,75,896 హెక్టార్లు
  • పంటల విస్తీర్ణం ఖరీఫ్‌ 2012 లెక్కల ప్రకారం 5,65,239 హెక్టార్లు
  • వరి 2,63,012 హెక్టార్లు
  • జొన్న 48 హెక్టార్లు
  • మొక్కజొన్న 709 హెక్టార్లు
  • కంది 24,581 హెక్టార్లు
  • పెసర 3,773 హెక్టార్లు
  • మినుము 598 హెక్టార్లు
  • వేరుశనగ 253 హెక్టార్లు
  • సోయాబీన్‌ 59 హెక్టార్లు
  • ఆవాలు 2,584 హెక్టార్లు
  • ఆముదం 1,622 హెక్టార్లు
  • మిరప 61,347 హెక్టార్లు
  • చెరకు 1,057 హెక్టార్లు
  • పత్తి 1,54,008 హెక్టార్లు
  • పొగాకు 1,930 హెక్టార్లు
  • ఇతరాలు (జనుము, బార్లీ పొగాకు, ఉలవలు, రేగి) 44,546 హెక్టార్లు

గుంటూరు మిర్చియార్డు

గుంటూరు పేరు చెప్పగానే గుర్తొచ్చేది మిర్చి. ఆ మిర్చియే గుంటూరు పేరును విశ్వవ్యాప్తం చేసింది. ఆసియా ఖండంలోనే పెద్ద మిర్చి మార్కెట్‌గా గుర్తింపు పొందిన ఈ యార్డు ఏడాది సుమారు రూ.600 కోట్ల లావాదేవీలు జరుపుతోంది. సుమారు 12 వేల మంది శ్రామికులు ప్రత్యక్షంగా, మరో 12 వేల మంది పరోక్షంగా ఉపాధి పొందుతున్నారు. అయిదో నెంబర్‌ జాతీయ రహదారి, నరసరావుపేట ప్రధాన రహదారుల మధ్య 50 ఎకరాల స్థలంలో మార్కెట్‌యార్డు ఉంది. మిర్చి క్రయవిక్రయాల ద్వారా యార్డుకు రూ.40 కోట్ల వరకు ఆదాయం సమకూరుతోంది. 1950లో మార్కెట్‌ సెంటర్‌ సమీపంలోని ఏలూరు బజారులో మిర్చి మార్కెట్‌ మొదలైంది. అనంతరం వ్యాపారస్థాయి పెరగడంతో ఏటుకూరు రోడ్డులో సహకార సంఘాల గోదాములకు మార్కెట్‌ తరలింది. తర్వాత చుట్టుగుంట సెంటర్‌లో మార్కెట్‌ కమిటీ ఆవిర్భవించి విక్రయాలు జరిగాయి. మలేసియా, సింగపూర్‌, థాయ్‌లాండ్‌, బంగ్లాదేశ్‌, శ్రీలంక, పాకిస్థాన్‌ దేశాలకు గుంటూరు నుంచి మిర్చి ఎగుమతులు జరుగుతున్నాయి. 49 ఏళ్ల కిందట రాష్ట్రంలోని భద్రాచలం, ఖమ్మం, నల్గొండ, జిల్లాలోని పల్నాడు ప్రాంతంలో రెంటచింతల, గురజాల తదితర ప్రాంతాల్లో మిర్చి సాగయ్యేది. మిర్చి యార్డులో లావాదేవీలు పెరిగిన తర్వాత సాగు విస్తీర్ణం గణనీయంగా పెరిగింది.

మిరప గుంటూరు సన్నానికి ఖండాంతర ఖ్యాతి

2011 జనవరిలో మిరప గుంటూరు సన్నానికి ఖండాంతర ఖ్యాతి లభించింది. జియోగ్రాఫికల్‌ ఇండికేషన్‌ (జీఐ) గుర్తింపు పొందింది. ఇందుకోసం కృషి చేసింది సుగంధ ద్రవ్యాల బోర్డు. 1962లో విడుదల చేసిన ఈ విత్తన రకానికి మరో పేరు భాగ్యలక్ష్మి. నగరానికి సమీపంలోని లాం పరిశోధన స్థానంలో రూపుదిద్దుకుంది. 1922లో ఈ పరిశోధన స్థానం ఏర్పాటైంది. 1948 నుంచి మిరపపై ప్రయోగాలు ప్రారంభించింది. ఇప్పటి వరకు ఈ కేంద్రం 13 రకాల మిరప విత్తనాలను విడుదల చేసింది. అన్నీ దేశవాళీ రకాలే. వీటిలో అయిదు అంతర్జాతీయ స్థాయి రకాలు. అవి జి4 (భాగ్యలక్ష్మి), జి5 (ఆంధ్రజ్యోతి), 206 (ప్రకాష్‌), క్లాస్‌-235 (భాస్కర్‌), ఎల్‌సీఏ 334 (ప్రశాంత్‌).

పొగాకుబోర్డు

గుంటూరులో పొగాకు బోర్డును 1976లో స్థాపించారు. రైతు సంక్షేమమే ధ్యేయంగా దీనిని నెలకొల్పారు. మొదట్లో కేవలం రైతుల రిజిస్ట్రేషన్‌ మాత్రమే జరిగేది. అప్పట్లో పొగాకును ప్రవేటు సంస్థలు కొనుగోలు చేసేవి. సరిగ్గా డబ్బులు చెల్లించకపోవడంతో రైతులు ఇబ్బందులు పడేవారు. రెండు, మూడు సంవత్సరాల వరకు చెల్లింపులు సరిగ్గా జరిగేవి కాదు. రఘురామయ్య మంత్రిగా ఉన్న సమయంలో కేంద్ర కార్యాలయం ద్వారా ఆక్షన్‌ ప్లాట్‌ఫారాలు ఏర్పాటు చేయించారు. వాటి ద్వారా పొగాకు కొనుగోలు చేయించేందుకు అన్ని ఏర్పాట్లు జరిగాయి. రైతులు నష్టపోకుండా కొనుగోలు జరిగిన 40 రోజుల్లోగానే సొమ్ము ఇప్పించారు. 1985లో పూర్తిస్థాయిలో ఆక్షన్‌ ప్లాట్‌ఫారాలు ఏర్పాటు చేశారు. మొదట్లో కేవలం 15 మిలియన్‌ కిలోల పంట పండేది. ప్రస్తుతం దానిని 170 మిలియన్‌ కిలోలకు పెంచారు. ప్రస్తుతం 30 ఆక్షన్‌ ప్లాట్‌ఫారాలు ఉన్నాయి. నందిగామ, భద్రాచలం, గోదావరి జిల్లాలు, పొదిలి, కలిగిరి, కందుకూరు, వెల్లంపల్లి ప్రాంతాల్లో ఆక్షన్‌ ప్లాట్‌ఫారాలు ఏర్పాటు చేశారు. బోర్డు ఏర్పాటు సమయంలో ఎంతమంది ఉద్యోగులు ఉన్నారో ఇప్పటికీ అంతే మంది ఉన్నారు. ఉద్యోగుల సంఖ్య 750 మంది.

కోస్తాలో ఏకైక పసుపు యార్డు

దుగ్గిరాల వ్యవసాయ మార్కెట్‌ యార్డు కోస్తా జిల్లాల్లోనే ఉన్న ఏకైక పసుపు మార్కెట్‌ యార్డు. 1979 వరకూ తెనాలి యార్డులో కలిసి ఉండి 1980లో వేరుపడింది. దేశంలో ఎక్కడా లేని విధంగా కొన్ని ప్రత్యేకతలు దుగ్గిరాల యార్డుకు ఉన్నాయి. రైతులు పసుపు తెచ్చిన తర్వాత ఇక్కడ అమ్మకానికి పోస్తారు. వాటిని రైతు సమక్షంలో వేలం వేస్తారు. వ్యాపారులు వేలంలో సరుకు కొన్న తర్వాత కూడా ఆ ధర నచ్చకపోతే అమ్ముకోకుండా అలాగే పెట్టుకుని, మంచి ధర వచ్చాక అమ్ముకునే అవకాశం రైతుకు ఉంది. దీనికి తోడు ఏ రోజు కొన్న సరుకుకు అదే రోజు అక్కడే నగదు చెల్లించేస్తారు. ఏడాది పొడవునా యార్డులో క్రయవిక్రయాలు జరుగుతుంటాయి. సాలీనా 2.50 లక్షల బస్తాల పసుపు ఇక్కడకు వస్తుంది. కడపలో మార్కెట్‌ యార్డు ఉన్నా కూడా ఎక్కువ మంది రైతులు ఇక్కడకే సరుకు తెస్తారు. అక్కడ కమీషన్‌ వ్యాపారం, నగదు కూడా 15 రోజులు తర్వాత ఇచ్చే పరిస్థితులు ఉండటంతో కడప, కర్నూలు నుంచి కూడా సరుకు తెస్తారు. కడప, టేకూరుపేట, దుగ్గిరాల, సాంగ్లీ రకాలు ఇక్కడకు వస్తూంటాయి. యార్డుకు సరుకు  తెచ్చే రైతులకు ఉచిత భోజన వసతి ఇక్కడ ఉంది. సరుకు అమ్ముకున్న వారికే ఈ పథకం వర్తిస్తుంది.

కరివేపాకు సాగుకు ప్రసిద్ధి పెదవడ్లపూడి

మంగళగిరి మండలం పెదవడ్లపూడి కరివేపాకు సాగుకు ప్రసిద్ధి. మూడు దశాబ్దాలుగా ఇక్కడ కరివేపాకు పంటను రైతులు సాగు చేస్తున్నారు. చెన్నై, హైదరాబాద్‌, విశాఖపట్టణంతోపాటు సౌదీఅరేబియా, దుబాయ్‌, లండన్‌ వంటి దేశాలకు కరివేపాకును ఇక్కడి నుంచి ఎగుమతి చేస్తున్నారు. తుఫాన్లు, అధిక వర్షాల ప్రభావం ఈ పంటపై పెద్దగా ఉండదు. అధిక వర్షాలు పడినా వెంటనే నీరు బయటకు వెళ్లే విధంగా కాల్వ విధానం ఉంటే ఎలాంటి నష్టభయం ఉండదు.

రాష్ట్ర వ్యాప్తంగా ఇక్కడి నుంచే విత్తనాలు

కరివేపాకు విత్తనాలు రాష్ట్ర వ్యాప్తంగా సరఫరా చేసేది పెదవడ్లపూడి నుంచే. రాష్ట్రంలోని పలు ప్రాంతాల నుంచి విత్తనాలు సేకరించిన వారు విక్రయించేందుకు పెదవడ్లపూడి వస్తారు. ఏటా జూన్‌ మొదటి వారం నుంచి విత్తనాల వ్యాపారం మొదలవుతుంది. డిసెంబరు నెలాఖరు వరకూ విత్తనాలు మార్కెట్‌కు వస్తూనే ఉంటాయి.

ఏడాదికి మూడు కోతలు

కరివేపాకు ఒకసారి వేస్తే దాదాపు 20, 30 ఏళ్ల వరకూ కోతలు వస్తూనే ఉంటాయి. కలుపు తీస్తూ, ఎరువులు, పురుగుమందులు పిచికారీ చేస్తూ, వాతావరణాన్ని బట్టి నీటి తడులు ఇవ్వాలి. కరివేపాకు వేసిన తొలి ఏడాది మాత్రం రెండు కోతలే వస్తాయి. ఆ తరువాత ఏడాది నుంచి మూడు కోతలు వస్తాయి.

మూడు కోతలపై రూ.లక్ష వరకూ ఆదాయం

అక్టోబరు నుంచి మార్చి వరకూ ఆరు నెలలపాటు కరివేపాకుకు మంచి ధర లభిస్తుంది. ఎకరాకు కనిష్టంగా రూ.40 వేలు నుంచి గరిష్టంగా రూ.80 వేలు వరకూ ధర పలుకుతుంది. ఎకరాకు 6 నుంచి 7 టన్నుల దిగుబడి వస్తుంది. ఏప్రిల్‌ నుంచి సెప్టెంబరు వరకూ ధర కొంత తక్కువగా ఉంటుంది. వర్షాలు మొదలైన తరువాత కరివేపాకు వేగంగా పెరుగుతుంది. దీనికితోడు చీడ, పీడలు కూడా ఎక్కువగా ఆశిస్తాయి. దీంతో నాణ్యత తగ్గుతుంది. అందుకే ధర పెద్దగా ఉండదు.

ఆధారము: ఈనాడు

ప్రాజెక్టులు

మానవ నిర్మిత మహా'సాగరం'

ఎంతో మంది ఉద్యమాల ఫలితమే నాగార్జునసాగర్‌ ప్రాజెక్టు నిర్మాణం. ఎందరో మహానుభావుల త్యాగఫలితం కారణంగా నాగార్జునసాగర్‌ రూపకల్పన చేసుకుంది. ప్రాజెక్టు శంకుస్థాపన 1955, డిసెంబరు 10న జరిగింది. ఈ ప్రాజెక్టు కోసం ముక్త్యాల రాజా చేసిన కృషి అమోఘం. ముక్త్యాల రాజాను ప్రాజెక్టుల ప్రసాద్‌గా గౌరవభావంతో ప్రశంసించారు. నాగార్జునసాగర్‌ ప్రాజెక్టు ప్రారంభించినప్పుడే ఎడమ కాలువకు 11 వేల క్యూసెక్కులు, కుడి కాలువకు 21 వేల క్యూసెక్కుల పరిమాణం ఉండే విధంగా ఏర్పాటు చేశారు. గత 40 సంవత్సరాలుగా 10 వేల క్యూసెక్కుల నీటిని విడుదల చేస్తున్న విషయం తెలిసిందే. 21 వేల సామర్థ్యం ఉన్న కుడి కాలువకు ఆ స్థాయిలో నీటిని వదిలిన దాఖలాలు ఇంతవరకు లేదు. 14 వేల క్యూసెక్కులకు మించి కాలువకు నీటిని విడుదల జరగలేదు. ఆగస్టు 4, 1967లో నాగార్జునసాగర్‌ కాలువకు నీటిని విడుదల చేశారు. 11వ పంచవర్ష ప్రణాళికలో నాగార్జునసాగర్‌ ప్రాజెక్టు రెండో దశ పనులను పూర్తిచేసి 21 వేల క్యూసెక్కుల నీటిపరిమాణాన్ని కాలువకు విడుదల చేయాలన్న కల ఇప్పటికీ నెరవేరలేదు. కుడి కాలువ కింద 11 లక్షల ఎకరాల ఆయకట్టుకు సాగునీరు అందుతుంది. అనధికారికంగా మరో 5 లక్షల ఎకరాలకు నీరు ప్రవహిస్తున్నట్లు అంచనా. కుడి కాలువ పరిధిలో గుంటూరు, ప్రకాశం జిల్లాల పరిధిలోని 65 మండలాలకు సాగు, తాగునీరు అందుతుంది.

డ్యాం పూర్తి వివరాలు

1955లో శంకుస్థాపన జరిగిన నాగార్జునసాగర్‌ ప్రాజెక్టు పనులను 1967 ఆగస్టు 4న అప్పటి ప్రధాని ఇందిరాగాంధీ ప్రారంభించారు. ఎడమ వైపునున్న లాల్‌బహదూర్‌కాలువ, కుడి వైపునున్న జవహర్‌కాలువకు సాగునీటిని ఆమె విడుదల చేశారు. నాగార్జునసాగర్‌ డ్యాం నిర్మాణం మొత్తం పూర్తిగా ఎత్త్తెన రాతికట్టడం. మానవ ప్రయత్నానికి అపరూపమైన ప్రతీకగా అది నిలుస్తుంది. నదీగర్భంపై 400 అడుగుల ఎత్తుకు ఎటువంటి యంత్రసాయాలు లేకుండా రాళ్లను, సిమెంటు మోటార్లను ఇతర నిర్మాణ సామగ్రిని మానవ శక్తితో చేర్చారు. స్థానికంగా లభించే సర్వేబాదులను, బోల్టునట్టులతో బిగించి పరంజా తయారు చేసి వాటి ఆధారంగా పనులు చేశారు. 300 అడుగుల ఎత్తు వరకు మానవ శక్తితోనే పరంజాల మీదుగా నిర్మాణ సామగ్రి ఎత్తారు. రెండో దశలో మోనోటవర్‌ క్రేన్‌ను ఉపయోగించి రాళ్లను, సిమెంటు మోటారు, కాంక్రీటు బక్కెట్లను ఎత్తారు. నిర్మాణ సమయంలో ప్రతిరోజూ 15 వేల టన్నుల వరకు నిర్మాణ పదార్థాలు ఉపయోగించారు. మొదట్లో ప్రాజెక్టు అంచనా మౌలికంగా 1960 సెప్టెంబరులో కేంద్ర ప్రభుత్వం రూ. 91.12 కోట్లు వ్యయానికి మంజూరు చేసింది. 1969లో ప్లానింగ్‌ కమిషన్‌ ప్రాజెక్టును సవరించిన అంచనాలను రూ. 163.54 కోట్లు మంజూరు చేసింది. అనంతరం ప్రాజెక్టు పరిధిలో ఎన్నో మార్పులు జరిపి విస్తరించారు. 2005 నవంబరు చివరకు ప్రాజెక్టుపై వెచ్చించిన మొత్తం వ్యయం రూ.1300 కోట్లకు మించలేదు. ఎడమ కాలువకు కింద నల్గొండ, ఖమ్మ, కృష్ణా జిల్లాల్లో మొత్తం 9.76 లక్షల ఎకరాలు కుడి కాలువ కింద 11.18 లక్షల ఎకరాలు సాగులోకి వచ్చాయి. నిర్మాణ వ్యయం పరిశీలిస్తే ఎకరాకు రూ. 6,200 మించలేదు. ప్రస్తుతం భారీ ప్రాజెక్టులు నిర్మించాలన్నా దాని వ్యయం ఎకరాలకు రూ. 80 వేల వరకు అవుతుందని అంచనా. గత 20 ఏళ్ల నుంచి నాగార్జునసాగర్‌ ప్రాజెక్టు పరిశీలిస్తే ఆయకట్టు కింద రూ. 1500 కోట్ల విలువైన పంట రైతుల చేతికొస్తుంది. అదేవిధంగా విద్యుదుత్పాదన ద్వారా ఏడాదికి రూ. 400 కోట్ల ఆదాయం లభిస్తుంది. ప్రస్తుతం రూ. 4,444 కోట్ల ప్రపంచ బ్యాంకు నిధులతో నాగార్జునసాగర్‌ ఆధునికీకరణ పనులు జరుగుతున్నాయి. నాగార్జునసాగర్‌ ప్రాజెక్టుతోపాటు కుడి, ఎడమ కాలువల పూర్తిస్థాయి ఆధునికీకరణ చేయనున్నారు. కట్టల పటిష్టతతోపాటు నీరు ఇంకిపోకుండా సిమెంటు కాంక్రీటు అడుగు భాగంలో వేస్తున్నారు.

ముఖ్య వివరాలు

  • నీరు పొర్లే రాతికట్టడం విభాగం పొడవు (స్పిల్‌వే): 1.545 అడుగులు
  • డ్యాం ఎత్తు: 409 అడుగులు
  • ఎడమ వైపు మట్టి డ్యాం పొడవు: 8,400 అడుగులు
  • కుడి వైపు మట్టి డ్యాం పొడవు: 2,800 అడుగులు
  • స్పిల్‌వే అలుగు మట్టం: 546 అడుగులు
  • స్పిల్‌వే క్రస్టుగేట్లపై మట్టం: 590 అడుగులు
  • క్రస్టుగేట్ల సంఖ్య: 26
  • క్రస్టుగేట్ల పరిమాణం: 45X44 అడుగులు
  • డ్యాంపై రోడ్డు వెడల్పు: 30.75 అడుగులు
  • కుడి కాలువ పొడవు: 203 కి.మీ.
  • ఎడమ కాలువ పొడవు: 179 కి.మీ.

జలాశయం

  • డ్యాం వద్ద పరివాహక విస్తీర్ణం: 2,15,185 చదరపు కి.మీ.
  • పూర్తి జలాశయ మట్టం: 590 అడుగులు
  • నీటిని విడుదల చేయగా కనీస మట్టం: 510 అడుగులు
  • జలాశయ విస్తీర్ణం: 285 చ.కి.మీ. (110 చ.మైళ్లు)

విద్యుదుత్పాదన

  • పైపుల మధ్య మట్టం: 405 అడుగులు
  • పవర్‌ యూనిట్లు 7 (రివర్స్‌బుల్‌) : 100 మెగావాట్లు (ఒక్కొక్కటి)
  • విద్యుదుత్పాదనకు అవసరమైన కనీస జలాశయ మట్టం: 506 అడుగులు
  • రివర్స్‌బుల్‌ యూనిట్‌కి: 495 అడుగులు

ఎన్‌.ఎస్‌.పి. కాల్వల ఆధునికీకరణ

ఎ.పి.ఇ.ఆర్‌.పి.లో భాగంగా 2000-01 సంవత్సరంలో సాగర్‌ ఆధునికీకరణకు నిధులు విడుదలయ్యాయి. డివిజన్‌లో మొదటిసారిగా పనులు ప్రారంభించారు. ఏడు మేజర్లు, వాటి అనుబంధమైన మైనర్‌ కాల్వలను సిమెంటు లైనింగు చేశారు. వీటి కోసం రూ.25.23కోట్లు ఖర్చు చేశారు. ఇనిమెళ్ల, అంగలూరు, పెరుమాళ్లపల్లె, పేరూరిపాడు, దొండపాడు, చీకటీగలపాలెం, పలుకూరు మేజరు కాల్వలు ఇందులో ఉన్నాయి. వినుకొండ, ఈపూరు, బొల్లాపల్లి మండలాలకు మేలు చేకూరింది. సీపేజీ అరికట్టి ఆయకట్టు చివరి భూములకు నీరందించడం ప్రధాన ఉద్దేశం. కొంతమేర ఫలితాలు లభించాయి. ఆటోమేషన్‌ ప్రాజెక్టు కింద మరో రూ.5 కోట్లతో నీటి నియంత్రణలు ఏర్పాటు చేశారు. అవి పూర్తిస్థాయిలో అమల్లోకి రాలేదు. నియోజకవర్గంలో నూజండ్ల మండలం మాత్రమే ఇంకా లైనింగు పనులు చేయలేదు.

డెల్టా జీవనాధారం ప్రకాశం బ్యారేజీ

ఒకప్పుడు బీడుభూములను తలపించిన డెల్టా ప్రాంతం ఇప్పుడు పచ్చని పంటలతో సస్యశ్యామలమయింది. దీనికి కారణం... సర్‌ ఆర్ధర్‌ కాటన్‌ 150 ఏళ్ల క్రితం కృష్ణా నదిపై విజయవాడ దగ్గర నిర్మించిన ఆనకట్టే. తర్వాత అది బ్యారేజిగా మారింది. వీటి నిర్మాణాలతోనే తెనాలి డివిజన్‌లోని కృష్ణా పశ్చిమ డెల్టా ప్రాంత ప్రజల జీవన విధానమే మారిపోయంది. ఎందరో బ్రిటిష్‌ సాంకేతిక నిపుణులతో డెల్టా కాల్వలు రూపుదిద్దుకున్నాయి. మొదట 5.8 లక్షల ఎకరాలకు సాగునీరందించేందుకు రూపుదిద్దుకున్న కృష్ణా ఆనకట్ట క్రమంగా పెరిగిన సాగు విస్తీర్ణానికి అనుగుణంగా మారిపోయింది. 1894లో ఆనకట్ట ఎత్తును మరో 3 అడుగులకు, 1925లో ఆరడుగులకు పెంచి, నీటి నిల్వకు గేట్లు కూడా నిర్మించారు. దీంతో సాగు విస్తీర్ణం 13.2 లక్షల ఎకరాలకు పెరిగింది. ఈ బ్యారేజి నుంచి ప్రధానంగా ఏడు కాల్వలను గుంటూరు జిల్లాలో సాగుకోసం రూపొందించారు. ఈ కాల్వల ద్వారా ప్రస్తుతం మాగాణి ప్రాంతమే 5.71 లక్షల ఎకరాల్లో వరి సాగవుతోంది. దీనిలో 4.99 లక్షల ఎకరాలు గుంటూరు జిల్లాలో ఉంటే, మిగిలిన ప్రాంతం ప్రకాశం జిల్లాలో ఉంది.

పులిచింతల

పెదకూరపాడు నియోజకవర్గ పరిధిలోని బెల్లంకొండ మండల పరిధిలోని పులిచింతల గ్రామం వద్ద కొత్తగా ప్రాజెక్టుని నిర్మిస్తున్నారు. తొలుత దీనిని పులిచింతల ప్రాజెక్టుగా వ్యవహరించినా తదనంతరం కానూరి లక్ష్మణరావు ప్రాజెక్టుగా నామకరణం చేశారు. ప్రకాశం బ్యారేజీకి 85 కిలోమీటర్ల ఎగువన, నాగార్జున సాగర్‌కు 115 కిలోమీటర్ల దిగువన దీనిని నిర్మిస్తున్నారు. గుంటూరు, కృష్ణా, ప్రకాశం, పశ్చిమ గోదావరి జిల్లాల్లో 13.8 లక్షల ఎకరాల ఆయకట్టు స్థిరీకరణ లక్ష్యం. ప్రాజెక్టు వల్ల 24,082 ఎకరాల నివాస ప్రాంతం, 2,859 ఎకరాల అటవీభూమి ముంపునకు గురవుతుంది. దీని నిర్మాణానికి ప్రభుత్వం రూ. 1249 కోట్లు కేటాయించింది. డెల్టాలో రెండోపంటకు సాగునీరు ఇవ్వడానికి నీటి నిల్వ కోసం దీనిని నిర్మిస్తున్నారు. ప్రాజెక్టు నిర్మాణానికి 2004 అక్టోబరు 15న అప్పటి ముఖ్యమంత్రి వై.ఎస్‌.రాజశేఖరరెడ్డి శంకుస్థాపన చేశారు. వై.ఎస్‌. హయాంలో చేపట్టిన జలయజ్ఞంలో తొలిగా పునాది వేసింది ఈ ప్రాజెక్టుకే. ప్రాజెక్టు నిర్మాణ పనులు దాదాపు 45 శాతం పూర్తయ్యాయి. ఈ ప్రాజెక్టు నిర్మాణం పూర్తయితే జిల్లాలోని బెల్లంకొండ, మాచవరం, దాచేపల్లి మండలాల్లోని 15 గ్రామాలు ముంపునకు గురవుతాయి.

డ్యాం నిర్మాణ వివరాలు

  • డ్యాం పొడవు 1289 మీటర్లు
  • స్పిల్‌ వే పొడవు 754.90 మీటర్లు
  • నాన్‌ ఓవర్‌ ఫ్లో డ్యాం ఎడమవైపు 442.60 మీటర్లు, కుడివైపు 91.50మీటర్లు.
  • మొత్తం 24 గేట్లు పెడతారు.
  • పూర్ణ జలాశయ సామర్థ్యం 53.340 మీటర్లు 45.770 టీఎంసీల నీరు నిల్వ ఉంటుంది. నీటివిడుదల కనీసమట్టం 42.670 క్రస్ట్‌లెవల్‌ 36.540 గరిష్ఠ వరద నీటి పరిమాణం 57,700 క్యూసెక్కులు.
  • 120 మెగావాట్ల విద్యుదుత్పత్తి చేయవచ్చు.
  • వరదనీటి 20 లక్షల క్యూసెక్కుల ప్రవాహాన్ని తట్టుకునే రీతిలో దీనిని నిర్మిస్తున్నారు.
  • ప్రాజెక్టుపై గుంటూరు, నల్గొండ జిల్లాలను కలుపుతూ రోడ్డు నిర్మిస్తున్నారు.

పోతార్లంక

వేమూరు నియోజకవర్గంలో ఐదువేల ఎకరాలకు నీరందించేందుకు పోతార్లంక సాగునీటి పథకం నిర్మించారు. ఈ పథకానికి 1997లో శంకుస్థాపన చేశారు 1999లో పూర్తి చేశారు. కొన్ని సంవత్సరాల క్రితం పథకం దెబ్బతింది. పునర్‌నిర్మాణం కోసం రూ. 13.8 కోట్ల నిధులు కేటాయించారు. కానీ పనులు ఇంతవరకు చేపట్టలేదు.

ఆధారము: ఈనాడు

నదులు

ద్వీపకల్పం పడమర నుంచి తూర్పు చివరి వరకు సాగే ప్రస్థానంలో 29 ఉపనదులను తనలో కలుపుకుంటోంది కృష్ణమ్మ. మహాబలేశ్వరంలో పుట్టిన నదీమ తల్లి మహారాష్ట్ర, కర్ణాటక రాష్ట్రాలను సస్యశ్యామలం చేసి మహబూబ్‌నగర్‌ జిల్లా తంగడి వద్ద ఆంధ్రప్రదేశ్‌లోకి ప్రవేశిస్తోంది. జగ్గయ్యపేట మండలంలోని ముక్త్యాల గ్రామానికి మూడు కిలోమీటర్ల ఎగువన కృష్ణాజిల్లాలోకి అడుగిడుతోంది. మొత్తం 125 కి.మీ. మేర ప్రవహించి దివిసీమలోని హంసలదీవి వద్ద బంగాళాఖాతంలో కలుస్తోంది. విజయవాడలోని ప్రకాశం బ్యారేజీ ఆనకట్ట ద్వారా సుమారు 14లక్షల ఎకరాల ఆయకట్టు సస్యశ్యామలమవుతోంది. జిల్లాకు తాగు, సాగు నీటి వనరు కృష్ణానదే. ప్రకాశం బ్యారేజీ వద్ద కృష్ణాడెల్టాను రెండుగా విభజించారు. గుంటూరు ప్రకాశం జిల్లాలకు పశ్చిమ ప్రధాన కాల్వను తాడేపల్లి సీతానగరం వద్ద నిర్మించగా, ఎడమ వైపు విజయవాడను ఆనుకుని కృష్ణా తూర్పు ప్రధాన కాల్వను నిర్మించారు. వీటిద్వారా కృష్ణ, గుంటూరు జిల్లాలే కాకుండా, ప్రకాశం, పశ్చిమగోదావరి జిల్లాల్లో కొంతమేర లబ్ధిపొందుతున్నాయి. కృష్ణా-గుంటూరు జిల్లాలకు మధ్య హద్దుగా ప్రవహించే కృష్ణా ఇరు జిల్లాల మధ్య రవాణా మాధ్యమంగా కూడా ఎంతగానో ఉపయోగపడుతోంది. జిల్లాలోని జగ్గయ్యపేట, నందిగామ, కంచికచర్ల, ఇబ్రహీంపట్నం, పెనమలూరు, తోట్లవల్లూరు, ఘంటసాల, మోపిదేవి, అవనిగడ్డ, కోడూరు, నాగాయలంక మండలాలను తాకతూ కృష్ణానది ప్రవహిస్తుంది. విజయవాడ వద్ద, గుంటూరు జిల్లాలోని అమరావతి క్షేత్రం వద్ద కిలోమీటరు  వెడల్పున అత్యంత విశాలంగా ప్రవహిస్తుంది. జిల్లాలోని వివిధ పరిశ్రమలకు ముఖ్యంగా థర్మల్‌ విద్యుత్‌ కేంద్రానికి ఈ కృష్ణానది నీరే ఆధారం. కృష్ణా, గుంటూరులను కలిపే మూడు ప్రధాన వంతెనలు నదిపై ఉన్నాయి. అవి ప్రకాశం బ్యారేజీ, కనకదుర్గ వారధి, పులిగడ్డ-పెనుమూడి వారధి. ప్రకాశం బ్యారేజీ తర్వాత కృష్ణా నీటిని నిల్వ చేసే సౌలభ్యం లేకపోవడం వల్ల ఎక్కువ నీరు సముద్రం పాలవుతోంది.

అతి పెద్ద చెరువు దొండపాడు

వినుకొండ నియోజకవర్గంలో చెరువులు కొన్ని గ్రామాల్లో సాగుకు ఉపకరిస్తున్నాయి. ఇందులో ప్రధానమైన వాటిలో దొండపాడు ఒకటి. జిల్లాలో అతిపెద్ద చెరువు. కొండల మధ్య సహజ నీటితోపాటు సాగర్‌ కాల్వల సీపేజీ నీరు అందులో చేరుతోంది. ఏడాది పొడవునా నీరు ఉంటుంది. సుమారు వెయ్యి ఎకరాలకు ఆయకట్టు సాగవుతుంది. ఆ తరువాత పెదకంచర్ల చెరువు ముఖ్యమైన వాటిలో ఒకటి. సుమారు 1500 ఎకరాలకు సాగునీరు సరఫరా అవుతోంది. కొంకేరు వాగునీరు చేరుతోంది. రెండేళ్ల క్రితం సుమారు కోటిన్నర రూపాయల ఖర్చుతో అభివృద్ధి పనులు చేశారు. ఈపూరు చెరువు కొండల అంచున ఉంది. దీని ద్వారా 500 ఎకరాలు సాగు చేస్తున్నారు. ఏడాది పొడవునా నీరు నిల్వ ఉంటుంది. కెనాల్స్‌ సీపేజీ నీరు చెరువుకు చేరుతోంది. ఇవి కాకుండా నియోజకవర్గంలో మరో 50 చెరువులు ఉన్నాయి. ఈ నియోజకవర్గంలో 16 ఎత్తిపోతల పథకాలు ఉన్నాయి. వాటి ద్వారా 10వేల ఎకరాల ఆయకట్టు సాగవుతోంది. గుండ్లకమ్మ, కొంకేరు వాగుపైన ఎక్కువ సంఖ్యలో ఉన్నాయి. మళ్లింపు పథకాలు సేద్యానికి ఉపకరిస్తున్నాయి.

జీవనదిలా నాగులేరు

కారంపూడి యుద్ధంలో రక్తపుటేరు పారించిన నాగులేరు గురజాల, దాచేపల్లి మండలాల మీదుగా భట్రుపాలెం వద్ద కృష్ణానదిలో ప్రవహిస్తుంది. మండుటెండల్లోనూ ఇందులో నీరు ప్రవహిస్తుంటుంది. ఈ నీటి ఆధారంగా సుమారు 8 వేల ఎకరాలు భూమి సాగు చేస్తున్నారు. గురజాల, దాచేపల్లి, మాచవరం నదీ పరివాహక మండలాలు. కృష్ణానది నుంచి మోటార్ల ద్వారా పిడుగురాళ్ల పట్టణంతో పాటు పలుగ్రామాల్లో తాగునీటిని సరఫరా చేస్తున్నారు. ఓగేరు, నక్కవాగు, కుప్పగంజి వాగులు చిలకలూరిపేట, యడ్లపాడు నాదెండ్ల మండలాల పరిధిలో ప్రవహిస్తాయి. ఈ వాగుల పరిధిలో మొత్తం 169 ఎత్తిపోతల పథకాలు ఏర్పాటు చేశారు. ఈ పథకాల ద్వారా మొత్తం 50 వేల ఎకరాలు సాగవుతుంది. పత్తి, మిరప, వరి, సుబాబుల్‌తోపాటు కూరగాయలు సాగుచేస్తారు.

ఆధారము: ఈనాడు

2.99926686217
K Srinivasarao May 10, 2018 02:32 PM

I am having 16 Cents land in Kajipet(Tenali) area.. What type of crops can I try in that sand soil.. Kindly Guide me

మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు