పంచుకోండి
వ్యూస్
  • స్థితి: సవరణ కు సిద్ధం

పశ్చిమ గోదావరి

ఈ పేజిలో పశ్చిమ గోదావరి జిల్లాకి సంబంధించిన వ్యవసాయ సమాచారం అందుబాటులో ఉంటుంది.

నీటి పారుదల

జిల్లాలో ఏలూరు సర్కిల్‌ భారీనీటి పారుదల విభాగం కింద గోదావరి పశ్చిమడెల్టా, మధ్య తరహ నీటిపారుదల కింద తమ్మిలేరు, ఎర్రకాలువ, విజయరాయి ఆయుకట్టు, చిన్ననీటిపారుదల విభాగం కింద జల్లేరు జలాశయంతో పాటుగా 1,398 సాగునీటి చెరువులున్నాయి.

ఆయుకట్టు వివరాలు

జిల్లాలో భారీనీటిపారుదల విభాగం కింద గోదావరి నదీజలాలు 5,29,962 ఎకరాలకు 11 ప్రధాన కాలువల ద్వారా సాగునీరు అందుతోంది. మధ్య తరహ నీటిపారుదల విభాగం కింద తమ్మిలేరు, ఎర్రకాలువ, విజయరాయి ఆయుకట్టు జలాలు 43,500 ఎకరాలు సాగవుతుండగా, చిన్ననీటి పారుదల విభాగం కింద జల్లేరు జలాశయం జలాలు ద్వారా 1,19,284 ఎకరాలు సాగవుతున్నాయి. కృష్ణా డెల్టా నుంచి వచ్చే ఏలూరు కాలువ కింద కూడా జిల్లాలోని దాదాపు 50 వేల ఎకరాలు సాగవుతున్నాయి.

జిల్లాలో సేద్యం....

పశ్చిమగోదావరి జిల్లా రాష్ట్రంలోనే ధాన్యాగారంగా పేరుగాంచింది. జిల్లాలో 22 డెల్టా, 7 పాక్షిక డెల్టా, 17 మెట్ట మండలాలతో కలిపి మొత్తం 46 మండలాలున్నాయి. సుమారు 40లక్షల మంది జనాభా కలిగిన ఈ జిల్లాలో దాదాపు 70 శాతం మంది వరకు వ్యవసాయం మీదనే ఆధారపడింది. గోదావరి నదీ జలాలపై అధికశాతం పంటలు పండుతుంటే, కృష్ణానదీ జలాలపై ఆధారపడి సుమారు 20వేల హెక్టార్లు వరకు సాగు అవుతుంది. జిల్లాలో ముఖ్యంగా వరి అత్యధిక విస్తీర్ణంలో సాగవుతుండగా వేరుశెనగ, మొక్కజొన్న, పొద్దుతిరుగుడు, అపరాలు సాగుకూడా ఆశాజనకంగానే సాగుతుంది. జిల్లాలో ప్రతి సీజన్‌లో వరి రెండు పంటలు పండుతుంది.

ఆధారము: ఈనాడు

ప్రధాన పంటలు

జిల్లాలో ఖరీఫ్‌, రబీ సీజన్లలో సుమారు 11 లక్షల ఎకరాల్లో వరి సాగవుతోంది. దీంతోపాటుగా మొక్కజొన్న 40వేల హెక్టార్లలో, పొద్దుతిరుగుడు 3వేల హెక్టార్లలో, పోగాకు 25వేల హెక్టార్లలో, మినుములు 10,970, కందులు 13, పెసలు 4089, ఉలవలు 422, వేరుశెనగలు 4221, నువ్వులు 662, మిరపకాయలు 2979 హెక్టార్లలో సాగు చేస్తుంటారు. చెరకు 28వేల హెక్టార్లలో సాగు చేస్తున్నారు.

ఉద్యాన పంటలు సాగు

పశ్చిమగోదావరి జిల్లాలో 1,27,727 హెక్టార్లల్లో అరటి, మామిడి, జామ, నిమ్మకాయలు వంటి పండ్లతోటలతో పాటుగా కూరగాయలు, సుగంధ ద్రవ్యాలు, పూలతోటలను రైతులు సాగు చేస్తున్నారు. లక్ష ఎకరాల విస్తీర్ణంలో ఆయిల్‌పామ్‌, కోకో పంటల సాగుతో జిల్లా రాష్ట్రంలో ప్రథమస్థానంలో నిలిచింది.

పరిశోధన కేంద్రాలు

పశ్చిమగోదావరి జిల్లాలో వ్యవసాయాభివృద్ధికి అనేక పరిశోధనా కేంద్రాలు నెలకొల్పారు. పెదవేగిలో ఆయిల్‌ఫామ్‌ పరిశోధనా కేంద్రం, పెనుమంట్ర మండలం మార్టేరులో వరి పరిశోధనా కేంద్రం, కొవ్వూరులో అరటి, ఉండిలో కృషి విజ్ఞాన్‌ పరిశోధన కేంద్రాలున్నాయి.

కృషి విజ్ఞాన కేంద్రం

రాష్ట్రంలోని వివిధ పరిశోధన స్థానాలు సాధించిన ప్రగతిని విస్తరణ విభాగం ద్వారా రైతుల దరికి చేర్చడంలో ఉండిలోని కృషి విజ్ఞాన కేంద్రం (కేవీకే) ప్రగతిని సాధిస్తోంది. 1994లో ఎన్నార్పీ అగ్రహారంలోని 50 ఎకరాల విస్తీర్ణంలో ఆచార్య ఎన్‌జీ రంగా వ్యవసాయ విశ్వవిద్యాలయం ఆధ్వర్యంలో కేవీకేను ఏర్పాటు చేశారు. మార్టేరుతో పాటు వివిధ పరిశోధన స్థానాలకు చెందిన బీడర్‌ సీడ్‌ (వరి)ని తీసుకొచ్చి ఇక్కడ సాగు చేసి నాణ్యమైన పౌండేషన్‌ సీడ్‌ను 1996 నుంచి రైతులకు సరఫరా చేస్తున్నారు. గత అయిదేళ్ల నుంచి హార్టీకల్చర్‌ సాగులో ఈ కేంద్రం ప్రగతిదిశగా అడుగులేస్తోంది. సపోటా, కొబ్బరితోటల సాగుచేస్తున్నారు. కూరగాయల సాగులో వివిధరకాల ప్రయోగాలు చేస్తున్నారు. మెట్టపంటలైన పత్తి, బీటీకాటన్‌, మొక్కజొన్న వంటి పంటలపై ప్రదర్శనా మడులు ఏర్పాటు చేస్తున్నారు. బ్రాకోలీ, రెడ్‌క్యాబేజీ, టమాటా, వంగ వంటి కూరగాయలతో పాటు వివిధ రకాల ఆకుకూరల సాగుచేస్తున్నారు. బిందు సేద్యంతోపాటు తక్కువ నీటితో ప్రత్యామ్నాయ పంటల సాగుపై అన్నదాతలకు అవగాహన కల్పిస్తున్నారు. గిరిరాజ, టర్కీ కోళ్ల పెంపకాన్ని ప్రొత్సహిస్తున్నారు. శ్రీవరిసాగు, వర్మీ కంపోస్టుతోపాటు వివిధరకాల ప్రశుగ్రాసాల పెంపకంపై ప్రదర్శనా మడులు ఏర్పాటు చేసి రైతులకు వివరిస్తున్నారు. అరటితో నార తయారీ, బొమ్మల తయారీ, అల్లికలు, కుట్లపై శిక్షణ ఏర్పాటు చేస్తున్నారు. మహిళా సంఘాల వద్దకు వెళ్లి శిక్షణ కార్యక్రమాలు నిర్వహిస్తున్నారు. రైతుల చెరువుల్లో చేపలు, రొయ్యల పెంపకంపై అవగాహన కల్పిస్తున్నారు.

మత్స్య పరిశోధన కేంద్రం(ఉండి)

ఆక్వా రంగ ప్రగతికి ఉండిలో మత్స్య పరిశోధన స్థానం నిరంతరం ప్రయోగాలు జరుపుతూనే ఉంది. వెంకటేశ్వర వెటర్నరీ విశ్వవిద్యాలయానికి చెందిన మత్స్య పరిశోధన స్థానం(ఎఫ్‌ఆర్‌ఎస్‌) 2001లో కొవ్వలి నుంచి ఉండి తీసుకొచ్చారు. ప్రస్తుతం దీని ప్రధాన కార్యాలయం కృషి విజ్ఞాన కేంద్రంలోనే ఉంది. తెల్లజాతి చేపల పెంపకంలో వచ్చే వ్యాధులు, వాటి నివారణ, పెంపకం చెరువుల్లో నీటి నాణ్యత, మేత వినియోగంలో హెచ్చుతగ్గులు, నాణ్యత గల మేత వినియోగం వల్ల కలిగే లాభాలు, వాతావరణ మార్పులకు అనుగుణంగా చేపలు, రొయ్యల సాగులో తీసుకోవాల్సిన జాగ్రత్తలపై మత్స్య పరిశోధన స్థానం ప్రయోగాలు చేస్తూ వాటి ఫలితాలు రైతులకు అందిస్తోంది. దీర్ఘకాలిక వ్యాధుల బారిన పడుతున్న తెల్లజాతి చేపలకు ప్రత్యామ్నాయ జాతుల పెంపకంపై వివిధ ప్రయోగాలు నిర్వహిస్తోంది. బొమ్మిడాయి విత్తన తయారీలో సత్ఫలితాలు సాధించింది. కొరమేను, మార్పు వంటి ప్రత్యామ్నాయ జాతి చేపల పెంపకంలో ఈకేంద్రం మంచి ఫలితాలు పొందింది. టైగర్‌ రొయ్యకు ప్రత్యామ్నాయంగా నీలకంఠ రొయ్యల పిల్లల పెంపకంలో చేసిన ప్రయోగాలు ఇక్కడ ఫలించాయి. 12.5 ఎకరాల విస్తీర్ణంలో ఎఫ్‌ఆర్‌ఎస్‌ చేపలు, రొయ్యల పెంపకంలో ప్రయోగాలు జరుపుతోంది. చేపలు, రొయ్యల్లో వ్యాధి నిర్థారణ, నీటి నాణ్యత, హిబ్రియోసిస్‌ వంటి వివిధ రకాల వ్యాధినిర్ధారణ పరీక్షలు ఈకేంద్రంలోనే శాస్త్రవేత్తలు నిర్వహిస్తూ రైతులను ప్రొత్సహిస్తున్నారు.

ఉద్యాన విశ్వవిద్యాలయం

ఉద్యాన విశ్వవిద్యాలయాన్ని తాడేపల్లిగూడెం మండలం వెంకట్రామన్నగూడెంలో 2007లో స్థాపించారు. 200 మంది శాస్త్రవేత్తలు పనిచేస్తున్నారు. ఔషధ మొక్కలు, రకరకాల పంటలపై పరిశోధనలు చేస్తున్నారు. 200 మంది అధికారులు సేవలందిస్తున్నారు. 290 ఎకరాల్లో విస్తరించి ఉంది. దీని పరిధిలో రాష్ట్ర వ్యాప్తంగా తొమ్మిది కళాశాలలు, మూడు కృషి విజ్ఞాన కేంద్రాలు పనిచేస్తున్నాయి.

గేదెల పరిశోధన కేంద్రం

1999లో వెంకట్రామన్నగూడెంలో స్థాపించారు. ఈ కేంద్రంలో గేదెలు, దున్నపోతులు కలిపి 150 ఉన్నాయి. మేలురకం దూడలకోసం హర్యానా నుంచి పశువుల వీర్యం తీసుకొచ్చి ఇద్దరు శాస్త్రవేత్తలు పరిశోధనలు చేస్తున్నారు. ప్రస్తుతం దీని పరిధిలో 80 ఎకరాలు ఉంది. అందులో కొంత మేలురకం గడ్డిని సాగు చేస్తున్నారు. వీటి పోషణకు సుమారు 50 మంది సిబ్బంది సేవలందిస్తున్నారు.

వరి పరిశోధన స్ధానం

పెనుమంట్ర మండలం మార్టేరులో వరిపరిశోధన స్ధానం కొలువు తీరింది. నూతన వరి వంగడాల రూపకల్పన దిశగా ఇక్కడ శాస్త్రవేత్తల బృందం నిత్యం పరిశోధనలు నిర్వహిస్తుంది. మొత్తం 22 మంది శాస్త్రవేత్తలు ఉన్నారు. వాతావరణంలో మార్పులకు అనుగుణంగా వరి రకాలతోపాటు అధిక దిగుబడులు, తెగుళ్లను తట్టుకునే రకాలను అందించాలనే కృషినిత్యం జరుగుతుంది. 1925లో స్ధాపించిన ఈ పరిశోధన స్ధానం ఇప్పటివరకు 47రకాలను అందించింది. వీటిలో రెండు హైబ్రీడ్‌ రకాలు ఉన్నాయి. 1982లో ఈ సంస్థ అందించిన స్వర్ణ రకం వరి వంగడం అంతర్జాతీయ స్ధాయిలో ప్రాముఖ్యతను సాధించింది. అలాగే 1986లో దోమపోటును తట్టుకునే వరి రకాలను రైతులకు అందించి అండగా నిలిచింది. సన్నరకాలపై రైతులకు మక్కువ పెరగడంతో ఈదిశగా పరిశోధనలు చేసి మేలైన రకాలను అందించింది. ఎమ్‌టియు 2067, 2077, 1001, 1010 రకాలను రూపొందించింది. ఎమ్‌టియు 1031, 1032, 1075, 1064, 1061 రకాలు రైతులకు పంట పండించాయి. త్వరలో పరిశోధన ముగించుకుని ఎమ్‌టియు 1112, 1120 వరి రకాలు రైతులకు చేరనున్నాయి.

కొవ్వూరు అరిటి పరిశోధన కేంద్రం

రాష్ట్రంలోనే ఏకైక అరటి పరిశోధన కేంద్రం జిల్లాలోని కొవ్వూరులో ఉంది. ఇది పరిశోధనల్లో మంచి ఫలితాలను సాధిస్తుంది. ఆంధ్రప్రదేశ్‌ ఉద్యానవన విశ్వవిద్యాలయం (వెంకట్రామన్నగూడెం)నేతృత్వంలో ఇది పనిచేస్తుంది. 1958లో తణుకులో ప్రారంభమైన ఈ సంస్ధ దశాబ్ద కాలం అనంతరం 1968లో కొవ్వూరు పట్టణ శివారులో సుమారు 15 ఎకరాల సువిశాలమైన స్థలంలోకి మారింది. ఈ కేంద్రంలో ఆరుగురు శాస్త్రవేత్తలు నిరంతరం తమ పరిశోధనలను కొనసాగిస్తున్నారు. వీరికి డాక్టర్‌ బి.వి.కృష్ణ భగవాన్‌ నేతృత్వం వహిస్తున్నారు. కేంద్రం తన పరిశోధనలలో భాగంగా 1985లో గజేంద్ర పేరిట కందను ఉత్తత్తి చేసింది. ఈ రకం అంతర్జాతీయంగా పేరు ప్రఖ్యాతలను తెచ్చిపెట్టింది. నేపాల్‌, దక్షిణాఫ్రికా వంటి దేశాల వారు సైతం ఈ రకం కందను పంటలు వేస్తున్నారు. 1995లో కొవ్వూరు బొంత పేరుతో కూర అరటిని కనుగొంది. ఈ రకం రైతులను విశేషంగా ఆకట్టుకుంది. ప్రస్తుతం కె.బి.ఎస్‌-5 పేరిట కూర అరటిని పరిశోధిస్తుంది. ఇది కొవ్వూరు బొంత అరటికంటే మేలైన రకమని శాస్త్రవేత్తలు చెబుతున్నారు. కె.సి.ఎస్‌-3 పేరిట కందపై పరిశోధన జరగుతోంది. కేవలం 5.5 నెలల కాలంలో పంట చేతికొస్తుంది.

ఆయిల్‌ఫామ్‌ పరిశోధన కేంద్రం

జిల్లాలోని పెదవేగిలో జాతీయ ఆయిల్‌ఫామ్‌ పరిశోధన కేంద్రాన్ని 1995 సంవత్సరంలో ఏర్పాటు చేశారు. ప్రారంభంలో ముగ్గురు శాస్త్రవేత్తలు ఉండగా ప్రస్తుతం 18 మంది శాస్త్రవేత్తలు ఉన్నారు. మరో అయిదు పోస్టులు ఖాళీగా ఉన్నాయి. వీరితోపాటు పరిపాలన, సాంకేతిక సహాయకులు కలిపి మరో 40 మంది ఉన్నారు. ఆయిల్‌ఫామ్‌ తోటలకు సంబంధించి పరిశోధనలు చేయడం ప్రధాన విధి. నీరు తక్కువుగా తీసుకుంటూ ఎక్కువ దిగుబడి సాధించడానికి కొత్త వంగడాలపై కూడా పరిశోధనలు సాగిస్తున్నారు. అదేవిధంగా చీడపీడలను తట్టుకునేలా కొత్త వంగడాలను అందుబాటులోకి తెచ్చారు. అవి పాలాడు-1, పాలాడు-2 రకాలు. వీటితోపాటు పలు రకాలైన పామాయిలులో అంతర పంటలకు సంబంధించి కూడా పరిశోధనలు సాగిస్తున్నారు. వీటితోపాటు రైతులకు అవసరమైన సూచనలు ఇస్తున్నారు. జిల్లాలో లక్ష ఎకరాలకు పైగా పామాయిలు సాగు జరుగుతుంది.

పశ్చిమ గోదావరి జిల్లాలో 1,08,300 హెక్టార్లలో ఉద్యానపంటలు ఉన్నాయి. వీటిలో అత్యధికంగా 44వేల హెకార్లలో పామాయిల్‌ తోటలు ఉన్నాయి. కామవరపుకోట, టి.నర్సాపురం, జంగారెడ్డిగూడెం, దెందులూరు, పెదవేగి, చింతలపూడి, దేవరపల్లి, లింగపాలెం తదితర మండలాల్లో ఎక్కువగా ఈ తోటలున్నాయి.

20,437 హెక్టార్లలో కొబ్బరిసాగు ఉంది. పెదవేగి, ఎలమంచిలి, ఆచంట, పెనుగొండ, చాగల్లు, ద్వారకాతిరుమల మండలాల్లో ఎక్కువ. 4,325 హెక్టార్లలో కోకో సాగు ఉంది. పామాయిల్‌, కొబ్బరితోటల్లో అంతర పంటగా కోకో సాగుచేస్తున్నారు. పెదవేగిలో అత్యధికంగా 2 వేల హెక్టార్లలో కోకో అంతరసాగుగా ఉంది.

23,379 హెక్టార్లలో జీడిమామిడి ఉంది. ఎక్కువగా జీలుగుమిల్లి, బుట్టాయిగూడెం, చింతలపూడి, గోపాలపురం, కామవరపుకోట, ద్వారకాతిరుమల, నల్లజర్ల, దేవరపల్లి, చాగల్లు మండలాల్లో సాగు చేస్తున్నారు.

  • మామిడి 10,767 హెక్టార్లు (ఎక్కువగా చింతలపూడి, ద్వారకాతిరుమల, నల్లజర్ల మండలాలు)
  • 194 హెక్టార్లలో బత్తాయి (టి.నర్సాపురం, కామవరపుకోట మండలాలు)
  • నిమ్మ 2,811 హెక్టార్లు ( గోపాలపురం, జంగారెడ్డిగూడెం, టి.నర్సాపురం, ద్వారకాతిరుమల, దేవరపల్లి, పెదవేగి మండలాలు)
  • అరటి : పెరవలి, ఉండ్రాజవరం, కొవ్వూరు మండలాల్లో
  • జామ 618 హెక్టార్లు (పెదవేగి, ఉండ్రాజవరం, తాడేపల్లిగూడెం మండలాలు)
  • బొప్పాయి 99 హెక్టార్లు (పెరవలి మండలం)
  • సపోటా 621 హెక్టార్లు (పెదవేగి, మొగల్తూరు మండలాల్లో) * 216 హెక్టార్లలో తమలపాకు యలమంచిలి, ఆచంట మండలాల్లో సాగుచేస్తున్నారు.

ఆధారము: ఈనాడు

ప్రాజెక్టులు

గోదావరిపై ఆధారపడి పలు సాగునీటి ప్రాజెక్టులు ఉండగా మెట్టలోనూ పలు పథకాలు సాగుకు తోడ్పడుతున్నాయి. ఈ ప్రాజెక్టుల వివరాలు ఇలా ఉన్నాయి

తాడిపూడి ఎత్తిపోతల పథకం

జిల్లా తాళ్ళపూడి మండలంలోని తాళ్ళపూడి గ్రామం వద్ద తాడిపూడి ఎత్తిపోతల పథకం ఏర్పాటైంది. తొలుత ఈ పథకానికి రూ.295.80కోట్లు వ్యయం అవుతుందని అంచనా వేశారు. ఇందిరాసాగర్‌ ప్రధాన కుడికాలువ ద్వారా 2,58,000 ఎకరాల్లో ఇచ్చే ఆయుకట్టులో భాగంగా 2,06,600 ఎకరాల ఆయుకట్టుకు ఈ పథకం ద్వారా నీటిని సరఫరా చేయాలని నిర్ణయించారు. అంతేకాక 5,40,000 మంది జనాభాకు తాగునీటి అవసరాలు తీర్చనుంది. ఈ పథకం అంచనాలు రూ.467.80 కోట్లకు పెరిగింది. ఈ పథకం ఇంకా పూర్తి కాలేదు. ప్రస్తుతం 60 వేల ఎకరాలకు మాత్రమే నీరిస్తుంది.

చింతలపూడి ఎత్తిపోతల పథకం

చింతలపూడి ఎత్తిపోతల పథకం గోదావరి నది కుడిగట్టుపై కట్టారు. ఈ పథకం ద్వారా జిల్లాలో అయిదు నియోజకవర్గాల్లో 13 మండలాల్లోని 1.78లక్షల ఎకరాలకు, కృష్ణా జిల్లా లోని 22 వేల ఎకరాలల్లోని ఆయుకట్టుకు సాగునీటిని అందించేందుకు ఉద్దేశించింది. పశ్చిమ గోదావరి, కృష్ణా జిల్లాల్లో ఈ పథకం ద్వారా దాదాపు 230 గ్రామాల్లోని 12 నుంచి 140 మీటర్ల ఎత్తులోనున్న భూములకు మూడు దఫాలుగా నీటిని ఎత్తిపోయడం ద్వారా సాగు, తాగునీటి అవసరాలు తీర్చుతారు. ఈ పథకానికి రూ.1701 కోట్ల వ్యయం అవుతుందని అంచనా. దీనికిగాను 8659 ఎకరాల భూమిని సేకరించాల్సి ఉంది. ఈ పథకాన్ని రెండు భాగాలుగా విభజించి ఈపీసీ టర్న్‌ పద్ధతి ద్వారా టెండర్లు పిలిచారు. ఇప్పటి వరకు రూ.250 కోట్ల లోపు మాత్రమే కేటాయింపులుజరిగాయి.

ఇందిరాసాగర్‌ పోలవరం ప్రాజెక్టు

జిల్లాలోని పోలవరం మండలం రామయ్యపేట గ్రామం వద్ద పోలవరం ప్రాజక్టుని నిర్మిస్తున్నారు. ఈ ప్రాజెక్టు వల్ల ఎడమ ప్రధానకాలువ ద్వారా తూర్పుగోదావరి, విశాఖ జిల్లాల్లో 1.62లక్షల హెక్టార్లు, కుడి కాలువ ద్వారా పశ్చిమ గోదావరి, కృష్ణా జిల్లాల్లో 1.29 లక్షల హెక్టార్లు భూమి సాగులోకి రానుంది. అంతేకాక దీనివల్ల 960 మెగావాట్ల విద్యుత్‌ ఉత్పత్తి కూడా అవుతుంది. 80 టీఎంసీల నీటిని గోదావరి కుడి ప్రధాన కాలువ ద్వారా కృష్ణానదికి మళ్లించడం, 23.44 టీఎంసీల నీటిని విశాఖపట్నం పరిసర ప్రాంతాలకు తాగునీటి, పరిశ్రమల కోసమ్  కాలువల ద్వారా సరఫరా చేయడం జరుగుతుంది. అంతేకాక పర్యాటక, చేపల పెంపకం, జలరవాణా తదితర లాభాలు కూడా ఉంటాయి. ఈ ప్రాజెక్టుకు రూ.16,010 కోట్లతో సీడబ్ల్యూసీ వారి సాంకేతిక సలహా కమిటీ అనుమతి ఇచ్చింది. ఈ వ్యయం ప్రస్తుతం రూ.17 వేల కోట్లు దాటి పోయింది. దీనిని జాతీయ ప్రాజెక్టుగా ప్రకటించాలని రాష్ట్ర ప్రభుత్వం, రాజకీయ పార్టీలు డిమాండ్‌ చేస్తున్నాయి.

కొవ్వాడ జలాశయం పథకం

పోలవరం మండలం ఎల్‌ఎన్‌డీ పేట వద్ద రూ.66.16కోట్ల ఆర్‌ఐడీఎఫ్‌-4 ప్రణాళిక కింద మధ్య తరహా పథకంగా కొవ్వాడ జలాశయాన్ని చేపట్టారు. ఈ పథకం ద్వారా ఇప్పటివరకు 17,739 ఎకరాలకు గాను 1500 ఎకరాలకు సాగునీటిని అందించడం జరుగుతుంది. ఈ పథకం ద్వారా రెండుమండలాల్లో 15గ్రామాలకు నీరు అందుతుంది.

తమ్మిలేరు జలాశయం

చింతలపూడి మండలం నాగిరెడ్డి గూడెం వద్ద తమ్మిలేరు జలాశయం మధ్యతరహా పథకంగా నిర్మించారు. ఈ పథకాన్ని 1969లో ప్రారంభించగా, 1980లో పూర్తి చేశారు. ఈ పథకం ద్వారా జిల్లాలో 4,200 ఎకరాలకు, కృష్ణాజిల్లాలో 4,969 ఎకరాలకు సాగునీరు అందుతుంది. కృష్ణా, పశ్చిమగోదావరి జిల్లాల్లో 15,570 ఆయకట్టు స్థిరీకరణ, వరద నియంత్రణ పథకంగా నిర్ధేశించారు.

ఎర్రకాలువ జలాశయం

జంగారెడ్డిగూడెం మండలం కొంగువారిగూడెం గ్రామం వద్ద ఎర్రకాలువపై కరాటం కృష్ణమూర్తి ఎర్రకాలువ జలాశయాన్ని మధ్యతరహా సేద్యపు ప్రాజెక్టుగా నిర్మించారు. ఈ జలాశయం ద్వారా ఎడమకాలువ ద్వారా 5వేలు, కుడికాలువ ద్వారా 19,700 ఎకరాలకు సాగునీరు అందుతుంది. ఇందులో కుడికాలువ ద్వారా నిర్ధేశించిన 19,700 ఎకరాలకు గాను ప్రస్తుతం 13,500 ఎకరాలకు మాత్రమే నీరు అందుతుంది.

ఆధారము: ఈనాడు

నదులు

గోదావరి నది

'ఉప్పొంగిపోయింది గోదావరి' అంటూ ఆ నదీ తరంగాల పరవళ్లను ఎంతో రమ్యంగా వర్ణించారు ప్రముఖకవి అడవి బాపిరాజు. దక్షిణాది రాష్ట్రాల్లో ప్రవహిస్తున్న అతి పెద్ద జీవనదిగా ఇది పేరొందింది. మహారాష్ట్రలోని నాసిక్‌ జిల్లా త్రయంబకం వద్ద పుట్టి 1,465 కిలోమీటర్ల దూరం నది పయనించి ఉభయగోదావరి జిల్లాల సరిహద్దు ప్రాంతమైన అంతర్వేది పల్లిపాలెం వద్ద బంగళాఖాతంలో కలుస్తుంది. 3,12,812 చదరపు కిలోమీటర్ల ప్రాంతంలో పడే వర్షపాతం ఈ నదిలో కలుస్తుంది. మహారాష్ట్ర, చత్తీస్‌గఢ్‌, కర్నాటక, ఒరిస్సా, ఆంధ్రప్రదేశ్‌ రాష్ట్రాల వెంబడి ఈ నది ప్రవహిస్తుంది. పూర్ణ, మంజీర, ప్రాణహిత, ఇంద్రావతి, శబరి, పెన్‌గంగా, వార్థా, మానేరు వంటి ముఖ్య ఉపనదులు గోదావరిలో కలుస్తాయి. గోదావరి పేరుతో ఆంధ్రప్రదేశ్‌లో పశ్చిమ, తూర్పుగోదావరి జిల్లాలు ఆవిర్భవించాయి. బ్రిటీషు ఇంజినీరు కాటన్‌దొర పుణ్యమా అని ధవళేశ్వరం బ్యారేజీ నిర్మాణంతో ఉభయగోదావరి జిల్లాల్లో పంట విస్తీర్ణం పెరిగి ఆంధ్రప్రదేశ్‌కే ధాన్యాగారంగా వెలుగొందుతున్నాయి.

తెల్లదిబ్బల్లోని పాపికొండలు నుంచి ప్రారంభమై..!

పోలవరం మండలంలోని తెల్లదిబ్బల్లోని పాపికొండలు నుంచి గోదావరి నది పశ్చిమ గోదావరి జిల్లాలో ప్రవేశిస్తుంది. పోలవరం నుంచి ఈ నది పొడవు విస్తరించింది. పశ్చిమలో కొవ్వూరు.. తూర్పున రాజమండ్రి ప్రాంతంలో బాగా విస్తరించింది. ధవళేశ్వరం వద్ద సువిశాలంగా ఈనది అఖండ గోదావరిగా అవతరించింది. కాటన్‌ మహానీయుడు నిర్మించిన బ్యారేజీతో అఖండ గోదావరి దవళేశ్వరం నుంచి గౌతమి, వశిష్ట పాయలుగా చీలిపోయింది. గతంలో గౌతమి, వశిష్ట, విశ్వామిత్ర, అత్రి, కౌశిక, భరద్వాజ, అగస్త్యుడు అనే ఏడుగురు రుషుల పేర్ల మీద ఏడు పేర్లు ఉండేవని ప్రతీతి. కాని ప్రస్తుతం వశిష్ట, గౌతమిలు తప్ప మిగిలినవన్నీ గోదావరిలో అంతర్లీనమయ్యాయి. ధవళేశ్వరం వద్ద బ్యారేజీని నిర్మించిన తరువాత అక్కడ నుంచి తూర్పు డెల్టా, మధ్య డెల్టా, పశ్చిమ డెల్టాలుగా విభజించి పంటకాల్వల వ్యవస్థను కాటన్‌ మహనీయుడు ఏర్పాటు చేశాడు. పశ్చిమ గోదావరి జిల్లాలో తెల్లదిబ్బల్లోని పాపికొండల నుంచి ప్రారంభమైన గోదావరి నది పోలవరం, తాళ్లపూడి, కొవ్వూరు, నిడదవోలు, పెనుగొండ, ఆచంట, యలమంచిలి, నరసాపురం మండలాల మీదుగా ప్రవహిస్తుంది. అంతర్వేదిలోని అన్నాచెల్లెల నీటి గట్టు వద్ద సాగరంలో కలిసిపోతుంది.

ఆధారము: ఈనాడు

3.00973451327
రేటింగ్ చేయుటకు చుపించిన నక్షత్రము పైన క్లిక్ చేయండి
raju Apr 21, 2015 05:10 PM

కంటెంట్ ఇస్ గుడ్

మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు