పంచుకోండి
వ్యూస్
  • స్థితి: సవరణ కు సిద్ధం

ప్రకాశం

ఈ పేజిలో ప్రకాశం జిల్లాకి సంబంధించిన వ్యవసాయ సమాచారం అందుబాటులో ఉంటుంది.

నీటి పారుదల

జిల్లాలో నాగార్జున సాగర్‌ కుడికాలువ పరిధిలో ఒంగోలు బ్రాంచి కెనాల్‌(ఓబీసీ), దర్శి బ్రాంచి కెనాల్‌(డీబీసీ), అద్దంకి బ్రాంచి కెనాల్‌(ఏబీసీ) ఉన్నాయి. ఈ కాలువల కింద జిల్లాలో 4.30 లక్షల ఎకరాల ఆయకట్టు స్థిరీకరించబడింది. 2010-11 సంవత్సరంలో 3,30,330 ఎకరాలకు సాగర్‌ కాలువల ద్వారా నీరందించారు. ప్రపంచ బ్యాంకు ఆర్థిక సహాయంతో సాగర్‌ కాలువల ఆధునికీకరణకు రూ. 298 కోట్లతో పరిపాలనా ఆమోదం లభించింది. ఐదు ప్యాకేజీల్లో పనుల నిర్వహణకు రూ. 153.26 కోట్లతో గుత్తేదార్లతో ఒప్పందం కుదిరింది.

మధ్యతరహా నీటిపారుదల

ఈ విభాగంలో జిల్లాలో ఒంగోలు, మార్కాపురం, రాళ్లపాడు సర్కిళ్లు ఉన్నాయి. జిల్లాలో ఐదు మధ్య తరహా ప్రాజెక్టులు ఉన్నాయి. మోపాడు, వీఆర్‌కోట(వీరరాఘవునికోట), పాలేరు-బిట్రగుంట(పీబీ ఛానెల్‌), కంభం చెరువు, రాళ్లపాడు ప్రాజెక్టుల కింద 40,992 ఎకరాల ఆయకట్టు ఉంది. గతేడాది ఈ ప్రాజెక్టుల కింద 36,193 ఎకరాల్లో పంటలు సాగయ్యాయి.

చిన్నతరహా నీటి పారుదల

ఈ విభాగంలో జిల్లాలో ఒంగోలు, మార్కాపురం కేంద్రాలుగా చిన్న తరహా నీటి వనరులైన 957 చెరువుల కింద 1.36 లక్షల ఎకరాల ఆయకట్టు ఉంది. మరో 368 చెరువులు పంచాయతీరాజ్‌ విభాగం ఆధీనంలో ఉన్నాయి. 2010-11 సంవత్సరంలో ఈ చెరువుల కింద కేవలం 49,910 ఎకరాల్లో మాత్రమే పంటలు సాగయ్యాయి.

నాటి రవాణా మార్గం బకింగ్‌హామ్‌ కెనాల్‌

రోడ్డు రవాణా మార్గం విస్తరించకముందు జల రవాణానే ఆధారంగా ఉండేది. కాకినాడ నుంచి మద్రాసుకు జల రవాణా మార్గం ప్రకాశం జిల్లా నుంచి సాగేది. జిల్లాలోని కొమ్మ మూరు కాలువ అనుసంధానంగా ఉప్పుగుండూరు నుంచి బకింగ్‌హామ్‌ కెనాల్‌ చెన్నై వరకు ఉంది. అప్పట్లో నిత్యావసర వస్తువులు, ధాన్యం తదితర వస్తువులు మొత్తం ఈ కాలువ ద్వారానే పడవుల ద్వారా రవాణా జరిగేది. కొత్తపట్నం సమీపంలో రేవుగా ఏర్పాటు చేసి సరకులను ఒంగోలు పట్టణంతోపాటు మార్కాపురం వంటి దూర ప్రాంతాలకు కూడా ఎడ్లబండ్లతో సరకులను రవాణా చేసేవారు కాలక్రమేణా రోడ్డు మార్గం విస్తరించటంతో ఈ కాలువపై జల రవాణా మార్గం స్తంభించిపోయింది. ప్రస్తుతం కాలువ కూడా పూర్తిస్థాయిలో అన్యాక్రాంతం అయిపోయింది. ఇటీవల కేంద్ర ప్రభుత్వం మళ్లీ కాలువ అభివృద్ధి పరిచేందుకు కాలువపై సర్వే నిర్వహించటం జరిగింది. పూర్తిస్థాయిలో కాలువ అభివృద్ధి పరిస్తే రవాణాకు, ఈ ప్రాంత అభివృద్ధికి దోహదపడుతుంది.

కొమ్మమూరు కాల్వ

గుంటూరు జిల్లా నర్సాయపాలెం వద్ద ఉన్న నల్లమల లాకుల దిగువ నుంచి ప్రకాశం జిల్లా చినగంజాం మండలం పెదగంజాం వరకు కొమ్మమూరు కాలువ విస్తరించి ఉంది. దీని పొడవు సుమారు 63 కిలోమీటర్లు. కారంచేడు, చీరాల, వేటపాలెం, పర్చూరు, చినగంజాం, నాగులుప్పలపాడు మండలాల పరిధిలోని సుమారు లక్ష ఎకరాల భూములకు ఈ కాలువే సాగునీటి వనరు. దీని పరిధిలో ప్రధానంగా వరి సాగవుతోంది. ప్రశుగ్రాసం కింద పిల్లిపిసర, జనుము సాగు చేస్తారు. రెండు దశాబ్దాల క్రితం జూలై నెలలో సాగునీరు విడుదలయ్యేది. ఆగస్టు చివరికి ఖరీఫ్‌ సాగుపూర్తయ్యేది. ఆ రోజుల్లో రబీ పంట మచ్చుకైనా ఉండేది కాదు. ప్రస్తుతం సాగునీటి విడుదలలో తీవ్ర జాప్యం అవుతుండడంతో ఖరీఫ్‌ చేజార్చుకొని రబీలో సాగు చేయాల్సిన దుస్థితి అన్నదాతది. కారంచేడు వద్ద 1000 క్యూసెక్కుల నీటి ప్రవాహం కాలువలో ఉంటే అన్ని పంట కాల్వలకు సక్రమంగా సాగునీరు అందుతోంది.

ఆధారము: ఈనాడు

ప్రధాన పంటలు

ప్రకాశం జిల్లాలో 70 శాతం మంది వ్యవసాయంపై ఆధారపడి జీవిస్తున్నారు. సాగుభూమిలో అత్యధిక శాతం వర్షంపై ఆధారపడి ఉండగా మిగిలిన భూమి నాగార్జునసాగర్‌, కొమ్మమూరు కాలువ, గుండ్లకమ్మ, పాలేరు, మన్నేరు నదుల ఆధారంగా నిర్మించిన ఎత్తిపోతల పథకాల కింద సాగవుతోంది. జిల్లాలో అత్యధికంగా పొగాకు పంటను సాగు చేస్తున్నారు. తర్వాత శనగ, సామాజిక వనాలు సాగులో ఉన్నాయి. ఖరీఫ్‌లో మొత్తం 2,18,315 హెక్టార్లు పంటలు సాగవుతుండగా రబీలో 3,48,968 హెక్టార్లలో పంటలు సాగవుతున్నాయి. నైరుతీ రుతుపవనాల ద్వారా ఏటా 388.3 మి.మీ. సాధారణ వర్షపాతం నమోదవుతుంది. కాగా, గత పదేళ్ల కాలంలో వాతావరణ పరిస్థితులు సక్రమంగా లేక 603 మి.మీ. వర్షపాతం నమోదై పంటలు తీవ్రంగా దెబ్బతిన్నాయి. ఈశాన్య రుతుపవనాల ద్వారా 393.7 మి.మీ. సాధారణ వర్షపాతం నమోదు కావాల్సి ఉంది. ఇది కూడా సక్రమంగా ఉండటం లేదు. కొన్ని సందర్భాల్లో అత్యధిక వర్షపాతం నమోదై పంటలు దెబ్బతింటున్నాయి. జిల్లాలో ఖరీఫ్‌లో 44,656 హెక్టార్లలో వరి, 12,236 హెక్టార్లలో సజ్జ, 63,164 హెక్టార్లలో కంది, 12,672 హెక్టార్లలో మిరప, 27,443 హెక్టార్లలో పత్తి పంటలు సాగవుతున్నాయి. రబీలో 87,095 హెక్టార్లలో వరి, 97,529 హెక్టార్లలో శనగ, 69,169 హెక్టార్లలో పొగాకు పంట సాగవుతోంది.

మార్కెటింగ్‌ శాఖ జిల్లాలో 14 వ్యవసాయ మార్కెట్‌ కమిటీలు ఉన్నాయి. ఒంగోలు మార్కెట్‌ కమిటీ సెలెక్షన్‌ గ్రేడులో ఉంది. మిగిలిన కమిటీలు సెకండరీ గ్రేడ్‌ కింద కొనసాగుతున్నాయి. ఏటా ఈ కమిటీల ద్వారా రూ. 1448 లక్షలు సెస్‌ రూపంలో వసూలవుతోంది. ఐదు కమిటీలకు మాత్రమే ప్రస్తుతం పాలక వర్గాలు ఉన్నాయి. మిగిలిన కమిటీలకు పాలకవర్గాల పదవీకాలం ముగిసిపోయింది. మొత్తం అన్ని కమిటీల్లో కలిపి 66 గోదాములు ఉండగా వాటిలో నిల్వ సామర్థ్యం 50,120 మెట్రిక్‌ టన్నులు. ఇవికాక జిల్లాలో ప్రైవేటు శీతల గిడ్డంగులు 27 ఉండగా వాటిలో ఉత్పత్తుల నిల్వ సామర్థ్యం 1,64,350 మెట్రిక్‌ టన్నులు. మార్కెట్‌ కమిటీల ద్వారా స్వల్పంగా మాత్రమే రైతుబంధు పథకం కింద రుణాలు అందజేస్తున్నారు.

ఉద్యాన శాఖ జిల్లాలో ఉద్యానవన శాఖ కింద రెండు డివిజన్లలో కార్యాలయాలు పనిచేస్తున్నాయి. మార్కాపురం, ఒంగోలులో ఉద్యాన సహాయ సంచాలకులు పనిచేస్తున్నారు. జిల్లాలో ప్రధానంగా ఉలవపాడు, గుడ్లూరు, సింగరాయకొండ, యర్రగొండపాలెం, బేస్తవారిపేట, తాళ్ళూరు, గిద్దలూరు మండలాల్లో పండ్ల తోటలు విస్తరించాయి. ఉద్యానశాఖ ద్వారా పండ్ల తోటల విస్తరణ కింద మామిడి, బత్తాయి, నిమ్మ, జామతోటలు సాగుచేసే రైతులకు 75 శాతం రాయితీతో మొక్కలు, వ్యవసాయ ఉపకరణాలు, పురుగు మందులు అందజేస్తోంది. జిల్లా మొత్తమ్మీద 12 వేల హెక్టార్లలో పండ్ల తోటలు సాగు చేస్తున్నారు. అత్యధికంగా బత్తాయి, నిమ్మ, బొప్పాయి, సపోట పంటలు సాగులో ఉన్నాయి.

పచ్చి కూరగాయల కేంద్రం మార్టూరు

మార్టూరులోని కూరగాయల మార్కెట్‌ రాష్ట్రంలోనే పేరు గాంచింది. ఈ మార్కెట్‌లో 74 కూరగాయల హోల్‌సేల్‌ దుకాణాలున్నాయి. జిల్లాలోని మార్టూరు, యద్దనపూడి, కొరిశపాడు, సంతమాగులూరు, బల్లికురవ, అద్దంకి మండలాల నుంచి నిత్యం రైతులు ఇక్కడకి వచ్చి తాము పండించిన కూరగాయలను అమ్ముకుంటారు. గుంటూరు జిల్లా నరసరావుపేట నుంచి మునక్కాయలు, కర్నాటకలోని కోలార్‌, చిత్తూరు జిల్లా పలమనేరు ప్రాంతాల నుంచి టమాటాలు ఇక్కడ మార్కెట్‌కు అమ్మకానికి వస్తాయి. ప్రతి రోజూ ఇక్కడ సుమారు రూ.5 లక్షల మేర కూరగాయల వ్యాపారం జరుగుతుంది. డిసెంబర్‌, జనవరి నెలల్లో అయితే మిర్చి మీద రోజువారీ రూ. 25 లక్షల నుంచి 30 లక్షల వరకు వ్యాపారం జరుగుతుంది. ఈ మార్కెట్‌ నుంచి నిత్యం రాష్ట్రంలోని అన్ని ప్రధాన పట్టణాలకేకాక బెంగళూరు, చైన్నై వంటి నగరాలకు కూడా కూరగాయలు ఎగుమతి అవుతుంటాయి.

గిద్దలూరు

రాష్ట్రంలో చిత్తూరు జిల్లా మదనపల్లి, కర్నూలు తర్వాత టమోటా పంటకు గిద్దలూరు ప్రాంతం ప్రసిద్ధి. పదేళ్ల క్రితం వెయ్యి ఎకరాల విస్తీర్ణంలో పంట సాగయ్యేది. రాన్రానూ అది 500.. 250 ఎకరాలకు తగ్గిపోయింది. సరైన మార్కెటింగ్‌ వ్యవస్థ లేకపోవడం. వరుసగా ఒకేపంటను సాగుచేయడంతో వైరస్‌ తెగుళ్లు వ్యాపించడంతో దిగుబడి తగ్గుతోంది. దళారుల మాయాజాలం కారణంగా గిట్టుబాటు ధర రాకపోవడంతో రైతులు ప్రత్యామ్నాయ పంటల వైపు మొగ్గుచూపుతున్నారు.రైతులు రహదారి పక్కనే విక్రయించేందుకు మొగ్గుచూపడంతో ఉన్న మార్కెట్‌ యార్డు నిరుపయోగంగా మారింది.

కనిగిరి నిమ్మ, బత్తాయికి ప్రసిద్ధి

కనిగిరి ప్రాంతం వర్షాధారం కావడంతో ఇక్కడ బత్తాయి, నిమ్మ తోటలకు ఎక్కువగా సాగు చేశారు. కనిగిరి ప్రాంతంలో బత్తాయి, నిమ్మ 15 వేల హెక్టార్లలో సాగవుతోంది. ఇక్కడ బత్తాయిని, నిమ్మను, కలకత్తా బెంగళూరు, చెన్నై , హైదారాబాద్‌, ముంబయి తదితర ప్రాంతాలకు తరలిస్తారు. మెడిసిన్‌, జ్యూస్‌. పచ్చళ్ల తయారికీ ఇక్కడ నుంచి ఎగుమతి చేసుకుంటారు. ప్రతి ఏడాది బత్తాయి, నిమ్మ మీద రూ.70 కోట్ల వరకు కనిగిరిలో మార్కెట్‌ టర్నోవర్‌ జరుగుతుంది. మెట్ట పంటల తర్వాత అధికంగా కనిగిరి ప్రాంత రైతులకు ఆదాయాన్నిచ్చే పంటలు నిమ్మ , బత్తాయి పంటలే. అయితే మార్కెట్‌ సౌకర్యం లేక ఇప్పటి వరకు రైతులు ఇబ్బంది పడ్డారు. ఈమధ్యనే మార్కెట్‌ సౌకర్యాన్ని ప్రభుత్వం నిధులు మంజూరు చేసింది. దీంతో రైతులు స్వయంగా నిల్వ జేసుకొని గిట్టుబాటు ధర వచ్చే వరకు ఉండ వచ్చు. జిల్లాలో అన్ని ప్రాంతాలకు ఇక్కడి నుంచే నిమ్మకాయలు సరఫరా అవుతుంటాయి.

వూరించే ఉలవపాడు మామిడి

కందుకూరు నియోజకవర్గంలో మామిడి తోటలు పెంపకం సుమారు ఏడువేల ఎకరాల్లో సాగుచేస్తున్నారు. వీటిలో ఎక్కువ శాతం బంగినపల్లి మామిడిరకం విస్తారంగా సాగుచేశారు. ఈరకం మామిడి ప్రకాశం జిల్లాలో ఉలవపాడు ప్రాంతంలో తీయదనంగా ఉంటుందని ప్రసిద్ధి. అయితే ఈరకం మామిడిని ముంబై, చెన్నై, విజయవాడ, గుంటూరు, తదితర నగరాలకు ఎగుమతి చేస్తారు. కందుకూరు, ఉలవపాడు, గుడ్లూరు మండలాల్లో ఎక్కువ విస్తీర్ణంలో సాగులో ఉంది బంగినపల్లి తో పాటు బెంగూళూర రకం, చెరుకు రసాలు, సువర్ణరేఖ, నీలం, పునారస, మామిడి తోటలు వీటితో కలిపి పెంచుతారు. అయితే ఎకరం తోటలో ఈరకం మామిడిచెట్లు రెండు నుంచి ఐదులోపే ఉంటాయి. బెంగుళూర రకం మామిడికి ఇటీవల కాలంలో గిరాకీ పెరిగింది. చిత్తూరు జిల్లాలోని జ్యూస్‌ఫ్యాక్టరీలు ఈమామిడిని కొనుగోలు చేస్తాయి. ఇటీవల మామిడి రైతులు ఒడిదుడుకులు ఎదుర్కొనటంతో ప్రభుత్వం మార్కెట్‌యార్డు నిర్మాణానానికి శ్రీకారం చుట్టింది. దాదాపు రూ.రెండు కోట్లు మంజూరు కాగా వాటితో ప్రస్తుతం రూ.కోటిల వ్యయంతో వీరేపల్లి గ్రామంలో దగ్గర 3.87ఎకరాలతో నిర్మాణాలు ప్రారంభ దశలో ఉన్నాయి. మార్కెట్‌ యార్డు నిర్మాణం పూర్తయితే ఈప్రాంతపు మామిడి పరిస్థితి మెరుగవుతుందని రైతులు ఆశిస్తున్నారు.

కృషి విజ్ఞాన కేంద్రం

దర్శిలో ఆచార్య ఎన్‌.జి.రంగా విశ్వవిద్యాలయ ఆధ్వర్యంలో పదేళ్ల సంవత్సరాల క్రితం కొత్త వంగడాలను కనుగొనడానికి, రైతులకు పంటల సాగుపై సలహాలు, సూచనలు ఇచ్చేందుకు నెలకొల్పారు. ప్రస్తుతం నలుగురు శాస్త్రవేత్తలు వరి, ఆముదం, కంది తదితర పంటలపై పరిశోధనలు చేస్తున్నారు. ఇటీవలే కంది నూతన వంగడం తయారు చేశారు.

ఆధారము: ఈనాడు

ప్రాజెక్టులు

వెలుగొండ ప్రాజెక్టు

ప్రకాశం, కడప, నెల్లూరు జిల్లాల్లోని 30 మండలాల పరిధిలో ఉన్న 4.47 లక్షల ఎకరాలకు సాగునీరు, 15.25 లక్షల మంది ప్రజలకు తాగునీరు అందించే లక్ష్యంతో ఈ ప్రాజెక్టును నిర్మిస్తున్నారు. రూ. 5,150 కోట్ల వ్యయంతో దీని నిర్మాణం చేపట్టారు.గొట్టిపడియ, సుంకేసుల గ్యాప్‌ల పనులు పూర్తయ్యాయి. కాకర్ల గ్యాప్‌ పనులు కొనసాగుతున్నాయి. ఈ ప్రాజెక్టు నిర్మాణంతో 53.50 టీఎంసీల నీటిని నిల్వ చేసే అవకాశం ఉంది. గొట్టిపడియ కాలువ పనులు పూర్తికాక తేగలేరు కాలువ పనులు పురోగతిలో ఉన్నాయి. జిల్లాకు మొదటి దశలో 1.19 లక్షల ఎకరాలకు, రెండో దశలో 3.27 లక్షల ఎకరాలకు నీరివ్వాలని నిర్ణయించారు. ఈ ప్రాజెక్టు నిర్మాణం నిమిత్తం 39,048 ఎకరాల భూమిని సేకరించాల్సి ఉండగా ఇప్పటికి 20,205 ఎకరాలను సేకరించారు.

గుండ్లకమ్మ ప్రాజెక్టు

గుండ్లకమ్మ నది నల్లమల్ల అటవీ ప్రాంతంలోని గుండ్ల బ్రహ్మేశ్వరం వద్ద పుట్టి దాదాపు 216 కి.మీ.లు ప్రయాణించి మల్లవరం వద్దకు చేరుతుంది. పైభాగాన కంభం చెరువు తరువాత ఏవిధమైన రిజర్వాయర్లు లేక ఏటా 27 శతకోటి ఘనపుటడుగుల నీరు సముద్రం పాలవుతోంది. జలయజ్ఞంలో భాగంగా 12.845 టీఎంసీల సామర్థ్యంతో మల్లవరం వద్ద గుండ్లకమ్మ ప్రాజెక్టును చేపట్టారు. ఈ ప్రాజెక్టు ద్వారా ఖరీఫ్‌లో 62,368 ఎకరాలకు, రబీలో 80,060 ఎకరాలకు సాగునీరు అందించే లక్ష్యంతో రూ. 592 కోట్లతో ప్రాజెక్టును నిర్మించారు. 2008 నవంబరులో దివంగత ముఖ్యమంత్రి డాక్టర్‌ వై.ఎస్‌.రాజశేఖర్‌రెడ్డి చేతుల మీదుగా ఈ ప్రాజెక్టు నుంచి కాలువలకు నీరు విడుదల చేశారు. ఇప్పటివరకు రూ. 485.98 కోట్లు ఖర్చు చేశారు. కోర్టు వివాదాల కారణంగా కాలువ నిర్మాణాలు కొంత పెండింగ్‌లో ఉన్నాయి. ప్రాజెక్టు కారణంగా 12 గ్రామాలు ముంపుకు గురవుతుండగా నాలుగు గ్రామాలకు పునరావాసం కల్పించారు.

రాళ్లపాడు ప్రాజెక్టు

జిల్లాలో ప్రధాన ప్రాజెక్టులో రాళ్లపాడు జలాశయం ఒకటి. కందుకూరు నియోజకవర్గంలో మధ్యతరహాప్రాజెక్టు రాళ్లపాడు కింద 16,500 ఎకరాలు అధికారికంగా, అనధికారికంగా ఎనిమిదివేల ఎకరాలు సాగవుతోంది. తాగు, సాగునీటికి మూడు మండలాలకు కల్పతరువుగా పనిచేస్తోంది. వ్యవసాయానికి అనుకూలంగా ఉంటుంది. కుడికాలువ 20కిలోమీటర్లు పొడవు, ఎడమకాలువ మూడు కిలోమీటర్ల పొడవున ఉంటుంది. ప్రాజెక్టులో 1.01 టీఎంసీ నీటిని నిల్వచేసే సామర్ధ్యం ఉంది.

రామతీర్థం ప్రాజెక్టు

నాగార్జున సాగర్‌ ప్రాజెక్టు ఒంగోలు బ్రాంచి కాలువ మీద రామతీర్థం వద్ద 1.516 టీఎంసీల నీటి నిల్వ సామర్థ్యంతో రూ. 50 కోట్లు వ్యయంతో ఈ ప్రాజెక్టును చేపట్టారు. ఒంగోలు, కందుకూరు మున్సిపాల్టీలతో సహా 56 చెరువులకు తాగునీరు అందించడంతోపాటు సాగరు కాలువ పరిధిలోని 72,874 ఎకరాల ఆయకట్టును స్థిరీకరించాలనే ఉద్దేశంతో ఈ రిజర్వాయర్‌ను నిర్మించారు. రూ. 48.14 కోట్లతో ప్రాజెక్టు పనులు పూర్తయ్యాయి. 2009, ఫిబ్రవరిలో దివంగత ముఖ్యమంత్రి డాక్టర్‌ వై.ఎస్‌.రాజశేఖర్‌రెడ్డి చేతులమీదుగా ఈ రిజర్యాయర్‌ను ప్రారంభించారు.

పాలేరు రిజర్వాయర్‌ ప్రాజెక్టు

పొన్నలూరు మండలం సంగమేశ్వరం వద్ద పాలేరు నదిపై రూ. 50.50 కోట్ల వ్యయంతో ఈ ప్రాజెక్టు నిర్మాణం చేపట్టారు. పొన్నలూరు, మర్రిపూడి, కొండపి, జరుగుమల్లి మండలాల్లోని 15 గ్రామాలకు తాగునీరు, 9,500 ఎకరాలకు తాగునీరు అందించాలనే లక్ష్యంతో ఈ ప్రాజెక్టు నిర్మాణాన్ని తలపెట్టారు.

కొరిశపాడు ఎత్తిపోతల పథకం

కొరిశపాడు ఎత్తిపోతల పథకం గుండ్లకమ్మ ప్రాజెక్టు అంతర్భాగం నుంచి 1.33 టీఎంసీల నీటిని తోడి అద్దంకి, సంతనూతలపాడు నియోజకవర్గాల్లోని కొరిశపాడు, నాగులుప్పలపాడు మండలాల పరిధిలోని దాదాపు 20 వేల ఎకరాలకు సూక్ష్మసేద్యం కింద నీరు ఇవ్వటానికి ఉద్దేశించినది. ఈ రెండు మండలాల్లోని 12 గ్రామాల్లో ఏ నీటి వసతీ లేని గ్రామాలకు ఈ పథకం ప్రయోజనకారి.

కనపర్తి ఎత్తిపోతలు

గుండ్లకమ్మ నదిపై నిర్మించిన కనపర్తి ఎత్తిపోతల పథకం ఉత్తమ ఎత్తిపోతల పథకంగా రాష్ట్రస్థాయిలోనే గుర్తింపు పొందింది. దీని ఆయకట్టు పరిధిలో 4,900 ఎకరాలు అధికారికంగా, 1,000 ఎకరాలు అనధికారికంగా వరి సాగవుతోంది. ఎకరాకు 40 నుంచి 50 బస్తాలు వరిపండే ఈభూముల్లోనే ప్రభుత్వం 1,785 ఎకరాలు సేకరించి 4 వేల మెగావాట్ల థర్మల్‌ విద్యుత్తు కేంద్రం నిర్మించాలని భూసేకరణకు నోటిఫికేషన్‌ ఇవ్వగా రైతులు తీవ్ర నిరసన వ్యక్తం చేస్తూ వివిధ రూపాలలో ఆందోళనలు ఉద్యమాలు, ధర్నాలు, చేస్తున్నారు.

ఆధారము: ఈనాడు

నదులు

జిల్లాలో గుండ్లకమ్మ, మూసినది, మన్నేరు, పాలేరు నదులు ప్రవహిస్తున్నవి. ఇవికాక గుడిసెలేరు, సగిలేరు, తమ్మిలేరు మొదలైన చిన్నతరహా నదులు, నల్లవాగు, దగురువాగులాంటి చిన్నవాగులు కూడా ప్రవహిస్తున్నాయి. ఇందులో 220 కిలోమీటర్ల పొడవున గుండ్లకమ్మ నది ప్రవహిస్తోంది. ఈనదిలోని నీరు త్రాగునీటికి, వ్యవసాయ అవసరాలకు ఉపయోగపడుతోంది. పైన నాలుగు నదుల నుండి జిల్లాలో అనేక చోట్ల ఎత్తిపోతల పథకాల ద్వారా వేలాది ఎకరాలు సాగవుతోంది.

ఆధారము: ఈనాడు

3.01521216974
venkat Sep 19, 2016 10:11 AM

గుండాలక్కమ్మ నదీ వెల్లంపల్లి తూర్పున ప్రవహించే.నేను ఈ నదిలో ఈత నేర్చుకున్న ఈ నది నీరు నిండి ప్రవహిస్తూ నది సమీపంలో జీవిస్తున్నా వ్యక్తులకి సహాయపడుతుంది అని ఆశిస్తున్నాము.ప్రజలకు నా ప్రార్థన " దయచేసి డ్రైనేజీ నీటిని నదిలో కలపకండి

మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు