অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

నీటిని వంచగలమా ?

నీటిని వంచగలమా ?

ఆ రోజు కెమిస్ట్రీ మేజిక్ కు మెజీషియన్ సుబ్బు విద్యార్థుల్ని కెమిస్ట్రీ ల్యాబ్ లోకి తీసుకెళ్లాడు. ధారగా పై నుంచి కిందికి పడుతున్న నీటిని మనం వంగేటట్లు చేయగలమా, మీలో ఎవరైనా చెప్పండి అని అడిగాడు. అదెలా సాధ్యం! మనం చేయలేం అన్నారంతా. కానీ నేను చేసి చూపిస్తానన్నాడు మెజీషియన్. అంతా మెజీషియన్ వైపు ఆశ్చర్యంగా చూశారు.

మెజీషియన్ తన జేబులోంచి ఒక చిన్న దువ్వెన తీశాడు. తలకి కొబ్బరినూనె రాసుకోలేదేమో జుట్టు చింపిరి జుట్టులాగా పొడిగా ఎగురుతూ ఉంది. దువ్వెనతో జుట్టును చాలా సార్లు దువ్వాడు. ల్యాబ్ సింక్ కు అమర్చిన కుళాయిని నెమ్మదిగా విడిచిపెట్టాడు. సన్నటి నీటిధార పడుతోంది. మెజీషియన్ తన చేతిలోని దువ్వెనను నీటిధారకు దగ్గరగా తీసుకొచ్చాడు. అద్భుతం! నీటిధార ఏదో మంత్రం వేసినట్లు దువ్వెనవైపు వంగింది. మెజీషియన్ ఆ దువ్వెనను ధారకు మరోవైపుకు మార్చాడు. నీటిధార మళ్లీ దువ్వెనవైపుకే వంగింది. ఆశ్చర్యపడడం విద్యార్థుల వంతయ్యింది. అంతా చప్పట్లు కొట్టారు.

ఇలా ఎందుకు జరిగింది?

ఇదేమీ మాయ కాదు, మంత్రం కాదు. ఇది స్థిరవిద్యుత్ మహిమ మాత్రమే. పదార్థం పరమాణువులతో నిండి ఉందనీ, పరమాణువు కేంద్రకంలో ధనావేశిత ప్రోటాన్లు, తటస్థంగా ఉండే న్యూట్రాన్ లు ఉంటాయనీ, కేంద్రకం వెలుపల నిర్ధిష్ట కక్ష్యల్లో రుణావేశం కలిగిన ఎలక్ట్రాన్లు పరిభ్రమిస్తుంటాయని మీకు తెలుసు. కేంద్రకంలోని ప్రోటాన్ ల సంఖ్య, వెలుపల ఎలక్ట్రాన్ ల సంఖ్య సమానంగా ఉండడం వల్ల పరమాణువు మొత్తం మీద తటస్థంగా ఉంటుంది.

రెండు వస్తువుల్ని ఒకదానితో ఒకటి రుద్దినప్పుడు ఒక వస్తువు నుంచి మరోదానికి కొన్ని ఎలక్ట్రాన్ లు దూకుతాయి. ఎలక్ట్రాన్ లను స్వీకరించిన వస్తువుకు రుణావేశం, కోల్పోయిన వస్తువుకు ధనావేశం ఏర్పడతాయి. అప్పుడు విరుద్ధ ఆవేశాలున్న ఆ వస్తువులు రెండూ ఒకదాన్నొకటి ఆకర్షించుకుంటాయి.

ఒక పొడిగా ఉన్న నైలాన్ దువ్వెనను తీసుకుని, పొడిగా, శుభ్రంగా ఉన్న జుట్టును సుమారు 10 సార్లు దువ్వాలి. అప్పుడు జుట్టు నుంచి దువ్వెన ఎలక్ట్రాన్లను గ్రహించి రుణావేశం పొందుతుంది. జుట్టులోని వెంట్రుకలకు ధనావేశం ఉండడం వల్ల ఆ వెంట్రుకలు ఒక దాన్నొకటి వికరించుకుని నిటారుగా నిక్కపొడుచుకున్నట్లు కన్పిస్తాయి.

రుణావేశం ఉన్న దువ్వెనను కుళాయి నుంచి పడుతున్న సన్నటి నీటిధార (1.5 మి.మీ. వ్యాసం)కు దగ్గరగా, దానిని తాకకుండా ఉంచాలి. నీటిధార దువ్వెన వైపునకు వంగుతుంది. దువ్వెనను నీటిధార మరోవైపుకు మార్చితే మళ్లీ దువ్వెన వైపునకు వంగుతుంది. దువ్వెనను నీటిధారకు దగ్గరగా తెచ్చినప్పుడు, నీటిలో విద్యుదావేశాలు వేరు పడి, దువ్వెన వైపునకు ధనావేశం చేరుతుంది. విరుద్ధ విద్యుదావేశాలు ఆకర్షించుకుంటాయి కదా! అందుకే నీటిధార దువ్వెన వైపునకు వంగుతుంది.

గాలిలో తేమ ఎక్కువగా ఉంటే, వస్తువు ఉపరితలం మీద పల్చటి నీటిపొర ఏర్పడుతుంది. నీటి పొర కప్పిన వస్తువులను ఒకదానితో ఒకటి రుద్దినా, ఆ నీటిపొర ఎలక్ట్రాన్లను ఒక వస్తువు నుంచి ఇంకో వస్తువుకు ఎగరకుండా అడ్డుకుంటుంది. అప్పుడు ఈ మేజిక్ సాధ్యం కాదు.

దువ్వెన బదులు రబ్బరు బెలూన్ ను ఉపయోగించి కూడా ఈ మేజిక్ చేయవచ్చు.

చివరిసారిగా మార్పు చేయబడిన : 1/22/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate