పంచుకోండి
వ్యూస్
  • స్థితి: సవరణ కు సిద్ధం

యునాని

భారతదేశంలో యునాని వైద్య విధానానికి ఒక ఆకర్షణీయమైన, సుదీర్ఘ చరిత్ర (రికార్డ్) ఉంది. ఇంచుమించు 11వ శతాబ్ద కాలంలో అరబ్బులు మరియు పర్షియన్లచే ఇది భారతదేశంలో ప్రవేశపెట్టబడింది. ఈ రోజు యునాని విధానంలో వైద్యాన్ని అనుసరించడానికి సంబంధించినంత వరకూ ప్రపంచ అగ్రగామిదేశాలలో భారతదేశం ఒకటిగా ఉంది.

పరిచయం

భారతదేశంలో యునాని వైద్య విధానానికి ఒక ఆకర్షణీయమైన, సుదీర్ఘ చరిత్ర (రికార్డ్) ఉంది. ఇంచుమించు 11వ శతాబ్ద కాలంలో అరబ్బులు మరియు పర్షియన్లచే ఇది భారతదేశంలో ప్రవేశపెట్టబడింది. ఈ రోజు యునాని విధానంలో వైద్యాన్ని అనుసరించడానికి సంబంధించినంతవరకూ ప్రపంచ అగ్రగామిదేశాలలో భారతదేశం ఒకటిగా ఉంది. అతి పెద్ద సంఖ్యలో యునాని భారతదేశం యొక్క విద్య, పరిశోధన మరియు ఆరోగ్య పరిరక్షణ సంస్ధలను కలిగివుంది.

యునాని వైద్య విధానం, దాని పేరుకు తగ్గట్టుగానే, గ్రీస్ లో పుట్టింది. ఈ యునాని వైద్య విధానం హిప్పోక్రేట్స్ చే పునాది వేయబడింది. చాలావరకు గ్రీకు వైద్య శాస్త్రాన్ని జాగ్రత్త పరచి, అరబ్బి భాషలోకి కేవలం దీనిని అనువందించడమే కాకుండా అరబ్బులు ఆనాటి వైద్యాన్ని వారి వంతు కృషితో వృధ్ది చేసి, సుసంపన్నం చేసుకోవడం జరిగింది. తద్వారా ఈ వైద్య విధానం యొక్క ప్రస్తుత రూపం అరబ్బులకే చెందుతుంది. ఈ ప్రక్రియలో వారు భౌతిక, రసాయనిక, వృక్షశాస్త్రం, శరీరనిర్మాణ శాస్త్రం, శరీర(ధర్మ) శాస్త్రం, రోగలక్షణ శాస్త్రం, చికిత్సా శాస్త్రం మరియు శస్త్రచికిత్స శాస్త్రాలను విస్తృతస్ధాయిలో వినియోగించుకున్నారు.

ఈజిప్ట్, సిరియా, ఇరాక్, పర్షియా, ఇండియా, చైనా మరియు ఇతర మధ్యప్రాచ్య దేశాల సమకాలీన సాంప్రదాయబద్ధమైన వైద్య విధానాలలో ఏది అత్యంత శ్రేష్టమైనదో దానిని స్వీకరించడం ద్వారా ఈ యునాని వైద్య విధానాలు శక్తివంతమైన, సుసంపన్నమైనవిగా వృద్ధి చేయబడ్డాయి. అరబ్బులు యునాని వైద్య విధానాన్ని భారతదేశంలో ప్రవేశపెట్టారు. అది అతి త్వరగా, బలంగా పాతుకుపోయింది . ఢిల్లీ సుల్తానులు (పాలకులు) యునాని పండితులకు మంచి ప్రాపకాన్ని, పొషణను అందించేవారు. చివరికి కొంతమందిని ప్రభుత్వ ఉద్యోగులుగానూ మరియు ఆస్ధాన వైద్యులు గానూ కూడా నియమించారు.

భారతదేశంలో బ్రిటిష్ వారి పాలనలో ఈ విధానానికి తీవ్ర విఘాతం కలిగింది. అలోపతి విధానం ప్రవేశపెట్టబడి బాగా నాటుకుపోయింది. ఇది యునాని వైద్య విధానానికి సంబంధించన విద్య, పరిశోధన మరియు సాధనలలో ప్రతి బంధకాన్ని కలిగించింది. ఇంచుమించు రెండు శతాబ్దాలపాటు, యునాని వైద్య విధానంతో పాటుగా సాంప్రదాయ బధ్దమైన వైద్య విధానాలు నిర్లక్ష్యం చేయబడ్డాయి. రాజ్యాదరణ, ప్రాపకం, పోషణ ఉపసంహరింపబడినా, ఈ విధానం పట్ల ప్రజలలో ఇంకా విశ్వాసం ఉండడం వల్ల, అంతగా హాని కలుగలేదు. అలాగే దీని సాధన, ఆచరణ ఇంకా కొనసాగుతూనే ఉండేవి. కేవలం ఢిల్లీకు చెందిన షరీఫ్ కుటుంబం, లక్నోకు చెందిన అజీజి కుటుంబం మరియు హైదరాబాదుకు చెందిన నిజాం కుటుంబాల కృషి వల్లనే ప్రధానంగా, ఈ యునాని వైద్య విధానం బ్రిటిష్ పాలనలో బతికి బట్ట కట్టగలిగింది.

స్వతంత్రం వచ్చిన తరువాత, ఇతర వైద్య విధానాలతో పాటుగా ఈ యునాని వైద్య విధానం కూడా, కేంద్ర ప్రభుత్వం మరియు దాని ప్రజానీకం యొక్క ప్రాపకం, పోషణతో కొత్త ఉత్సాహాన్ని పుంజుకుంది. భారత ప్రభుత్వం ఈ విధానాన్ని సర్వదా అభివృద్ధి చేయడానికి అనేక చర్యలను చేపట్టింది. దీనికి సంబంధించిన విద్యను, శిక్షణను క్రమబద్ధీకరించి, ప్రోత్సహించడానికి అనేక చట్టాలను ప్రవేశపెట్టింది. అలాగే, పరిశోధనా సంస్ధలను, పరీక్షలను చేసే ప్రయోగశాలలను, మందుల ఉత్పత్తి, ఈ విధానం యొక్క సాధన కోసం ప్రామాణికం చేయబడిన నిబంధనలను కూడా తయారుచేసింది. ఈ నాడు గుర్తింపును పొందిన వైద్యులు, ఆసుపత్రులు మరియు విజ్ఞాన మరియు పరిశోధన సంస్ధలతో యునాని వైద్య విధానం, జాతీయ ఆరోగ్య పరిరక్షణనందించే విధానంలో ఒక అంతర్గత భాగమై ఉంది.

యునాని యొక్క సూత్రాలు మరియు భావనలు

యునాని వైద్య విధానం యొక్క సిధ్ధాంతం హిప్పోక్రేట్స్ యొక్క సుప్రసిద్ధ నాలుగు రసాల సిద్ధాంతంపై ఆధారపడి ఉంది. ఇది శరీరంలో రక్తం, ఖఫం, పసుపు పైత్యరసం మరియు నలుపు పైత్యరసం అనే 4 రసాలున్నాయన్న భావనను ధృవీకరిస్తోంది.

మానవ శరీరం ఈ క్రింది 7 భాగాలతో నిర్మితమై ఉన్నట్లు పరిగణింపబడుతోంది:

  • ఆర్కన్ (ప్రకృతి శక్తులు)
  • మిజాజ్ (స్వభావం)
  • అఖ్లాట్ (రసాలు)
  • ఆజా (అవయవాలు)
  • అర్వాహ్ (ఆత్మశక్తులు)
  • కువా (మానసిక శక్తి)
  • అఫాల్ (విధులు)

అర్కాన్ (ప్రకృతి శక్తులు)

మానవ శరీరంలో ఈ క్రింది విధంగా 4 ప్రకృతి శక్తులుంటాయి. ఈ నాల్గింటిలో ప్రతి శక్తి కూడా దాని స్వంత స్వభానాన్ని కలిగి ఉంటుంది:

శక్తి

స్వభావం

గాలి

వేడి మరియు తేమగా ఉండడం

భూమి

శీతలం మరియు పొడిగా ఉండడం

అగ్ని

వేడి మరియు పొడిగా ఉంటటం

నీరు

శీతలం మరియు తేమగా ఉండడం

మిజాజ్ (స్వభావం)

యునాని విధానంలో వ్యక్తి యొక్క స్వభావం అద్వీతీయమైనదిగా పరిగణింపబడుతుంది కాబట్టి, చాలా ముఖ్యమైనది. ఈ శక్తుల పరస్పర చర్యల యొక్క ఫలితమే ఒక వ్యక్తి యొక్క స్వభావం అని విశ్వసించబడుతోంది, ఈ నాలుగు శక్తుల ఉపయోగం కూడా సమపాళ్లలో, సమ పరిమాణంలో ఉన్నప్పుడు ఈ స్వభావం వాస్తవంగా సమంగా, సముచితమైనదిగా ఉండవచ్చు. సాధారణంగా ఈ స్ధితి ఉండదు. ఈ స్వభావం తగినంతగా ఉండవచ్చు. దీని అర్ధం కేవలం కావలసినంత మొత్తంలో ఉండవలసిన అనుకూలమైన, యోగ్యమైన స్వభావం, చివరిగా, స్వభావం అనుచితంగా, తగినంతగా ఉండకపోవచ్చు. మానవశరీరం ఆరోగ్యవంతంగా పని చేయడానికి వాటికి కావలసిన ప్రకారం ఈ విషయంలో స్వభావం న్యాయబధ్దంగా పంపిణీ జరగడం లోపిస్తుంది.

అఖ్లాట్ (రసాలు)

రసాలు (హ్యూమర్స్) అంటే తీసుకున్న ఆహారం జీర్ణమై, పరివర్తనం చెందిన తరువాత మరియు జీవ క్రియలు జరిగిన తరువాత ఉత్పత్తి కాబడే, శరీరంలో తడిగా మరియు ద్రవరూపంలో ఉండేవి. ఈ రసాలు శరీరానికి పోషకాలనందించడం, పెరుగుదలను మరియు లోపాలను సరిదిద్దడంతో పాటు శక్తినిస్తూ, వ్యక్తి యొక్క మరియు అతని జాతుల సంరక్షణ కోసం ఈ విధులను ఇవి నిర్వహిస్తాయి. శరీరంలోని వివిధ అవయవాలను తడిగా ఉంచే పనిని, అలాగే శరీరానికి పొషకాలనందించే పనిని కూడా ఇవి నిర్వహిస్తూ ఉంటాయి. ఆహారం జీర్ణక్రియలో నాలుగు దశలు ఉంటాయి.

  1. జఠర రసంతో జీర్ణమైనప్పుడు ఆహారం అన్నధాతుసారంగా మారి, కాలేయంలోకి పేగులలో ఉండే రక్తనాళాల ద్వారా చేరవేయబడడం.
  2. కాలేయసంబంధిత జీర్ణమైన ఆహారం అన్నరసంలోకి మార్చబడి వ్యత్యాసంతో ఉండే వివిధ పరిమాణాలలో రక్తం అతి పెద్ద పరిమాణంలో ఉండే 4 రకాల రసాలుగా మారుతుంది. అ విధంగా కాలేయాన్ని వదిలిన రక్తం, ఖఫం, పసుపు పైత్య రసం మరియు నలుపు పైత్య రసాలతో, కలిసి మిశ్రమంగా మారుతుంది. మూడవ మరియు నాల్గవ ఆహారం జీర్ణమయ్యే దశలను,
  3. నాళాలు, వాహికల జీర్ణక్రియ గానూ, మరియు
  4. ధాతువు, కణజాలపు జీర్ణక్రియ గానూ పిలువబడతాయి. రక్తనాళాల ద్వారా ఈ రసాలు ప్రవహిస్తున్నప్పుడు ప్రతి ధాతువు కూడా తన ఆకర్షించే గుణంతో దాని పోషకాన్ని తనలో లీనం చేసుకుని, దాని ఇముడ్చుకునే శక్తితో దానిని అలాగే తనలో ఉంచుకుంటుంది. అప్పుడు జీర్ణశక్తి వంటబట్టే విధమైన శక్తితో సంయోగం చెంది దానిని ధాతువులుగా మారుస్తుంది. ఈ దశలో రసాలలో ఉండే వ్యర్ధ పదార్ధం బహిష్కరణ చేసే శక్తితో, బయటకు విసర్జింపబడుతుంది. ఈ పధ్దతి ప్రకారం, రసాలలోని సమతుల్యంలో ఏమైనా అఘాతం సంభవించినప్పుడు, అది వ్యాధికి కారణమవుతుంది. అందుచేత, చికిత్స రసాలలో సమతుల్యతను తిరిగి పునరుధ్దరించడంపై దృష్టిని పెడుతుంది.

ఆజా (అవయవాలు)

ఇవి మానవ శరీరంలోని వివిధ అవయవాలు ఇవి. ప్రతి అవయవం యొక్క ఆరోగ్యం లేక అనారోగ్యం, మొత్తం శరీరం యొక్క ఆరోగ్యపరిస్ధితిని ప్రభావితం చేస్తుంది.

అర్వాహ్ (ఆత్మశక్తులు)

గాలి పీల్చడం ద్వారా పొందే రూహ్ (ఆత్మశక్తి) వాయువు (గ్యాస్)ను పోలి ఉండే పదార్ధం. శరీరంలో అన్ని జీవ ప్రక్రియలకు సంబంధించిన కార్యకలాపాలకు ఇది సహకరిస్తుంది. అన్ని రకాలైన కువాహ్ (శక్తులను) లు మరియు హరారత్ ఘరిజియాహాను ఉత్పత్తిచేయడానికి అఖ్లత్ లతీఫాను మండిస్తుంది. ఇవి శరీరం యొక్క అన్ని అవయవాలకు శక్తినిచ్చే ఆధారాలు. ఇవి జీవన శక్తులుగా అఖ్లత్ లతీఫాను పరిగణింపబడతాయి అందుచేత వ్యాధి నిర్ధారణలోనూ, వ్యాధి చికిత్సలోనూ ఇవి చాలా ముఖ్యమైనవి. మొత్తం శరీరాన్ని మరియు అవయవాలను పని చేయించడానికి, వివిధ శక్తులను మోసుకెళ్లే వాహనాల వంటివి ఇవి.

కువా (మానసిక శక్తులు)

ఇని మూడు రకాలైన శక్తులు:

  1. కువా తబీయాహ్ లేక సహజ శక్తి:ఇది జీవక్రియ మరియు పునరుత్పత్తికి సంబంధించిన శక్తి. కాలేయం ఈ శక్తికి పీఠం మరియు ఈ ప్రక్రియ శరీరంలో ప్రతి ధాతువు లోనూ నిర్వహించబడుతుంది. పోషకాల ప్రక్రియతోనూ మరియు మానవ శరీరం యొక్క పెరుగుదలతోనూ ఈ జీవ ప్రక్రియ సంబంధం కలిగివుంటుంది. ఆహారం నుండి పోషకత్వం లభిస్తూ, శరీరంలో అన్ని అవయవాలకు అందించబడుతుంటే, పెరుగుదల శక్తి అనేది మానవ అవయవ నిర్మాణపు మరియు పెరుగుదలకు బాధ్యతను కలిగి వుంటుంది.
  2. కువాహ్ నఫ్సారియాహ్ లేక మానసిక శక్తి: ఇది నరాలకు మరియు మానసిక శక్తికి సంబంధించినది. ఇది మెదడులో ఉండి, మనసు యొక్క గ్రహించుకోగలిగే శక్తికి సకారణయుతంగా ఆలోచించగలిగే శక్తికి మరియు చలనశక్తికి కారణమైనది. ఇంద్రియ గ్రహణశక్తి ఊహలను, తలంపులను, ఇంద్రియజ్ఞానాన్ని తెలియజేస్తూ వుంటే, చలనశక్తి, ఇంద్రియ జ్ఞానానికి ప్రతిచలనాలను తీసుకు వస్తుంది.
  3. కువాహ్ హేవానియాహ్ లేక జీవన లేక ప్రాణాధారమైన శక్తి : ఇది జీవ పోషణ మరియు నిర్వహణకు బాధ్యత వహిస్తూ, అన్ని అవయవాలను మానసిక శక్తికి సమ్మతంగా పని చేసేటట్లు వీలు కలిగిస్తుంది. ఈ శక్తి స్ధానం గుండెలో ఉంటుంది. ఇది ధాతువులలో జీవనాన్ని నడిపిస్తూ ఉంటుంది.

అఫాల్ (విధులు)

శరీరం యొక్క అన్ని అవయవాల చలనాలు మరియు విధులకు సంబంధించిన అంశం ఇది. ఆరోగ్యకరంగా ఉన్న శరీరంలో వివిధ అవయవాలన్నీ సరైన రీతిలో ఉండడమే కాకుండా వాటి వాటి విధులను సక్రమంగా నిర్వహిస్తూ ఉంటాయి. మానవ శరీరం యొక్క విధులను గురించి పూర్తిగా అన్ని వివరాలతోనూ తెలసుకోవలసిన అవసరాన్ని ఇది కలిగిస్తుంది.

ఆరోగ్యం: శరీరంలో ఉండే అవయవాలన్నీ వాటి విధులను సక్రమంగా, మామూలుగా నిర్వహిస్తూ ఉండే స్ధితినే ‘ఆరోగ్యం’ అనేది తెలియజేస్తుంది. వ్యాధి అనేది దీనికి, అంటే ఆరోగ్యం అన్నదానికి పూర్తి వ్యతిరకమైన స్ధితి – ఇది ఒకటి, లేక కొన్ని శరీవావయవాల విధులు లేక వాటి స్వరూపాలు లోపభూయిష్టంగా ఉన్నప్పుడు ఉండే స్ధితి.

వ్యాధి నిర్ధారణ: యునాని విధానంలో రోగనిర్ధారణ ప్రక్రియ రోగిని పరిశీలించి చూడడం మరియు శారీరక పరీక్ష అనే వాటిపై ఆధారపడి ఉంటుంది. ఒక వ్యక్తి ఏ విధమైన ఆనారోగ్యానికి గురయినా, అది ఈ క్రింది వాటి వల్లే ఆ పరిస్ధితి వచ్చిందని అనుకోవచ్చు.

  • అతను తయారుకాబడిన వివిధ పదార్ధాలు, వస్తువులు
  • అతని స్వభావ రీతి, నిర్మాణం మరియు అతనికున్నమానసిక శక్తుల బలం
  • అతినిని ప్రభావితం చేసే వివిధ రకాలైన బాహ్య శక్తులు
  • అతని భౌతిక విధులను నిర్వహించుకోవడంలోనూ, వీలైనంత వరకు అతనికి కలిగే ఇబ్బందులను తొలగించడంలోనూ ప్రకృతి యొక్క స్వంత ప్రయత్నాలు.

ఒకదానితో ఒకటి అంతర్లీనంగా సంబంధం కలిగివుండే అన్ని అంశాలనూ దృష్టిలో ఉంచుకుని వ్యాధి కారణాన్ని, దాని స్వభావాన్ని గుర్తించి, చికిత్స చేయడం నిర్ణయింపబడుతుంది. వ్యాధి నిర్ధారణ చేయడం, దానికి గల కారణాలను పూర్తిగా, క్షుణ్ణంగా మరియు వివరంగా పరీక్షించడంతో కూడి ఉంటుంది. దీనికోసం వైద్యులు ముఖ్యంగా నాడిని (నబ్జ్) చూడడం మరియు మల, మూత్రాల పరీక్ష పైనే ఆధారపడతారు. గుండె కొట్టుకుంటూ ఉండడం వల్ల సంభవించే ధమనుల ముకుళించుకునే మరియు విచ్చుకునే ప్రతిస్పందనను నాడి (నబ్జ్) అని అంటారు. నాడిని చూడడం మరియు మల, మూత్రాలను భౌతికంగా పరీక్షించి చూడడమే కాకుండా కొన్ని సాంప్రదాయబధ్దమైన మార్గాలు కూడా ఉన్నాయి. అవిః పరీక్షించడం, కొట్టుకోవడం, గాయాలు, దెబ్బలు మరియు గుప్త రోగాల లక్షణాల పరిశీలన అనేవి కొన్ని రోగ నిర్ధారణ చేయడంలో ఉపయోగించే పధ్ధతులు.

రోగ నివారణ

అనారోగ్యాన్ని నయం చేయడం అనేది ఎంత ఆందోళన కలిగిస్తుందో, వైద్య విధానానికి వ్యాధి నివారణ కూడా అంతే ఆందోళనను కలిగిస్తుంది. మానవులలో వ్యాధి ప్రథమ దశలో ఉన్నప్పుడే పరసరాలలో ఉండే పరిస్ధితుల మరియు జీవ్యావరణ పరిస్ధితులు వారి ఆరోగ్యంపై చూపించే ప్రభావం గుర్తించబడింది. నీటిని, ఆహారాన్ని మరియు గాలిని కాలుష్యం లేకుండా ఉంచవలసిన అవసరం గురించి నొక్కి చెప్పడం జరిగింది. ఆరోగ్య పరిరక్షణను మరియు వ్యాధుల నివారణలోనూ, ముందుగా కావలసిన ఆరు ప్రధానమైన అంశాలు (అసబ్ సిత్తా-ఏ-జరూరియాహ్) ఈ క్రింద పొందు పరచబడ్డాయి. అవిః

  • గాలి
  • ఆహారం, పానీయాలు
  • శారీరక కదలికలు మరియు విశ్రాంతి
  • మానసిక కదలిక మరియు విశ్రాంతి
  • నిద్ర, మెలుకువగా ఉండడం
  • ఖాళీ చెయ్యడం, అక్కడే నిలకడగా ఉండడం

ఆరోగ్యానికి స్వఛ్చమైన, పరిశుభ్రమైన మంచి గాలి అత్యంత అవసరమైనదిగా పరిగణించబడుతుంది. అవిసెన్నా అనే ప్రఖ్యాత అరబ్బీ వైద్యుడు, వాతారవణ మార్పు రోగిలో ఉండే అనేక వ్యాధులనుండి అతనిని విముక్తి చేస్తుందని గమనించాడు. ఇళ్లు విశాలంగా, గాలి, సరైన వెలుతురుతో ఉండవలసిన అవసరాన్ని గురించి నొక్కి చెప్పాడు.

స్వఛ్చమైన ఆహారాన్ని, అలాగే కుళ్లిపోని, మురిగిపోని, వ్యాధులను పుట్టించే అవకాశం లేని పదార్ధాన్ని తీసుకోవాలని సిఫార్సు చేయబడుతోంది. మురికి నీరు అనేక వ్యాధులకు వాహకంగా పరిగణింపబడుతుంది. అందుచేత, అన్ని రకాలైన మాలిన్యాలనుండి నీటిని దూరంగా ఉంచుకోవలసిన అవసరం గురించి ఈ విధానం గట్టిగా నొక్కిచెప్పబడుతోంది.

మంచి ఆరోగ్యాన్ని పోషించుకోవడానికి వ్యాయామాలు, అలాగే విశ్రాంతి తీసుకోవడం కూడా అత్యంత అవసరమైనవిగా పరిగణింప బడుతున్నాయి. కండరాల పెరుగుదలకు వ్యాయామం సహకరిస్తూ, పుష్టిగా ఉండేటట్లు చూస్తుంది. అలాగే రక్త సరఫరాను కూడా పెంచుతుంది, విసర్జన విధానాన్ని కూడా సరిగా పనిచేసేటట్లు చూస్తుంది. గుండెను, కాలేయాన్ని కూడా ఇది మంచి స్ధితిలో ఉంచుతుంది.

ఆరోగ్యంపై సంతోషం, దుఃఖం మరియు కోపం మొదలగు మానసిక అంశాల ప్రభావాన్ని ఈ విధానం విస్తృతంగా వ్రాత పూర్వకమైన ఆధారాలతో భధ్రపరిచి, నిరూపిస్తుంది. యునాని వైద్య విధానంలో, ఈ అంశంతో సంబంధం కలిగివున్న మానసిక చికిత్స అని పిలువబడే ఒక విభాగం ఉంది.

సాధారణ నిద్ర మరియు మెలకువగా ఉండడం అనేవి మంచి ఆరోగ్యానికి అవసరమైనవిగా పరిగణింపబడతాయి. నిద్ర శారీరక, మానసిక శాంతిని ఇస్తుంది. ఈ నిద్రలేమి శక్తిని పాడుచేసి, మానసిక అలసటకు మరియు జీర్ణ సంబంధిత ఇబ్బందులకు కారణమవుతుంది.

మంచి ఆరోగ్యం కోసం సరైన, సాధారణమైన విసర్జన ప్రక్రియలు జరుగుతూ ఉండడం అవసరం. శరీరంలో తయారవుతూ ఉండే వ్యర్ధ పదార్ధాలు పూర్తిగా విసర్జింపబడకపోతే లేక ఇందులో ఏమైనా ఆఘాతం లేక ఇబ్బంది లేక అవరోధం కలిగినప్పుడు, అది అనారోగ్యానికి, వ్యాధులకు దారితీస్తుంది.

వైద్య విధానంలో చికిత్సలు

ఈ విధానంలో రోగియొక్క సంపూర్ణ వ్యక్తిత్వాన్ని పరిగణనలోనికి తీసుకోవడం జరుగుతుంది. ప్రతి వ్యక్తి కూడా స్వంతంగా తనకంటూ ఒక ప్రాథమిక నిర్మాణాన్ని, భౌతికరూపాన్ని, అలంకరణను, ఆత్మరక్షణ యంత్రాంగాన్ని, వాతావరణ అంశాలపై ప్రతిస్పందనలను, ఇష్టాలనూ, అయిష్టాలనూ కలిగి వుంటాడు.

యునాని వైద్య విధానంలో ఈ క్రింది ప్రధాన చికిత్సా విధానాలు ఉన్నాయి:

ఒక పధ్ధతిలో/విధానంలో క్రమబధ్దీకరిస్తూ చేసే చికిత్స/వైద్యం (హజ్-బిల్-తద్బీర్)

వ్యర్ధ పదార్ధాలను తొలిగించడం, శరీర నిర్మాణ క్రమాన్ని మెరుగుపరచడం మరియు శరీరం యొక్క స్వయం రక్షణను కూడా మెరుగుపరచడం, ఆరోగ్య రక్షణ ద్వారా శారీరక నిర్మాణాన్ని మెరుగుపచడం కోసం ఒక పధ్ధతిలో/విధానంలో క్రమబధ్దీకరిస్తూ చేసే చికిత్స/వైద్య విధానంలో ప్రకృతి సిద్ధమైన ఒక చిట్కా వంటిది. మరోలా చెప్పాలంటే ఇవి అత్యంత శ్రేష్టమైనవిగా చెప్పబడే ‘విష పూరిత పదార్ధాల తొలగింపు పధ్దతులు’.

ఒక పధ్ధతిలో/విధానంలో క్రమబద్ధీకరిస్తూ చేసే ఈ చికిత్సలో ముఖ్యమైన చిట్కాలు ఈ చికిత్సా విధానంలో సమర్ధవంతంగా పనిచేస్తాయని పరిగణించబడే వ్యాధులతో సహ, ఇవి క్లుప్తంగా క్రింద వివరించబడ్డాయి:

  1. వెనిసెక్టియో (ఫసద్) ఈ క్రింది వాటికి ఈ చికిత్స సమర్ధవంతంగా పనిచేస్తుందని కనిపెట్టబడిందిః
    • రక్త సంబంధిత సమస్యలను సరిచేయడం మరియు అధిక రక్తపోటు నుండి ఉపశమనం.
    • రక్తంలో విషస్వభావం కలగకుండా మరియు వ్యర్ధ పదార్ధాలు పేరుకుపోకుండా నివారణ
    • శరీరంలోని వివిధ భాగాలనుండి వ్యర్ధ పదార్ధాల విసర్జన
    • జీవక్రియలను ప్రేరేపించడం
    • ఋతుక్రమ సంబంధిత ఇబ్బందులవల్ల కలిగే వ్యాధులను నయంచేయడం
    • మానసిక స్వభావంలో వేడి పుట్టించే అంశాలను సరిచేయడం
  2. కప్పింగ్ (ఆల్ హిజమా) (రోగి శరీరంపై ఖాళీ కప్పులను ఉపయోగించడం, (రక్తపు నమూనాలను రోగి యొక్క శరీర ఉపరితలం నుండి సేకరించడానికి): ఈ చికిత్సా వధ్దతి ఈ క్రింది వాటికి అనుసరింపబడుతుందిః
    • వ్యర్ధ పదార్ధాలనుండి చర్మాన్ని శుభ్రం చేయడం
    • అదిక ఋతుస్రావాన్ని లేక ముక్కునుండి రక్తాన్ని కారడాన్ని ఆపివేయడం
    • కాలేయ సంబంధిత వ్యాధులను సరిచేయడానికి
    • మూలవ్యాధికి, వృషణాలలోనూ మరియు గర్భాశయంలోను మంట, గజ్జి, బొబ్బలు మొదలైన వాటి చికిత్సకు
  3. చెమట కారడం (తారీక్): చెమట కారే సాధారణ ప్రక్రియ ద్వారా శరీరం, రక్తం మరియు శరీరంలోని ఇతర భాగాలనుండి వ్యర్ధ పదార్ధం విసర్జింపబడుతుంది. అధిక వేడిని తగ్గంచడంలో ఇది సహకరిస్తుంది. పొడి లేక తడి కాపడం పెట్టడం, వెచ్చటి నీటితో స్నానం చేయడం, మర్దన చేయడం మరియు వేడి గాలి ఉండే గదిలో రోగిని ఉంచడం వంటివి చెమట కారేలా చేసే ప్రక్రియకు చేసే కొన్నిచికిత్సా పధ్దతులు.
  4. అతిమూత్ర విసర్జన (ఇద్రార్-ఏ-బౌల్): విషపూరితమైన పదార్ధాలు, వ్యర్ధ ఉత్పత్తులు మరియు అపరిమిత, అధికంగా ఉండే రసాలు మూత్రం ద్వారా విసర్జింపబడతాయి. గుండె, కాలేయం, ఊపిరి తిత్తుల వ్యాధుల చికిత్సగా దీనిని ఉపయోగిస్తారు. ఈ చికిత్స కొన్నిసందర్భాలలో రోగిని చల్లగా ఉండే గదిలో కార్చోబెట్టి చల్లటి నీటిని ఉపయోగించడం ద్వారా ఈ అతిమూత్ర విసర్జన సంభవిస్తుంది.
  5. టర్కిష్ స్నానం (హమామ్) : ఇది ఈ క్రింది వాటికి సిఫార్సు చేయబడుతోంది:
    • వ్యర్ధపదార్ధలను విఛ్చిన్నం చేయడం మరియు చెమట కార్చడాన్ని అధికం చేయడం
    • స్వల్పంగా వేడిని కలుగజేయడం
    • పోషకాన్ని తగ్గించడం
    • కొవ్వును పెంచడం
    సాధారణ ఆరోగ్యానికి చన్నీటి స్నానం అభిలాషణీయం. సాధారణంగా పక్షవాతం మరియు కండరాల క్షయానికి సంబంధించిన వ్యాధుల చికిత్సకు మర్దన తర్వాత వేడినీటి స్నానాన్ని చేయిస్తారు.
  6. మర్దన (దల్క్, మాలిష్): మృదువుగా చేసే మర్దన ఉపశమనకారి మరియు విశ్రాంతిని, హాయిని కలిగించేది. పొడిగా, వెచ్చగా ఉండే మర్దన సువాసనను వెదజల్లుతూ, రక్త సరఫరాను పెంచేదైతే, నూనెతో చేసే మర్దన కండరాలకు ఉపశమనాన్ని కలిగించి, శరీరాన్ని మృదువుగా చేసేటటువంటిది.
  7. అస్వస్ధత, ఇబ్బంది కలిగినప్పుడు, కోపం వచ్చినపుడు చేపట్టే ప్రతిచర్య: బాధ, నొప్పి , దురదగా, మంటగా ఉన్నప్పుడు మరియు కోపం, చికాకుగా ఉన్నప్పుడు ఈ చిట్కా ఉపశమనాన్ని కలిగిస్తుంది. మంటగా ఉండడాన్ని తగ్గించి, పుళ్లను, వాపులను నయంచేస్తుంది.
  8. దహనీకరణం (వాత పెట్టుట – రక్త స్రావాన్ని అరికట్టడానికి చేపట్టే చర్య) (అమోల్-ఏ-కే): ఒక అవయవాన్నుండి విషపూరితమైన దుర్మాంసం ఇతర అవయవాలకు వ్యాపించడాన్ని ఇది నిరోధిస్తుంది. తుంటి ఎముకల జాయింట్లలో నొప్పి వచ్చినపుడు, ఈ చిట్కా చాలా ఉపయోగకారియని కనిపెట్టబడింది. ఈ చిట్కా ద్వారా కొన్ని అవయవాలకు అంటిపెట్టుకుని ఉండే హానికరమైన, వ్యాధిని పుట్టించే పదార్ధాలు, విడివడడం లేక పరిష్కరింపబడడం గాని జరుగుతుంది.
  9. విరేచనాన్ని కలిగించుట: పేగులను ఖాళీ చేసి, శుభ్రం చేయడానికి విరేచనకారకాలు విస్తృతంగా ఉపయోగించబడతాయి. దీనిని ఉపయోగించడానికి లిఖిత పూర్వకమైన నిబంధనలు ఉన్నాయి. సాధారణ జీవక్రియను ఈ పద్ధతి ప్రభావితం చేస్తుంది.
  10. డోకులు, వాంతి అవడం: తలనొప్పి , పార్శ్వం నొప్పి , గవదబిళ్లల వాపు, శ్వాసనాళ సంబంధిత న్యూమోనియా మరియు శ్వాసనాళ సంబంధిత ఉబ్బసానికి కూడా వాంతిని కలిగించే మందులు వాడబడతాయి. ఇది ఉన్మాదం, పిచ్చి, ఆవేశం మరియు విచారంగా, నిస్సత్తువగా ఉండడం వంటి మానసిక వ్యాధులను కూడా నివారిస్తుంది.
  11. వ్యాయామం (రియాజత్): మంచి ఆరోగ్య పోషణకు మరియు కొన్ని వ్యాధులకు చికిత్స చేయడానికి శారీరక వ్యాయామం ఉన్నతమైన, ముఖ్యమైన ప్రాధాన్యతను కలిగివుంది. ఇది ఉదరానికి మరియు జీర్ణాన్ని బలోపేతం చేయడానికి కూడా మంచిదిగా పరిగణింపబడుతుంది. వివిధ రకాలైన వ్యాయామాలకు నిర్దేశించ బడిన నిబంధనలు, సమయాలు మరియు పరిస్ధితులు ఉన్నాయి.
  12. రక్తాన్ని పీల్చడం (తలీఖ-ఏ-అలాఖ్): రక్తాన్నుండి చెడుపదార్ధాన్ని తీసివేయడానికి ఈ పధ్దతి ఉపయోగించబడుతుంది. శరీర వ్యాధులకు, తామర మొదలగు వాటికి ఇది ఉపయోగకారి. ఈ పధ్దతి దీనిని ఉపయోగించడంలో స్పష్టమైన షరతులను వివరించింది.

ఆహార సంబంధిత చికిత్స (హజ్-బిల్-ఘిజా)

యునాని చికిత్సలో ఆహారం ఒక కీలకమైన పాత్రను పోషిస్తుంది. ఆహారం యొక్క నాణ్యత మరియు పరిమాణం క్రమబధ్దీకరించడం వల్ల అనేక రకాలైన వ్యాధులు విజయవంతంగా చికిత్సచేయబడతాయి. స్పష్టమైన కొన్ని వ్యాధులకు సంబంధించి, ఆహారం అనే అంశం (సబ్జెక్ట్)పై అనేక ప్రచురణలు ఉన్నాయి. కొన్ని ఆహారాలు విరేచనకారులుగా, మూత్ర విసర్జన కలిగించేట్లుగా మరియు చెమటను పుట్టించేవిగా పరిగణించ బడ్డాయి.

ప్రకృతిసిద్ధమైన మందులతో చికిత్స (హజ్-బిల్-దవా)

ఈ మాదిరి చికిత్సలో సహజమైన, ప్రకృతిసిద్ధమైన మందులను ఉపయోగించడం జరుగుతుంది, జంతువుల మందులు మరియు ఖనిజాలనుండి లభించే మందులను చాలావరకూ వనమూలికలు ఉపయోగించడం జరుగుతుంది. స్ధానికంగా దొరుకుతాయి కాబట్టి ప్రకృతిసిద్ధమైన మందులనే వాడడం జరుగుతుంది. ఇవి శరీరంపై ఏవిధమైన తదుపరి ప్రభావాలను కలిగి ఉండవు లేక అసలు ఉండకపోవచ్చు కూడా. యునాని వైద్యం మందులు కూడా వాటి స్వయం-స్వభావాన్ని కలిగివుంటాయని ముందుగానే సూచిస్తుంది. ఈ విధానంలో వ్యక్తి యొక్క ప్రత్యేక స్వభావం పైన ప్రాధాన్యం చూపబడి, వాడబడే మందులు కూడా అతని స్వభావంతో ఇమిడి, అనువుగా ఉంటాయి. ఆ విధంగా అతను కోలుకోవడాన్ని వేగవంతంచేస్తూ, మందులు ప్రతికూలంగా పనిచేసే ఆవకాశం కూడా లేకుండా ఉంటాయి. మందులు వేడి, చల్లదనం, తేమ మరియు పొడిగా ఉండే వాటి స్వభావానికి అనుగుణంగా పనిచేస్తాయని భావించవచ్చును. వాస్తవంగా, వాటి స్వభావాన్ని బట్టి మందులు నాలుగు రకాలుగా విభజింపబడ్డాయి మరియు వైద్యులు వాటి శక్తి, సామర్ధ్యాలను, రోగి వయసును మరియు అతని స్వభావాన్ని, అలాగే వ్యాధి యొక్క స్వభావం మరియు దాని తీవ్రతను పరిగణనలోకి తీసుకుంటారు. మందులు పౌడర్లు, డికాషన్ల (కషాయాలు), రూపంలోనూ, శరీరంలోకి ద్రవాన్ని ఎక్కించండం ద్వారాను, జవారిష్, మజూన్, ఖమీర, సిరప్ (త్రాగేవి) మరియు బిళ్లలు మొదలైన రూపంలో ఉంటాయి. ఈ విధానం ప్రత్యామ్నాయ మందులను వ్రాసి ఇవ్వడానికి నిబంధనలను ఏర్పరచింది.

శస్త్ర చికిత్స (హజ్-బిల్-యాద్)

యునాని విధానం వైద్యం, చికిత్సారంగాలలోనూ అగ్రగామిగా పేరుగాంచి, తన స్వంత పరికరాలను, చిట్కాలను వృద్ధి చేసుకున్నప్పటికీ, ఈ చికిత్స చాలా పరిమితమైన వాడకాన్ని కలిగివున్నటువంటిది. ప్రస్తుతం ఈ విధానంలో కేవలం స్వల్పమైన శస్త్రచికిత్సలు మాత్రమే చేయబడుతున్నాయి.

యునానిలో ఔషధాల నియంత్రణ

భారతదేశంలో యునాని ఔషధాల తయారీ డ్రగ్స్ అండ్ కాస్మెటిక్స్ యాక్ట్ 1940 (ఔషధాల మరియు అలంకరణ సామగ్రి చట్టం, 1940) యొక్క మరియు ఎప్పటికప్పుడు దాని క్రింద సవరించబడే నిబంధనల ద్వారా నియంత్రీకరించబడుతుంది. భారత ప్రభుత్వంచే నియమింపబడిన ఔషధాల సాంకేతిక సలహా మండలి (డ్రగ్ టెక్నికల్ అడ్వైజరీ బోర్డు) ఈ చట్టం అమలు చేసే బాధ్యతను వహిస్తుంది. ఔషధ సంప్రదింపుల సంఘం (డ్రగ్ అడ్వైజరీ కమీటీ) ఒకటి ఉంది. కేంద్ర/ రాష్ట్ర ప్రభుత్వాల/మండళ్లకు ఈ సంఘం దేశంలో ఔషధాల మరియు అలంకరణ సామగ్రి చట్టం అమలు చేయబడంలో ఒక క్రమపధ్దతిని సాధించడానికి సలహా, సంప్రదింపులను కలుగజేస్తూ ఉంటుంది.

భారత ప్రభుత్వము వారి ఆరోగ్య మరియు కుటుంబ సంక్షేమ మంత్రిత్వశాఖ, ఒకే రకమైన ప్రామాణికాలతో యునాని ఔషధ సమ్మేళనాలను తయారుచేయడానికి, ఒక యునాని ఫార్మకోపోయియల్ (ఔషధ గుణ ప్రకాశక గ్రంధం) కమిటీ అనే ఒక సంఘాన్ని నియమించింది. ఈ సంఘం యునాని వైద్యం, రసాయనశాస్త్రం, వృక్షశాస్త్రం మరియు ఔషధశాస్త్రం వంటి వివిధ రంగాల నిపుణులతో కూడి ఉంటుంది.

ఫార్మకోపోయియే అనేది వివిధ ప్రామాణికాంశాలను మరియు వివిధ ఒడంబడికలకు అనువుగా పరీక్ష చేయడం/ విశ్లేషిచడానికి సంబంధించిన ఔషధాల నాణ్యత నియంత్రణకు అవసరమయ్యే ప్రామాణికాలతో ఉండే ఒక గ్రంధం, ఈ ప్రామాణికాలు యునాని ఫార్మకోపోయియల్ కమిటీచే తుది రూపాన్నివ్వబడతాయి. ఈ ప్రామాణికాలు/అంశాలు నిర్దేశించడానికి ప్రయోగాత్మక పనిని ఫార్మకోపోయియే సంఘాలచే ఫార్మకోపోయియే లేబరేటరీ ఆఫ్ ఇండియన్ మెడిసిన్ కు అప్పగించబడింది.

1091 నిర్వచనాలు/సూత్రాలతో మరియు 298 రకాల మూల ఔషధాలను గురించి తెలిపే ఏక విషయక రచనలు (మోనోగ్రాఫ్స్) కలిగివున్న 6 సంపుటాలలో యునాని ఫార్మకోపోయియే ఆఫ్ ఇండియా (యు.పి.ఐ) అంటే భారతీయ యునాని ఔషధ కోశం మరియు 50 రకాల ఔషధ సమ్మేళనాల నిర్వచనాల/సూత్రాలతో భారతీయ ఔషధకోశం, II భాగం, సంపుటం I లతో, 5 భాగాల ఎన్.ఎఫ్.యు.ఎమ్ (NFUM) ప్రచురించబడింది.

ఫార్మాకోపోయియేల్ ప్రయోగశాల

ఫార్మాకోపోయియేల్ లేబోరేటరీ ఫర్ ఇండయన్ మెడిసిన్ (పి.ఎల్.ఐ.ఎమ్ – PLIM) (జాతీయ వైద్య ఔషధ కోశ ప్రయోగ శాల), ఘజియాబాద్, 1970లో స్ధాపించబడన ఆయుర్వేద, యునాని మరియు సిద్ధ వైద్య విధానాల ప్రామాణికాలను నెలకొల్పే మరియు ఔషధ పరీక్షలను నిర్వహించే ప్రయోగశాల. ఇది ఔషధ మరియు అలంకార సామగ్రి చట్టం 1940 పరిధి క్రింద జాతీయ స్ధాయిలో పనిచేస్తుంది. ఈ ప్రయోగశాల రూపొందించిన ఆయుర్వేద, యునాని మరియు సిద్ధ విధానాల ఔషధ సమాచారం) ఆయుర్వేద, యునాని మరియు సిద్ధ అదే కమిటీలచే సమ్మతిని పొందిన తరువాత అదే క్రమంలో ఆయుర్వేద, యునాని మరియు సిద్ధ ఫార్మాకోపోయియేగా ప్రచురించబడతాయి.

యునానిలో పరిశోధన

  • మసిహ్-ఉల్-సుల్క్ హకీమ్ అజ్మల్ ఖాన్, 1920లలో ప్రధమంగా యునాని వైద్య విధానంలో పరిశోధనను చేపట్టాలని ఊహించాడు. అతని కాలంలో ఒక బహుముఖ ప్రజ్ఞాశాలి అయిన హకీమ్ అజ్మల్ ఖాన్ పరిశోధనలో గల ప్రాముఖ్యతను అతి తొందరలోనే తెలుసుకున్నాడు. తెలుసుకోవాలేనే ఆతృత, జిజ్ఞాస వంటి స్వభావంతో అతను ఢిల్లీలోని ఆయర్వేద మరియు యునాని టిబ్బియా కళాశాలలో పరిశోధనలు చేయడంలో నియమింపబడిన డా. సలీమ్ ఉజ్జమాన్ సిధ్దికిని చూడడం తటస్థించింది.
  • సామాన్యంగా ఆస్రోల్ (పాగల్ బూతి) గా పిలువబడే మొక్కలో ఉండే ఔషధ గుణాలను డా. సిధ్దికి కని పెట్టడం, స్ధిరంగా, నిలకడగా సాగుతూ వుండే పరిశోధనను కొనసాగించడానికి దారితీసి, ప్రపంచ వ్యాప్తంగా ‘రావోల్ఫియా సర్పెంటినా’ గా పేరొందిన ఈ మొక్క నాడీ-నాళ మరియు నాడి సంబంధిత అస్తవ్యస్ధ పరిస్ధితికి అంటే నరాలు బిగుసుకు పోవడం, పిచ్చెక్కడం, మనోవైకల్యం, మూర్చవ్యాధి, అపస్మారక స్ధితి, నిద్ర లేమి మరియు మానసిక శారీరక స్ధితులు మొదలైన వాటిని నయం చేయడంలో అద్వితీయమైన సమర్ధతను పనితనాన్ని ఋజువు చేసింది. 1969లో భారత ప్రభుత్వ ప్రోద్భలంతో, ప్రాపకంతో కేంద్రీయ మండలి నెలకొల్పబడడంతో యునాని వైద్యంతో సహా వివిధ భారతీయ వైద్య విధానాలలో పరిశోధన ఒక క్రమపధ్దతిలో ప్రారంభించబడింది.
  • ఈ మండళ్ల యొక్క రక్షణ, సహకారం క్రింద, యునాని వైద్య విధానంలో ఇంచుమించు ఒక దశాబ్దం పాటు భారతీయ వైద్య మరియు హోమియోపతి (సి.సి.ఆర్.ఐ.ఎమ్.హెచ్. (CCRIMH) కోసం పరిశోధనా కార్యక్రమాలు చేపట్టబడ్డాయి. 1978వ సంవత్సరంలో ఈ సి.సి.ఆర్.ఐ.ఎమ్.హెచ్. (CCRIMH) – ‘ఆయుర్వేదం మరియు సిద్ధ’, ‘యునాని వైద్యం’, ‘హోమియోపతి’, ‘యోగ మరియు ప్రకృతివైద్యం’ లు, ఒక్కొక్కదాని కోసం ఒక్కొక్కటిగా, విడిగా నాలుగు పరిశోధనా మండళ్లుగా విభజింపబడింది.

యునాని వైద్యంలో పరిశోధన చేయడానికి కేంద్రీయ మండలి

భారత ప్రభుత్వంలోని ఆరోగ్యం మరియు కుటుంబ సంక్షేమ మంత్రిత్వశాఖ క్రింద ఈ కేంద్రీయ యునాని వైద్య విధాన పరిశోధన మండలి జనవరి, 1979 నుండి ఒక స్వయం ప్రతిపత్తి గల సంస్ధగా పనిచేస్తోంది.

మరిన్ని వివరాల కోసం: Central Council for Research in Unani Medicine

యునాని ఆసుపత్రులు మరియు ఔషధశాలలు

ప్రజానీకంలో యునాని వైద్య విధానం చాలా ప్రజాదరణ పొందినటువంటిది. దేశమంతటా వ్యాపించి ఉన్న, యునాని వైద్యం చేసే వైద్యులు జాతీయ ఆరోగ్య పరిరక్షణ మరియు సేవలనందించే వ్యపస్ధీకరణంలో ఒక అంతర్గత భాగంగా ఉన్నారు. అందుబాటులో ఉన్న అధికారిక గణాంకాలను బట్టి, దేశంలో 47,963 నమోదు కాబడిన యునాని వైద్యులున్నారు.

ప్రస్తుతం 15 రాష్ట్రాలు యునాని ఆసుపత్రులను కలిగి ఉన్నాయి. దేశంలోని వివిధ రాష్ట్రాలలో పనిచేస్తూ ఉండే ఆసుపత్రుల మొత్తం సంఖ్య 263. ఈ ఆసుపత్రులన్నింటిలోనూ ఉన్న మొత్తం పడకల సామర్ధ్యం 4,686.

దేశంలో 20 రాష్ట్రాలు యునాని ఔషధశాలలను కలిగి ఉన్నాయి. యునాని ఔషధశాలల మొత్తం సంఖ్య 1028. కేంద్ర ప్రభుత్వ ఆరోగ్య పథకాల (సి.జి.హెచ్.ఎస్ – CGHS) క్రింద అదనంగా 10 ఔషధ శాలలు – 2 ఆంధ్రప్రదేశ్ లోనూ, ఉత్తరప్రదేశ్, కర్నాటక మరియు పశ్చిమ బెంగాలులో ఒకటి చొప్పున మరియు ఢిల్లీలో 5 పనిచేస్తున్నాయి.

యునానిను అభ్యసించడం

యునాని వైద్య విధానంలో విద్యనభ్యసించడానికి, శిక్షణను పొందడానికి ఉన్న సౌకర్యాలు ప్రస్తుతం ఇండియన్ మెడిసిన్ సెంట్రల్ కౌన్సిల్ యాక్ట్ 1970 (భారతీయ వైద్య కేంద్ర మండలి చట్టం 1940 గా పిలువబడే) పార్లమెంట్ యొక్క చట్టం ద్వారా చేయబడి, ప్రస్తుతం చట్టపరమైన సంస్ధ అయిన భారతీయ వైద్య కేంద్ర మండలిచే పర్వవేక్షింప బడుతున్నాయి. ప్రస్తుతం దేశంలో 40 గుర్తింపు పొందిన యునాని వైద్య కళాశాలలున్నాయి. ఇవి ఈ విధానంలో విద్య, శిక్షణా సౌకర్యాలను కలుగజేస్తున్నాయి. విద్యార్ధులు అండర్ గ్రాడ్యుయేట్ కోర్సులలో చేరడానికి ఈ కాలేజీలలో సంవత్సరానికి మొత్తం మీద 1770 సీట్ల సామర్ధ్యం ఉంది. ఇవి ప్రభుత్వ సంస్ధలు కావచ్చు లేక స్వఛ్చంద సంస్ధలచే నెలకొల్పబడినవైనా కావచ్చు. ఈ విద్యా సంస్ధలన్నీ కూడా దేశంలో వివిధ విశ్వవిద్యాలయాలకు అనుబంధ సంస్ధలుగా ఉన్నాయి. భారతీయ వైద్య కేంద్ర మండలిచే నిర్దిష్టపరచబడిన పాఠ్యాంశాలను (కరిక్యులమ్) ఈ సంస్ధలు అనుసరిస్తున్నాయి.

ఇల్ ముల్ అద్వియా (ఔషధ విజ్ఞాన శాస్త్రం), మొవాలిజత్ (వైద్య విద్య), కులియత్ (ప్రాధమిక సూత్రాలు), హిఫ్జనే-ఏ-సెహాత్ (పరిశుధ్దత), జర్రహియత్ (శస్త్ర చికిత్స), తహాఫుజి-వా-సమాజి టిబ్, అమిరాజ్-ఏ-అత్ఫాల్ మరియు కబాలా-వా-అమ్రాజ్-ఏ-నిస్వాన్ (స్త్రీల వైద్య/రోగ సంబంధితమైనది) అంశాల (సబ్జెక్టు)లో పొస్ట్ గ్రాడ్యుయేషన్ విద్య మరియు పరిశోధనా సౌకర్యాలు అందుబాటులో ఉన్నాయి. ఈ కోర్సులకు ఉన్న మొత్తం ప్రవేశ సామర్ధ్యం 79.

జాతీయ యునాని వైద్య సంస్ధ, బెంగుళూరు

జాతీయ యునాని వైద్య సంస్ధ, బెంగుళూరు, యునాని వైద్య విధానాన్ని అభివృధ్ది చేయడానికి, ప్రచారం చేయడానికి ఒక ఉత్కృష్టమైన కేంద్రంగా 19 వనంబరు, 1984 నాడు సొసైటీల చట్టం క్రింద నమోదు కాబడిన సంస్ధ. జాతీయ యునాని వైద్య సంస్ధ (N.I.U.M) కేంద్ర ప్రభుత్వం మరియు కర్నాటక రాష్ట్రాల ఉమ్మడి సంస్ధ. ఇది రాజీవ్ గాంధీ జాతీయ ఆరోగ్యశాస్త్రాల విశ్వవిద్యాలయం, బెంగుళూరు, కర్నాటక రాష్ట్రానికి అనుబంధ సంస్ధగా ఉంది.

మరిన్ని వివరాల కోసం వెబ్ సైట్: National Institute of Unani Medicine

ఆధారము: ఆయుష్ విభాగం, ఆరోగ్యం మరియు కుటుంబ సంక్షేమ మంత్రిత్వశాఖ, భారత ప్రభుత్వము

2.98591549296
మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు