హోమ్ / ఆరోగ్యం / వ్యాధులు / కంటి జాగ్రత్తలు
పంచుకోండి
వ్యూస్
  • స్థితి: సవరణ కు సిద్ధం

కంటి జాగ్రత్తలు

కండ్ల కలక ముఖ్యంగా వైరస్ ద్వారా, బాక్టీరియా ద్వారా కళ్ళకి కలిగే ఇన్ ఫెక్షన్. దీంట్లో ముఖ్యంగా కళ్ళు బాగా ఎర్రబడి నీళ్ళు కారడం, కళ్ళమంటలు, కళ్ళలో పొడుచుకుంటునటువంటి బాధ, సరిగ్గా చూడలేకపోవడం ముఖ్య లక్షణాలు.

విటమిన్ ఎ లోపం వలన వచ్చే కంటి సమస్యలు, నివారణా ఈ క్రింది వీడియో లో చుడండి.

విటమిన్ ఎ లోపం వలన వచ్చే కంటి సమస్యలు, నివారణా- వీడియో


విటమిన్ ఎ లోపం వలన వచ్చే కంటి సమస్యలు, నివారణా - ఈ వీడియొ లో చుడండి

కండ్లకలక

కండ్ల కలక ముఖ్యంగా వైరస్ ద్వారా, బాక్టీరియా ద్వారా కళ్ళకి కలిగే ఇన్ ఫెక్షన్. దీంట్లో ముఖ్యంగా కళ్ళు బాగా ఎర్రబడి నీళ్ళు కారడం, కళ్ళమంటలు, కళ్ళలో పొడుచుకుంటునటువంటి బాధ, సరిగ్గా చూడలేకపోవడం ముఖ్య లక్షణాలు. ఇది ఒక అంటువ్యాధి, చేతి రుమాలు, తువ్వాలు ఒకళ్ళు వాడినవి ఇంకొకళ్ళు వాడడం వలన, వ్యాధి సోకిన వారు ఇతరులతో చాలా దగ్గరగా ఉండడం వలన తొందరగా వస్తుంది.

చికిత్స :
వ్యాధి సోకిన వాళ్ళు గోరువెచ్చని నీళ్ళతో తరచూ కళ్ళు కడగాలి. వీలైతే నల్లటి కళ్ళజోడు ధరించాలి. చేతి రుమాలు తుండుగుడ్డ ఇతరులని వాడనీయకూడదు. డాక్టరు సలహాపై కళ్ళలో మందు చుక్కలు వాడాలి.

క్యాటరాక్ట్ (కంటి శుక్లాలు, కంటిపొర అను కంటిజబ్బు) – కల్పితాలు – వాస్తవాలు

కల్పితం 1 కంటి పై భాగాన క్యాటరాక్టులు ‘పెరుగుతాయి’.

వాస్తవం- క్యాటరాక్టులు కంటి కటకాన్ని (లెన్స్) మబ్బులాగ కప్పివేసేటటువంటివి. ఈ కటకం కంటిలోపలే ఉంటుంది గాని కంటి ఉపరితలంపై ఉండదు. సహజమైన ఈ కంటి కటకం నీటితోను మరియు మాంసకృత్తులతో ఏర్పడిన పీచులాంటి సన్నని దారాలతో ఏ విధంగా ఏర్పడివుంటుందంటే ఈ కటకాన్ని స్పష్టంగా కాంతిని తనద్వారా ప్రసరించుకోగలిగేటట్టు ఉంటుంది. వయసు పెరిగే కొద్దీ, ఈ పీచువంటి దారాలు గుబురుగా, ముద్దగా మారి ఈ కటకంపై చిన్న చిన్న ప్రాంతాలను కప్పివేస్తాయి. కాలక్రమేణా, ఈ గుబురుగా పెరగడం అన్నది ఒక ప్రత్యేక ప్రదేశంలో పేరుకుపోయి చూడడాన్ని క్లిష్టతరం చేస్తుంది.

కల్పితం-2 లేజర్లతో క్యాటరాక్టును తొలగించ వచ్చు.

వాస్తవం- కంటిపై భాగంలోనే ఈ క్యాటరాక్టులు పెరుగుతాయి అనే అపోహతో పాటుగా చాలామంది వీటిని తొలగించుకోవచ్చని నమ్ముతూ వుంటారు. అయితే అసలు విషయం అది కాదు. ఎందుకంటే, ఈ మబ్బులాగ కప్పివేయబడడం అనేది కంటి కటకం యొక్క భౌతిక ధర్మాలతో పాటుగా వృధ్ది చెందుతూ వుంటుంది కాబట్టి. క్యాటరాక్టు శస్త్రచికిత్సలో మీ కంటిలోని ఈ సహజసిధ్దమైన కటకాన్ని ఛిధ్రం చేసి పేకో ప్రోబ్ అనే ఒక పరికరంతో తీసివేయబడుతుంది. ఇప్పుడు సహజసిధ్దమైన కటకం స్ధానంలో ఒక కృత్రిమమైన కటకాన్ని కంటిలోపలే అమర్చడం జరుగుతుంది. దీనిని ఐ.ఓ.ఎల్. అంటారు.

కల్పితం-3 క్యాటరాక్టులు తిరీగి మళ్లీ పెరుగుతాయి.

వాస్తవం- అది కాదు. అయితే, తరచుగా ఈ క్యాటరాక్టు ఉన్న రోగి మరొక విధమైన ద్వితీయ తరహా క్యాటరాక్టును పెంచుకుంటూ వుండడం జరుగుతుంది. శస్త్ర చికిత్స జరిగిన కొన్ని సంవత్సరాలలో లేక కొన్ని నెలలలో. కొత్త కటకాన్ని అమర్చిన కంటి పై పొరభాగంలో మబ్బుకమ్మినట్లు అవుతూ ఉండడంతో, చూడడాన్ని కష్టతరం చేస్తూ ఇది జరుగుతుంది. దీనిని లేజర్ శస్త్ర చికిత్సతో నయం చేయవచ్చు. ఇది ఒక చిన్న, సుళువైన, సూక్ష్మమైన విధానం. ఈ చికిత్స చేసే కంటిపై పొరభాగంలో ఒక చిన్న మార్గాన్ని చేసుకొని ఈ కటకం లోనికి కాంతి ప్రసరించేటట్లు చేస్తారు. ఈ విధానం వేగవంతమైనది, బాధ లేనటువంటిది. 15 నిముషాలకంటే తక్కువ టైము తీసుకుంటూ, మామూలుగా ఇది మీ వైద్యుని యొక్క కార్యాలయంలోనే నిర్వహింపబడవచ్చు.

కల్పితం-4 క్యాటరాక్టును తొలగించే ముందు, అది ముదిరి ఉండాలి.

వాస్తవం- గతంలో అయితే ఇది నిజమే. క్యాటరాక్ట్ తీసివేసే ముందు బాగా ముదిరిన దశలో ఉండాలి. అయితే, ఆధునిక క్యాటరాక్ట్ శస్త్ర చికిత్సతో క్యాటరాక్టును తొలగించాలంటే అది ముదిరి ఉండవలసిన అవసరం లేదు. మీ కంటి చూపు మందగించడం మరియు మీలో నాణ్యమైన జీవనం కొరవడడం ప్రారంభమైన వెంటనే మీరు ఈ క్యాటరాక్టును తొలగించుకోవచ్చు.

కల్పితం-5 కేవలం వయసు మీరిన పెద్దవాళ్లలోనే క్యాటరాక్టు పెరుగుతుంది.

వాస్తవం- 65 ఏళ్లకు పైబడిన వారిలో క్యాటరాక్ట్ చాలా సామాన్యమైన విషయం. అయినప్పటికీ, ఇది చిన్న వయస్కులలో కూడా రావచ్చు. ఈ క్యాటరాక్టులు మధుమేహం, కొన్ని రకాల మందులను సేవించడం వల్ల మరియు ఇతర కంటి సమస్యలున్న పరిస్ధితుల ఫలితంగా కూడా రావచ్చు. మరికొన్ని సందర్భాలలో పుట్టుకతోనే ఇది రావచ్చు – వీటిని కంజెనిటల్ క్యాటరాక్ట్ అంటారు.

కల్పితం 6 క్యాటరాక్ట్ శస్త్ర చికిత్స ప్రమాదకరమైనది.

వాస్తవం- 95 శాతం వరకు విజయవంతమవుతూ వుండే, ఈ క్యాటరాక్ట్ శస్త్ర చికిత్స వైద్యంలోనే ఒక అత్యంత క్షేమకరమైన, అత్యంత సమర్ధవంతంగా, నైపుణ్యంతో చేసేటటువంటి శస్త్ర చికిత్స. అయినప్పటికి, ఏ శస్త్ర చికిత్సలోనైనా ఉండే ప్రమాదం మాదిరిగానే దీనిలో కూడా అటువంటిదానికి అవకాశం ఉంది. అయితే, ఈ శస్త్ర చికిత్స చేయించుకునే ముందు మీ వైద్యుడితో మీరు చర్చించాలి.

కల్పితం-7 క్యాటరాక్ట్ శస్త్రచికిత్స అయిన తరువాత కోలుకోవడానికి కొన్ని నెలలు పట్టవచ్చు.

వాస్తవం- చాలా సందర్భాలలో రోగులు ఈ శస్ర్ర చికిత్స జరిగిన వెంటనే తమ చూపులో మార్పును గ్రిహిస్తారు,. అయితే, దీని తరువాత కొద్ది నెలలోనే రోగులలో వారి చూపు మెరుగవుతూ వుండడం జరుగుతుంది. ఈ చికిత్స జరిగిన మూడు వారాల వరకు మీరు వంగడం గాని లేక ఏదైనా బరువైన దానిని ఎత్తడం గాని చేయలేరు. అలాగే మీ కళ్లను నలుపుతూ పుండడం గానీ లేక వాటిపై ఒత్తిడిని కలిగిస్తూ వుండడం గాని చేయకుండా వుండవలసిన అవసరం వుంది. ఇది తప్ప, ఈ శస్త్ర చికిత్స జరిగిన తరువాత మీ కంటిపై ఉన్న కట్టును తీసివేసిన మరుసటి రోజు నుండి మీ సాధారణ కార్యకలాపాలను మీరు విర్వహించుకుంటూ వుండవచ్చు.

కల్పితం – 8 క్యాటరాక్ట్ శస్త్ర చికిత్స చేయించుకున్న తరువాత కళ్లద్దాల అవసరం ఉంటుంది.

వాస్తవం- క్యాటరాక్ట్ శస్త్ర చికిత్స చేయించుకున్న తరువాత కళ్లద్దాలు అవసరముంటాయా లేదా అనేది మీ కంటిలో మార్పిడి చేసిన ఒక రకమైన ఇంట్రా ఓక్యులర్ అనే కటకాన్ని బట్టి వుంటుంది.. మోనోఫోకల్ అనే కటకంతో రోగులు చాలా వరకూ ఇంకా అద్దాల అవసరాన్ని కలిగి వుండవచ్చు దగ్గరలోను మరియు దూరంగా వుండే వాటిని చదవడానికి లేక కంప్యూటర్ మీద పనిచేసుకోవడానికి కూడా. చాలా మంది రోగులు చాలా సందర్భాలలో బహుళవిధాల పనికి వచ్చే కటకాలను అమర్చుకోవడాన్ని ఎంచుకుంటారు, ఎందుకంటే ఇటువంచి చాలా కేసులలో దూరంగా ఉన్నవాటిని చూడగలిగే విధంగా చూపు సరిచేయబడి వుంటుంది కనుక.. అలాగే అద్దాల అవసరం కూడా వుండకపోవచ్చు. ఈ బహుళ ప్రయోజన కటకం మీకు కుదురుతుందేమో అని, మీకు మంచిదేనా అని మీ వైద్యుడితో మీరు మాట్లాడవచ్చు క్యాటరాక్ట్ శస్త్ర చికిత్సకు వివిధ రకాల కటకాల ప్రత్యామ్నాయాలను గురించి మీరు మరింత సమాచారాన్ని చదవండి.

కల్పితం – 9 ఒక కంటినుండి మరొక కంటికి కూడా ఈ క్యాటరాక్ట్ వ్యాపించ వచ్చు.

వాస్తవం- క్యాటరాక్టు ఒకే కంటికి రావచ్చు లేక రెండు కళ్లకి రావచ్చు, అంతేకాని అది ఒక కంటిలోనుంది మరో కంటికి వ్యాపించడం జరగదు.

కల్పితం – 10 దగ్గరగా చూస్తూ చేసుకునే పనులు అంటే చదవడం మరియు కుట్టడం, అల్లిక వంటి పనులలో క్యాటరాక్టు పరిస్ధితినింకా అధ్వాన్నంగా చేస్తుంది.

వాస్తవం- ఈ పనులను చేయడం వల్ల క్యాటరాక్టును మీరు పెంచుకోలేరు లేక ప్రస్తుతం ఉండే దానినింకా అధ్వాన్నంగా చేసుకోలేరు. క్యాటరాక్టుకు కారణాలు మీరు మీ కళ్లనెలా ఉపయోగిస్తారనే దానిపై ఆధారపడి వుండవు. అయితే, దగ్గరగా చూస్తూ చేసుకునే పనులను చేసుకుంటూ ఉండడం వల్ల మీలో క్యాటరాక్ట్ వచ్చిందేమో అని మీరు గమనించే అవకాశం ఉంది ఇటువంటి దగ్గరగా పెట్టుకుని చూస్తూ వుండి చేసుకోవలసిన పనులను చేయడం వల్ల. ఎందుకంటే క్యాటరాక్టు యొక్క లక్షణాలలో ఒకటి ఇటువంటి పనులను చేసుకోవడానికి మీకు మరింత వెలుతురు కావాలానిపించడం.

కల్పితం – 11 క్యాటరాక్టు ఒకసారి వచ్చినా తిరిగి దానిని మామూలు (క్యాటరాక్ట్ లేనటువంటి) పూర్వస్ధితికి తీసుకురావడానికి మార్గాలున్నాయి.

వాస్తవం- వయసు మీరిపోతూ ఉండడంతో కటకంపై మబ్బులు కమ్ముకుపోయి ఉన్నట్లు జరగడం సహజమే అయినా, దానిని నివారించ వచ్చు. ఏమైనప్పటికీ మీరు మీ జీవనసరళిని మార్చుకుంటూ ఈ క్యాటరాక్టును పెరుగుతూ ఉండడాన్ని ఆలస్యంగా, లేక నెమ్మది (స్లో) గా చేయవచ్చు, లేదా నివారించుకోవచ్చు, ఈ క్రిందివాటిని అనుసరిస్తూ వుంటేః

  • మీరు పొగత్రాగే వారైతే, దానిని మానివేయడాన్ని పరిశీలించండి.
  • పళ్లను మరియు కూరగాయలను సమృధ్దిగా తినడంతో సహా, సమీకృత ఆహారాన్ని తీసుకోండి.
  • చలువ కళ్లద్దాలను ధరించండి (100 శాతం యు.వి. ఏ మరియు బి రక్షణతో) అలాగే అదికంగా సూర్యరశ్మి బారినపడకుండా చూసుకోండి.

ఆధారము: www.cataractsurgeryindia.in/

rushabheye.blogspot.com/

పసికందులు అంధులైతే....

మనదేశంలో ప్రతి నాలుగు నిమిషాలకు ఒకరు చొప్పున పిల్లలు అంధత్వానికి గురవుతున్నారు. ఆ లెక్కన ప్రస్తుతం మన దేశంలో రెండు లక్షలా డెబ్బై వేల మంది చిన్నారులు అంధులుగా ఉన్నారని గణాంకాలు చెబుతున్నాయి. రెండేళ్లలోపే అంధత్వానికి గురైన పిల్లల్లో సుమారు 50 శాతం మంది 5 ఏళ్ల లోపే చనిపోతున్నారు. నిజానికి అంధత్వాన్ని కలిగించే ఈ సమస్యల్లో 70 శాతం దాకా నివారించడం సాధ్యమయ్యేవే. చిన్న వయసులోనే కంటి సమస్యలను గుర్తించి అవసరమైన వైద్య, శస్త్ర చికిత్సలు అందించకపోతే అది అంధత్వానికి దారి తీస్తుంది. అందుకే ముందస్తు జాగ్రత్తలే పిల్లలను అంధత్వ ముప్పునుంచి తప్పిస్తాయంటున్నారు, నేత్ర వైద్య నిపుణురాలు డాక్టర్ మాధవి.
శుక్లాలతో పుట్టిన పిల్లలను చూసి జాలిపడతారు. లేదా ఉన్నంతలో ఏదో ఆర్థిక సహాయం చే స్తారు. అంతేగానీ, వెంటనే వైద్యపరీక్షలు చేయించడం గానీ, మందులతోనో లేదా శస్త్ర చికిత్సల ద్వారానో పరిస్థితి చక్కబడే అవకాశాల గురించి ఆలోచించడమో చాలా మంది చేయరు. ఫలితంగా పరిస్థితి చక్కబడే అవకాశం కూడా జారిపోయి, వారు శాశ్వత అంధులుగా మారే స్థితికి దారి తీస్తుంది.

కొంత మంది పిల్లలు కార్నియా లోపం కారణంగా పుట్టుకతోనే అంధులవుతారు. అయిన వాళ్లంతా ఆ స్థితిని ఎవరూ ఏమీ చేయలేర న్నట్లు వదిలేసి ఊరుకుంటారు. నిజానికి కార్నియా మార్పిడి చికిత్సతో కొంత మేరకైనా వారికి తిరిగి చూపు అందించే అవకాశాలు ఉంటాయి. నేత్ర వైద్య విభాగంలో వచ్చిన అధునాతన చికిత్సల గురించిన అవగాహన లేకపోవడమే సమాజంలో మన దేశంలో లక్షలాది మంది పిల్లలు జీవితమంతా అంధులుగానే ఉండిపోయే పరిస్థితి ఎదురవుతోంది.

పిల్లల్లో వచ్చే విటమిన్-ఎ లోపాలు, మశూచికం, రుబెల్లా, ఆఫతాల్మిక్ నియోనెటోరియం వంటి సమస్యలను నివారించే అవకాశాలు మెండుగా ఉన్నాయి. ఇక శుక్లాలు, నీటికాసులు (గ్లకోమా), కార్నియా అంధత్వం, మెల్లకన్ను, రెటినోపతి ఆఫ్ ప్రిమెచ్యురిటీ, రెటినో బ్లాస్టోమా, మరికొన్ని దృష్టిలోపాలు వీటిని వైద్య చికిత్సలతో తొలగించడం సాధ్యమవుతుంది. కానీ, ఈ విషయం తెలియక కంటి సమస్యలను అవేవో శాప ఫలితాలు అన్నట్లు అలా వదిలేయడం వల్ల ఎంతో మంది పిల్లలు కనుచూపు నోచుకోకుండా కాలం వెళ్లదీయాల్సి వస్తోంది.

ఎలా తెలుస్తాయి ?
సాధారణంగా ఆరు మాసాల వయసు నుంచే పిల్లలు తల్లిని గుర్తు పడుతుంటారు. పరిశీలనగా అన్ని వైపులా చూడటం కూడా చేస్తుంటారు. ఆ లక్షణాలేమీ కనిపించకపోతే ఆ పిల్లల్లో కంటికి సంబంధించి ఏదైనా సమస్య ఉన్నట్లు భావించాలి. తరుచూ కనురె ప్పలు కొట్టుకోవడం, కనుగుడ్లు అదేపనిగా తిప్పుతూ ఉండడం, రంగు వస్తువులను చూపినా వాటిమీద దృష్టి పడకుండా మరోవైపు చూడటం, కళ్లు మరీ పెద్దవిగా ఉండడం వంటివి కూడా కంటి సమస్యలు ఉన్నట్లు అనుమానించే అంశాలే.

అయితే తలిదండ్రులకు ఈ విషయాల మీద అనుమానం కలిగినా వయసు పెరుగుతూ ఉంటే ఇవన్నీ వాటంతట అవే పోతాయి అనుకునే వారే ఎక్కువ. కానీ, ఆ లక్షణాలు ఆ తరువాత ఒక తీవ్రమైన సమస్యకు గురిచేస్తాయనే అవగాహన లేక పోవడమే ఇందుకు కారణం. పిల్లల్లోని ఈ అసహజ లక్షణాలను ముందే గుర్తించి మందులో లేదా శస్త్ర చికిత్సలో అందిస్తే ఆ తరువాత పిల్లలు చూపు కోల్పోయే పరిస్థితి రాకుండా నివారించవచ్చు.

విటమిన్-ఏ లోపాలు:
పిల్లల్లో కార్నియా సమస్యతో వచ్చే అంధత్వానికి విటమిన్-ఏ లోపమే ప్రధాన కారణం. ఈ లోపం వల్ల ముందుగా రేచీకటి సమస్య వస్తుంది. బాగా అలవాటైన ప్రదేశంలో కూడా పిల్లలు రాత్రిపూట తడబడుతున్నా, పదే పదే వస్తువులను గమనించక వాటిని పడదోస్తున్నా అది రేచీకటి సమస్యగా గుర్తించాలి.

కంటిలో తడి ఆరిపోవడం, తెల్లగుడ్డుపైన బూడిద రంగు మచ్చలు ఏర్పడటం ఉంటాయి. చివరి దశలో కార్నియా దెబ్బతిని అంధత్వం వస్తుంది. నివారణగా ప్రతి ఆరుమాసాలకు ఒకసారి 200000 ఐయు విటమిన్-ఎ ఇస్తూ ఉండాలి. పాలు ఇచ్చే తల్లులకు ప్రసవం నుంచి తగిన మోతాదులో విటమిన్-ఏ ఇవ్వాల్సి ఉంటుంది. అలాగే మశూచి టీకాలు కూడా ఇప్పించడం ద్వారా కార్నియా సమస్యను నియంత్రించవచ్చు.

కళ్లకలక (ఆఫతాల్మిక్ నియోనెటోరియం) కొంత మంది పిల్లలు 10 రోజుల వయసులోనే కళ్లకలక సమస్యకు గురవుతుంటారు. గర్భిణులు బ్యాక్టీరియా, వైరస్ ఇన్‌ఫెక్షన్లకు గురైనప్పుడు ఆ సమస్య కడుపులో ఉన్న శిశువుకు కూడా సోకుతుంది. ఫలితంగా పుట్టిన శిశువు కళ్లల్లో పుసులు కట్టడం, కళ్లలోంచి ఒక జిగురు పదార్థం స్రవించడం కనిపిస్తుంది.

వెంటనే వైద్యం అందకపోతే కంటి కార్నియా దెబ్బతిని అంధత్వం రావచ్చు. అందుకే గర్భిణిగా ఉన్నప్పుడు గానీ, ప్రసవ సమయంలో గానీ, తల్లులు ఇన్‌ఫెక్షన్ల బారిన పడకుండా కాపాడటం చాలా ముఖ్యం. అలాగే పుట్టిన పాప కళ్లు పరీక్షించి కళ్లకలక ఉంటే కళ్లను శుభ్రపరుస్తూ పొవిడీన్ ఐయాడీన్ ద్రావకం చుక్కలను కంటిలో వేయాలి.

రుబెల్లాతో జాగ్రత్త...
మూడు నుంచి ఆరుమాసాల గర్భంతో ఉన్నప్పుడు తల్లులు రుబెల్లా అనే వైరల్ ఇన్‌ఫెక్షన్లకు గురైతే బిడ్డ పలురకాల రుగ్మతలతో పుడుతుంటారు. ముఖ్యంగా పుట్టుకతో వచ్చే గుండెలోపాలు, చెవిటితనం, మానసిక వైకల్యం, రోజులు గడిచే కొద్దీ దంతాల లోపాలు, కంటి శుక్లాలు, గ్లకోమా, రెటీ నా పరమైన వ్యాధులు కూడా ఈ పిల్లలకు రావచ్చు. ఈ స్థితిని నివారించడానికి యుక్తవయసులో ఉన్న యువతులకు రుబెల్లా టీకాలు తప్పనిసరిగా ఇప్పించాలి.

అపోహలూ ఎక్కువే...
పిల్లల్లో కంటి సమస్యలు ఎన్ని ఉన్నా వయసు పెరిగితే వాటంతట అవే త గ్గిపోతాయనుకోవడం, కళ్లు ఎరుపెక్కితే తల్లి చనుబాలు పోయడం, కొన్ని సందర్భాల్లో కంట్లో ఆకు పసర్లు, ఇతర మూలికా మందులు వేయడం, గర్భిణిగా ఉన్నప్పుడు అవసరమైన మందులు, టీకాలే వీ తీసుకోకపోవడం, మేనరిక వివాహాలు ఇవన్నీ పిల్లల్లో కంటి సమస్యలను పెంచి చివరికి వారి చూపునే హరిస్తున్నాయి.

పిల్లల్లో శుక్లం
ప్రతి రెండు వేల మంది పిల్లల్లో ఒక రు పుట్టుకతోనే శుక్ల సమస్యకు గురయ్యే వీలుంది. కొంతమంది పిల్లలకు పుట్టుకతో గానీ, కొంత వయసు వచ్చిన తరువాత గానీ ఒక కంట్లో లేదా రెండు కళ్లల్లో శుక్లాలు రావచ్చు. ఇందుకు గల కారణాల్లో బిడ్డ గర్భంలో ఉన్నప్పుడు తల్లి ఇన్ ఫెక్షన్లకు గురికావడం, జన్యుపరమైన కార ణాలు, కంటికి బలంగా దెబ్బ త గలడం వంటివి ప్రధానమైనవి.

ఈ వ్యాధి సోకినప్పుడు కనుపాప నల్లగా కాకుండా తెలుపు రంగులోకి మారుతుంది. ఈ పిల్లల్లో వెలుతురు చూడలేకపోవడం, చూపు నిలబెట్టలేకపోవడం, కనుగుడ్డును అతిగా తిప్పడం, ఎక్కువగా కళ్లు చిట్లించి చూడటం వంటి లక్షణాలు కనిపిస్తాయి. ఈ స్థితిలో శస్త్ర చికిత్స ద్వారా శుక్లాన్ని తీసివేయడం ఒక్కటే పరిష్కారం. శుక్లాల కారణంగా పిల్లల్లో చేసే శస్త్ర చికిత్స, పెద్దవారిలో చేసే శస్త్ర చికిత్స ఈ రెండు వేరు వేరు.

రెండేళ్ల లోపు పిల్లలకు ఈ శస్త్ర చికిత్స చేసినప్పుడు వారికి ఐదేళ్లు వచ్చేదాకా లావుపాటి అద్దాలు వాడాల్సి ఉంటుంది. రెండవ సారి శస్త్ర చికిత్స చేసి కంట్లో అద్దం అమర్చాక సాధారణ అద్దాలే సరిపోతాయి. అయితే ఒకసారి ఈ శస్త్ర చికిత్స జరిగిన పిల్లలను జీవితాంతం నేత్రవైద్యుని పర్యవేక్షణలో ఉంచడం చాలా అవసరం.

గ్లకోమా (నీటికాసులు)
ఈ వ్యాధి సోకే వారిలో పెద్ద వారే ఎక్కువగా ఉంటారు. అయితే పిల్లల్లోనూ ప్రతి 10 వేల మందికి ఒకరు చొప్పున ఈ వ్యాధి బారినపడుతుంటారు. గ్లకోమాతో కంటిలో ఒత్తిడి పెరిగి, అక్కడున్న నరం దెబ్బ తిని అంధత్వం వస్తుంది. ఈ వ్యాధి సోకిన పిల్లల్లో కనుపాప పెద్దదవుతుంది. వెలుతురు చూడలేకపోవడం, కంట్లోంచి నీరు కారడం వంటి లక్షణాలు కనిపిస్తాయి. కంటిలోని ఒత్తిడిని తగ్గించడానికి శస్త్ర చికిత్స ఒక్కటే పరిష్కారం. ఆ తరువాత కూడా ఒత్తిడి తగ్గకపోతే మరోసారి శస్త్రచికిత్స చేయవలసి రావచ్చు. లేదా మందులు వాడవలసి రావచ్చు. ఏమైనా గ్లకోమా ఉన్న వారు జీవితాంతం డాక్టర్ పర్యవేక్షణలో ఉండడం చాలా అవసరం.

మెల్ల
మెల్ల ఉన్నప్పుడు ఒక క న్ను సమాంతరంగా ఉండదు. అందుకే రెండు కళ్లనుంచి మెదడుకు చేరే ప్రతిబింబాలు కూడా సమంగా ఉండవు. మెదడు స్పష్టంగా ఉన్న ప్రతిబింబాన్ని పరిగణనలోకి తీసుకుని మసకగా ఉండే రెండవ ప్రతిబింబాన్ని నిర్లక్ష్యం చేస్తుంది. అలాగే ఇంకొంత కాలం గడిస్తే మెల్లకంటి చూపు మరింత తగ్గి చివరికి అంధత్వానికి దారి తీస్తుంది. ఈ స్థితిని యాంబిలోపియా అంటారు.

మెల్ల కన్ను ఉన్నప్పుడు ఆరేళ్ల లోపే గుర్తించి తగిన వైద్య చికిత్సలు చేయవలసి ఉంటుంది. మెల్ల నివారణలో కంటి కండరాలను సరిచేయడానికి శస్త్ర చికిత్స కూడా అవసరమవుతుంది. మెల్లను పూర్తి స్తాయిలో తొలగించడానికి కొందరికి రెండవసారి కూడా శస్త్ర చికిత్స చేయవలసి రావచ్చు. శస్త్ర చికిత్స తరువాత దృష్టిలోపాలకు కళ్లజోడు కూడా వాడవలసి ఉంటుంది.

కంటి చూపు వృద్ధికి...
కొంత మంది పిల్లల్లో మందులతోగానీ, శస్త్ర చికిత్సల వల్ల గానీ చూపును మెరుగుపరిచే అవకాశాలు ఉండవు. అలాంటి వారిలో అప్పటికి ఇంకా మిగిలి ఉన్న చూపును మెరుగుపరిచే ఆధునిక చికిత్సలు కొన్ని ఇప్పుడు అందుబాటులో ఉన్నాయి. పిల్లల ప్రస్తుత కంటి చూపును అంచనా వేసి కొన్ని రకాల బూతద్దాలు, టెలిస్కోపులు, ప్రత్యేకమైన కళ్లజోడు, కొన్ని ప్రత్యేకమైన లైట్ల ద్వారా పిల్లల చూపును మెరుగు పరిచే అవకాశాలు ఉన్నాయి.

అయితే అప్పటికే అంధత్వం కారణంతా బ్రెయిలి లిపికి అలవాటు పడితే ఈ పరికరాలను ఉపయోగించడానికి అంతగా ఇష్టపడరు. అందుకే చిన్న వయసులోనే పిల్లల అంధత్వాన్ని అంచనా వేసి అందుబాటులో ఉన్న సదుపాయాలను వినియోగించుకుంటే ప్రయోజనం ఉంటుంది. పుట్టుకతో వ చ్చిన అంధత్వాన్ని పూర్తిగా జయించలేకపోయినా, ప్రయోజనకరమైన కంటిచూపును పొందే అవకాశాలు ఉన్నాయి. "ఆలస్యం...అమృతం...విషం'' అన్న నానుడి పిల్లల కంటి సమస్యల విషయంలో నూటికి నూరు పాళ్లు నిజం.

-డాక్టర్ జి.మాధవి
కన్సల్టెంట్ ఆప్తమాలజిస్టు,
మెడికల్ డైరెక్టర్, గౌతమి ఐ ఇనిస్టిట్యూట్, రాజమండ్రి,
ఫోన్ : 9502136068

డయాబెటిస్ వల్ల కంటిపై ప్రభావాలు, వాటి లక్షణాలు, నివారణ, చికిత్స

చక్కెర నోటికి తీపి గానీ... కళ్లకు మాత్రం చేదే. చక్కెర వ్యాధి ప్రభావం ఎంత చేదుగా ఉంటుందో తెలిసిన విషయమే. అన్ని అవయవాలపై దుష్ర్పభావం చూపించే ఆ వ్యాధికి కన్ను మినహాయింపేమీ కాదు. అన్ని అవయవాల్లాగే కన్ను కూడా డయాబెటిస్‌కు ప్రభావితమవుతుంది. చక్కెరను నియంత్రించుకోకపోతే అది డయాబెటిక్ రెటినోపతి అనే సమస్య మొదలు అనేక రుగ్మతలకు దారి తీయవచ్చు. వాటిని నిర్లక్ష్యం చేస్తే చూపునే కోల్పోవాల్సిన పరిస్థితికి దారితీయవచ్చు. అందుకే... చక్కెర వ్యాధి సూచనలు కనిపించగానే కంటిపై ఆ వ్యాధి ప్రభావాన్ని దృష్టిలో పెట్టుకుని జాగ్రత్తగా ఉండాలి. డయాబెటిస్ వల్ల కంటిపై పడే ప్రభావాలు, వాటి లక్షణాలు, నివారణ, చికిత్స లాంటి అనేక అంశాలను తెలుసుకోడానికే ఈ కథనం...

ప్రతి అవయవానికి పోషకాలు అందించే బాధ్యత రక్తానిది. ఈ రక్తం రక్తనాళాల్లో ప్రవహిస్తుంటుంది. ఈ నాళాల చివరన ఉండే అత్యంత సూక్ష్మమైన నాళాలను రక్తకేశనాళికలు (క్యాపిల్లరీస్) అంటారు. దీర్ఘకాలంగా రక్తంలో చక్కెర పాళ్లు ఎక్కువగా ఉండేవారిలో కేపిల్లరీస్ దెబ్బతింటాయి. రక్తంలో పెరిగే గ్లూకోజ్ పాళ్ల వల్ల ఈ రక్తనాళాల చివర్లలో అడ్డంకులు (బ్లాకేజ్) ఏర్పడవచ్చు. ఫలితంగా ఆ అవయవానికి రక్తం అందకపోవచ్చు. దాంతో ఆ అవయవం శాశ్వతంగా చచ్చుబడే ప్రమాదం ఉంది. కంటిలో ఉండే రక్తనాళాల చివరల్లోనూ ఇలాంటి బ్లాక్స్ రావడం సంభవిస్తే చూపు దెబ్బతినే అవకాశాలు ఉంటాయి.

డయాబెటిస్ వల్ల వచ్చే వ్యాధులివి...
డయాబెటిక్ రెటినోపతి

డయాబెటిక్ క్యాటరాక్ట్

గ్లకోమా నర్వ్ పాల్సీ ఆప్టిక్ న్యూరోపతి

కనురెప్పకు తరచూ వచ్చే ఇన్ఫెక్షన్

కనురెప్పలు వాలిపోవడం

కంటిలోపల ఉండే పొర కంజెంక్టివాకు వచ్చే ఇన్ఫెక్షన్లు

కార్నియాకు వచ్చే సమస్యలు.

డయాబెటిక్ రెటినోపతి... ఏదైనా వస్తువును చూసినప్పుడు దాని ప్రతిబింబం కంటిలోపల ఉండే ఒక తెరపై పడుతుంది. ఆ తెరపై పడే ప్రతిబింబం వల్లనే మనం చూడగలమన్నది తెలిసిందే. ఈ తెరనే ‘రెటీనా’ అంటారు. అన్ని అవయవాల్లాగే ఈ రెటీనాకు కూడా అత్యంత సూక్ష్మమైన నాళాల ద్వారా రక్తం సరఫరా అవుతుంటుంది. చక్కెర వ్యాధి వల్ల ఈ రక్తనాళాలు దెబ్బతిని రెటీనాకు రక్తం సరిగ్గా అందక చూపు దెబ్బతినే పరిస్థితిని ‘డయాబెటిక్ రెటినోపతి’ అంటారు. దీని వల్ల శాశ్వతంగా చూపు కోల్పోవాల్సిన పరిస్థితి రావచ్చు. ప్రపంచవ్యాప్తంగా అంధత్వానికి చాలా ఎక్కువగా ఉన్న కారణాల్లో ఇది ప్రధానమైనది.

‘డయాబెటిక్ రెటినోపతి’ ఎవరెవరిలో ఎక్కువ...
దీర్ఘకాలంగా చక్కెర వ్యాధి ఉన్నవారికి

చక్కెరను అదుపు చేసుకోకుండా నిర్లక్ష్యంగా ఉండేవారికి

డయాబెటిస్‌తో పాటు అధిక రక్తపోటు ఉన్నవారికి

డయాబెటిస్‌తో పాటు కొలెస్ట్రాల్ పాళ్లు, రక్తంలో కొవ్వుల పాళ్లు ఎక్కువగా ఉన్నవారికి

కిడ్నీ సమస్యలు ఉన్నవారికి

గుండె జబ్బులు ఉన్నవారికి

పొగతాగేవారికి... వీళ్లందరిలో డయాబెటిక్ రెటినోపతి వచ్చే అవకాశాలు చాలా ఎక్కువ.

గమనిక : షుగర్ పూర్తిగా నియంత్రణలో ఉన్నా రెటినోపతి వచ్చే అవకాశాలు ఉంటాయి. కాబట్టి చక్కెర వ్యాధి ఉన్నవారు క్రమం తప్పకుండా కంటి వైద్యనిపుణులను తరచూ సంప్రదించడం అవసరం.

తస్మాత్ జాగ్రత్త...
డయాబెటిక్ రెటినోపతితో బాధపడే వారిలో, చూపు కోల్పోయే వారిలో - తమకు ఈ దుష్ర్పభావం పడబోతుందన్న విషయం దాదాపు సగానికి మందికి పైగా తెలియనే తెలియదు. ఒక్కోసారి కంటికి చేసే సాధారణ (రొటీన్) పరీక్షల్లో ఈ విషయం బయటపడుతుంది. అందుకే డయాబెటిస్ ఉన్నవారు తరచూ కంటి పరీక్షలు చేయించుకుంటూ ఉండటం మంచిది.

డయాబెటిక్ రెటినోపతి కేసుల్లో ఏం జరుగుతుంది?
డయాబెటిస్ ఉన్నవారిలో కంటిలోని అత్యంత సూక్ష్మమైన రక్తనాళాల చివరలు ఉబ్బుతాయి. ఇలా రెటినాకు చెందిన రక్తనాళాల చివరలు ఉబ్బడాన్ని ‘మైక్రో అన్యూరిజమ్’ అంటారు. ఇవి ఉబ్బి ఉబ్బి ఒక్కోసారి చిట్లి రక్తస్రావం కావచ్చు. ఇలా రక్తస్రావం కావడాన్ని ‘డాట్ అండ్ బ్లాట్ హ్యామరేజ్’ అంటారు. కొన్నిసార్లు కంటిలోని ద్రవాలు లీక్ కావచ్చు. అలా జరిగితే దాన్ని ‘మాక్యులార్ ఎడిమా’ అంటారు. అప్పుడు రెటీనా నుంచి కొత్త రక్తనాళాలు ఆవిర్భవించవచ్చు. దీన్నే ప్రొలిఫిరేటివ్ డయాబెటిక్ రెటినోపతి అంటారు. ఇలా కొత్తరక్తనాళాలు పుట్టుకురావడమే కంటికి ప్రమాదకరం అవుతుంది.

నేత్రవైద్యులు ఇందుకోసం చేసే పరీక్షలివి
ఫండస్ ఎగ్జామినేషన్

ఫండస్ ఫ్లోరోసిన్ యాంజియోగ్రఫీ

ఓసీటీ (ఆప్టికల్ కొహెరెన్స్ టోమోగ్రఫీ)

అల్ట్రా సౌండ్ ‘బి’ స్కాన్

చికిత్స
డయాబెటిస్ రెటినోపతీకి అందుబాటులో ఉన్న చికిత్స ప్రక్రియలు
1. వైద్యపరంగా అందించే చికిత్స
2. లేజర్ ఫోటోకోయాగ్యులేషన్
3. శస్తచ్రికిత్స (విట్రెక్టమీ)

1. వైద్యపరంగా చేయాల్సిన చికిత్స:
రక్తంలోని గ్లూకోజ్‌ను నియంత్రించడానికి చికిత్స చేయాలి.

రక్తంలో కొవ్వులను నియంత్రించడానికి చికిత్స (కొలెస్ట్రాల్ తగ్గించడానికి)

యాంటీప్లేట్‌లెట్ ఏజెంట్స్ (రక్తం పలచబరచడానికి మందులు)

బీ కాంప్లెక్స్ ఔషధాలు ఇవ్వాలి.

3. శస్తచ్రికిత్స:
రెటినోపతి వల్ల వచ్చే దుష్ర్పభావాలు దీర్ఘకాలం పాటు కొనసాగుతూ ఉంటే అప్పుడు అక్కడ గడ్డకట్టిన రక్తాన్ని తొలగించడానికి విట్రెక్టమీ ఆపరేషన్ అవసరం కావచ్చు.

డయాబెటిక్ క్యాటరాక్ట్...
డయాబెటిస్‌తో శరీరంలోని జీవక్రియ (మెటబాలిజమ్) ల్లో మార్పుల వల్ల కొందరిలో కంటిలో త్వరగా క్యాటరాక్ట్ రావచ్చు. దీనివల్ల చూపు స్పష్టంగా కనిపించకపోవడం వంటి లక్షణాలు కనిపిస్తాయి. ఇలాంటి వారిలో ఫ్యాకో ఎమల్సిఫికేషన్ వంటి ప్రక్రియలతో కంటి ముందు ఉంటే లెన్స్ మార్చి కృత్రిమ లెన్స్‌ను అమర్చాల్సి ఉంటుంది.

గ్లకోమా...
కంటిలో ఉండే ద్రవాలలో ఒత్తిడి పెరిగి అది కంటి నరం మీద పడటాన్ని గ్లకోమా అంటారు. ఈ ఒత్తిడి వల్ల క్రమంగా కంటిచూపు కోల్పోయే ప్రమాదం ఉంది. యాంటీ గ్లకోమా చుక్కల మందు కంట్లో వేయడం ద్వారా దీన్ని నివారించవచ్చు. అయితే దీన్ని జీవితకాలం వాడాల్సి ఉంటుంది. కొంతమందికి శస్తచ్రికిత్స ద్వారా కూడా గ్లకోమాను నయం చేసే అవకాశాలు ఉంటాయి.

ఆప్టిక్ న్యూరోపతి...
కంటిలో కనిపించే ప్రతిబింబాన్ని ‘ఆప్టిక్ నర్వ్’ మెదడుకు చేరవేయడం వల్లనే మనకు చూపు కనిపిస్తుంటుందన్న విషయం తెలిసిందే. కొన్నిసార్లు ఈ నరం దెబ్బతినడం వల్ల కంటి చూపు అకస్మాత్తుగా దెబ్బతింటుంది. ఈ నరం దెబ్బతిన్న విషయాన్ని ఫండస్ పరీక్ష ద్వారా తెలుసుకోవచ్చు. ఇలాంటి సందర్భాల్లో కంటి వైద్యులు, న్యూరోఫిజీషియన్ ఆధ్వర్యంలో చికిత్స ఇవ్వాల్సి ఉంటుంది.

చూపును దీర్ఘకాలం పదిలంగా కాపాడు కోవడం కోసం కంటి పరీక్షలు తరచూ చేయించడం అవసరం. డయాబెటిస్ ఉంటే అది మరింత అవసరమని గుర్తుంచుకోవాలి.

2. లేజర్ ఫోటోకోయాగ్యులేషన్
లేజర్ కిరణాల సహాయంతో చేయాల్సిన ఈ చికిత్స వల్ల కంటిలో రక్తస్రావాన్ని తగ్గించడం కొత్తగా ఏర్పడే రక్తనాళాలను నివారించడం సాధ్యమవుతుంది. ఈ చికిత్స ప్రక్రియలో కొన్నిసార్లు ఒకటి కంటే ఎక్కువ సార్లు ఈ చికిత్స చేయాల్సిన అవసరం రావచ్చు. ఒకసారి చికిత్స చేశాక జీవితకాలం పాటు క్రమం తప్పకుండా వైద్యపరీక్షలు చేయించుకోవాల్సి ఉంటుంది.

ఎన్నాళ్లకోమారు..?
డయాబెటిస్ ఉన్నవారు ఏడాదికి ఒకసారి కంటి పరీక్షలు చేయించాలి.

డయాబెటిక్ రెటినోపతి ఉన్నవారు ప్రతి ఆర్నెల్లకు ఓ మారు పరీక్షలు చేయించాలి.

డయాబెటిక్ రెటినోపతి తీవ్రంగా ఉంటే ప్రతి మూడు నెలలకోమారు పరీక్షించుకోవాలి.

నివారణ...
డాక్టర్లు చెప్పినవిధంగా మంచి పోషకాలు, పీచుపదార్థాలు ఎక్కుడా ఉండే ఆహారాన్ని క్రమబద్ధంగా తీసుకోవడం.

ఆరోగ్యకరమైన జీవన శైలిని పాటించడం

వ్యాయామం

క్రమం తప్పకుండా రక్తంలో గ్లూకోజ్ పాళ్లను పరీక్షించుకుంటూ దాన్ని నియంత్రించుకోవడం

పొగతాగే అలవాటును పూర్తిగా మానివేయడం.

ఆధారము: ఆయురారోగ్యాలు బ్లాగ్

వివిధ కంటి వ్యాధులు - చికిత్సలు

దృష్టికి అవరోధాలూ... అధిగమించే ఐడియాలు

లోచనాలూ- లోపాలు
మనం చూసే ప్రక్రియలో ఎలాంటి అవరోధం కలిగినా వైద్యపరిభాషలో దాన్ని ‘విజువల్ డిస్టర్‌బెన్సెస్’ అంటారు. అంటే... చూసేటప్పుడు మనకు కలిగే అంతరాయాలన్నమాట. ఇవి అనేక రకాలుగా ఉంటాయి. చూపునకు అంతరాయం కలిగించే కొన్ని అంశాలు తాత్కాలికమైనవి. వీటి గురించి కొద్దిపాటి జాగ్రత్తలు, చికిత్స తీసుకుంటే మళ్లీ అంతా మామూలైపోతుంది. కానీ... దృష్టికి కలిగే కొన్ని అంతరాయాలు మాత్రం క్రమంగా పెరుగుతూ పోతాయి. ఫలితంగా శాశ్వతంగా చూపు కోల్పోయే ప్రమాదం ఉంది. ఇలాంటి విజువల్ డిస్టర్‌బెన్సెస్ గురించి ప్రాథమిక అవగాహన ఉండటం వల్ల కంటి చూపును పదికాలాల పాటు పదిలంగా కాపాడుకోవచ్చు. అందుకు ఉపయోగపడేదే ఈ ప్రత్యేక కథనం.

తాత్కాలిక వ్యాధులు

తాత్కాలిక లోపాలే అని నిర్లక్ష్యం చేయడం సరికాదు. ఒక్కోసారి అవి శాశ్వతం కావచ్చు.

మైగ్రేన్
ఇది తీవ్రమైన తలనొప్పి. ముఖ్యంగా యువతలో ఎక్కువ. ఒకవైపు కంటిలో లేదా తలలో ఒక పక్క ఈ నొప్పి వస్తుంటుంది. అందుకే పార్శ్వపు నొప్పి అంటారు. ఈ నొప్పిలో వికారం, వాంతులతో పాటు, కొందరిలో ఏదో కాంతి ఆవరించినట్లుగా  ఉంటుంది. దీన్నే ‘విజువల్ ఆరా’ అంటారు. కళ్ల ముందు మిరిమిట్లు గొలిపే మెరుపులూ కనిపించవచ్చు.

చికిత్స:నొప్పిని తక్షణం తగ్గించేవాటితో పాటు... మున్ముందు రాకుండా నివారించే మందులు... దాదాపు ఏడాది నుంచి రెండేళ్ల పాటు వాడాలి.

క్యాటరాక్ట్ (తెల్ల ముత్యం)
కంటిలో ఉండే లెన్స్ పారదర్శకంగా ఉండటం వల్ల మనకు ఎదుటి వస్తువులు స్పష్టంగా కనిపిస్తుంటాయి. కానీ కాలక్రమంలో ఈ లెన్స్ తన పారదర్శకతను కోల్పోతుంటుంది. దాంతో దృష్టి సన్నగిల్లడం, ఒకవస్తువు రెండుగా కనిపించడం, అనేక దొంతరలుగా కనిపించడం, మసకబారడం, రాత్రివేళ చూడటం కష్టమైపోవడం వంటి లక్షణాలు కనిపిస్తాయి.

చికిత్స:ఈ సమస్య చాలా సాధారణం. అత్యంత సాధారణమైన శస్త్రచికిత్స ద్వారా కంటిలోని లెన్స్‌ను మార్చి మరో పారదర్శకమైన లెన్స్ అమర్చడం వల్ల చికిత్స తర్వాత మళ్లీ మామూలుగానే చూడగలం.

ట్రామా (గాయాలు)
కంటికి దెబ్బతగిలినప్పుడు తక్షణం కనిపించే లక్షణాలు, ఆ తర్వాత కనిపించే లక్షణాలు వేర్వేరుగా ఉండవచ్చు. చూపు మసకబారవచ్చు. కంటిముందు మెరుపులు కనిపించడం, కంటిలోని ద్రవం (విట్రియల్) బయటకు రావడం,   దీర్ఘకాలంలో గ్లకోమా, రెటీనా పొరలు విడిపోవడం, కంటి నరం దెబ్బతినడం వంటి ప్రమాదాలు జరగవచ్చు.

చికిత్స:కంటికి ఏదైనా దెబ్బ తగిలినప్పుడు (ట్రామా కేసుల్లో) అత్యవసరంగా తగిన చికిత్స చేస్తే చూపు కోల్పోయే అవకాశాలు తక్కువ. ఆ తర్వాత కూడా క్రమం తప్పకుండా ఫాలో అప్ దీర్ఘకాలం పాటు చేయిస్తూ ఉండాలి.

రేచీకటి (నైట్ బ్లైండ్‌నెస్)
ఇది మనం తీసుకునే ఆహారంలో విటమిన్-ఏ పాళ్లు తగ్గడం వల్ల కలిగే కంటి సమస్య. మరికొందరిలో ఇది రెటీనాకు వచ్చే ఆరోగ్య సమస్యలు వల్ల ఈ సమస్య రావచ్చు. ఈ సమస్య వచ్చినవారిలో రాత్రిపూట కనిపించకపోవడం వంటి లక్షణాలుంటాయి. ఇక విటమిన్-ఏ లోపం తీవ్రంగా ఉన్నవారిలో కార్నియా కరిగిపోయే పరిస్థితి వస్తుంది. దీన్నే వైద్యపరిభాషలో ‘కెరటోమలేసియా’ అంటారు. పిల్లల్లో ఇది ఎక్కువ. అది అత్యవసరమైన పరిస్థితి (ఎమర్జెన్సీ).

చికిత్స: ఆహారంలో విటమిన్ ఏ ఉన్న పదార్థాలు ఇవ్వడం, విటమిన్-ఏ మాత్రలు వాడటం వంటివి చికిత్సలు.

డ్రగ్స్
కార్టికోస్టెరాయిడ్స్, కీళ్లనొప్పుల కోసం దీర్ఘకాలం పాటు వాడే కొన్ని మందులు, క్షయవ్యాధికి వాడే కొన్ని రకాల మందుల వల్ల స్కోటోమాస్ వచ్చి క్రమంగా చూపు తగ్గుతూ పోవచ్చు. ఒక్కోసారి ఇది శాశ్వతమూ కావచ్చు. అందుకే చూపు తగ్గుతున్నట్లు గ్రహించగానే డాక్టర్‌ను సంప్రదించి, తాము వాడుతున్న మందులను వివరించి, తగిన చికిత్స తీసుకోవాలి. దాంతో కోల్పోయిన చూపు తిరిగి వచ్చేందుకు అవకాశాలు ఎక్కువ.

పక్షవాతం (స్ట్రోక్ )
పక్షవాతం వచ్చినవారిలో మెదడులోని కొన్ని భాగాలకు రక్తసరఫరా తగ్గడం వల్ల ఆ భాగాలు చచ్చుబడిపోతాయి. ఒకవేళ కంటిచూపును నియంత్రించే కేంద్రానికి రక్తప్రసరణ తగ్గితే, ఆ ప్రభావం చూపుపై పడవచ్చు. ఇది సాధారణంగా తాత్కాలికం అయ్యేందుకే అవకాశాలు ఎక్కువ. అయితే కొన్ని సందర్భాల్లో ఇది శాశ్వత అంధత్వానికీ దారితీయవచ్చు.

చికిత్స: ఈ విషయంలో నివారణే చికిత్సతో సమానం. డయాబెటిస్‌ను, రక్తపోటును అదుపులో ఉంచుకోవడం వల్ల ఈ ప్రమాదాన్ని నివారించుకోవచ్చు. అప్పటికీ స్ట్రోక్ బారిన పడితే న్యూరాలజిస్ట్‌ల ఆధ్వర్యంలో చికిత్స తీసుకోవాలి.

బ్రెయిన్ ట్యూమర్స్
మెదడులో వచ్చే గడ్డలు (ఉదా: పిట్యూటరీ గడ్డల వంటివి) పెరిగిపోతూ... అవి చూపును మెదడుకు చేరవేసే ఆప్టిక్ నర్వ్ అనే నరాన్ని నొక్కివేయడం వల్ల లేదా కంటికీ, నరానికీ రక్తప్రసరణ కల్పించే రక్తనాళాన్ని నొక్కివేయడం వల్ల ఒక్కోసారి పాక్షిక అంధత్వం రావచ్చు. ఇందులో ఒక్కోసారి కంటికి ఎదురుగా ఉన్న మొత్తం దృశ్యం కాకుండా సగమే కనిపించవచ్చు. అలాంటి లక్షణం కనిపించినప్పుడు మెదడులో గడ్డలు ఉన్నట్లు అనుమానించి, నిర్ధారణ పరీక్షలు చేయించుకోవాలి. గడ్డలు ఉన్నట్లయితే వాటిని శస్త్రచికిత్స ద్వారా తొలగిస్తే మళ్లీ కోల్పోయిన చూపు వచ్చేందుకే అవకాశాలు ఎక్కువ.

పొగతాగడం వల్ల
దీనివల్ల వచ్చే తాత్కాలిక అంధత్వం (టొబాకో ఆంబ్లోపియా), ఆ అలవాటును  మానివేస్తే తొలగిపోతుంది.

శాశ్వత వ్యాధులు
ఈ కంటి వ్యాధులు శాశ్వత అంధత్వానికి దారితీస్తాయి. కాబట్టి అప్రమత్తంగా ఉండండి.

గ్లకోమా
మన కంటిలోని నల్లగుడ్డులో ఉన్న ద్రవాలు కొంత ఒత్తిడిని కలిగిస్తుంటాయి. ఈ ఒత్తిడినే ఇంట్రా ఆక్యులార్ ప్రెషర్ అంటారు. అయితే ఈ ఒత్తిడి క్రమంగా పెరుగుతూ పోవడం వల్ల మనం చూసే ప్రాంతపు వైశాల్యం క్రమంగా కుంచించుకుపోతూ, చికిత్స తీసుకోకపోతే  శాశ్వతంగా చూపు పోయే ప్రమాదం ఉంది. దీన్నే గ్లకోమా అంటారు.

చికిత్స :గ్లకోమాకు చికిత్స మూడు విధాలుగా జరుగుతుంది. మొదటిది మందులతో ఇంట్రా ఆక్యులార్ ప్రెషర్‌ను పెరగకుండా ఉంచడం. రెండోది లేజర్ చికిత్స. ఇంకా ప్రెషర్ అదుపులోకి రాకపోతే శస్త్రచికిత్స చేయాల్సి రావచ్చు.

రెటినల్ డిటాచ్‌మెంట్
ఈ సమస్య ఉన్న వారిలో రెటీనా లోని లోపలి పొర,  బయటి పొర మధ్యలోకి కొన్ని రకాల ద్రవపదార్థాలు రావడం వల్ల ఆ రెండు పొరలూ విడిపోవచ్చు. ఫలితంగా కొంతమేరకు గాని లేదా పూర్తిగా కాని దృష్టిని కోల్పోయే ప్రమాదం ఉంది.

చికిత్స : పై సమస్యలు కనిపించినప్పుడు వెంటనే కంటి డాక్టర్‌ను సంప్రదించాలి. అప్పుడు డాక్టర్లు అత్యవసర శస్త్రచికిత్స చేసి, విడిపోయిన రెండు రెటీనా పొరలను కలుపుతారు.

డయాబెటిక్ రెటినోపతి
డయాబెటిస్ ఉన్నవారిలో రక్తం మందంగా మారుతుంది. ఇలా మందంగా మారిన రక్తం అత్యంత సూక్ష్మాతి సూక్ష్మమైన రక్తనాళాల నుంచి ప్రవహించడం కష్టం కావడం వల్ల రెటినాకు తగినంత రక్తప్రసరణ జరగదు. ఫలితంగా చక్కెర పాళ్లను సమర్థంగా అదుపులో ఉంచుకోని వారిలో రెటీనా దెబ్బతినే అవకాశాలు ఎక్కువై చూపు పోయే ప్రమాదం ఉంది.

చికిత్స : డయాబెటిక్ రెటినోపతి కండిషన్ ఉన్నట్లు నిర్ధారణ అయితే తక్షణ లేజర్ చికిత్సతోగానీ లేదా కంటిలో ఇచ్చే ఇంజెక్షన్లతో గాని లేదా శస్త్రచికిత్స మార్గాల ద్వారాగాని చూపును మరింత కోల్పోకుండా ఆపే అవకాశాలు ఉంటాయి.

హైపర్‌టెన్సివ్ రెటినోపతి
మన దేహంలోని అన్ని అవయవాలతో పాటు కంటికీ నిత్యం రక్తప్రసరణ జరుగుతుందన్న విషయం తెలిసిందే. అయితే రక్తపోటు ఉన్నవారిలో రక్తం వల్ల రక్తనాళాలపై కలిగే ఒత్తిడి తీవ్రంగా పెరిగినప్పుడు అత్యంత సన్నటి రక్తకేశనాళికలు (క్యాపిల్లరీస్) ఆ ఒత్తిడికి చిట్లిపోయే ప్రమాదం ఉంది. ఫలితంగా చూపు కోల్పోయే అవకాశం ఉంది.

చికిత్స :ఈ సమస్య వల్ల చూపు కోల్పోకుండా ఉండేందుకు రక్తపోటును అదుపులో ఉంచుకోవడమనే నివారణ చర్య చాలా ఉత్తమమైన మార్గం. కొందరిలో లేజర్ లేదా శస్త్రచికిత్స అవసరం కావచ్చు.

ఏఆర్‌ఎమ్‌డీ
ఇది వయసుతో పాటు వచ్చే కంటి సమస్య. ‘ఏజ్ రిలేటెడ్ మాక్యులార్ డీజనరేషన్’ అనే ఇంగ్లిష్ పదాలకు  ఏఆర్‌ఎమ్‌డీ అన్నది సంక్షిప్త రూపం. వీరిలో రెటీనాలోని ‘మాక్యులా’ అనే మధ్యభాగం ప్రభావితం కావడం వల్ల ఇది వస్తుంది.

చికిత్స:ఈ సమస్య ఉన్నవారు తక్షణం డాక్టర్‌ను కలిస్తే లేజర్ చికిత్స ద్వారాగానీ లేదా కంటిలోని విట్రియల్ ఛేంబర్ అనే ప్రాంతంలో ఇంజెక్షన్స్ ఇవ్వడం వల్లగానీ లేదా శస్త్రచికిత్సతో గాని సమస్యను పెరగకుండా చూడవచ్చు.

థైరాయిడ్ ఐ డిసీజ్
ఇది హైపోథైరాయిడజమ్ లేదా హైపర్ థైరాయిడిజమ్ వ్యాధులు ఉన్న రోగుల్లో కనిపించే సమస్య. ఈ సమస్య ఉన్న కొందరిలో కనుగుడ్లు ముందుకు పొడుచుకు వచ్చినట్లుగా కనిపిస్తుంటాయి. దీన్నే వైద్యపరిభాషలో ప్రోప్టోసిస్ అంటారు. కొందరిలో కన్ను పొడిబారవచ్చు. ఒకే వస్తువు రెండుగా కనిపించడం, కంటి నొప్పి, గ్లకోమా కూడా రావచ్చు.

చికిత్స :లక్షణాలు కనిపించగానే థైరాయిడ్ హార్మోన్ల సమతౌలత్య నెలకొనేలా హార్మోన్ చికిత్స తీసుకోవాలి. కొందరిలో ఆర్బిటాల్ డీకంప్రెషన్ అనే శస్త్రచికిత్స అవసరం కావచ్చు.

కెరటోకోనస్ వ్యాధి
సాధారణంగా గమనించి చూస్తే మన కంటి నల్ల గుడ్డు ప్రాంతం ఒకింత ఉబ్బెత్తుగా కనిపిస్తూ గుండ్రం (స్ఫెరికల్)గా ఉంటుంది. కానీ కెరటోకోనస్ అనే కండిషన్ ఉన్నవారిలో ఈ నల్ల గుడ్డు భాగం ఒక కోణం (కోన్) ఆకృతిలో ఉన్నట్లుగా అనిపిస్తుంటుంది.

చికిత్స :కాంటాక్ట్ లెన్స్‌లతో దీనికి చికిత్స చేయవచ్చు. ‘కొలాజెన్ క్రాస్ లింకింగ్’ ప్రక్రియతో దీన్ని అదుపు చేయవచ్చు. ఇదిగాక కెరటోప్లాస్టీ అనే చికిత్స కూడా చేయవచ్చు.

మెల్లకన్ను
ఇంగ్లిష్‌లో స్క్వింట్ అని పిలిచే మెల్లకన్ను ఉన్నవారు వీలైనంత త్వరగా దాన్ని సరిచేసే శస్త్రచికిత్స చేయించుకోవాలి.

చూపునకు కలిగే అంతరాయాల్లో తాత్కాలికం... శాశ్వతాలివి...
వివిధ వ్యాధులు, రుగ్మతలు చూపునకు అంతరాయం కలిగించవచ్చు. కానీ అందులో కొన్ని తాత్కాలికమైనవి. తగిన చికిత్స తీసుకుంటే తగ్గుతాయి. కానీ కొన్ని మాత్రం తగిన చికిత్స తీసుకోకపోతే శాశ్వతంగా చూపును కోల్పోయేలా చేస్తాయి. ఆ తాత్కాలిక, శాశ్వత అంతరాయాల గురించి తెలుసుకుందాం.

లక్షణాలు
చూపునకు కలిగే అంతరాయాలు తాత్కాలికమైనా లేదా శాశ్వతం అయినా ఆయా వ్యాధులను కొన్ని సాధారణ లక్షణాల ద్వారా గుర్తించవచ్చు. అవి... ఒకే వస్తువు రెండుగా కనిపించడం, ఒకే వస్తువు అనేక వస్తువులుగా  కనిపించడం, మసగ్గా కనిపించడం, కళ్ల ముందు మెరుపులు, ఏవేవో మెరుపు తీగలు తేలుతున్నట్లు కనిపించడం,  మనం చూసే దృశ్యం మధ్యలో నల్లమచ్చ కనిపించడం లేదా కొంత భాగం కనపడకుండా పోవడం  జరగవచ్చు. దీన్ని వైద్యపరిభాషలో స్కోటోమాస్ అంటారు.

ఫీల్స్ డిఫెక్ట్స్:మనం చూసే ప్రాంతం (వైశాల్యం)లో అంతా ఒకేలా కనిపించకపోవచ్చు. వీటిని ఫీల్డ్ డిఫెక్ట్స్ అంటారు. ఉదా: ఒకవైపు అంతా స్పష్టంగా ఉండి, మరోవైపు స్పష్టత లేకపోవడాన్ని ‘హెమీ అనోపియా’ అంటారు. మనం చూసే ప్రాంతంలో పావు భాగం స్పష్టంగా లేకపోవడాన్ని ‘క్వాడ్రాంటనోపియా’ అంటారు. మనం చూసే దృశ్య వైశాల్యం రానురాను తగ్గిపోవడాన్ని ‘కన్‌స్ట్రిక్షన్’ అంటారు.

ఆధారము: సాక్షి

3.06504065041
మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు