హోమ్ / ఆరోగ్యం / వ్యాధులు / చెవి-ముక్కు-గొంతు
పంచుకోండి
వ్యూస్
  • స్థితి: సవరణ కు సిద్ధం

చెవి-ముక్కు-గొంతు

చిన్న పిల్లలలో చెవిలోంచి చీము కారడం చాలా సాధారణంగా చూసే వ్యాధి లక్షణం. చెవిలోని కర్ణభేరి పగిలి అక్కడ సూక్ష్మక్రిములు చేరి చీము తయారు చేస్తాయి. ఇది సరిగా చికిత్స చేయకపోతే పూర్తిగా చెముడు, అప్పుడప్పుడు మెదడుకు పాకి మెదడు వాపు వ్యాధి లక్షణాలు కలుగుతాయి.

ముక్కునుండి రక్తం కారుట

కారణాలు:-

  1. ఏదైనా బలమైనది ముక్కుపైన తగిలినప్పుడు.
  2. బలమైన పని చేసినా.
  3. రక్తపోటు ఎక్కువ అయినా.
  4. ఎత్తైన ప్రదేశములో ఉన్నా.
  5. ఎక్కువ ఒత్తిడి తో ముక్కును చీదినా.

ముక్కునుండి రక్తం కారితే ఏమి చెయ్యాలి?

  1. ప్రశాంతంగా కూర్చోవాలి.
  2. కొంచెం ముందుకు వంగాలి,కారుతున్న రక్తం గొంతులోనికి పోకుండా చూసుకోవాలి.
  3. ఒక ప్రక్క ముక్కునుండి రక్తం వస్తుంటే,ఆ ముక్కు నరానికి పైభాగంలో గట్టిగా వత్తిపట్టుకోవాలి.
  4. ఐస్ గాని లేక తడి(చల్లటి) బట్టను ముక్కుపై ఉంచాలి.దీని ద్వారా ముక్కుకు సంబంధించిన రక్తనాళాలు సంకోచించటం జరుగుతుంది.
  5. రెండు ముక్కు రంధ్రాల నుండి రక్తం వస్తున్నచో ముక్కులు రెండింటినీ గట్టిగా నొక్కి పట్టుకోవాలి,కనీసం 10 నిమిషాల పాటు పట్టుకొని ఉంచాలి.ఇంకనూ రక్తప్రసరణ ఉన్నచో,ఇంకా 10 నిమిషాల పాటు నొక్కి పట్టి ఉంచాలి.
  6. ముక్కుకు బలమైన గాయం అయినచో చాలా సున్నితంగా పట్టి ఉంచాలి.
  7. రక్తస్రావం ఎక్కువగా గాని లేక మరలా మరలా రక్తం కారుతున్నా వెంటనే డాక్టర్ ని కలవవలసి ఉంటుంది.

చెవిలో చీము

చిన్న పిల్లలలో చెవిలోంచి చీము కారడం చాలా సాధారణంగా చూసే వ్యాధి లక్షణం. చెవిలోని కర్ణభేరి పగిలి అక్కడ సూక్ష్మక్రిములు చేరి చీము తయారు చేస్తాయి. ఇది సరిగా చికిత్స చేయకపోతే పూర్తిగా చెముడు, అప్పుడప్పుడు మెదడుకు పాకి మెదడు వాపు వ్యాధి లక్షణాలు కలుగుతాయి.

వ్యాధి లక్షణాలు :
ఒక చెవి లేదా రెండు చెవులలోంచి చీము, నీరు, దుర్వాసనతో చీము వస్తుంటాయి. జలుబు చేసినపుడు ఎక్కవవుతుంటుంది. చెవినొప్పి, పోటు, జ్వరం కూడా రావచ్చును.

జాగ్రత్తలు :
నీరు చెవిలో పోనివ్వకూడదు. దూదిపెట్టి స్నానం చేయించాలి. ఈదనివ్వకూడదు. చిన్నపుల్లకి దూదిచుట్టి కనిపించినంత మేరకు చీము తుడిచి శుభ్రం చేయాలి. నూనె, పసర్లు పోయనివ్వకూడదు. డాక్టర్ల సలహాపై చెవిలో మందులు వేయాలి.

వినికిడి మందగించుట

సాధారణంగా వయసు పెరుగుదలతో పాటు వినికిడి మందగిస్తుంది.

కారణాలు:

  • వృత్తి రీత్యా దీర్ఘకాలము పెద్ద శబ్దాలు వినేవారు.
  • వెలుపల చెవిలో మైనము లాంటి పదార్దము గట్టి పడడము.
  • దీర్ఘకాలిక చెవి ఇన్ పెక్షను తో  బాధపడడం.
  • కర్ణ భేరికి సంబంధించిన  వ్యాధులు.
  • కర్ణ భేరి చిట్లుట
  • చెవి లోపల కండరము పెరుగుదల. ఎముకలు అసాధారణంగా పెరుగుట వలన గడ్డలు,  కాన్సరు లాంటి వ్యాధులు

లక్షణాలు:

  • సాధారణంగా మాట్లాడలేక పోవడం.
  • ఎదుటివాళ్ళతో మాట్లడుతున్నప్పుడు సరిగ్గా అర్దం చేసుకోలేకపోవడం.
  • ఇతరులను మాట్లాడమనడం.
  • పెద్ద శబ్దము తో ఇతరులను మాట్లాడమనడం
  • రేడియో వింటున్నప్పుడు కాని, టి వి చూస్తున్నప్పుడు కాని శబ్దము అధికము గా పెట్టడం.
  • చిన్నపిల్లలలో ఎలాంటి శబ్దానికి సమాధానము లేకపోవడం.

తీసుకోవలసిన జాగ్రత్తలు:

  • అధిక శబ్దాలకు అసాధారణ శబ్దాలకు దూరంగా ఉండాలి.
  • శబ్దకాలుష్యము ఉన్న వృత్తిలో మార్పు  చేయడం.
  • వ్యాధి నిర్దారణ చికిత్స. వీలైనంత త్వరగా డాక్టరు సలహా తీసుకోవడం
  • చిన్న పిల్లలకు వినికిడి సమస్య త్వరగా గుర్తించి తగు చర్యలు తీసుకోవడం.
  • ప్రత్యేకమైన వినికిడి పరికరాలు ఉపయోగించడం.

సైనసైటిస్

కపాలంలో గాలితో నిండిన కేవటీలను సైనస్ అంటారు. సైనస్ మ్యూకస్ మెంబ్రేన్ అనబడే మెత్తటి పొరతో కప్పబడి ఉంటాయి. ఈ మ్యూకస్ మెంబ్ర్రేన్ ఒక పలుచటి ద్రవపదార్ధాన్ని తయారుచేస్తుంది. ఇవి ముఖ్యంగా ఊపిరి పీల్చుకున్నప్పుడు శరీరంలోకి ప్రవేశించిన గాలికి సరైన ఉష్టోగ్రత మరియు తేమ కల్పించడానికి తయారు చేయబడ్డాయి. అందువల్ల ఆర్బిట్ మరియు క్రేనియంలోని వివిధ భాగాలు ఉష్టోగ్రతలోని తేడాల వల్ల దెబ్బతినకుండా వాటికి తగిన ఉష్టోగ్రత కల్పించడానికి తోడ్పడతాయి. సైనస్ లు కపాలంలో ఎముకలలో గాలిని ఉంచడంవల్ల వాటి బరువును తగ్గిస్తాయి. ఇవి మాట్లాడేప్పుడు తగిన శబ్ధం రావడానికి కూడా తోడ్పడతాయి. అన్ని రకాల శ్వాసకోశ అంటువ్యాధులు సైనస్ ల పైన ప్రభావం చూపుతాయి. ఒక వేళ సైనస్ లు ఎటువంటి అడ్డులేకుండా ముక్కు రంధ్రాలలోనికి తెరుచుకున్నట్లైతే అంటు త్వరగా తగ్గిపొతుంది. కాని సైనస్ ల నుండి స్రవించు స్రావాలు వాటి మార్గంలో అడ్దువల్ల అంటువ్యాప్తి చెందవచ్చు. దీనినే సైనసైటిస్ అంటారు. కొన్ని సార్లు ఈ అంటు చాలా ప్రమాదకరంగా కూడా మారవచ్చు.

అక్యూట్ సైనసైటిస్ లక్షణాలు:

  • సైనస్ లు ఉన్న భాగాల్లో నొప్పి మరియు ఒత్తిడి.
  • చీముతో కూడిన స్రావాలు ముక్కు నుండి బయటకు వచ్చుట.
  • ముక్కు దిబ్బడ.

కారణములు

ముక్కులో వచ్చే ఇన్ ఫెక్షన్స్: సైనస్ ను కప్పబడిన మ్యూకస్ మెంబ్రేన్ ముక్కులోని మ్యూకస్ మెంబ్రేన్ తో సంబంధం కలిగి ఉంటుంది. అందువలన ఎటువంటి అంటు అయినా ముక్కు నుండి చాల సులభంగా సైనస్లకు చేరుతుంది. ఈ సైనస్లు ముక్కు రంధ్రాల లోకి తెరుచుకొని ఉంటే అంటు త్వరగా తగ్గిపోతుంది. ఒక వేళ వాటిలో ఏదైనా అడ్డు ఉంటే అంటు త్వరగా తగ్గిపోదు. ఇది ముఖ్యంగా వైరస్ వల్ల వస్తుంది.

ఈతకొట్టడం: ఒక్కొక్క సారి సూక్ష్మజీవులు ఎక్కువగా ఉన్న నీళ్ళలో ఈత కొట్టడం వల్ల ఆ నీళ్ళు సైనస్ లలోకి ప్రవేశించి వ్యాధిని కలుగ చేస్తాయి. స్విమ్మింగ్ పూల్స్ లో క్లోరిన్ ఎక్కువగా ఉన్నప్పుడు కూడా ఆ  గ్యాస్ ముక్కు రంధ్రాల ద్వారా సైనస్ లలోని చేరి సైనస్ల లోకి మ్యూకస్ మెంబ్రేన్ వాచేటట్లు చేస్తుంది. అది క్రమంగా సైనసైటిస్ ను కలుగచేస్తుంది.

ట్రోమా: ఒక్కొక్కసారి సైనస్ లను తయారు చేసిన ఎముకలు విరగడం వల్ల వాటికి అంటు చేరి సైనస్ మ్యూకోసాకు అంటును కలుగచేస్తుంది.

దంతాలలో వచ్చే ఇన్ ఫెక్షన్ మోలార్ మరియు ప్రీ మోలార్ దంతాలలో ఇన్ ఫెక్షన్ కలుగచేయవచ్చు.

ఇతరకారణాలు:

  1. సైనస్ లో సరైన వెంటిలేషను లేకపోవడం మరియు సైనస్ లలో అడ్డు: సాధారణంగా సైనస్ లలో బాగా వెంటిలేట్ అయి ఉంటాయి సైనస్ ను కప్పి ఉంచిన మ్యూకోసా మ్యూకస్ ద్రవాలను ఉత్పత్తి చేస్తుంది. ఈ ద్రవాలు సీలియరీ మూమెంట్ వల్ల సైనస్ ఆస్టియాను చేరి అక్కడ నుండి ముక్కురంద్రాలలోకి చేరుతాయి. ఒక వేళ ఇలా జరగడానికి సైనస్లలో ఏదైన అడ్డుకుంటే సైనస్ లో తయారయ్యే పదార్ధాలు అక్కడే నిలవ ఉండి సైనస్లో విధులకు ఆటంకం కలిగిస్తాయి. ముఖ్యంగా సైనస్ లో నాసల్ పేకింగ్, స్ఫుటం యొక్క నిర్మాణంలో తేడా రావడం, మేలిగ్నెంట్/నియొప్లాసం వల్ల అడ్డు ఏర్పడుతుంది.
  2. నాసల్ కేవిటిలో ద్రవాలు నిలువ ఉండటం: ఒక్కొక్క సారి ముక్కులోని ద్రవాల చిక్కదనం వల్ల లేదా ఏదైనా అడ్డు ఉండటం వల్ల  నాసోఫారింగ్స్ లోకి వెళ్ళకుండా ఉండి అవి అంటు కలగజేస్తాయి.
  3. పూర్వం వచ్చిన సైనసైటిస్ అటాక్స్: ఎక్కువసార్లు సైనసైటిస్ రావటం వల్ల సైనస్ మ్యూకోసా దెబ్బతిని ఉండటం వల్ల మళ్ళీ సైనసైటిస్ వచ్చేటట్లు చేస్తుంది.
  4. వాతావరణం: వాతావరణం తేమగా మరియు చల్లగా ఉన్నప్పుడు సైనసైటిస్ వచ్చే అవకాశం ఎక్కువ.
  5. ఇతర అంటువ్యాధులు: పుష్టికరమైన ఆహారం తీసుకోకపోవటం, మీసిల్స్, చికెన్ పాక్స్, కోరింత దగ్గు వంటి అంటువ్యాధులతో బాధపడటం మరియు డయాబెటిస్ వంటి దీర్ఘకాల వ్యాధులతో బాధపడుతున్నప్పుడు సైనసైటిస్ వచ్చే అవకాశాలు ఎక్కువ.
  6. సూక్ష్మజీవులు: చాలా కేసుల్లో సైనసైటిస్ వైరల్ ఇన్ ఫెక్షన్ లాగా ప్రారంభమవుతుంది. తరువాత నెమ్మదిగా బాక్టీరియా చేరి సైనసైటిస్ వస్తుంది. ఈ హానికర సూక్ష్మజీవులలో స్ట్రెప్టోకోకస్ న్యూమోనియ,హీమోఫిలస్ ఇన్ప్లూయంజా, స్టెఫైలోకోకస్ ఆర్.ఇ.యస్ .ముఖ్యమైనవి.

సైనసైటిస్ వలన సైనస్ లను కప్పి ఉన్న మ్యూకస్ మెంబ్రేన్ మంటకు గురవుతుంది. దాని వల్ల అవి ఎక్కువగా ద్రవాలను ఉత్పత్తి చేయడమే కాకుండా పాలీమార్పో న్యూక్లియర్ కణాలను కూడా తయారుచేస్తాయి. సైనస్ ఆస్టియమ్ ఈ విధంగా తయారైన ద్రవాలను బయటకు పంపించగలిగి,శరీరానికి తగిన వ్యాధి నిరోధక శక్తి ఉన్నప్పుడు వ్యాధి త్వరగా తగ్గిపోతుంది. అలాకానప్పుడు అంటు అధికమై మ్యూకోసల్ మెంబ్రేన్ మరియు సైనస్ ఎముకల మీద కూడా ప్రభావం కనబడుతుంది. దంతాలకు అంటు ఉన్నట్లయితే అది చాలా సులభంగా సైనస్లకు వ్యాపించి సైనసైటిస్ లను కల్పించవచ్చు. అందువల్ల దంతాలలోకి అంటును ముందుగానే గుర్తించి చికిత్స తీసుకోవాలి.

వ్యాధి నిర్ధారణ

వ్యాధి లక్షణాలను పూర్తిగా తెలుసుకొనుట వలన మరియు సైనస్ ఎక్స్-రే ద్వార ఈ వ్యాధిని నిర్ధారించవచ్చు.

చికిత్స

  • వైద్యుని సహకారంతో అమాక్సిసిల్లిన్ లేదా ఆంపిసిల్లీన్ మందులు యివ్వవచ్చు.
  • పెన్సిలిన్ మందులకు రోగి అలర్జీ కలిగి ఉన్నట్లైతే ట్రైమితోప్రిం లేదా సల్ఫోమితాక్సజోల్  మందులు యివ్వచ్చు.
  • ఓరల్ డ్రిక్సోరాల్ మరియు డిమెటాప్ యివ్వవచ్చు.
  • సెలైన్ యిరిగేషన్ వలన గట్టిగా ఉన్న స్రావాలు మెత్తబడి  బయటకు స్రవించే అవకాశం ఉంది.
  • స్టీమ్ పీల్చుకొనుట ద్వారా మరియు ఎక్కువ ద్రవాలను లేదా పానీయాలను సేవించుట  ద్వారా మరియు లోకల్ హీట్ (వేడి తడి బట్టలను సైనస్ల మీద ఉంచటం)ను కలిగించుట ద్వారా ముక్కు నుండి స్రావాలు బయటకు వచ్చి రోగికి ఉపశమాన్ని కలిగిస్తుంది.
  • నేసల్ స్ప్రేలు రోగికి కొంత ఉపశమనాన్ని కలిగిస్తాయి. కాని నేసల్ స్ప్రేలు అవసరం కంటే ఎక్కువ మోతాదులో ఉపయోగించినట్లయితే ముక్కు దిబ్బడ కలిగే ప్రమాదమున్నది కాబట్టి రోగి జాగ్రత్తగా ఉపయోగించవలెను.
  • సాధారణంగా సైనసైటిస్ మందుల ద్వారా తగ్గుతుంది. కాని కొన్నిసార్లు మందులకు తగ్గనప్పుడు శస్త్రచికిత్స ద్వారా ఈ వ్యాధిని తగ్గిస్తారు.

నివారణ

(ఎ)ఎలర్జీ కలిగించే వస్తువులకు దూరంగా ఉంచాలి.

(బి) తగిన పోషకాహారం తీసుకోవడం,వ్యాయామం చేయటం మరియు తగినంత విశ్రాంతి తీసుకోవడం ద్వారా వ్యాధి నిరోధక శక్తి పెంపొందించుకోవాలి.

(సి) శ్వాసకోశ అంటువ్యాధులతో బాధపడుతూ ఉన్న వ్యక్తులకు దూరంగా ఉండాలి.

(డి) శ్వాసకోశ వెలుపలి భాగాల్లో అంటు 7 - 10 రోజుల కంటే ఎక్కువ కాలము ఉన్నట్లయితే వైద్యుని సలహా పాటించవలెను.

(ఇ) సైనస్ లలో నొప్పి ఉన్న, ముక్కు నుండి వచ్చు స్రవాల రంగు మారిన లేదా చెడువాసన వస్తున్నా, వెంటనే వైద్యుని సంప్రదించాలి.

సైనస్ వ్యాధి మరియు టాన్సిలైటిస్ తో బాదపడుతున్నవారికి ఇ.ఎన్.టి (చెవి, ముక్కు,గొంతు) నిపుణుల ఆసుపత్రి హైదరాబాదులో ఉంది.

సైనస్‌ సమస్య కి ఆసనాలు

ముక్కు పట్టేయడం, శ్వాస తీసుకోవడం కష్టంగా అనిపించడం, ముఖమంతా నొప్పులూ, తలనొప్పి.. ఇలా ఏడాది పొడవునా సైనస్‌ లక్షణాలు కొందరిని ఇబ్బంది పెడుతుఉంటాయి. వాటిని అదుపు చేయాలంటే... ఈ ఆసనాలు వేయాల్సిందే.

పూర్ణ భుజంగాసనం

బోర్లా పడుకుని ఛాతీ పక్కన రెండు చేతులూ ఉంచాలి. ఇప్పుడు మోకాళ్లను వంచి పాదాల్ని పైకి లేపి తల దగ్గరకు తీసుకురావాలి. తరవాత శ్వాస తీసుకుంటూ మెల్లగా భుజాలను పైకి లేపుతూ సాధ్యమైనంత వరకూ తలను పాదాలకు ఆనించడానికి ప్రయత్నించాలి. ఈ ఆసనంలో ఇరవై నుంచి ముప్ఫై సెకన్లు ఉన్నాక శ్వాస తీసుకుంటూ మెల్లగా యథాస్థితికి రావాలి. ఇలా మూడు నుంచి ఆరుసార్లు చేయాలి. దీన్ని చేయడం వల్ల ఛాతీ భాగం, పొట్ట బాగా సాగుతాయి. వెన్నెముకకు విశ్రాంతి అంది ఆరోగ్యంగా మారుతుంది. స్వాధీష్టాన చక్రం క్రమబద్ధం అవుతుంది. ఈ ఆసనం గర్భాశయం, అండాశయాలకూ మేలు చేస్తుంది. పొట్టలోని భాగాలన్నింటికీ మంచిది. అలాగే శ్వాస సమస్యలున్న వాళ్లకూ ఈ ఆసనం వల్ల ఎంతో ఫలితం ఉంటుంది. హెర్నియా, హైపర్‌ థైరాయిడ్‌ ఉన్నవాళ్లు ఆసనాన్ని గురుముఖంగా వేయడం మంచిది. సర్వైకల్‌ స్పాండిలైటిస్‌, గుండె జబ్బులూ, అధికరక్తపోటు ఉన్న వాళ్లు ఈ ఆసనం వేయకూడదు.

భస్త్రిక ప్రాణాయామం

కూర్చుని వెన్నెముక నిటారుగా ఉంచి, కొద్దిగా వేగంగా శ్వాస తీసుకుని వదులుతూ ఉండాలి. ఇలా వందసార్లు లేదా మూడు నిమిషాలు చేయాలి. తరవాత వెంటనే లేవకుండా కళ్లు మూసుకుని నిమిషం పాటు విశ్రాంతి తీసుకోవాలి. శ్వాస మీదే ధ్యాస ఉంచాలి. ఆ తరవాత శవాసనంలో విశ్రాంతి తీసుకోవాలి.ఈ ప్రాణాయామం చేయడం వల్ల వూపిరితిత్తులు దృఢంగా మారతాయి. శరీరంలో రక్తప్రసరణ బాగా జరుగుతుంది. రోజులో రెండుసార్లు కూడా ఈ ప్రాణాయామాన్ని చేయొచ్చు.

విపరీత నౌకాసనం

బోర్లా పడుకుని రెండు చేతులూ ముందుకు చాచి ఉంచాలి. ఇప్పుడు శ్వాస తీసుకుంటూ చేతులూ, కాళ్లూ, తలను సాధ్యమైనంత వరకూ పైకి లేపాలి. ఈ క్రమంలో శరీర బరువంతా పొట్టపై ఉంచాలి. మోకాళ్లు వంచకూడదు. ఈ స్థితిలో ఇరవై నుంచి ముప్ఫై సెకన్లు ఉన్నాక శ్వాస వదులుతూ తలా, కాళ్లూ చేతులూ కింద పెట్టాలి. తరవాత మళ్లీ శ్వాస తీసుకుంటూ ఈ ఆసనం వేయాలి. ఇలా ఆరుసార్లు చేయాల్సి ఉంటుంది. ఫలితంగా సైనస్‌ సమస్య, శ్వాస తీసుకోవడంలో ఇబ్బంది, ఎలర్జీల్లాంటివి రాకుండా ఉంటాయి. శరీరాన్ని సాగదీయడం వల్ల ఛాతీ భాగం, వూపిరితిత్తులూ దృఢంగా మారతాయి.

ఆధారము: పోర్టల్ విషయ రచన సభ్యులు

గురక

మన పక్కన పడుకున్న వాళ్ళు ఎవరైనా గురక పెడుతుంటే మనకు నిద్ర పట్టదు. గురకలు కూడా రకరకాలుగా పెడుతుంటారు. కొన్ని గురకలు భయాన్ని పుట్టిస్తాయి. పాశ్చాత్య దేశాల్లో మొగుడి గురక తట్టుకోలేక విడాకులకై కోర్టులకు పరుగెత్తిన వాళ్ళూ ఉన్నారు. గురక పెట్టేవాళ్ళు రాత్రి సరిగ్గా నిద్రపోక పగలు కునికి పాట్లు పడుతూ వాహనాలు నడిపేటప్పుడు యాక్సిడెంట్లు చేస్తారని పలు అధ్యయనాల్లో తేలింది.

ఈ అధ్యయనం ప్రకారం ప్రపంచ జనాభాలో కనీసం 40 శాతం మంది గురకపెట్టే వారే! పిల్లల్లో సైతం ఇది కనబడుతుంది. వయస్సు పెరుగుతున్న కొద్దీ గురక ఎక్కువవుతుంది. అలాగే బరువు పెరుగుతున్న కొద్దీ ఈ సమస్య పెరుగుతుంది.

గురక అంటే ఏమిటి?
శ్వాస లోపలికి తీసుకునేప్పుడు ముక్కు నుంచి స్వరపేటిక వరకు ఎక్కడైనా నాళాలు సన్నబడ్డా, శ్వాసద్వారాలు మూసుకుపోయినా, గాలి లోపలికి బలవంతాన తీసుకుంటున్నప్పుడు వచ్చే శబ్దమే గురక. నాళాలు సన్నగా ఉండడంతో బలవంతాన గాలి తీసుకోవాల్సి వస్తుంది కాబట్టి గురకలో గాలి ఎక్కువ తీసుకుంటున్నారేమో అనిపిస్తుంది చూసేవారికి. గొతులో ఉండే కండరాల బిగువు తగ్గినప్పుడు అంగిట్లో చివరి భాగాన ఉండే కండరం సాఫ్ట్‌ పాలట్‌తో బాటు చుట్టుపక్కల ఉన్న ఫారింక్స్‌ కండరాలు, కొండ నాలుక బలంగా లోపలికి పీల్చే గాలి వల్ల కంపిస్తాయి. ఈ కంపనం వల్ల వచ్చే శబ్దమే గురక.

నిద్రలో బలవంతాన తీసుకున్న గాలిని తిరిగి సన్నని శ్వాసనాళాల ద్వారా బయటకు నెట్టడం కష్టమై నిశ్వాస నోటి ద్వారా కూడా జరుగుతుంటుంది. అప్పుడు పెదాలు కంపించి కొన్ని రకాల శబ్దాలు వస్తుం టాయి. ముక్కు దూలం వంకరగా ఉన్నా, అడినాయిడ్స్‌, టాన్సిల్స్‌ ఉన్నా శ్వాసమార్గం సన్నబడుతుంది. ఊపిరి తేలిగ్గా లోపలికి వెళ్ళదు. గురక వల్ల నిద్ర సరిగ్గా పట్టదు. మెలకువగా ఉన్నప్పటికన్నా నిద్ర పోయేటప్పుడు శ్వాస సరిగా ఉండేట్లు శస్తచ్రికిత్స చేయించుకోవాలి. అడినాయిడ్స్‌, టాన్సిల్స్‌ గాని ఉంటే తీయించాలి. థైరాయిడ్‌ వ్యాధి ఉన్న వాళ్ళు థైరాయిడ్‌ హార్మోన్లు తీసుకోవాలి. ఊబకాయంతో బాధపడేవారు బరువు తగ్గించుకోవాలి.

నిద్ర, నిద్రకు సంబంధించిన రుగ్మతపై అవగాహన పెరుగుతున్న తరుణంలో శ్వాససంబంధిత వ్యాధులు- గురక ఈ రుగ్మతలలో భాగమేనని గుర్తించారు. నిద్రలో 10 సెకన్ల పాటు శ్వాస ఆగిపోవడాన్ని ‘ఆప్నియా’ అని, 50 శాతం కంటే తక్కువ గాలి పీల్చడాన్ని ‘హైపోప్నియా’ అని అంటారు. వీటికి తోడు రక్తంలో ఆక్సిజన్‌ పరిమాణం కూడా బాగా తగ్గుతుంది. అబ్‌స్ట్రక్టివ్‌ స్లీప్‌ ఆప్నియా (ఒఎస్‌ఎ) శ్వాస ప్రక్రియ జరుగుతున్నా ముక్కు- గొంతుకలో అడ్డంకుల వల్ల శ్వాస ఆగిపోతుంది. ఆ తరువాత గురక రావడం ఒక సైకిల్‌గా వస్తుంది. వ్యాధిగ్రస్తుడు తరచుగా మేల్కోవడం, గొంతు తడారిపోవడం జరుగుతుంది.

గురక లక్షణాలు:

  1. గురక, నిద్రాభంగం
  2. వేకువజామున తలపోటు
  3. పగటి నిద్ర
  4. పని మీద ఏకాగ్రత లేకపోవడం
  5. వ్యక్తిత్వంలో మార్పులు
  6. ఆక్సిడెంట్‌లకు గురి కావడం
  7. రాత్రివేళల్లో ఎక్కువ మూత్రం
  8. హై బిపి
  9. హార్ట్‌ ఎటాక్స్‌
  10. అంగస్తంభన సమస్యలు

వ్యాధి నిర్ధారణ:స్లీప్‌ స్టడీ ద్వారా అబ్‌స్ట్రక్టివ్‌ లేదా సెంట్రల్‌ స్లీప్‌ ఆప్నియాను గుర్తించవచ్చు. ఈ పరీక్ష రాత్రివేళలో నిర్వహిస్తారు. కనీసం 7-8 గంటలపాటు నిద్రలో వివిధ అంశాలను గుర్తించవచ్చు. ఆప్నియా, హైపోప్నియా, బిపి ఆక్సిజన్‌ పరిమాణం, గుండె స్పీడు, శ్వాస స్పీడు, ఛాతీ కదలికలు, ఏ పొజిషన్‌లో పడుకున్నది, కాళ్ళ కదలికలు, గురక వంటి వాటిని రికార్డు చేసి ఎంత ఉధృతంగా ఉందో తెలుసుకోవాల్సి ఉంటుంది.

ఒఎస్‌ఎ చికిత్స:బాడీ మాస్‌ ఇండెక్స్‌ (బిఎమ్‌ఐ) 20 నుండి 25 లోపు ఉండేట్లు చూసుకోవడం, బరువు తగ్గడం, థైరాయిడ్‌, డియన్‌యస్‌, టాన్సిల్‌, అడినాయిడ్స్‌ సమస్యలను మందులతో లేదా శస్త్ర చికిత్స ద్వారా నయం చేసుకోవటం అప్పటికీ గురక తగ్గకపోతే యుపులో పాలాటో ఫారింజి యో ప్లాస్టీ అనే శస్త్ర చికిత్స అవసరం పడుతుంది. ఫెయిల్‌ అయిన వారిలో కంటిన్యువస్‌ పాజిటివ్‌ ఎయిర్‌వేస్‌ ప్రెషర్‌ (సిపిఎపి)తో శ్వాస మార్గాలను వెడల్పు చేయడం, తద్వారా శ్వాస ప్రక్రియ సజావుగా జరిగేట్లు చూడవచ్చు. దీనిని ఇంటి దగ్గరే ప్రతిరోజు పడుకునేటప్పుడు వాడాలి. ఈ చికిత్స వల్ల బరువు తగ్గడం, గురక, బిపి వంటివి తగ్గడమే కాకుండా దినచర్య కూడా చాలా ఆక్టివ్‌గా ఉండేట్లు చేయవచ్చు.

- డా బి.శ్యామ్‌ సుందర్‌ రాజ్‌

ఆధారము: ఆయురారోగ్యాలు బ్లాగ్

చెవి ముక్కు గొంతు సమస్య - పరిష్కారాలు

చెవులు మూసుకు పోతున్నాయి...

నేను తరచూ విమాన ప్రయాణాలు చేస్తుంటాను. నాకుకొద్దిరోజులుగా విమానం టేకాఫ్ అయ్యేటప్పుడు, ల్యాండ్ అయ్యేటప్పుడు చెవులుమూసుకుపోయినట్లుగా అవుతున్నాయి. ఇలా మూసుకుపోయిన తర్వాత చాలాసేపు చెవులుదిమ్ముగా అవుతాయి. శబ్దాలు వినిపించవు. ఎందుకు ఇలా అవుతోంది. దీనినినిర్లక్ష్యం చేస్తే వినికిడి పూర్తిగా పోతుందేమోనని భయం వేస్తోంది. నాకు ఇతర ఆరోగ్య సమస్యలు ఏవీ లేవు. నా సమస్యకు పరిష్కారాన్ని తెలియచేయగలరు.

మన చెవిని మూడు భాగాలుగా విభజించవచ్చు. అవి బయట చెవి, మధ్య చెవి, లోపలి చెవి. మధ్య చెవిలో గాలితో నింపబడిన కావిటీలాంటి భాగంలో మూడు ఎముకల గొలుసుతో పాటుగా యూస్టేషియన్ ట్యూబ్ అనే గొట్టంలాంటి భాగం కూడా ఉంటుంది. బయట వాతావరణంలోని గాలి ఒత్తిడి, మధ్య చెవిలోని గాలి ఒత్తిడి సమానంగా ఉండేలా చూడడమే ఈ ట్యూబ్ ముఖ్యమైన పని. ఇది మధ్య చెవి నుంచి ముక్కులోనికి తెరుచుకుని ఉంటుంది. మనం శ్వాస తీసుకున్నప్పుడు గాలి ముక్కువైపు ఉన్న భాగం ద్వారా మధ్య చెవిలోనికి వెళ్తుంది. ఈ ప్రెషర్, బయటి ఎయిర్ ప్రెషర్‌కు సమానంగా లేనప్పుడు చెవి మూసుకుపోయినట్లుగా అనిపిస్తుంది. ముఖ్యంగా విమానంలో ప్రయాణించేటప్పుడు, బయట వాతావరణంలోని గాలి ఒత్తిడి తరచూ మారుతుండడం వల్ల ఈ సమస్య వస్తుంది.

మీరు ఈ సమస్యను చూయింగ్ గమ్ నమలడం ద్వారా కానీ, ఇయర్ ప్లగ్స్ వాడడం వల్ల కానీ తగ్గించుకోవచ్చు. ఇది తీవ్రమైన సమస్య కాదు, కానీ ఒకసారి ఈఎన్‌టీ నిపుణులను సంప్రదించి సలహా తీసుకోండి. ఇందుకు సంబంధించిన అనుబంధ సమస్యల లక్షణాలు ఏవైనా గుర్తించినట్లయితే తొలిదశలోనే చికిత్స చేసి తగ్గించడానికి అవకాశం ఉంటుంది.

నా వయసు 29. కుడి ముక్కు రంధ్రం సరిగా పనిచేయడం లేదు. మూసుకుపోయినట్లుఉంటోంది. కుడిచెవిలో కూడా నొప్పి వస్తోంది. నా సమస్యకు పరిష్కారంతెలియచేయండి.?

మీకు ముక్కు దూలం వంకర పోవడం వల్ల ఈ సమస్య వచ్చి ఉండవచ్చు. మన చెవి, ముక్కు, గొంతు ఒకదానితో ఒకటి సంబంధం కలిగి ఉంటాయి. అందువల్ల ఈ మూడు భాగాల్లో ఏదైనా ఒక భాగంలో సమస్య మొదలైతే... అది క్రమేణా మిగిలిన రెండు భాగాలకూ విస్తరిస్తుంది. మీరు మొదట ఈఎన్‌టీ నిపుణులను సంప్రదించి ముక్కుకు సంబంధించిన పరీక్షలు చేయించి సమస్యను నిర్ధారించుకోవాల్సి ఉంటుంది. పరీక్షల రిపోర్టుల ఆధారంగా సమస్య తీవ్రతను అంచనా వేసి... మీకు ఆపరేషన్ అవసరం అవుతుందా లేక మందులు, నాసల్ స్ప్రేల వాడకం, జీవనశైలి మార్పులతో తగ్గుతుందా అనేది చెప్పవచ్చు. ముక్కును చెవిని కలిపే యూస్టేషియన్ ట్యూబ్ ముక్కు రంధ్రంతోపాటుగా మూసుకుపోవడం వలన చెవిలోకి గాలి ప్రసరణ జరగక చెవినొప్పి వస్తుంది. ఇది ముక్కు సమస్యతోపాటుగా వచ్చిన అనుబంధ సమస్య. కాబట్టి ముక్కు సమస్యకు తగిన ట్రీట్‌మెంట్ తీసుకుంటే చెవినొప్పి కూడా తగ్గుతుంది.

ముక్కు నుంచి తరచూ రక్తస్రావం...?

మా బాబు వయసు ఎనిమిదేళ్లు. చాలా తరచుగాముక్కు నుంచి రక్తం కారుతోంది. డాక్టర్‌కి చూపించి ట్రీట్‌మెంట్ తీసుకున్నతర్వాత తగ్గింది. కానీ మళ్లీ వెంటనే నాలుగు నెలల్లో తిరిగి రక్తస్రావంకావడం మొదలైంది. జలుబు కూడా తరచూ వస్తుంటుంది. మా సమస్యకు పరిష్కారంచూపండి.

ముక్కు చాలా సున్నితమైన భాగం. ముక్కులోంచి భాగాలు కూడా చాలా సున్నితంగా ఉంటాయి. కొన్నిసార్లు చిన్న ఒత్తిడికి లోనైనా రక్తస్రావం అవుతుంటుంది. ముక్కులో వేళ్లు పెట్టుకునే అలవాటు ఉన్న వారిలో చేతి గోళ్ల వల్ల, గట్టిగా తిప్పడం వల్ల లోపలి భాగాలకు దెబ్బతగలడం వల్ల రక్తస్రావం అయ్యేందుకు అవకాశాలు ఉన్నాయి. ఈ ఒక్క సమస్య మాత్రమే గాక బాబుకు తరచూ జలుబు చేస్తుందంటున్నారు కాబట్టి మీ బాబుకు అడినాయిడ్ ఇన్ఫెక్షన్ కూడా ఉండవచ్చు. దీనివల్ల కూడా తరచూ జలుబు రావడానికి అవకాశం ఉంది. ముక్కు నుంచి రక్తం కారడాన్ని వైద్యపరిభాషలో ఎపిస్టాక్సిస్ అంటారు. మీరు మొదట ఈఎన్‌టీ వైద్య నిపుణులను సంప్రదించి వారితో చెవి, ముక్కు, గొంతు భాగాలలో వారు సూచించిన విధంగా అవసరమైన పరీక్షలు చేయించుకోండి. అడినాయిడ్ ఇన్షెక్షన్ ఉన్నట్లయితే అడినాయిడ్ ఎక్స్‌రే, ఎండోస్కోపీ పరీక్షలు చేయించుకోవలసి ఉంటుంది. మొదట మీరు చేయాల్సింది మీ బాబు ముక్కులో వేళ్లు పెట్టుకోకుండా ఆపడం. అతడి గోళ్లు ఎప్పటికప్పుడు కత్తిరించడం. అలాగే రక్తం రావడొ మొదలుకాగానే వెంటనే ముక్కు రంధ్రాలను గట్టిగా పట్టుకుని కాస్త ఒత్తిడి కలగజేస్తూ పట్టుకోవాలి. ఐస్ క్యూబ్స్ పెట్టడం, ఐస్‌ప్యాక్‌తో ముక్కు పైభాగంలో రుద్దుతూ ఉండటం వల్ల ఉపశమనం కలుగుతుంది. అయితే ముక్కు నుంచి రక్తస్రావం అన్నది ఇతర కారణాలతో జరిగినప్పుడు దానికి తగిన చికిత్స ఇప్పించడం ద్వారా సమస్యకు శాశ్వత పరిష్కారం దొరుకుతుంది.

నావయసు 43 ఏళ్లు. నాకు అప్పుడప్పుడూ కళ్లు తిరుగుతున్నాయి. కొన్ని సార్లుకింద పడిపోవడం కూడా జరిగింది. ఈ సమస్యతో నాకు చాలా ఆందోళనగా ఉంది. నేనుఎవరిని సంప్రదించాలి, ఏమి చేయాలి?

మీరు చెప్పిన వివరాలు పరిశీలిస్తే మీరు ‘బినైన్ పొజిషనల్ వర్టిగో’ అనే సమస్యతో బాధపడుతున్నట్లు అనిపిస్తోంది. మన చెవిలోని లోపలి భాగంలో వినికిడి కోసం, బ్యాలెన్స్‌ను నియంత్రించేందుకు... రెండు వ్యవస్థలు ఉంటాయి. బ్యాలెన్స్ నియంత్రించే వ్యవస్థలను ‘వెస్టిబ్యులర్ వ్యవస్థ’ అంటారు. ఇందులో భాగాలలో ఓటోలిత్ అనే కణాలు, హెయిర్ సెల్స్, ఇతర భాగాలు ఉంటాయి. ఇవి మన బ్యాలెన్స్‌ను నియంత్రించేందుకు ఉపయోగపడతాయి. వాటిలోని లోపాల వల్ల బ్యాలెన్స్ వ్యవస్థలో లోపాలు రావడానికి అవకాశం ఉంది. మీరు మొదట నిపుణులైన ఈఎన్‌టీ వైద్యులను సంప్రదించి వినికిడి, బ్యాలెన్స్ వ్యవస్థకు సంబంధించిన, క్లినికల్ పరీక్షలు చేయించుకోండి. కళ్లు తిరగడంతో పాటు తలనొప్పి, వినికిడి లోపం, ఇతర సమస్యలు ఉన్నట్లయితే ఈఎన్‌టీ వైద్యుల సలహాపై న్యూరాలజిస్ట్‌ను కూడా సంప్రదించండి. అయితే ఈ సమస్య అంత ప్రమాదకరమైనది కాదు. కొన్ని రకాల వెస్టిబ్యుల్‌కు సంబంధించిన ఎక్సర్‌సైజులతో తగ్గిపోతుంది. అవసరాన్ని బట్టి కొన్ని మందులు వాడాల్సి ఉంది.

కంటి పరీక్ష తప్పనిసరి

శరీరంలోని అన్ని అవయవాలనూ అవస్థల పాలు చేస్తుంది మధుమేహం. ఇందుకు కళ్లు మినహాయింపేమీ కాదు. నిజానికి మిగిలినవాటి కన్నా కన్ను పైనే ముందుగా ప్రభావం చూపిస్తుంది. డయాబెటిక్ రెటినోపతి రూపంలో అంధత్వాన్ని కూడా తెచ్చిపెడుతుంది. కంటిచూపులో రెటీనాదే కీలకపాత్ర. రక్తంలో పెరిగిన చక్కెర పదార్థాలు రెటీనాలోని రక్తనాళాలను దెబ్బతీస్తాయి. రక్తనాళాల నుంచి రక్తం కంటి మధ్య భాగంలోకి లీక్ అవడం వల్ల రక్తనాళాల్లో వాపు కనిపిస్తుంది. దాంతో చూపులో స్పష్టత ఉండదు. ఇదే క్రమంగా మొత్తం చూపును హరించివేస్తుంది. దీన్నే డయాబెటిక్ రెటినోపతి అంటారు. వ్యాధి తొలిదశలో ఉన్నప్పుడు ఎదురుగా ఉన్న దృశ్యం అస్పష్టంగా, మచ్చలు మచ్చలుగా కనిపిస్తుంది. ఇలాంటప్పుడు ఆలస్యం చేయకుండా వెంటనే డాక్టర్‌ను కలిసినా కొంతవరకు పూర్తి అంధత్వాన్ని నివారించవచ్చు.

ఏకైక ఆయుధం.. కంటిపరీక్ష

  • రక్తనాళాలు బయటకు కనిపించే ఏకైక భాగం కన్ను. కాబట్టి కంటి పరీక్షల ద్వారా చాలా రకాల వ్యాధులను నిర్ధారించడం సాధ్యపడుతుంది. దెబ్బతిన్న రక్తనాళాలను బట్టి మధుమేహాన్ని కూడా గుర్తించవచ్చు.
  • మధుమేహం రాకముందు, వచ్చిన తరువాత ఇతర అవయవాలు దెబ్బతిన్నాయోలేదో అన్న అంశాలను కూడా కంటి పరీక్షల ద్వారా కనుక్కోవడం సులభం అవుతుంది. ఒకసారి మధుమేహం, ప్రీడయాబెటిస్ ఉందని తెలిస్తే వెంటనే ముందు కంటిపరీక్షలు చేయించుకోవాలి.
  • మంచి ఆహారం, వ్యాయామం ద్వారా మధుమేహాన్ని ఎప్పటికప్పుడు అదుపులో ఉంచుకోవాలి.
  • ప్రతినెలా క్రమం తప్పకుండా రక్త, మూత్ర పరీక్షలు చేయించుకోవాలి. మూడు నెలలకు ఒకసారి రెటీనా పరీక్షలు చేయించుకోవాలి.
  • మధుమేహం ఉన్నవాళ్లు ఆరు నెలలకు ఒకసారి కంటిపరీక్షలు చేయించుకుంటే ఇతర అవయవాల గురించిన సమస్యలుంటే కూడా తెలుస్తుంది. నాలుగుపదుల వయసు దాటిన వాళ్లు ఏడాదికి ఒకసారి కంటిపరీక్షలు చేయించుకోవడం మేలు.

ఆలస్యం.. అమృతం... సాధారణంగా రక్తంలో పెరిగిన చక్కెరలు ఇతర సమస్యలన్నీ కలిగించడం మొదలు పెట్టిన తరువాత వాటి సంబంధిత పరీక్షలు... కిడ్నీ, కంటి పరీక్షల వంటివి చేయిం చుకుంటుంటారు. అప్పుడు ఆ అవయవాలు దెబ్బతిన్నాయనే విషయం తెలుసు కున్నా జరిగిన నష్టాన్ని పూరించడం సాధ్యపడదు. ఆయా సమస్యల నుంచి బయట పడటం కూడా కష్టం. కాబట్టి డయాబెటిస్ విషయంలో నిర్లక్ష్యం ఏమావూతమూ పనికిరాదు. డయాబెటిక్ రెటినోపతి వల్ల కలిగే దృష్టిలోపాన్ని లేజర్ చికిత్స ద్వారా సరి చేయవచ్చు. కానీ ఇది చాలా ఖర్చుతో కూడుకున్న వ్యవహారం. కాబట్టి ముందు జాగ్రత్త పడటమే శ్రేయస్కరం.

ఇదీ దృష్టి లోపమే...

మెల్లకన్ను అదృష్టం అనుకునే వారికి మన దేశంలో కొదవేమీ లేదు. ఇది నిజమేనని నమ్మేవారికీ కొదవలేదు. ఈ సమస్య ఉన్నవారిలో ఆత్మన్యూనత తగ్గించడానికి ఈ మాట చెప్పి ఉంటారు. కానీ అది నిజం కాదు, మెల్లకన్ను కూడా ఒక జబ్బే. దీని వల్ల కంటి చూపు కూడా దెబ్బ తినే అవకాశం ఉంటుంది. ఈ సమస్య గురించి తెలుసుకునే ముందు కన్ను పనిచేసే విధానం ఒకసారి తెలుసుకుందాం.

ఏ వస్తువునైనా మనం చూడాలంటే మన కన్నుమీద కాంతిపడి అది వస్తువు పై ప్రతిఫలిస్తే దాని ప్రతిబింబం మన కంటిలో ఏర్పడుతుంది. ఈ విషయాన్ని మెదడు గ్రహించి మన కంటి ముందు ఉన్న దృశ్యం ఏమిటో విద్యుత్ సంకేతాల ద్వారా మనకు తెలుపుతుంది.

మనకు చూడగల శక్తి పుట్టుకతో 40 శాతం మాత్రమే ఉంటుంది. తరువాత మన పరిసరాల్లోని కాంతి కళ్లపైన పడుతూ వాటిని స్టిమ్యులేట్ చేస్తుంది. దాని వల్ల మెల్లమెల్లగా మన దృష్టిసామర్థ్యం క్రమంగా పెరుగుతుంది. ఐదేళ్లు వచ్చేసరికి పూర్తిస్థాయికి చేరుతుంది. కనుగుడ్డు చుట్టూ ఉండే కండరాలు కంటిని అటూఇటూ తిప్పి చూసేందుకు సహకరిస్తాయి. వీటి పని తీరు దెబ్బతిన్నపుడు మెల్లకన్ను ఏర్పడుతుంది. జన్యులోపాల వంటి కారణాల వల్ల మొదడు ఇచ్చే సంకేతాలను కండరాలు సరిగా గ్రహించలేవు. దానివల్ల కండరాల్లో ఒకటి అతిగా పనిచేస్తే మరోటి అతి నెమ్మదిగా పనిచేస్తుంది. ఫలితంగా ఒక కన్ను ఎదురుగా చూస్తే రెండవది పక్కకు చూస్తుంది. దీని వల్ల రెండురకాల ప్రతిబింబాలు ఏర్పడి మెదడుకు గందరగోళ పరిస్థితి కలుగుతుంది.

కాబట్టి ఏదో ఒక చిత్రాన్ని మాత్రమే మెదడు గ్రహిస్తుంది. రెండదాన్ని ఏర్పడకుండా అణచివేస్తుంది. ప్రతి బింబాన్ని ఏర్పరిచిన కన్ను క్రమంగా తన దృష్టి సామర్థ్యాన్ని కోల్పోతుంది. ఇలా అణచివేయబడిన కన్నును లేజీ ఐఅంటారు. ఐదేళ్ల వయసులోపుగానే కంటి పరీక్షలు చేయించడం అత్యవసరం. ఇంత చిన్న పిల్లలకు శస్త్రచికిత్స చేయిస్తే ఇలా అనే సందేహంతో నిర్లక్ష్యం చేస్తే వయసు పెరిగే కొద్దీ దృష్టిలోపాలను సరిచేసే అవకాశం పూర్తి సన్నగిల్లుతుంది. కాబట్టి ఏ చిన్న అనుమానం కలిగినా పరీక్ష చేయించడం మంచిది.

మెల్లకన్నుతో దృష్టి లోపం..

మెల్లకన్ను ఉంటే అదృష్టమే... అంటూ మెల్లతో పుట్టిన పిల్లల్ని ఆస్పవూతికి తీసుకెళ్లనివాళ్లే ఎక్కువ. కానీ అదృష్టం అంటూ మురిసిపోతూ ఉంటే మెల్లకన్ను కాస్తా దృష్టిలోపానికి దారితీస్తుంది. మెల్లకన్ను ఉందని ఎదురయ్యే హేళనలకు చిన్నారులు ఆత్మన్యూనతకు గురవుతుంటారు. అందుకే వాళ్లలో డిప్రెషన్ రాకుండా నివారించడానికి మాత్రమే మెల్లకన్ను అదృష్టమనే నమ్మకం పుట్టింది. అంతేతప్ప మెల్ల సరిచేసుకోకుండా ఉంటే అదృష్టం వచ్చి వాలుతుందనుకోవడం సరికాదు.

మెల్ల అంటే...

కంటిలో ఉండే కనుగుడ్డు చుట్టూ ఉండే కండరాలు కళ్లను అటూ ఇటూ కదిలించడానికి తోడ్పడతాయి. మెదడు ఆదేశానుసారం ఇవి వాటి పనిని నిర్వర్తిస్తూ ఉంటాయి. జన్యుసమస్యల వల్ల పుట్టుకతోనే లోపాలతో పుట్టిన పిల్లల్లో మెదడు అందించే సంకేతాలను అందుకునే సామర్థ్యం కంటి కండరాలలో లోపిస్తుంది. దానివల్ల కండరాల పనితీరు దెబ్బతింటుంది. వీటిలో ఒక కనుగుడ్డు కండరాలు అతి వేగంగా పనిచేస్తే, మరో కంటిలోవి చాలా నెమ్మదిగా పనిచేస్తాయి. తద్వారా ఒక కన్ను ఎదురుగా చూస్తే మరోటి పక్కకి చూస్తుంది. ఇలా పక్కకి చూసే కన్ను మెల్లలా కనిపిస్తుంది.

ఇదీ కంటిజబ్బే...

రెండు కళ్లూ ఒకేవైపు చూసినప్పుడే దృశ్యం స్పష్టంగా కనిపిస్తుంది. అలా కాకపోయేసరికి రెండు రకాల ప్రతిబింబాలు ఏర్పడి మెదడు గందరగోళానికి గురవుతుంది. ఈ గందరగోళం నుంచి బయటపడటానికి మెదడు ఏదో ఒక ప్రతిబింబాన్ని మాత్రమే తీసుకుని మరోదాన్ని అణిచిపెడుతుంది. ఇదే క్రమంగా దృష్టిలోపానికి దారితీస్తుంది. మెల్ల ఉన్న పిల్లల్లో అయిదేళ్ల వయసు వచ్చేలోపే గుర్తించి సరైన చికిత్స చేయించుకోకుంటే అదృష్టం మాట దేవుడెరుగు... కంటిచూపే దెబ్బతినే ప్రమాదం ఉంటుంది. మెల్లకన్ను కూడా కంటిచూపు లోపమే అన్న విషయం చాలామందికి తెలియదు. అసలు దాని గురించి తెలుసుకోవాలన్న ఆసక్తి కూడా తక్కువే. అవగాహన పెంచుకుని ఎంత త్వరగా కంటిపరీక్ష చేయిస్తే అంత మంచిది.

30 వేల రూపాయలు ఖర్చయ్యే లాసిక్ చికిత్స తెల్లకార్డు ఉన్నవారికి 10 వేలకే అందిస్తోంది మాక్సివిజన్.

వినికిడి యంత్రానికి ప్రత్యామ్నాయం?

మా బాబుకి 14 నెలలు. వినబడటం లేదేమో అన్నఅనుమానంతో డాక్టర్‌కి చూపించాం. వినికిడి శక్తి సరిగా లేదన్నారు. చెవినరాలు బలహీనం అయ్యాయని, 20 శాతం మాత్రమే వినగలిగే శక్తి ఉందన్నారు.వినికిడి యంత్రం పెట్టాలని చెప్పారు. అయితే ఇంత చిన్న బాబుకి వినికిడియంత్రం పెట్టడం కష్టం అవుతోంది. దీనికి ఇతర పరిష్కారం ఏమన్నా ఉందా?

తల్లికి వైరల్ ఇన్‌ఫెక్షన్లు సోకితే కడుపులో ఉన్న బిడ్డకు వినికిడి సమస్యలు రావచ్చు. కొన్ని రకాల మందులు కూడా ఇటువంటి నష్టం కలిగిస్తాయి. మేనరికపు వివాహాలు చేసుకున్న వాళ్లకు పుట్టుకతోనే వినికిడి లోపం ఉన్న పిల్లలు కలిగే అవకాశం ఉంది. మీ బాబు విషయంలో చెవి నరాలు బలహీనం అయ్యాయి కాబట్టి విన్న శబ్దాన్ని మెదడుకు చేరవేసే ప్రక్రియే దెబ్బతింటోంది. మెదడుకు సమాచారం అందదు కాబట్టి వినలేకపోతున్నాడు. ఇలాంటప్పుడు వినికిడి యంత్రం తప్పదు. వినికిడి యంత్రం అవసరం లేకుండా లోపలి చెవి లాగా ఉండే కృత్రిమచెవిని చెవి లోపల అమర్చవచ్చు. కాకపోతే ఇది చాలా ఖరీదైన ఆపరేషన్. డిజిటల్ హియరింగ్‌ఎయిడ్స్ పేరుతో వస్తున్న వినికిడి యంత్రాలను పైకి కనిపించకుండా చెవి లోపలే అమర్చవచ్చు. మీ బాబు ఆరోగ్య పరిస్థితులను బట్టి ఇఎన్‌టి సర్జన్ల పర్యవేక్షణలో ఆడియాలజిస్టులు వీటిని అమరుస్తారు. మీ బాబుకి వీటిని ప్రయత్నించవచ్చు.

నావయసు 21 సంవత్సరాలు. నేను పదవ తరగతి చదివేటప్పుడు ఒక్కసారిగా చెవుల నుంచిశబ్దాలు రావడం, మాటలు వినిపించకపోవడం మొదలైంది. ఇప్పుడు ఓ డాక్టర్‌నుకలిస్తే కుడిచెవి వినికిడి శక్తి 50 శాతం తగ్గిందన్నారు. ఆపరేషన్ చేసినాచెవి వినిపించకపోవడానికి హామీ ఇవ్వలేమన్నారు. ఇది నిజమేనా? ఎందుకిలాఅయింది?

సాధారణంగా వైరల్ జ్వరాలు సోకినపుడు తల్లి గర్భంలో ఉన్నపుడు మాత్రల ప్రభావం వల్ల చెవి నరాలు దెబ్బతిని వినికిడి శక్తి కోల్పోయే ప్రమాదం ఉంది. ఇలా నరాలు దెబ్బతిన్నప్పుడు ఏమీ చెయ్యలేం. వినికిడి యంత్రాలను అమర్చుకోవడం తప్ప దీనికి పరిష్కారం లేదు. కర్ణభేరికి రంధ్రాలు పడినా వినికిడి దెబ్బతినవచ్చు. కొందరిలో వంశపారంపర్యంగా చెవి లోపలి భాగంలో ఉండే స్టేపిస్ ఎముక అతుక్కుపోయి చెవుడు రావచ్చు. ఇలాంటప్పుడు మాత్రం స్టేపిడోటమీ విత్ టెఫ్లాన్ ప్రొఫ్తెసిస్ అనే శస్త్రచికిత్స ద్వారా సరిచేయవచ్చు. అతుక్కుపోయిన స్టేపిస్ ఎముకను తీసివేసి, దాని స్థానంలో ఇంప్లాంట్‌ను అమర్చడం ద్వారా వినికిడి శక్తిని సరిచేస్తారు. మీరు ముందుగా ప్యూర్ టోన్ ఆడియోక్షిగామ్, ఇన్‌పిడెన్స్ ఆడియోమెట్రీ అనే రెండు రకాల వినికిడి పరీక్షలు చేయించుకోండి. దాన్ని బట్టి తగిన చికిత్స తీసుకుంటే మీ సమస్య పరిష్కారం అవుతుంది.

నావయసు 25 సంవత్సరాలు. గత ఏడాది నుంచి గురకతో బాధపడుతున్నాను. రాత్రి నిద్రపోలేకపోతున్నాను. అసలు గురక ఎందుకు వస్తుంది? దీని బాధ తీరేదెలా?

ముక్కులో సమస్యలు ఉండి నోటితో గాలి పీల్చుకున్నపుడు గురక సమస్య ఎదురవుతుంది. సాధారణంగా ముక్కుదూలం వంకర ఉన్నా, పాలిప్స్ ఏర్పడినా, ముక్కులో కండరాలు వాచిపోయినా లోపలికి గాలి వెళ్లడం కష్టమవుతుంది. సైనస్ సమస్య ఉన్నవాళ్లు కూడా ఇలా గురక పెడుతుంటారు. స్థూలకాయం, మెడ చిన్నదిగా ఉండడం కూడా ఇందుకు దోహదం చేస్తాయి. ఇన్‌ఫెక్షన్, థైరాయిడ్, టాన్సిల్స్ సమస్యలున్నవాళ్లలో కూడా గురక ఉంటుంది. కారణం తెలియడానికి మీరు ముక్కు, గాలి గదులకు కరోనల్ సిటి స్కాన్ చేయించుకోండి. ఒక రాత్రి అంతా నిద్ర ఎలా పోతున్నారన్న విషయాన్ని స్లీప్ స్టడీ ద్వారా అధ్యయనం చేసి స్లీప్ అప్నియా సమస్య ఉందో లేదో తెలుసుకోవచ్చు. కారణాన్ని బట్టి యువులోటొలటో ఫారింగోప్లాస్టీ, సెప్టొప్లాస్టీ, ఎండోస్కోపీ వంటి ఆపరేషన్ల ద్వారా 70 శాతం వరకు గురక సమస్యను పోగొట్టవచ్చు.

ముక్కుని పునర్నిర్మించవచ్చు!

ముఖాన్ని చూడగానే మనికి అవ తలి వ్యక్తి మీద ఒక అభిప్రా యం ఏర్పడుతుంది . చూగానే ముఖంలో కొట్టొచ్చేట్లుగా కనిపించేంది ముక్కే . ముక్కు అందం ముఖానికి పెద్ద ఆకర్షణ . చప్పడి ముక్కున్నా , పెద్దముక్కున్నా, మరీ పొడవాటి ముక్కున్నా - ముఖాకర్షణ తగ్గుతుంది . ముక్కు మరో విధంగా ఉంటే బాగుంటుందనిపిస్తుంది .ముక్కును సరి చేయించుకోవాలనిపించి ఏమి చేయలేని రోజులు గతం . ఇప్పుడు ముక్కుని ప్లాస్టిక్‌ సర్జరీ ద్వారా మనకి కావాల్సిన విధంగా మార్పించుకోవచ్చు . ముక్కుకు చేసే ప్లాస్టిక్‌ సర్జరీని ‘రైనోప్లాస్టీ’ అంటారు .

రైనోప్లాస్టీ ద్వారా ముక్కుని కావాల్సిన విధంగా మల్చుకోవచ్చు . పెద్దగా ఉన్న ముక్కు ఎముకని లేదా కార్టిలేైఉని తొలగించవచ్చు. అలాగే చిన్నదిగా ఉంటే పెంచనూవచ్చు .

ట్రామా (యాక్సిడెంట్‌) వల్ల ముక్కు వంకర పో యినా, గ్రహణంమెర్రి శస్తచ్రికిత్స జరిగిన తరువాత ముక్కులో శస్తచ్రికిత్సతో సరిచేయవచ్చు . చట్టి , పెద్ద, పొడవు, గద్ద, దబ్బ ముక్కుల్ని ముఖానికి తగ్గట్లు అందమైన ముక్కులుగా పునర్నిర్మించవచ్చు .

రైనోప్లాస్టీ రెండు రకాలు ...

ఓపెన్‌ రైనోప్లాస్టీ ముక్కు ముందు మధ్యభాగంలో ఓపెన్‌ చేసి ముక్కును ఎత్తి, కావాల్సిన మార్పుల్ని లోపల చేస్తారు. క్లోజ్‌డ్‌ రైనోప్లాస్టీలో ముక్కులోపలికి పరికరాల ద్వారా వెళ్ళి లోపల చేస్తారు. ముక్కు పునర్నిర్మాణ శస్తచ్రికిత్సలో చికిత్సని బట్టి ఒకటి నుంచి మూడు గంటలు పడుతుంది. రెండు రోజులు హాస్పిటల్‌లో ఉండాల్సి వస్తుంది. ఈ రెండు రోజులు లోపలే రక్తస్ర్తావం ఆగిపోతుంది. గాయం , వాపు లాంటివన్నీ తగ్గటానికి వారం పట్టవచ్చు. ఈ వారం పాటు స్ల్పింట్‌ వేస్తారు.

పదహారు సంవత్సరాలు దాటిన ఎవరైనా ఈ ముక్కు శస్తచ్రికిత్స ‘రైనోప్లాస్టీ’ని చేయించుకోవచ్చు. పదహారు సంవత్సరాలు ఎందుకంటే, అప్పటికి ముక్కు ఎముక, కార్టిలేజ్‌ పూర్తిగా ఏర్పడుతాయి. చప్పడి ముక్కుకి పాలిప్రొపిలీన్‌ ఇంప్లాంట్‌ వేస్తారు. దీని వల్ల ఎటువంటి ఇబ్బంది ఉండదు. సాధారణంగా జనరల్‌ ఎనస్థిషియాలో ఈ శస్తచ్రికిత్స నిర్వహిస్తారు. శస్తచ్రికిత్స అనంతరం మచ్చలు కనిపించవు. ఈ శస్తచ్రికిత్సని ఎండోస్కోప్‌తో కూడా చేస్తారు. శస్తచ్రికిత్స అనంతరం ఎటువంటి ఇబ్బందులు ఉండవు. వారం కల్లా పూర్తి ఆరోగ్యంగా కనిపిస్తారు. ముఖ అందాన్ని పెంచటానికి ‘రైనోప్లాస్టీ’ చక్కగా తోడ్పడుతుంది.

ఆధారము: వైద్యరత్నాకరం బ్లాగ్

ఆధారము : హెల్త్ కేర్ తెలుగు బ్లాగ్

2.98214285714
ఆంజనేయులు Jul 27, 2018 02:56 PM

నాకు చిన్న చిన్న శబ్దాలు వినిపించడం లేదు అని డాక్టర్ ని కలిస్తే మీకు ముక్కు ప్రాబ్లెమ్ ఉంది అని చెప్పారు నేను తరువాత ఆపరేషన్ చేపించుకున్నాను కానీ నాకు చెవి,ముక్కు ప్రాబ్లమ్ తగ్గలేదు మరియు మాటలు మాట్లాడలేక నత్తి వస్తుంది దీనికి పరిస్కారం చెప్పగలరు

ashok Jul 04, 2017 10:15 PM

నాకు ఎడమ కన్ను కూడా దురద వస్తున్నాయి ,అందు మూలం గా కన్ను కి చిన్న చిన్న పదాలు కనబడటం లేదు ,కన్ను ఇంకా బాగా దురద వస్తుంది . ముక్కు కి దురద రావడం మూలం గా నలిపితే తుమ్ములు ఎక్కువగా వస్తున్నాయి ఏంచేయాలి ?
ఏదైనా సలహా ఇవ్వండి సార్.......!!!!!!

shyampattiro Jul 03, 2017 08:54 PM

నా పేరు శ్యామ్ నేను నా చిన్నప్పుడు నా రెండు చెవులలో గాజు పెంకులు పెట్టుకున్నాను డాక్టర్లు చికిత్స చేసారు . అయితే నాకు చికిత్స తరువాత కూడా రెండు చెవులలో చీము వచ్చేది. అయితే ఇప్పుడు నా వయస్సు 32సంవత్సరాలు చీము కారటం తగ్గింది అప్పుడప్పుడు చెవులలో కి నీరు వెళ్ళటంవలన చెవులలో చీము వచ్చేది . వినికిడి శక్తి కూడా తగ్గింది ఆడియో గ్రహీ చేయించారు 40 డెసిబుల్స్ ఎడమచెవి, 45 డెసిబుల్స్ తగ్గింది అన్నారు ,నారెండు చెవులలో కన్నాలు పడ్డాయన్నారు. ఆపరేషన్ చేయాలని అన్నారు. ఆపరేషన్ చేసిన తర్వాత నాకు వినికిడి శక్తి పెరిగే అవకాశముందా దయచేసి ప్రశ్న కు సమాధానం చెప్పగలను.

భాస్కర్ Feb 26, 2017 01:23 PM

మా అబ్బాయి కి గొంతు వాపు సమస్య ఉంది.
డాక్టర్ ని కలిసాము అయిన తగ్గలేదు ఎమిచేయాలి

దరణికాంత్ May 29, 2016 02:07 AM

నా వయసు తొమ్మిది సంవత్సరాలు నాకు అప్పు అప్పుడు ముక్కు నుంచీ రక్తం కారుతుంది ఎందుకు దయచేసి చెప్పండి...

మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు