హోమ్ / వార్తలు / భారత 70వ స్వాతంత్య్ర దినోత్సవం సందర్భంగా జాతిని ఉద్దేశించి రాష్ట్రపతి ప్రసంగం
పంచుకోండి

భారత 70వ స్వాతంత్య్ర దినోత్సవం సందర్భంగా జాతిని ఉద్దేశించి రాష్ట్రపతి ప్రసంగం

భారత 70వ స్వాతంత్య్ర దినోత్సవం సందర్భంగా జాతిని ఉద్దేశించి రాష్ట్రపతి ప్రసంగం

సహ పౌరులారా!

మన దేశ 69వ స్వాతంత్య్ర వార్షికోత్సవం సందర్భంగా దేశ విదేశాల్లోని భారత సోదరీ, సోదరులకు నా హృదయపూర్వక శుభాకాంక్షలు.

మనం 70వ స్వాతంత్య్ర దినోత్సవం చేసుకుంటున్న సందర్భంగా మనకు స్వాతంత్య్రం సముపార్జించడం కోసం పోరాడిన,ఎన్నో కష్టనష్టాలను ఎదుర్కొన్న, జీవితాలను త్యాగం చేసిన ఎందరో యోధులకు సవినయంగా శిరసు వంచి నమస్కరిస్తున్నాను.   వారిలో మనకు తెలిసినవారేగాక, తెలియనివారెందరో కూడా ఉన్నారు.  తేజోవంతమైన మ‌హాత్మాగాంధీ నాయ‌క‌త్వంలో  ఎట్ట‌కేల‌కు 1947లో బ్రిటీష్ పాల‌కుల‌ను దేశం నుంచి వెళ్ళ‌గొట్టాం.  1947లో మ‌న‌కు స్వాతంత్య్రం సిద్ధించిన‌పుడు ఓ ప్ర‌జాస్వామ్య దేశంగా భార‌త్ మ‌న‌గ‌ల‌ద‌ని విశ్వ‌సించిన వారెవ‌రూ లేరు.  అయితే, 7ద‌శాబ్దాల త‌రువాత 125 కోట్ల మంది భార‌తీయులు భిన్న‌త్వంలో ఏక‌త్వంతో నాటి జోస్యాలు అవాస్త‌వాల‌ని రుజువు చేశారు.      న్యాయం, స్వేచ్ఛ‌, స‌మాన‌త్వం, సౌభ్రాతృత్వ‌ము అనే 4 మూల స్తంభాల‌పై మ‌న పూర్వీకులు బ‌ల‌మైన ప్ర‌జాస్వామ్య సౌధాన్ని నిర్మించారు.  అంత‌ర్గ‌తంగా, బ‌హిర్గ‌తంగా ఎన్నో స‌వాళ్ళ‌ను ఎదుర్కొన్న‌ప్ప‌టికీ ఆ సౌధం మ‌రింత బ‌లోపేత‌మ‌వుతూ వ‌చ్చింది.

సహ పౌరులారా!

స్వాతంత్య్ర దినోత్సవం సంద‌ర్భంగా నేను మీతో సంభాషించ‌డం ఇది 5వసారి.  గ‌డ‌చిన 4 సంత్స‌రాల్లో సుస్థిర‌, ప్ర‌గ‌తిశీల,సంతృప్తిక‌ర ప్ర‌జాస్వామ్యం ప‌రిఢ‌విల్ల‌డం చూశాను.  ఒక పార్టీ నుంచి మ‌రొక పార్టీకి, ఒక ప్ర‌భుత్వం నుంచి మ‌రొక ప్ర‌భుత్వానికి, ఒక త‌రం నుంచి మ‌రొక త‌రానికి శాంతియుత అధికార మార్పిడి సంతృప్తిక‌రంగా సాగింది.  రాజ‌కీయ,సైద్ధాంతిక విభేదాలున్నా..  జాతీయాభివృద్ధి ల‌క్ష్యంగానూ, ఐక్య‌త‌, స‌మ‌గ్ర‌త‌, జాతీయ భ‌ద్ర‌తల కోసం అధికార పక్షం మరియు ప్ర‌తిప‌క్షం సంయుక్తంగా కృషి చేస్తున్నాయి.  ఇటీవ‌లే ముగిసిన పార్ల‌మెంటు స‌మావేశాల్లో వ‌స్తుసేవ‌ల ప‌న్నును ప్ర‌వేశ‌పెట్టేందుకు ఉద్దేశించిన రాజ్యాంగ స‌వ‌ర‌ణ బిల్లును పార్టీల‌న్నీ ఏక‌గ్రీవంగా ఆమోదించ‌డం, పార్ల‌మెంటులో నాణ్య‌మైన చ‌ర్చ‌లు సాగ‌డం మ‌న ఘ‌న‌మైన‌ ప్ర‌జాస్వామ్య ప‌రిణ‌తికి నిద‌ర్శ‌నం.

ఈ నాలుగేళ్ళ‌లో విచ్ఛిన్న, అస‌హ‌న శ‌క్తులు త‌మ వికృత రూపాన్ని ప్ర‌ద‌ర్శించ‌డం నాకు కొంత ఆందోళ‌న క‌లిగించింది.  మ‌న జాతీయ విలువ‌ల‌కు విరుద్ధంగా బ‌ల‌హీన వ‌ర్గాల‌పై దాడులు జ‌ర‌గ‌డం అస్వాభావికం.  వీటి విష‌యంలో క‌ఠినంగా వ్య‌వ‌హ‌రించాలి.  మ‌న స‌మాజం, రాజ‌కీయ వ్య‌వ‌స్థ‌ల స‌మష్టి మేధ‌స్సు అటువంటి శ‌క్తుల‌ను నిర్వీర్యం చేస్తాయని,భార‌త ఉజ్వ‌ల ప్ర‌గ‌తి ప‌య‌నం ఎటువంటి అడ్డంకులు లేకుండా కొన‌సాగుతుంద‌ని  విశ్వ‌సిస్తున్నాను.

మ‌న మ‌హిళా, శిశు లోకానికి మ‌నం క‌ల్పించే ర‌క్ష‌ణ‌, భ‌ద్ర‌త‌లే మ‌న దేశ‌, స‌మాజ శ్రేయ‌స్సును నిర్ణ‌యిస్తాయి.  మ‌హిళ‌లు, పిల్ల‌లపై చోటుచేసుకొనే హింసాత్మ‌క సంఘ‌ట‌న‌లు మ‌న నాగ‌రిక‌త మూలాల పైనే చెర‌గ‌ని గాయాలు చేస్తున్నాయి.  దీన్ని అరిక‌ట్ట‌డంలో మ‌నం విఫ‌ల‌మైతే మ‌న‌ది నాగ‌రిక స‌మాజ‌మ‌ని చాటుకోలేం.

సహ పౌరులారా!

నియ‌మిత కాల వ్య‌వ‌ధుల‌లో ప్ర‌భుత్వాన్ని ఎన్నుకొనేందుకు మ‌న‌కున్న అవ‌కాశాల క‌న్నాప్ర‌జాస్వామ్యం ఎంతో గొప్ప‌ది.  ప్ర‌జాస్వామ్య వ్య‌వ‌స్థ‌ల  ద్వారా స్వేచ్ఛా వృక్షానికి నిరంత‌ర పోష‌ణ అవ‌స‌రం.  విభజ‌న‌వాద రాజ‌కీయ బృందాల‌, వ్య‌క్తుల‌, విచ్ఛిన్న, ఆటంక‌వాద, అనాలోచిత చ‌ర్య‌లు వ్య‌వ‌స్థాప‌ర‌మైన అవ‌హేళ‌న‌కు, రాజ్యాంగ హానికి దారితీస్తాయి.  విభ‌జ‌న‌వాద చ‌ర్చ‌లు ప్ర‌జా జీవ‌నంలోని స్వ‌ల్ప విభేదాల‌ను విస్తృతం చేస్తాయి.

మ‌న రాజ్యాంగం ఓ రాజ‌కీయ లేదా చ‌ట్ట‌బ‌ద్ధ ప‌త్రం మాత్ర‌మే కాదు.  భావోద్వేగ, సాంస్కృతిక, సామాజిక ఒప్పందం.  నా క‌న్నా ముందు రాష్ట్రప‌తిగా ఉన్న ప్ర‌సిద్ధ మేధావి డాక్ట‌ర్ స‌ర్వేప‌ల్లి రాధాకృష్ణ‌న్ 50 ఏళ్ళ కింద‌ట స్వాతంత్య్ర దినోత్స‌వంనాడు ఇలా అన్నారు.  “మ‌నం ఓ ప్ర‌జాస్వామ్య రాజ్యాంగాన్ని ఆమోదించుకొన్నాం. ప్రామాణికృత ఆలోచ‌న‌,కార్యాచ‌ర‌ణ దిశ‌గా పెరిగే ఒత్తిడుల న‌డుమ‌ మ‌న వ్య‌క్తిత్వాన్ని నిల‌బెట్టుకోవ‌డానికి అది మ‌న‌కు తోడ్ప‌డుతుంది.  ప్ర‌జాస్వామ్య చ‌ట్ట స‌భ‌లు సామాజిక ఉద్రిక్త‌త‌ల నుంచి ఉప‌శ‌మ‌నానికి ర‌క్ష‌ణ క‌వాటాలుగా ఉంటూ... ప్ర‌మాద‌క‌ర విస్పోట ప‌రిస్థితుల‌ను నివారిస్తాయి.  స‌మ‌ర్థ ప్ర‌జాస్వామ్యంలో అందులోని స‌భ్యులు చ‌ట్టాన్ని, చ‌ట్ట‌బ‌ద్ధ అధికారాన్ని అంగీక‌రించ‌డానికి సిద్ధం కావాలి.  ఏ వ్య‌క్తీ, ఏ బృందం త‌న‌కు తానే చ‌ట్టంగా భావించ‌రాదు”.

రాజ్యంలోని ప్ర‌తి విభాగానికీ గ‌ల విధులు, బాధ్య‌త‌ల‌ను రాజ్యాంగం స్ప‌ష్టంగా నిర్వ‌చించింది.  రాజ్యంలో భాగ‌మైన సంస్థ‌లు, వ్య‌వ‌స్థ‌ల అధికారాల‌కు సంబంధించి  ప్రాచీన భార‌తీయ విలువ‌లు ప్ర‌బోధించే “మ‌ర్యాద”ను నిర్దేశించింది.  ఆయా వ్య‌వ‌స్థ‌లు త‌మ విధుల‌ను నిర్వ‌ర్తించ‌డంలో ఈ “మ‌ర్యాద”కు క‌ట్టుబ‌డ‌టం ద్వారా రాజ్యాంగ స్ఫూర్తిని స‌మున్న‌తంగా నిల‌బెట్టాలి.

స‌హ పౌరులారా!

ప్ర‌తి ఒక్క‌రి సంస్కృతి, విలువ‌లు, న‌మ్మ‌కాల‌ను గౌర‌వించ‌డ‌మ‌న్న‌ది భార‌త‌దేశాన్ని స‌మ‌ష్టిగా ఉంచుతున్న విశిష్ట ల‌క్ష‌ణం.  మ‌న వైవిధ్యాన్ని ప‌రిపోషించ‌డం,  భిన్న‌త్వానికి విలువ‌నివ్వ‌డంలోనే మ‌న బ‌హుళ‌త్వంలోని సారాంశం ఇమిడి ఉంది.  చిక్క‌గా అల్లుకున్న నేటి ప‌రిస్థితుల్లో ఆధునిక శాస్త్ర విజ్ఞానం, మ‌తం.. ఈ రెండింటి  స‌మ‌న్వ‌యంతో మాత్ర‌మే సంర‌క్ష‌క స‌మాజాభివృద్ధి సాధ్యం.  స్వామి వివేకానంద ఒక సంద‌ర్భంలో ఇలా చెప్పారు...“ఉత్థానప‌త‌నాల్లోనూ స‌మ‌ష్టి త‌త్వంతో  భిన్న మ‌తాల మ‌ధ్య స‌హ‌చ‌ర భావ‌న అవ‌స‌రం.  ప‌ర‌స్ప‌ర గౌర‌వం నుంచి ఉద్భ‌వించే స‌హ‌చ‌ర భావ‌న అవ‌స‌రం త‌ప్ప  ప‌రిమితంగానో, అభిమానంతోనో, త‌క్కువ‌స్థాయిలోనో స‌హృద‌యాన్ని ప్ర‌ద‌ర్శించేది కాకూడ‌దు”.

పండిట్ నెహ్రూ 69 ఏళ్ళ కింద‌ట ఇదే రోజున  ఒక ప్ర‌సిద్ధ ఉప‌న్యాసం ఇచ్చారు.  పాత మార్గం నుంచి న‌వ్య ప‌థంలోకి అడుగుపెట్టిన‌ప్పుడు, జాతి ప‌లుకుకు స్థానం ల‌భించిన‌పుడు దేశ చ‌రిత్ర‌లో ఉజ్వ‌ల క్ష‌ణాలు అనుభ‌వంలోకి వ‌స్తాయి.  అయితే, అటువంటి క్ష‌ణాలు అదృష్ట‌వ‌శాత్తు ఆక‌స్మికంగా వ‌చ్చిన‌వి కావ‌ని గ్ర‌హించ‌డం కూడా ముఖ్యం.  అటువంటి క్ష‌ణాల సృష్టికి జాతి కృషి చేయాలి.. చేయ‌గ‌ల‌దు.  మ‌న క‌ల‌ల భార‌తాన్ని నిర్మించుకోవ‌డానికి మ‌న గ‌మ్యాన్ని మ‌న చేతుల్లోకి తీసుకోవాలి.  అందుకు బ‌ల‌మైన రాజ‌కీయ సంక‌ల్పం అండ‌గా ఉండాలి.  60 కోట్ల మంది యువ‌త‌రానికి ఆర్థిక సాధికార‌త క‌ల్పించే భ‌విష్య‌త్తును మ‌నం సృష్టించాలి.  ఓ డిజిట‌ల్ భార‌తం, ఓ స్టార్ట‌ప్ భార‌తం,  ఓ నైపుణ్య భార‌తాన్ని నిర్మించాలి.  వంద‌లాది స్మార్ట్ సిటీలు, ప‌ట్ట‌ణాలు, గ్రామాలను నిర్మించే క్ర‌మంలో అవి మాన‌వ‌త‌కు, ఉన్న‌త సాంకేతికత‌కు, సాంకేతిక ప‌రిజ్ఞాన చోదిత, స‌హానుభూతి గ‌ల స‌మాజ సృష్టికి దారితీసే ఉల్లాస స్థ‌లాలుగా రూపొందాలి.  శాస్త్రీయ ఆలోచ‌నా విధానంతో స‌రితూగ‌ని మ‌న న‌మ్మ‌కాల‌ను ప్ర‌శ్నించుకోవ‌డం ద్వారా శాస్త్రీయ అభివ్య‌క్తీక‌ర‌ణ‌ను ప్రోత్స‌హించుకోవాలి... బ‌లోపేతం చేసుకోవాలి.  య‌ధా పూర్వ స్థితిని స‌వాలు చేయ‌డంతోపాటు అస‌మ‌ర్థ‌త‌ను, అర‌కొర ప‌నితీరును తిర‌స్క‌రించ‌డం  నేర్చుకోవాలి.  స్ప‌ర్థ‌పూర్వ‌క ప‌రిస్థితుల మ‌ధ్య త‌క్ష‌ణ ఫ‌లితాస‌క్తి, కొంత అస‌హ‌నం కూడా అవ‌స‌ర‌మైన సుగుణ‌మే.

స‌హ పౌరులారా!

అంద‌రూ ఎదిగితేనే దేశమూ ఎదుగుతుంది.  అభివృద్ధి ప్రక్రియ‌కు దూర‌మైనవారిని కూడా భాగ‌స్వాముల‌ను చేయాలి.  గాయ‌ప‌డిన‌, వేరుప‌డిన వారిని ప్ర‌ధాన స్ర‌వంతిలోకి తిరిగి తీసుకురావాలి.  సాంకేతిక ప‌రిజ్ఞానం ప‌రుగులు తీస్తున్న ఈ యుగంలో మ‌నిషికి యంత్రాలు పోటీ అవుతున్నాయి.  ఈ పోటీలో నిల‌దొక్కుకోవాలంటే ప‌రిజ్ఞాన స‌ముపార్జ‌న,నైపుణ్యాభివృద్ధి, ఆవిష్క‌ర‌ణ త‌త్వం అల‌వ‌ర‌చుకోవాలి.  ప్ర‌జ‌ల ఆకాంక్ష‌ల‌తో మ‌మేక‌మ‌య్యే ఆవిష్క‌ర‌ణ‌లు స‌మాజంలోని భిన్న వ‌ర్గాల‌కు ల‌బ్ది చేకూర్చ‌డ‌మేగాక‌, భిన్న‌త్వాన్ని ప‌రిర‌క్షిస్తాయి.  ఒక జాతిగా మ‌న‌మంతా సృజ‌నాత్మ‌క‌త, విజ్ఞానం,సాంకేతిక ప‌రిజ్ఞానాల‌ను వృద్ధి చేసుకోవాలి.  ఈ విష‌యంలో మ‌న పాఠ‌శాల‌లు, ఉన్న‌త విద్యాభ్యాస కేంద్రాలకు ప్ర‌త్యేక బాధ్య‌త ఉంది.

మనం మ‌న పురాత‌న ఘ‌న‌త‌ను త‌ల‌చుకొని త‌ర‌చూ పొంగిపోతుంటాం.  కానీ, కీర్తి ప్ర‌తిష్ట‌ల‌ను త‌ల‌చుకొంటూ విశ్ర‌మించ‌డం స‌రికాదు... భ‌విష్య‌త్తు వైపు దృష్టి సారించ‌డం అత్యంత ప్ర‌ధానం.  స‌హ‌కారం, ఆవిష్క‌ర‌ణ, ముంద‌డుగు దిశ‌గా చేయి చేయి క‌ల‌పాల్సిన త‌రుణ‌మిదే.  ఇటీవ‌ల కాలంలో భార‌త దేశం విశేష వృద్ధిని సాధిస్తూ వ‌స్తోంది.  గ‌డ‌చిన ద‌శాబ్ద కాలంలో 8 శాతానికి పైగా వార్షిక వృద్ధిని ప‌లుమార్లు న‌మోదు చేసింది.  ప్ర‌పంచంలో అత్యంత వేగంగా వృద్ధి చెందుతున్న కీల‌క ఆర్థిక‌వ్య‌వ‌స్థ‌గా అంత‌ర్జాతీయ సంస్థ‌లు భార‌త్ హోదాను గుర్తించాయి.  వ్యాపార సౌల‌భ్యం, ర‌వాణా రంగం ప‌నితీరు సూచీల‌లో గ‌ణ‌నీయ మెరుగుద‌ల‌కు గుర్తింపునిచ్చాయి.  స్టార్ట‌ప్ ఉద్య‌మంతోపాటు మ‌న యువ పారిశ్రామికుల వినూత్న ఆవిష్క‌ర‌ణ‌ల స్ఫూర్తి అంత‌ర్జాతీయ స‌మాజం దృష్టిని ఆక‌ర్షించింది.  ఈ ముంద‌డుగును సుస్థిరం చేసుకోవ‌డానికి, మ‌రింత విస్త‌రించ‌డానికి వీలుగా ఈ బ‌లాన్ని మ‌నం వినియోగించుకోవాల్సి ఉంది.   రెండేళ్ళ వ‌రుస లోటు వ‌ర్ష‌పాతం వ్య‌వ‌సాయరంగ సంక్షోభం సృష్టించిన నేప‌థ్యంలో - ఈ ఏడాది రుతుప‌వ‌నాలు సాధార‌ణ వ‌ర్ష‌పాతాన్ని ఇస్తాయ‌న్న‌ది మ‌నం హ‌ర్షించాల్సిన అంశం.  అయితే, రెండేళ్ళ వ‌రుస క‌రువు బాధించినా ద్ర‌వ్యోల్బ‌ణం 6 శాతానికి దిగువునే ఉంది.  అలాగే, వ్య‌వ‌సాయ దిగుబ‌డులు స్థిరంగా ఉన్నాయి.  మ‌న జాతి ప‌ట్టుద‌ల‌కు,స్వాతంత్య్రానంత‌రం మ‌న ప్ర‌గ‌తికి ఇదొక నిద‌ర్శ‌నం.

సహ పౌరులారా!

మన విదేశాంగ విధానం ఇటీవలి కాలంలో గణనీయ గతిశీలత కనబరుస్తోంది.  మన సంప్రదాయ భాగస్వాములైన  ఆఫ్రికా, ఆసియా పసిఫిక్ ప్రాంతాల్లోని దేశాలతో మన చారిత్రక స్నేహ బంధాన్ని పునరుత్తేజితం చేసుకున్నాం.  అన్ని దేశాలతో.. ప్రత్యేకించి మన పక్కనే ఉన్న, విస్తరిస్తున్న ఇరుగు పొరుగుతో పరస్పర ప్రయోజనాలు, విలువల ఆదానప్రదానం ప్రాతిపదికగా కొత్త సంబంధాలను ఏర్పరచుకునే ప్రక్రియలో ఉన్నాం.  “పొరుగువారికే ప్రాధాన్యం” అనే మన విధానం నుంచి వెనక్కు మళ్ళేది లేదు. దకిణాసియా ప్రజలు తమ ఉమ్మడి గమ్యం నిర్ణయించుకోవడానికి,సౌభాగ్యం దిశగా పయనించడానికి అనువైన అవకాశాన్ని చరిత్ర, సంస్కృతి, నాగరికత, భౌగోళిక సామీప్యం వంటి సన్నిహిత బంధాలు  కల్పిస్తున్నాయి.  ఎంతమాత్రం జాప్యం చేయకుండా ఈ అవకాశాన్ని అందిపుచ్చుకోవాలి. భారత విదేశాంగ విధానం ప్రధానంగా శాంతియుత సహజీవనం మీద దృష్టి సారిస్తుంది.  దాంతోబాటు ఆర్థికాభివృద్ధి దిశగా  సాంకేతిక పరిజ్ఞానం, వనరుల ఏకీకరణకు ప్రాధాన్యమిస్తుంది.  ఇటీవలి తీసుకున్న కొన్ని చర్యలు.. ఇంధన భద్రతను మెరుగుపరిచాయి;  ఆహార భద్రతకు భరోసా ఇచ్చాయి; మన ప్రతిష్టాత్మక అభివృద్ధి కార్యక్రమాలను ముందుకు తీసుకు వెళ్ళగల  అంతర్జాతీయ భాగస్వామ్యాలను సృష్టించాయి.

ప్ర‌పంచం ఇటీవ‌ల అనేక ఉగ్ర‌వాద దాడులను చ‌విచూసింది.  మ‌తం ప్రాతిప‌దిక‌గా హింసా ప్ర‌బోధంతో ఉత్తేజితులైన కొన్ని శ‌క్తులు అమాయ‌క ప్ర‌జ‌ల‌ను మ‌తం పేరిట బ‌లిగొన్నాయి.  అంతేగాకుండా, భౌగోళిక విభేదాల‌ను పెంచి ప్ర‌పంచ శాంతికి ముప్పుగా ప‌రిణ‌మిస్తున్నాయి.  ఫ్రాన్స్‌, బెల్జియ‌మ్‌, అమెరికా, నైజీరియా, కెన్యాల‌తో పాటు మ‌న స‌మీపానే ఉన్నఅఫ్గానిస్తాన్‌, బంగ్లాదేశ్‌ల‌లో  అటువంటి శ‌క్తుల అమానుష, మ‌తిమాలిన‌, అనాగ‌రిక దాడుల‌ను మ‌నం చూశాం.  ఈ శ‌క్తులు ఇప్పుడు అన్ని దేశాల‌కు ప్ర‌మాద‌క‌రంగా త‌యార‌వుతున్నాయి.  ప్ర‌పంచ‌మంతా ఈ శ‌క్తుల‌పై ముక్త‌కంఠంతో ఏక‌మై బేష‌ర‌తుగా పోరాడాల్సి ఉంది.

స‌హ పౌరులారా!

మ‌న ముందు ఎన్నో స‌వాళ్ళున్నా..  అధిగ‌మించు - జీవించు  అనే మ‌న‌ ప్రాచీన భార‌త అంతః సూత్రం, జిజీవిషాల‌తో నిండిన స్వాభావిక, అంత‌ర్గత సామ‌ర్థ్యం అణ‌గారిపోద‌న్న అచంచ‌ల విశ్వాసం నాకుంది.  అనేక బాహ్య‌, అంత‌ర్గ‌త శ‌క్తులు శ‌తాబ్దాలుగా భార‌తీయాత్మ‌ను లోబ‌ర‌చుకునే ప్ర‌య‌త్నం చేశాయి.  కానీ, అలాంటి ప్ర‌య‌త్నం జ‌రిగిన‌ ప్ర‌తిసారి తానెదుర్కొన్న ప్ర‌తి స‌వాలును అణ‌చివేస్తూ వాటిని స‌మీకృతం చేసి త‌న‌లో క‌లిపేసుకుంటూ  మ‌రింత శ‌క్తిమంతంగా,మ‌రింత ప్ర‌కాశ‌వంతంగా భార‌త‌దేశం వెలుగొందుతూనే ఉంది.

క‌ష్ట‌న‌ష్టాలు ఎదుర్కొంటున్న ప్ర‌పంచానికి భార‌త‌దేశం త‌న విశిష్ట నాగ‌రిక‌త‌ను నిరంత‌రాయంగా పంచుతూ శాంతిసామ‌ర‌స్య సందేశాన్ని అందిస్తూనే ఉంది.   స‌మ‌కాలీన చ‌రిత్ర‌లో భార‌త్ పాత్ర‌ను గురించి 1970లో చ‌రిత్ర‌కారుడు ఆర్నాల్డ్ టోయ‌న్ బీ ఇలా చెప్పారు.. “మ‌నం ఇప్ప‌టికీ ప్ర‌పంచ చ‌రిత్ర‌ ప‌రివ‌ర్త‌న అధ్యాయంలోనే నివ‌సిస్తున్నాం.  అయితే ఈ అధ్యాయానికి పాశ్చాత్య ఆరంభం ఉన్న‌ద‌ని స్ప‌ష్ట‌మ‌వుతోంది.  దీనికి భార‌తీయ ముగింపు అవ‌శ్యం... లేక‌పోతే అది మాన‌వ జాతి స్వీయ విధ్వంసంగా ముగుస్తుంది”.    మాన‌వ చ‌రిత్ర కూడ‌లిలో మాన‌వ జాతికి ముక్తి భార‌తీయ మార్గంలో మాత్ర‌మే సాధ్యమ‌ని కూడా  టోయ‌న్ బీ చెప్పారు.

స‌హ పౌరులారా!

మాతృభూమి ర‌క్ష‌ణ‌, స‌మ‌గ్ర‌త‌, ఐక్య‌త‌ల‌ను ముందుండి ప‌రిర‌క్షిస్తున్న మ‌న సాయుధ బ‌ల‌గాలు, అర్థ సైనిక - అంత‌ర్గ‌త భ‌ద్ర‌త బ‌ల‌గాలకు ఈ సంద‌ర్భంగా ప్ర‌త్యేక శుభాకాంక్ష‌లు, కృత‌జ్ఞ‌త‌లు అర్పిస్తున్నాను.

చివ‌ర‌గా... నాలుగేళ్ళ కింద‌ట నా తొలి స్వాతంత్య్ర దినోత్స‌వం ప్ర‌సంగం త‌ర‌హాలోనే ఇప్పుడు మ‌రోసారి ఉప‌నిష‌త్తులసూక్తాలను స్మ‌రిస్తున్నాను.  భ‌ర‌త మాత‌లాగానే ఈ సూక్తాలు స‌దా చిరంజీవులు.

దైవం మ‌న‌ల‌ను ర‌క్షించు గాక‌;

దైవం మ‌న‌ల‌ను పోషించు గాక‌;

మ‌నమంతా పరిపుష్టితో శ‌క్తితో, స‌మష్టిగా ప‌నిచేయుదము గాక

మ‌న అధ్య‌య‌నాలు సూక్ష్మ‌బుద్ధితో కూడి యుండుగాక‌;

మ‌న మ‌ధ్య వైరానికి తావు లేకుండు గాక‌;

అంత‌టా శాంతి శాంతి శాంతి వర్ధిల్లు గాక‌”.

జైహింద్‌

 

పైకి వెళ్ళుటకు