অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

తెలంగాణలో చౌడు భూములు – సవరణ

తెలంగాణలో సుమారుగా 1,19,000 హె.మేర చౌడు భూములు విస్తరించి ఉన్నాయి. వీటిలో అత్యధిక భాగం మహబూబ్ నగర్, నల్గొండ, మెదక్ జిల్లాల్లో ఉన్నాయి.

నేల రసాయనిక లక్షణాలలోని ప్రతికూలత కారణంగా ఈ నేలలు ఏర్పడతాయి. ఈ భూముల్లోని చౌడు తీవ్రతను బట్టి పంట అసలు పండకపోవడం, కొద్ది దిగుబడులు రావడంగాని జరుగుతుంది. చౌడు తీవ్రంగా ఉన్నప్పుడు గింజ మొలకెత్తదు. ఒకవేళ మొలకెత్తినా పంట ఆరోగ్యంగా ఉండదు. సాధారణంగా రైతులు సరిగా పండని భూములను, చౌడు భూములని పిలుస్తుంటారు. అయితే వీటిలో మూడు రకాలైన చౌడు భూములు వేర్వేరు లక్షణాలు కలిగి ఉన్నాయి.

తెల్ల చౌడు లేదా పాల చౌడు భూములు

ఈ నేలల్లో లవణాలు అధికంగా ఉండడం ప్రధాన సమస్య. లవణ పరిమాణ సూచిక 1.5 కంటే ఎక్కువగా, మార్పిడి కాగల సోడియం 15 శాతం కన్నా తక్కువగా ఉంటుంది. క్లోరైడ్, సల్ఫేట్ లవణాలు అధికంగా ఉంటాయి. వీటిలో నేల పైభాగంలో ఎండాకాలంలో తెల్లని ఉప్పు పొంగి ఉంటుంది. నేలలోని లవణాలు తేమను పీల్చుకొని ఎల్లపుడూ నేల తడిగా ఉంటుంది. భూమి మెత్తటి పొడిగా పొంగి ఉంటుంది. కాలు వేసినప్పుడు నేల కుంగడం గమనించవచ్చు. మొక్కలు సరిగా పెరగవు. ఆకులు ముడుచుకొని ఉంటాయి. చివర్లు ఎండి ఉంటాయి. చివర్లు ఎండి ఉంటాయి. ఉప్పాకు మొక్కలు ఎక్కువగా కనిపిస్తాయి.

యాజమాన్యం

అధికంగా ఉన్న లవణాలను పరిమిత స్థాయికి తీసుకురావడం ద్వారా ఈ నేలలను బాగుచేసుకోవచ్చు. దీనికోసం నేలను చదును చేసి, 20-25 సెంట్లు మడులుగా విభజించి గట్టుగా వేసుకోవాలి. సాగు నీటికి, మురుగు నీటికి వేర్వేరు కాల్వలు ఉండేలా ఏర్పాటు చేసుకోవాలి. మరుగు కాల్వలు కనీసం 18 అంగుళాల లోతు ఉండాలి. తరువాత సుమారు 9 అంగుళాల నీరు పెట్టి బాగా దమ్మ చేసి, ఒక రోజంతా తేరనిచ్చి మరుగు నీటి కాల్వల ద్వారా నీటిని తీసివేయాలి. రెండవ సారి చేసేటప్పుడు 4 అంగుళాల నీరు పెట్టి బాగా దమ్మ చేసి, మరుసటి రోజు నీటిని తీసివేయాలి. ఈ విధంగా నాలుగైదుసార్లు చేస్తే లవణ పరిమాణం తగ్గిపోతుంది. లవణస్థాయి మళ్ళీ పెరగకుండా మంచి యాజమాన్య పద్ధతుల ద్వారా ఈ స్థితిని నిలబెట్టుకోవాలి. వీటిల్లో పచ్చిరొట్ట ఎరువులను కలియదున్నాలి. ఎరువులను 25 శాతం అధికంగా వేయాలి. ఎకరానికి 40 కిలోల జింకు సల్పేటు చివరి దుక్కిలో నాటడానికి ముందుగా వేయాలి. ఈ నేలల్లో క్లోరైడు కలిగిన అమ్మోనియం క్లోరైడు, మ్యూరేట్ ఆఫ్ పొటాష లను వాడకూడదు. యూరియా, అమ్మోనియం సల్ఫేట్, సూపర్ ఫాస్ఫేట్, డి.ఎ.పి. ఇతర ఎన్.పి.కె. కాంప్లెక్స్ లను వాడుకోవచ్చు.

నల్ల చౌడు లేదా కారుచౌడు భూములు

వీటిల్లో మార్పిడయ్యే సోడియం 15 శాతం కన్నా అధికంగా ఉంటుంది. నేల ఉదజని సూచిక కూడా 8.5 కన్నా ఎక్కువగా ఉంటుంది. నీటిలో కరిగే లవణాలు సామాన్య స్థాయిలోనే ఉంటాయి. ఈ నేలలు ఎండినప్పుడు గునపం వేసినా దిగనంత గట్టిగా రాయివలే ఉంటాయి. తగినంత నీరు, తేమ ఉన్నప్పుడు మెత్తటి చిక్కటి బురదగా ఉంటాయి. కాలు పెడితే దిగుబడి పోతాయి. రోజులు తరబడి నీరు నిలబడి ఉంటుంది. నేలలోని భౌతిక లక్షణాలు క్షీణించి ఉండడం వల్ల నీరు, గాలి చొరబడే శక్తి తక్కువగా ఉంటుంది. నేలలోని సేంద్రియ పదార్థం, హ్యూమస్ కరిగిన కారణంగా కారు చౌడు నేలలకు అందులో నిలబడిన నీటికి ఒక రకమైన నల్లటి రంగు వస్తుంది. కారు చౌడు కారణంగా మొక్కలకు అవసరమైన పోషకాల సమతుల్యత దెబ్బతింటుంది. అవసరమైన పోషకాలు అందుబాటులోకి రాకపోవడం, అవసరమైన పోషకాలు అధికంగా అందుబాటులోకి రావడం జరిగి మొక్కలకు హాని జరుగుతుంది.

యాజమాన్యం

మార్పిడి అయ్యే సోడియం 15 శాతం కన్నా తక్కువ స్థాయికి తీసుకురావడం, ఉదజని సూచికను అనుకూలమైన స్థాయికి తగ్గించడం ద్వారా ఈ నేలలను బాగు చేసుకోవచ్చు. ఈ ప్రక్రియ కోసం అవసరమైతే సవరణ పదార్థాలను వాడుకోవాలి. జిప్సం, అమ్మోనియం సల్ఫేట్, గంధకం, కాల్షియం క్లోరైడ్ వంటివి వీటిని వీటిల్లో ముఖ్యమైనవి. అయితే వీటిల్లో జిప్పం చౌకగాను, తేలికగా లభిస్తుంది. ప్రభుత్వం కూడా జిప్సంను కారుచౌడు నేలల యాజమాన్యం కోసం సబ్సిడీ పైన అందచేస్తోంది. జిప్పంలో 24 శాతం కాల్షియం, 18 శాతం గంధకం ఉంటాయి. కాల్షియం మార్పిడి చెందే సోడియం తగ్గించడంలో, గంధకం ఉదజని సూచికను సాధారణ స్థాయికి తీసుకురావడంలోను ఉపయోగపడతాయి. కారుచౌడు నేలలను బాగుచేసుకోవడానికి జిప్పంతోపాటు, తగినంత నీటి వసతి, మురుగుపోయే సౌకర్యం కూడా అవసరం. ఎకరానికి అవసరమయ్యే జిప్సం, భూసార పరీక్షల ద్వారా క్షార తీవ్రతను బట్టి, ప్రయోగశాలలో నిర్ధారిస్తారు.

నేలను పరీక్ష చేయించుకున్న తరువాత, నేలను చదునుగా తయారు చేయాలి. చుట్టూ 35-40 సెం.మీ. ఎత్తులో గట్లుగా వేసుకోవాలి. ఈ గట్లు వీలైనంత బలంగా ఉండేటట్లుగా చూడాలి. విధిగా మరుగు కాల్వలను కూడా ఏర్పాటు చేసుకోవాలి. బాగా పొడి చేసిన జిప్సంను నేల పైపొరలలో అంటే 8-10 సెం.మీ. లోతులో బాగా కలిసేటట్లుగా కలియదున్ని నీరు నిల్వగట్టుకోవాలి. ఇలా చేయడం వల్ల జిప్సం నీటిలో కరిగి నెమ్మదిగా నేలలోకి ఇంకుతుంది. మూడు, నాలుగు రోజుల కన్నా ఎక్కువ సమయం తీసుకుంటుంది. జిప్సం నేలలో కరిగి రసాయన చర్య వేగవంతమయ్యే కొద్దీ నీరు వేగంగా ఇంకుతుంది. మూడు, నాలుగు సార్లు ఇలా నీరు పెట్టి, నేలలోనికి ఇంకించి, చివరిసారి నీటిని అధికంగా పెట్టి దమ్మ చేసి తేరనిచ్చి మరునాడు మురుగు కాల్వల ద్వారా నీటిని తీసివేయాలి. ఈ ప్రక్రియ వల్ల జిప్పంలోని కాలియం నేలలోని సోడియంతో మార్పిడి జరిగి సోడియం ధాతువు సోడియం సల్ఫేటుగా మురుగు నీటి ద్వారా బయటకు పోతుంది. ఈ చర్యవల్ల నేలలోని మార్పిడి అయ్యే సోడియం తగ్గి, ఉదజని సూచిక కూడా మామూలు స్థాయికి చేరి నేల సాధారణ స్థితికి వస్తుంది.nalla choudu.jpg ఈ విధంగా బాగుచేసుకున్న తరువాత జీలుగను పచ్చిరొట్టగా వేసుకొని సుమారుగా 45 రోజుల తరువాత పూతదశలో నేలలో కలియదున్నాలి. జీలుగ బాగా మరగడానికి రెండు వారాలపాటు నీటిని పెట్టి తీసివేయాలి. తరువాత కొత్త నీటిని పెట్టుకొని మొదటి పంటగా వరిని నాటుకోవాలి. ఈ నేలల్లో లేత నారుకన్నా ముదురు నారు బాగా నాటుకుంటుంది. మామూలుకన్నా మొక్కల సంఖ్య ఎక్కువగా తప్పనిసరిగా పాటించాలి. పోషక లోపాలు రాకుండా జాగ్రత్త వహించాలి. ఈ పంటకు మామూలుగా దానికన్నా 25 శాతం అధికంగా ఎరువులు వేయాలి. ఎరువులతోపాటు ఎకరానికి 20 కిలోల జింక్ సల్ఫేట్ వేయాలి. వరి తరువాత కూడా రెండు మూడు పంటల వరకు క్షారాన్ని తట్టుకొనే చెరకు, రాగి, పత్తి వంటి పంటలను వేయాలి. ఈ నేలల్లో పప్పుజాతి పంటలు, మొక్కజొన్న నిమ్మజాతులు వంటివి సాగుచేయడానికి అనుకూలం కాదు.

ఉప్పు చౌడు నేలలు

ఇవి చూడడానికి పాల చౌడు నేలల్లాగే ఉంటాయి. ఎండాకాలం నేల పైభాగంలో తెల్లని ఉప్పు పొంగి ఉండడం, నేల మెత్తటి పొడిగా ఉండడం గమనించవచ్చు. నేలలో ఉండే లవణాలను పరిమిత స్థాయికి తీసుకురావడం ద్వారా ఈ నేలలను బాగుచేసుకోవచ్చు. అదే సమయంలో మార్పిడి చెందే సోడియంను 15 శాతం కన్నా తగ్గించాలి. ఇందుకోసం పొలాన్ని చదును చేసి మరుగు నీటి కాల్వలు ఏర్పాటు చేసుకోవాలి. కారు చౌడు భూముల్లోలాగ మెత్తగా పొడి చేసిన జిప్సంను నేలల్లో కలియదున్ని నీరు నిలవగట్టి నీరు ఎక్కువగా పెట్టి బయటికి తీసివేయాలి. ఇలా 3-4 సార్లు చేస్తే మరుగునీటిలో సోడియం సల్ఫేట్ తో పాటు అధికంగా ఉన్న లవణాలు కూడా బయటికి పోతాయి. తరువాత జీలుగ పెంచి భూమిలో కలియదున్నాలి. ఇతర యాజమాన్యం పద్ధతులైన ఎరువుల మోతాదు పెంచుకోవడం, జింకును దుక్కిలో వాడకం వంటివి కారుచౌడు భూములలో మాదిరిగానే చేయాలి.

ఒకసారి చౌడు భూములను బాగుచేసుకున్న తరువాత వాటిల్లో వరుసగా పంటలు వేసుకోవాలి. పొలాలను ఖాళీగా వదలకూడదు. ప్రతి రెండేళ్ళకొకసారి మట్టి నమూనాలను పరీక్షకు పంపి మార్పులు గమనిస్తూ జాగ్రత్తలు తీసుకోవాలి. మరుగు పోయేు సౌకర్యాలను ఎవ్పటి కవ్పుడు పునరుద్ధరించుకోవాలి. చౌడు భూములను బాగు చేయడానికి వీలుకానప్పుడు మంచి యాజమాన్య పద్ధతుల ద్వారా దిగుబడులను పెంచుకోవచ్చు. ప్రత్యేక మెళకువలను పాటించాలి. ఎండాకాలంలో నేలపైన పొంగి ఉన్న ఉప్పును పారతో చెక్కి వేయాలి. ఖరీఫ్ వర్బాధారప పంటలను సాగుచేసుకోవాలి. వర్షపు నీటిని వృథా పోనివ్వకుండా, గట్లు నిర్మించుకొని పొలంలోనే ఇంకిపోయేటట్లు చూడాలి. బోదెలను, గట్లను వాలుకు అడ్డంగా నిర్మిస్తే లవణాల హాని తక్కువగా ఉంటుంది. విత్తన మోతాదును పెంచుకోవాలి. అదే విధంగా మొక్కలు, వరుసల మధ్య దూరాన్ని తగ్గించుకుని మొక్కల సాంద్రత అధికంగా ఉండేటట్లు చూడాలి. అన్నిటికన్నా ముఖ్యమైనది చౌడును తట్టుకునే పంటలను ఎంపిక చేసుకోవడం. అన్ని రకాల యాజమాన్య పద్ధతుల ద్వారా చౌడు భూములను వ్యవసాయ యోగ్యంగా మారిస్తే సాగు విస్తీర్ణం పెరిగి అధికోత్పత్తికి దోహదపడుతుంది.

ఆధారం: పాడిపంటలు మాస పత్రిక



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate