অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

అంతరిక్షంలో జీవాన్వేషణ

అంతరిక్షంలో జీవాన్వేషణ

dec21విశ్వంలో జీవం వుందా? వుంటే ఏ రూపంలో వుంది? ఎక్కడ వుంది? అంతరిక్షంలో భూమ్యేతర నాగరికత ఏదైనా వుందా? అనే ప్రశ్నలు ఈ రోజుకీ ఒక్క నిపుణులనే కాదు, సాధారణ ప్రజలను కూడా ఎంతగానో కలవర పెడుతున్నాయి. ఈనాటి వరకు భూమిమీద తప్ప మరెక్కడా జీవపదార్థాన్ని కనుక్కోలేదు. కాని ఆధునిక ప్రకృతి విజ్ఞాన శాస్త్రం సాధించిన ప్రగతి, శాస్త్రీయ ఆధారం మనం ఈ ప్రశ్నలు వేసే అవకాశం కల్పిస్తున్నది. అనేక రంగాలలో కృషి సలుపుతున్న శాస్త్రవేత్తలు జీవం వునికిపై పరిశోధనలు జరుపుతున్నారు. మనకి అందుబాటులో వున్న శాస్త్రీయ సమాచారమం అంతరిక్షంలో జీవపదార్థం ఎంతో కొంత వుండే అవకాశాన్ని ధృవపరుస్తుంది. భూపరిణామక్రమంలో సహజసిద్ధమైన పద్దతిలో భూమిమీద జీవం ఏర్పడినపుడు భూమిని పోలిన ఇతర ప్రదేశాల మీద కూడా జీవ పరిణామం జరిగి వుండవచ్చునని భావించారు.

జీవపదార్ధానికి రసాయనిక మూలమైన కార్బన్ అంతరిక్షంలో విస్తృతంగా వ్యాపించివుండటం కూడా దీనికి బలాన్నిస్తున్నది. .

ఏ గ్రహం మీదైనా జీవపదార్ధం ఏర్పడటానికి ముందుగా గ్రహం మీద జీవసంయోగ పదార్థాలు ముందే తయారవ్వాలి. కావున కర్బన అణువులు విశ్వాంతరాణంలో చాలా విస్తారంగా వ్యాపించియున్నా అవి జీవపదార్ధ ఆవిర్భావానికి ఎటువంటి అవకాశాన్ని ఇవ్వటం లేదు. ఇతర అంతరిక్ష వస్తువుల మీద జీవం ఆవిర్భవించగలదో లేదో వూహించటం ఎంతో కష్టం. ఎందుకంటే ఎంతో క్లిష్టమైన జీవావిర్భావం ప్రకృతిలో ఏవిధంగా జరుగుతుందో, నిర్జీవ పదార్థం నుండి సజీవ పదార్ధం ఎలా ఆవిర్భవిస్తుందో ఈ రోజుదాకా విజ్ఞానశాస్త్రం పూర్తిగా వివరించలేక పోయింది. ఈ సమస్యను విజ్ఞానశాస్త్రమే పరిష్కరించాల్సి వుంది, జీవపదార్ధం ఆవిర్భవించడానికి ఏరకం పరిస్థితుల కలయిక అవసరమో మనకి తెలియదు. అందుకే విశ్వ పరిణామంలో ఈ అనుకూల పరిస్థితులు ఏర్పడే సంభావ్యతని మనం అంచనా వేయలేం. భూమ్యేతర నాగరికతలను అన్వేషించేవారు ఎదుర్కొనే ముఖ్యమైన అనిశ్చితత్వాలలో ఇది ఒకటి.

నేటి అత్యంత ఆధునిక పద్ధతులు కూడా అతి దగ్గరగా ఉన్న నక్షత్ర మండలాలలో గ్రహవ్యవస్థలని కనిపెట్టలేకపోయాయి. సౌరకుటుంబాన్ని పోలిన ఒక్క గ్రహకూటమిని కూడా కనుగొనటం సాధ్యం కాలేదు. ప్రస్తుతానికి గ్రహవ్యవస్థలను కనుగొనటానికి మరింత ఆధునికమయిన నూతన వధతులు రూపొందించబడుతున్నాయి. వీటి ద్వారా త్వరలోనే నిర్దిష్టమయిన ఫలితాలు పొందవచ్చు. ప్రస్తుతానికి మేధ కల్గిన జీవి ఇంకెక్కడయినా ఉందో, లేదో అనే ప్రశ్నకి సంతృప్తికరమయిన సైద్ధాంతిక జవాబునివ్వడం అసాధ్యం.

భూమ్యేతర గ్రహపు జీవుల రేడియో ప్రసార సంకేతాలనుగానీ, ఆ నాగరికతల జీవిత కార్యకలాపాలకు సంబంధించిన ఎటువంటి గుర్తులనయినా గుర్తించడానికి మరింత పరిశోధన జరగాలి. ఆ పరిశీలనలో భాగంగానే గత 10 సం.లుగా వివిధ దేశాలకు చెందిన ఎన్నో భారీ రేడియో టెలిస్కోప్లతో పరిశోధనలు జరిగాయి. విశ్వానికి చెందిన ఎన్నో విడిప్రాంతాల పై పరిశీలనలు జరిపారు. అలాగే వేధోజీవుల కార్యకలాపాలకు సంబంధించినవి అని అనుమానించగల గుర్తులేవీ కూడా అంతరిక్షంలో తారసపడలేదు. విశ్వంలో నాగరికతలు ఎన్నో వున్నాయి అనుకుందాం. అప్పుడు సహజంగానే వాటి అభివృద్ధిలో వుండే అసమానతల వల్ల వాటి శాస్త్రీయ, ఇంజనీరింగ్, సాంకేతిక విజ్ఞానాల అభివృద్ధి వేరువేరుగా వుంటుంది. అనగా మనకంటే వెనుకబడినా, లేదా ఎక్కువ అభివృద్ధి చెందిన నాగరికతలు ఉండి వుండాలి. అలాగే ఇంకా పైస్థాయిలోని అతీత నాగరికతలు కొన్ని వుండితీరాలి. కానీ అటువంటి అతీత నాగరికతలేవీ నేటికీ కనుగొనబడలేదంటే ప్రస్తుతానికి భూమ్యేతర నాగరికతలేవీ లేనట్లే. ఐతే మరొకరకం అభిప్రాయం కూడా వ్యక్తమవుతున్నది. ఇతర గ్రహాల మీద నాగరికతలు తమ రానికిని గురించి తెలియజెప్పకపోవడానికి కారణం అది అసలు లేకపోవడం కాదనీ, వేరే కారణాలేవో వుండి వుంటాయని కొంత మంది శాస్త్రవేత్తలు భావిస్తున్నారు. వేడిగా వ్యాకోచిస్తున్న విశ్వపునమూనా ప్రకారం దాని పరిణామ అతి తొలిదశలో నక్షత్రాలు కానీ, గ్రహాలు కానీ, అణువులు కానీ, చివరకు పరమాణువులు కూడా వుండేవి కాపు. ఇవన్నీ కూడా తర్వాతి దశలో ఆవిర్భవించాయి.

ఆ విధంగా జీవపదార్ధపు పుట్టుకకు అనువైన సితులు విశ్వపరిణామంలో ఏదో ఒక నిర్దిష్ట దశలోనే ఏర్పడ్డాయి. తొయిత్రిస్కీ అనే రష్యన్ శాస్త్రవేత్త జీవపదార్ధానికి అనువైన పరిస్థితులు నిర్ధిష్ట దశలోనే గరుడాయని భావించారు. మానవజాతి తన అభివృద్ధి క్రమంలో ఏస్థాయికి చేరుకుందంటే మన నాగరికత ఈ అనంతవిశ్వంలో ఒక భాగమని, ఏ నియమాలకి విశ్వం కటుబడి వుందో అదే నియమాలు భూమికీ వర్తిస్తాయని మనకి అర్ధం అవుతోంది. ఇతర గ్రహాల మీద నాగరికతలకు సంబంధించిన పరిశోధనలను కొనసాగించడమే మన లక్ష్యసాధనకు అత్యుత్తమ మార్గంగా అనిపిస్తుంది. భూమ్యేతర నాగరికతలతో సంపర్కం ఏర్పరచుకోవడానికి, వాటితో సమాచార మార్పిడికి సంబంధించిన సమస్యలను అర్థం చేసుకోవడానికి కావలసిన పరిజ్ఞానాన్ని అభివృద్ధి పరచుకోవాలి. వాస్తవానికి ఈ గ్రహాంతర నాగరికత సంపర్కం ఏనాటికైనా సంభవిస్తుందా, లేదా అనే విషయంతో సంబంధం లేకుండానే ఈ సమస్యనే అధ్యయనం చేయవలసిన అవసరం ఎంతైనా వుంది. స్టీఫెన్ హాకింగ్ చెప్పినట్లు గ్రహాంతర జీవనం వుంటే వాటితో ఘర్షణ పడకుండా స్నేహ వాతావరణాన్ని నెలకొల్పడం మానవజాతికి శ్రేయస్కరం అంటాడు. గ్రహాంతర నాగరికతల అధ్యయనం మనిషికి, రకరకాల యంత్రాలకి మధ్యగల సంబంధాలను కూడా మెరుగుపరచుకోవడానికి, అర్ధం చేసుకోవడానికి బాగా ఉపయుక్తం అవుతాయని ఆయన అన్నారు. ఇస్రో, నాసా, ఐరోపా అంతరిక్ష పరిశోధనా సంస్థ చైనా మున్నగు దేశాలు భూమి వెలుపల జీవ ఉనికి లేదా వాటి ఆచూకీ కనుగొనడానికి రాబోయే 2 దశాబ్దాలలో భారీ మొత్తంలో డబ్బును వెచ్చించబోతున్నాయి. బహశా 2050 సం. నాటికి గ్రహాంతర జీవ వునికి తేటతెల్లం కావచ్చు. వారితో భూమి మీదున్న మనుషులు పరస్పర అవగాహన పొందవచ్చని ఆయన ఊహించారు.

ఆధారం: తుమ్మల శ్రీకుమార్



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate