অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

గ్రావిటీ

గ్రావిటీ

july4భూమ్యాకర్షణను దాటి అంతరిక్షంలోకి వెళ్ళినపుడు భూమి ఎలా కన్పిస్తుందో చూడాలని ఉందా? భారరహిత వ్యవస్థ (weightlessness) ఉండే శూన్యంలో అంతరిక్ష వ్యోమగాముల (astronauts or cosmonauts) కదలికలు ఎలా ఉంటాయో దగ్గరగా చూడాలని ఉందా? హబుల్ టెలీస్కోపును అతి సమీపంగా పరిశీలించాలని ఉందా?

అంతరిక్ష నడక (space walk) అనే పదం విన్నారు గానీ, ఏ రాకెట్టుతోనూ, ఏ తాడూ బొంగరంతో సంధానం లేకుండా ఒక వ్యక్తి శూన్యంలో (మన యింట్లో ఈగల్లాగా) అటూయిటూ తన యిష్టానుసారంగా చేసే అంతరిక్ష నడక ను గమనించాలని ఉందా? ఉన్నఫళాన వ్యోమగామి మాస్క్ పోతే ఆ మనిషి ఏ విధంగా చిధ్రమైపోతాడో నన్న భయానక దృశ్యాన్ని వీక్షించాలని ఉందా? శూన్యం నుంచి ఓ వస్తువు భూవాతావరణంలో ప్రవేశించాక అది భూమ్యాకర్షణ వల్ల క్రింది. పడినపుడు గాలి ఘర్షణ కూడా ఎంతటి వేడిని పుట్టిస్తుందో, ఆ వస్తువు ఏ విధంగా అగ్నిగోళం లాగా మండుతుందో తెలుసుకోవాలని ఉందా? అమెరికా వాళ్ళు అంతరిక్షంలోకి వ్యోమగాముల్ని పంపడానికి Explorer వంటి shuttle రాకెట్లను పంపుతారు. పైకెగిరేటపుడు రాకెట్టులాగా, దిగేటపుడు విమానంలా ప్రవర్తించే shuttle ను దగ్గరగా చూడాలని ఉందా?

ఇలా అంతరిక్ష పరిశోధనలకు సంబంధించిన అనేక ఆసక్తికర దృశ్యాలను అత్యంత అద్భుతంగా చిత్రీకరించిన ఇంగ్లీషు సినిమా 'గ్రావిటీ' (Gravity) ని చూస్తే పైన తెలిపిన కోరికలతో పాటు చక్కని నటనను చూసిన అనుభూతి కలుగుతుంది.

సుమారు గంటన్నరపాటు నడిచే 2D/3D సినిమాలో కేవలం ఇద్దరే పాత్రధారులు. అందులో హీరోయిన్ (సాండ్రా బుల్లక్, Sandra Bullock) ఉండే దృశ్యాలే 80 శాతం పైచిలుకు ఉంటాయి. కేవలం మొదట్లో కాసేపు, మధ్యలో కాసేపు మాత్రమే హీరో (జారి క్లూనీ, George Clooney) కనిపిస్తాడు. అయినా సినిమా ఎంతో ఆసక్తికరంగా ప్రేక్షకుల్ని ప్రతిక్షణం ఏమౌతుందో అన్న ఉత్కంఠను నిలబెడుతూ నడుస్తుంది.

మార్చి 2వ తేది, 2014 నాడు అమెరికాలో లాస్ ఏజెంల్స్ లో జరిగిన 86వ ఆస్కార్ అవార్డుల ప్రధానోత్సవంలో రికార్డుస్థాయిలో అత్యాధికంగా 10 నామినేషన్లు పొంది అందులో ఏడింటిని గెలుచుకున్న చిత్రం గ్రావిటీ. అంతేకాదు ఆర్థికంగా కూడా పెట్టుబడి కన్నా 7 రేట్లు లాభాలార్జించిన సినిమా గ్రావిటీ. గ్రావిటీ సినిమాను చూస్తే మనమే అంతరిక్షంలోకి వెళ్ళిన అనుభూతి, ఆందోళన, ఆసక్తి, సంభ్రమం, భయం కలుగుతాయి. ఇక కథ విషయాన్ని చూద్దాం.

కథ:

july5ఉన్నట్టుండి హబుల్ స్పేస్ టెలిస్కోపులో కొన్ని లోపాలొస్తే వాటిని సరిదిద్దడానికి నలుగురు ఇంజనీర్లను Explorer shuttle అక్కడకు చేరుస్తుంది. ఇందులో మాట్ కొవాలస్కీ (George Clooney) space walk పరికరంతో అటూ ఇటూ అంతరిక్షంలో కదుల్తూ మిగిలిన ముగ్గురికి ఆదేశాలు, సూచనలు ఇస్తుంటాడు. రియాన్ స్టోన్ (Sandra Bullock), మిలిగిన ఇద్దరు ఇంజనీర్లు షటిల్ తో లంకె (బొడ్డుతాడులాగా) ఉన్న యాంత్రికగొట్టం తాడు సహాయంతో బంధించుకొని టెలిస్కోపునకు రిపేర్లు చేస్తుంటారు.

ఇంతలో ఉన్నట్లుండి వీరికి Houston లో ఉన్న అంతరిక్ష పరిశోధనా కేంద్రం నుంచి హెచ్చరికలు వస్తాయి. అంతరిక్షంలో మరో కక్ష్య  తిరుగుతున్న ఓ రష్యా ఉపగ్రహం (satellite) లో విస్ఫోటనం జరగడం వల్ల విడుదలయిన లోహపు ముక్కలు చాలా వేగంగా వీరివైపు వచ్చే ప్రమాదముందని, వాటి వేగానికి హబుల్ టెలిస్కోపు, షటిల్ తో పాటు వీరి ప్రాణానికి ముప్పు ఉందనీ వెంటనే ఆపరేషన్లు ఆపేసి తిరిగి షటిల్ తో వెనక్కి (భూమికి) వచ్చేయమని ఆదేశాలు వస్తాయి. ఇంతలో ఓ చిన్న శకలపు తాకిడికి రేడియో సమాచార వ్యవస్థ దెబ్బతింటుంది. పూర్తిగా గ్రౌండ్ స్టేషన్ నుంచి సమాచార పంపిణీ స్తంభిస్తుంది. కొన్ని నిమిషాల్లోనే విస్ఫోటనానికి గురయిన ఉపగ్రహా ముక్కలు హబుల్ టెలిస్కోపును, షటిల్ ని ధ్వంసం చేస్తాయి. స్టోన్ తో పాటు రిపేర్లు చేస్తున్న ఇద్దరి హెల్మెట్లు పగిలిపోతాయి. వారిద్దరు చనిపోతారు.

స్టోన్ కు ఉన్న లంకెతాడు (umbilical chord) తెగిపోయింది. తన వీపుమీదున్న కొంచెం ఆక్సీజన్ అయిపోవస్తుంటుంది. ఆమె అంతరిక్షంలో దారితెన్ను లేకుండా విసిరేయబడుతుంది. ఇంకొన్ని క్షణాలు గడిస్తే ఆమె ఊపిరాడక చనిపోయేదే. కానీ కోవాలస్కీ తన Space walk రాకెట్టు ద్వారా ఆమెను రక్షించి మరో కక్ష్యలో తిరుగుతున్న అంతర్జాతీయ అంతరిక్ష స్థావరం (International Space Station, ISS) ను చేరుకుంటారు. శకలాల తాకిడి భయంతో అక్కడున్న సిబ్బంది అప్పటికే ISS ను వదిలేసి పారాచూట్లనన్నింటనీ తీసుకెళ్ళి ఉంటారు. ఓ పారాచూట్ విచ్చుకుని ఉంటుంది. దాన్ని వాడబోయిన వ్యోమగామి అక్కడే శవంగా వేలాడుతుంటాడు. ఇక స్టోన్, కోవాలస్కీ భూమికి దిగే

అవకాశం లేదు.

ఇద్దరూ ISS స్టేషన్ కు చేరుకునే క్రమంలో విచ్చుకొని ఉన్న పారాచూట్ తాళ్ళు స్టోన్ కాళ్లకు చుట్టుకొంటాయి. Space walk పరికరంలో ఉన్న కోవాలస్కీ space walk డబ్బాను ఆమె గట్టిగా పట్టుకొంటుంది. అలానే కాసేపు ఉంటే స్టోన్ మరణించడం ఖాయం. ఆమెను తొందరగా ISS లోకి పంపాలి. అక్కడ లోపలికి చేరితేనే అక్కడున్న ఆక్సీజన్ తో ఆమె బతక్కలదు.

ఆ సమయంలో కోవాలస్కీకి ఒక హృద్యమైన ఆలోచన వస్తుంది. తాను ఓ సీనియర్ వ్యోమగామి. వయసు చరమాంకంలో రేపో ఎల్లుండో రిటైర్మెంటు తీసుకునే స్థితిలో ఉన్నాడు. స్టోన్ కు ఇదే ప్రథమ అంతరిక్ష ప్రయాణం. ఆమె వయసులో చాలా చిన్నది. ఇంకా ఎంతో భవిష్యత్తు ఆమెకు ఉంది. తీరా ఇక్కడ చూస్తే space walk డబ్బాను ఆమె పట్టుకుని గాళ్లో వేలాడుతోంది. తాను త్యాగం చేస్తాడు. ఆమెకోసం తన space walk డబ్బాను ఆమెకు చిక్కేలా తాను దాన్నుంచి విడిపించుకొంటాడు. ఫలితంగా కోవాలస్కీ మరణిస్తాడు. అంతరిక్షంలో ఆ శవం ఓ ఉపగ్రహంలాగా ఎటో వెళ్లిపోతుంది.

స్టోన్ కు యిక ఎంతో సమయం లేదు. ఏ మాత్రం ఆలస్యం చేసినా ఇంతకు మునుపు షటిల్ ను, హబుల్ టెలీస్కోపును ధ్వంసం చేసిన విడిముక్కలు (debris) తిరిగి మళ్లీ ఢీకొనే ప్రమాదం ఉంది. వాటి భూపరిభ్రమణ కాలం అలా ఉంది. వెంటనే ఆమె తన గురువు కోవాలస్కీ తన కోసం మరణించాడన్న దుఃఖం ఓ వైపు ఉండగా, మరో వైపు ఆలస్యం చేయకూడదన్న జాగరూకతతో ISS లోకి వెళ్తుంది. అక్కడ భూమ్మీదకు దిగడానికి వీలున్న ఓ సోయజ్ (Soyuz) ఉంటుంది. కాని అందులో భూమి వరకు చేరడానికి సరిపడు ఇంధనం (fuel) ఉండదు. ఇక తనకు మరణం తప్పదని ఆమె దిగులుతో ఉంటుంది. ISS లో ఆక్సీజన్ తరిగిపోతుంటుంది.

ఆమె మెల్లగా మైకంలోకి వెళ్లిపోతుంది. తనకు కలలో కోవాలస్కీ కనిపించి Soyuz Landing Rockets ని, అందులో ఉన్న Fire extinguisherని రాకెట్టులుగా వాడుకొని అక్కడ్నుంచి 100 కిలోమీటర్ల దూరంలో ఉన్న చైనా వారి టియాంగాంగ్ షటిల్ కు చేరుకుని అక్కణ్నుంచి భూమ్మీదకు చేరేలా ఉపదేశం చేస్తాడు. వెంటనే ఆమెకు మెలకువ వస్తుంది. అదే విధంగా ఆమె చేస్తుంది.

తీరా టయాంగాంగ్ కు కూడా debris ముక్కల దాడి వల్ల భూవాతావరణంలోకి ప్రవేశించబోతుంటుంది. అదే జరిగితే అది మండిపోవడం ఖాయం. అందులో ఉన్న షటిల్ ఇక పనికిరాకుండా పోయే ప్రమాదం ఉంది. వెంటనే Fire extinguisher సాయంతో తొందరగా టయాంగాంగ్ చేరి అక్కడున్న Shenzhou అనే షటిల్ లో నేలకు చేరుకుంటుంది. ఓ నదిలో అది పడుతుంది. అక్కణ్నుంచి ఆమె బయటివరకు ఈదుకుంటూ వచ్చి నేల మీదకు చేరుకొంటుంది. ఆ విధంగా అతికష్టం మీద ఆమె బ్రతికినట్లుగా కథ సుఖాంతం అవుతుంది.

సాండ్రా బుల్లక్ నటనను మెచ్చి ఆమెకు 86వ ఆస్కార్ అవార్డులలో ఉత్తమ నటిగా నామినేషన్ పొందింది. అయితే ఉత్తమ నటిగా బహుమతి రాకపోయినా ఆస్కార్ నామినేషనే పెద్ద గౌరవప్రదమని అందరికీ తెలుసు. ఉత్తమచిత్రం, ఉత్తమ నటి, ఉత్తమ నిర్మాణ రూపకల్పన, ఉత్తమ దర్శకత్వం, ఉత్తమ ఛాయాచిత్రీకరణ (cinematography), ఉత్తమ దృశ్యాలు (best visual effects), ఉత్తమ ఎడిటింగ్, ఉత్తమ సంగీత ధ్వని, ఉత్తమ ధ్వని మిశ్రమం, ఉత్తమ సంగీత అమరిక వంటి 10 నామినేషన్లలో చివరి 7 అవార్డులను గెలుపొందింది. ఏ మాత్రం వీలయినా "Gravity" సినిమాను చూడడం మరవకండి.

ఆధారం: ప్రొ. ఎ. రామచంద్రయ్య



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate