অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

నీళ్ళలో మునిగితే?

నీళ్ళలో మునిగితే?

decs1మస్తాన్ బావిలో పడ్డాడు. “కాపాడండి! కాపాడండి!” అంటూ బావి దగ్గర నీళ్ళు చేదుతున్న ఆడవాళ్ళంతా కేకలేశారు. ఊరి జనమంతా బావిచుట్టూ పోగయ్యారు. బావిలోకి దిగి మస్తాన్ ను కాపాడ్డానికి ఎవరూ ముందుకురాలా, యాదగిరి ఈ కేకలు విని బావి దగ్గరకు చేరాడు. బావుల్లో ఈత గొట్టడం, బావుల్లో పడ్డ బిందెలు తీయడం వాడికి భలే సరదా. వెనకా ముందూ చూడకుండా యాదగిరి ఎగిరి బావిలో దూకేశాడు. మునిగిపోయిన మస్తాన్ కాళ్ళ కింద దూరి వాణ్ణి పైకి తెచ్చాడు. ఈలోగా అక్కడున్న వాళ్ళు నులక మంచానికి తాళ్ళు కట్టి బావిలోకి దించారు. మస్తాన్ ని పైకి తెచ్చారు. వాడు కదల్లేదు, మెదల్లేదు. జనంలో ఒకావిడ ముక్కు దగ్గర వేలుంచి చూసింది.

వాడు ఊపిరి పీల్చడం లేదు. "ఇంకేముంది పోయాడు" అంది. "ఓరి దేవుడా! నాకున్న ఒకే ఒక ఆధారం పోయిందిరా దేవుడా!” అంటూ మస్తాన్ అమ్మ వెంకమ్మ లబోదిబోమంది. గత  సంవత్సరం ఓ రోడ్ యాక్సిడెంటులో మస్తాన్ నాన్న ఎలమంద చనిపోయాడు. వెంకమ్మ కూలీనాలీ చేసి కొడుకును సాకుతూ బడికి పంపుతోంది. బడికెళ్ళేలోపు అమ్మకు నాలుగు బిందెలు నీళ్ళందించి పోదామని బావిదగ్గరకు వచ్చాడు. నీళ్ళుచేదుతూ కాలుజారి బావిలో పడ్డాడు.

“మస్తాన్ కాలు కదిలించాడు. ప్రాణముంది. పట్నం తీసుకెళ్తాం" అరిచారు జనంలోంచి ఒకరు. బడికెళుతూ ఈ సందడి విని అక్కడికి చేరి “ఏమయింది?” అని అడిగాడు భద్రం మాస్టారు.

“మస్తాన్ బావిలో పడి చనిపోయాడండీ" అన్నారు. “చనిపోలేదు మాస్టారూ, ఇపుడే కాలు కదిలించాడు. వాడికింకా ప్రాణ ముంది." అన్నదొకావిడ.

భద్రం మాస్టారు ఇక ఆలస్యం చేయలేదు. మెరుపు వేగంతో మస్తాన్ శరీరాన్ని బోర్లా తిప్పి నడుం వద్ద పట్టుకొని పైకి లేపాడు. ఇలా రెండు మూడు మార్లు చేసే సరికి నోట్లోనుండి ముక్కులో నుండి ఊపిరితిత్తుల్లోని నీళ్ళన్నీ బయటకు వచ్చాయి.

decs2మస్తాన్ని ఒక బల్లపై వెల్లకిలా పడుకోబెట్టాడు. తలకొంచెం వెనక్కువంచి, క్రింది దవడను ముందుకు లాగాడు. నోట్లోకి వేళ్లు పోనిచ్చి గొంతుకడ్డుగా ఉన్న జిగటను తొలగించాడు. మస్తాన్ ముక్కును వేళ్ళతో మూసిపెట్టి వాడి నోట్లోకి బలంగా గాలి వూదాడు. యాదగిరిని పిలిచి ఇలాగే గాలి ఊదమన్నాడు. ఇలా 10-15 సార్లు చేసే నరికి మస్తాన్ గాలి పీల్చడం ప్రారంభించాడు. భద్రం మాస్టారు మస్తాన్ ఛాతీ పై రెండు చేతుల్లోంచి గట్టిగా అదమసాగాడు.కాసేపటికి వాడి గుండెవేగం కూడా పెరిగింది. గాలిపీల్చుకోవడం వల్ల కాస్సేపటికి సృహలోకొచ్చాడు.

భద్రం మాస్టార్ని అక్కడున్న వారంతా మెచ్చుకున్నారు. మాస్టారు రాకపోతే మన మస్తాన్ మట్టిలో కలిసిపోయేవాడు అన్నారందరూ. భద్రం మాస్టారు మాత్రం యాదగిరిని అభినందించాడు. “యాదగిరి ఏ మాత్రం ఆలస్యం చేసినా మస్తాన్ బతికేవాడు కాదు, ఇంత మంది ఉండికూడా మీరెవరూ బావిలోకి దూకలేకపోయారు గదా"అన్నాడు.

“మాకు మస్తాన్ని కాపాడాలనే - వుంది మాస్టారూ! కానీ బావిలోని మనిషిని కాపాడబోతే వాళ్ళు మనల్ని గట్టి పట్టేస్తారట గదా! అందుకని".... నీళ్ళు నమిలాడు గోపాల్.

“అదీ నిజమే! ఈత నేర్చుకొంటేనే చాలదు. పక్కవాణ్ని కాపాడే కొన్ని మెలుకువలు కూడా నేర్చుకోవాలి. బావిలో పడ్డ వాళ్ళను జుట్టుగాని, నడుంకున్న బట్టలు గానీ భుజంగాని పట్టుకొని లాక్కురావాలి. మునిగిపోతున్న వ్యక్తి భయపడి మీ గొంతుకు చేతులు బిగించకుండా చూసుకోవాలి. మన యాదగిరి చూడండి. మునిగిన వాడి చేతులకు అవకాశం ఇవ్వకుండా, కాళ్ళ మధ్య దూరి వాడిని పైకి తెచ్చాడు". భద్రం మాస్టారు చెప్పకుపోతుంటే ఊరిజనం ఆసక్తిగా వింటున్నారు. "మాస్టారూ! మీరు రాకముందు మేమంతా పస్తాన్ చనిపోయాడనుకున్నాం. మీరు వచ్చి వాడి చేత నీళ్లు కక్కించి, వాడి నోట్లోకి గాలిపూదాక బతికాడు. ఇదంతా మేం కూడా చేయవచ్చా?" అడిగింది పొదుపులక్ష్మి లీడరు రాములమ్మ.

“అవునమ్మా! మీరంతా తెలుసు కోవాలనే నా తపనంతా", అన్నారు మాస్టారు. “మనలాంటి పల్లెల్లో ఆసుపత్రులు డాక్టర్లు కోసం ఉండరుగదా! డాక్టరు పట్నం వెళ్ళాలంటే కనీసం గంటైనా పడుతుంది. ఈలోగా మనిషి ప్రాణం పోవచ్చు. అలా మనం ప్రాణాపాయ స్థితిలో వుండే వారికి చేసే చికిత్సను ప్రథమచికిత్స అంటాం". నీళ్లలో పడ్డవాళ్ళకు వూపిరి అందదు. వూపిరి పీల్చబోయి ఊపిరితిత్తుల్లోకి నీళ్ళు చేరి స్వర పేటిక మూసుకుపోయింది. దీనివల్ల కొద్ది నిమిషాల్లోనే ప్రాణం పోయే అవకాశం ఉంది. నీళ్ళలోంచి తీసిన వాళ్లనోటికేదైనా అడ్డం పుంటే చేయిపెట్టి తొలగించాలి. నీళ్ళు తాగివున్నట్లయితే బోర్లా పడుకోబెట్టి, నడుం పట్కకొని పైకి లేపుతూ ఊపిరితిత్తుల్లోని నీళ్ళన్నీ బయటకి వచ్చేలా చేయాలి. స్థూపాకార డ్రమ్మును అడ్డంగా దొర్లించి దానిపై నీళ్ళు తాగిన వాళ్ళను బోర్లాపడుకోబెడితే నీళ్ళన్నీ బయటికి వచ్చేస్తాయి. నీళ్ళలో పద్ద మనిషికి ఊపిరి ఆడకపోతే, అతని ముక్కును నొక్కిపట్టి, నోటిలో నోరుపెట్టి బలంగా గాలిపూదాలి. దీన్ని కృత్రిమ శ్వాస అంటాం. ఇలా 10 నుండి 15 సార్లు చేయాలి. - నాడి కూడా అందకపోతే, మన రెండు చేతులతో చాతిపై నొక్కి గుండె కొట్టుకొనేట్లు చేయడానికి ప్రయత్నించాలి. దీన్ని హృదయ మర్దన అంటాం.- తడి బట్టలు తీసేసి పొడి బట్టలు చుట్టాలి.- తెలివిలోకి వస్తే కాఫీ గానీ టీ గాని తాగించాలి.- వేడివస్తుందని సారాయి త్రాగించడం, అరిచేతులు, అరికాళ్ళు లేదా వళ్ళంతా రుద్దడం చాలా ప్రమాదకరం".

“మాస్టారూ! మీనుండి చాలా విషయాలు తెలుసుకున్నాం. ఎవరైనా ప్రమాదంలో ఉంటే తప్పకుండా కాపాడుతాం'' అన్నారు. అక్కడున్న యువకులంతా."మంచి ఆలోచనమ్మా ఈ ప్రతి ఒక్కరూ తప్పక నేర్చుకోవాలి. ఈత వచ్చిన పెద్ద వాళ్ళ పర్యవేక్షణలోనే నేర్చుకోవాలి' అన్నారు మాస్టారు.మస్తాన్ తెలివిలో కొచ్చాడు. ఎవరో కాఫీ తెచ్చి త్రాగించారు. మస్తాన్ తెలివిలోకొచ్చే సరికి వెంకమ్మ ఆనందానికి అవధుల్లేవు. మాస్టారికి నమస్కారం చేసి మస్తాన్ ని తీసుకొని ఆనందంగా ఇంటికి వెళ్లింది. ఆ తల్లి ఆనందం చూసి అందరూ తృప్తిగా నవ్వుకున్నారు. యాదగిరి చాలా సంబరపడ్డాడు.

ఆధారం: డా. రాజేశ్వర రావు



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate