పంచుకోండి
వ్యూస్
  • స్థితి: సవరణ కు సిద్ధం

ఆధునిక ఎంపిక

సందీప్ ఇంటర్ చదివాడు. కుటుంబ పరిస్థితుల వలన బట్టల షాపులో గుమాస్తాగా చేరాడు. చదువుపై ఉన్న శ్రద్ధతో, ప్రయివేట్గా డిగ్రీ చదువుతూ, షాపులో ఒక గంట పర్మిషన్ తీసుకుని రోజూ కంప్యూటర్ వర్క్ నేర్చుకోవడానికి వెళ్ళేవాడు. అలా మూడు సం. లలో డిగ్రీతోపాటు కంప్యూటర్ టెక్నాలజీ కోర్సును కూడా పూర్తి చేశాడు.

ఓరోజు వాళ్ళమ్మతో, "అమ్మా! నాన్న చిన్నప్పడే చనిపోయినా, ఇన్నాళు కష్టపడి నాకు చదువు చెప్పించావు. ఈ మూడేళ్ళు బట్టల షాపులో పని చేసిన అనుభవంతో, సొంతంగా బట్టల వ్యాపారం పెడదామనుకుంటున్నా కాకపోతే పెట్టుబడి కోసం ఆలోచిస్తున్నాను" అన్నాడు

కొడుకుపై ఉన్న నమ్మకంతో, “అలాగే నాన్నా! పెట్టుబడి గురించి ఆలోచించకు. నా దగ్గర ఉన్న ఈ నెక్లెస్ ను అమ్మేసి పెట్టుబడికి వాడుకో," అంటూ ఇచ్చేసింది. దానిని అమ్మివేశాడు. వచ్చిన డబ్బును జాగ్రత్తగా ఉంచుకున్నాడు.

బజారులో షాపుకోసం తగిన స్థలం కోసం వెతికాడు. బజారుకు ఓ చివరన తక్కువ అద్దెకు చిన్న గదిని మాట్లాడుకున్నాడు. అడ్వాన్సు ఇచ్చాడు. షాపునకు కావలసిన బట్టలు, ఫర్నీచర్ తెచ్చుకున్నాడు. ఒక మంచి రోజు చూసుకుని వాళ్ల అమ్మ పేరున "రామలక్ష్మి శిల్క్ ప్యాలెస్" ను ప్రారంభించాడు.

కష్టం విలువ తెలిసిన వాడు. కనుక, నిజాయితీగా, న్యాయంగా కొద్దిపాటి లాభాలతో మంచి నాణ్యత గల బట్టలను అమ్మసాగాడు. వచ్చిన డబ్బును ముందుగా కొంత పొదుపు చేసి, మిగిలింది ఖర్చులకు వాడేవాడు.ప్రారంభంలో కష్టమర్లు అంత ఎక్కువగా రాలేదు. ఓ ఆర్నెల్లు గడిచించి. షాపులో సరుకులకు నాణ్యతలో పేరు వచ్చింది. అందువల్ల, అప్పు ఇవ్వకున్నా వ్యాపారం పెరగసాగింది. కష్టమర్లు అలవాటు పడ్డారు. కొంతవరకు లాభాలు కూడా రాసాగాయి.

ఓ రెండేళ్ళు గడిచింది. షాపులో సరుకు పెరిగింది. ఇప్పడు ఆ గది సరిపోవడం లేదు. తనకు చేతినిండా వని ఎక్కువైంది. ఇంకో మనిషి ఉండాలనిపిస్తోంది. కనీసం, వచ్చిన కష్టమర్లు కూర్చోవడానికి కూడా స్థలం లేక, పక్క షాపునకు వెళుతున్నారు. ఇక లాభం లేదనుకుని అద్దెలు ఎక్కువైనా బజారు సెంటరులో పెద్ద గదిని తీసుకొని గుమాస్తాను పెట్టుకోవడానికి నిశ్చయించుకున్నాడు.

ముందు సెంటర్లో ఒకచోట పెద్ద గది వెతికాడు. గుమాస్తా కావాలి. కానీ, తన వ్యాపారానికి నాణ్యతపై నమ్మకమే పెటుబడి. కనుక ఎవరినంటే వారిని పెట్టుకోవడం ఇష్టంలేదు. నమ్మకంతో పాటు, వచ్చిన కష్టమర్లకు కోరిన బటలు చూపించుతూ కొనేలా చేయగలగాలి. పైగా వచ్చిన కష్టమర్లు బట్టలను మడతలు విప్పి ఎలాగంటే అలా పడేసి వెళుతుంటారు. వాటిని సరుకోవాలంటే చాలా సహనం కావాలి.

ఇలాంటి లక్షణాలున్న గుమాస్తా కావాలి. పైగా ఏ షాపులో చూసినా నాలుగైదు వేల జీతం ఇస్తున్నారు. కొట్లలో గుమస్తాలంటే, పనిలేని వారో, తనలాంటి ఆర్థిక పరిస్థితి సరిగాలేని వారూ వస్తుంటారు. వచ్చినా, అందరూ శ్రద్ధతో పనిచేస్తారని లేదు. పోనీ ఎక్కువ జీతం ఇద్దామంటే, తాను భరించగలడా? ఒకవేళ ఇచ్చినా వారు అందుకు తగినట్లుగా పనిచేయాలి గదా?! అలాంటి వ్యక్తిని ఎంపిక చేసుకుని మరీ తీసుకుంటే సరిపోతుందని భావించాడు. ఇలాంటి వ్యక్తి కావాలని ఎవరినన్నా అడిగినా నవ్వుతారు. ఎలాగా? అని, తన కంప్యూటర్ బుఱ్ఱకు పదును పెట్టసాగాడు. బ్రహ్మాండమైనా ఐడియా తట్టింది. దానిని అమలుపరచాడు. ముందుగా, అన్ని దినపత్రికలలో "గుమాస్తా కావలెను" రామలక్ష్మి శిల్స్ నందు పని చేయుటకు 10 వ తరగతి పాస్/ఫెయిల్,ఆకర్షణీయమైన జీతము నెలకు రూ 10,000/-, ది: 12-03-2017 ఆదివారం ఉ. 9 గం. లకు ఇం. నెం. 253, పటేల్ నగర్, నందు జరుగు ఇంటర్స్యూకు హాజరు కాగలరు. అప్లికేషన్ కు ఆఖరు తేది:08-03-2017 అంటూ రద్దీ లేని ప్రాంతంలో ఒక పొడవైన గది అద్దెకు తీసుకుని, ఆ చిరునామా పేరున ఒక ప్రకటన ఇచ్చాడు.

తాను ఎవ్వరూ ఇవ్వనంత జీతాన్ని ప్రకటించాడు. కనుక అప్లికేషన్స్ వస్తాయి అని ఊహించాడు. అనుకున్నట్లే ఓ 30 మంది పంపించారు. పంపిన వారంతా వస్తారనీ భావించాడు. అందుకు తగినట్లు, తను కోరుకున్న వారిని ఎంపిక చేసుకునేలా ఏర్పాట్లను ముందురోజే ప్రారంభించాడు.

ఆ గదిలో, ముందు ఒక పెద్ద హాలు, లోపల ఇంటర్వ్యూ చేయడానికి, చిన్న గది వచ్చేటట్లు మధ్యలో ఒక పెద్ద కార్డుబోరు ను బిగింపచేశాడు. చిన్న గది ఉన్నా లేనట్లే డెకరేషన్ చేయించాడు. హాలులో ఒక పెద్ద టేబులు పై రకరకాల పుస్తకాలు, మేగజైనులు, ఆ రోజుటి దినపత్రికలు పెట్టాడు. ఒక 20 కుర్చీలను మాత్రమే కావాలని తక్కువగా వేయించాడు. ఒక ప్రక్క మినరల్ వాటర్, గ్లాసులు పెట్టించాడు. గదికి ముందు తప్పనిసరిగా అడుగు పెట్టి వచ్చేవిధంగా కావాలనే చాలా బురద మట్టిని సహజంగా ఉండేలా పోయించాడు. ఆ మట్టిని శుభ్రం చేసుకోవడానికి లోపలకు వచ్చే చోట నీళ్ళ ఏర్పాటు చేశాడు. హాలు ప్రవేశ ద్వారం వద్ద తేమ కాళ్లు తుడుచుకొనే విధంగా పెద్ద కాలిపట్టను ఏర్పాటు చేయించాడు. బయట "రామలక్ష్మి ప్యాలెస్" పేరున స్వాగతం ఫ్లెక్సీ కూడా పెట్టించాడు.

గది ప్రవేశం వద్ద రోడ్డు నుండి, గదిలోపల జరిగే ప్రక్రియలన్నీ కనపడాలి. వాటికోసం మంచి క్వాలిటి ఉన్న ఆరు సినీ కెమెరాలను ఏర్పాటు చేయించాడు. ఎవరికీ అవి కనబడకూడదు. విద్యుత్ అంతరాయము జరిగినా పనిచేయాలి. తగిన కెపాసిటీ వున్న ఇన్వర్టర్లను కూడా పెట్టించాడు. లోపల స్క్రీన్స్ ఏర్పాటు చేయించాడు. అక్కడి మాటలు వినపడేలా స్పీకర్లు, గదికి సౌండ్ ప్రూఫ్. ఇలా అన్ని ఏర్పాట్ల పూర్తి చేయించాక, పరిశీలించుకుని వెళ్లాడు.

interviewఆదివారం ఉదయం గం. 8:00 నికే వచ్చి కూర్చున్నాడు. ఓ 10 ని. లు చేసిన ఏర్పాట్లను ముందు జాగ్రత్తగా పునఃపరిశీలించుకున్నాడు. గం. 8:30 ని.కే లోపల కూర్చున్నాడు, కెమెరాలను గమనించుకుంటూ, గం. 8:45 ని. నుండి అభ్యర్థుల రాక ప్రారంభమయ్యింది. ఒక్కొక్కరుగా వస్తున్నారు. కానీ, వచ్చిన వాళ్లను పలకరించేవాళ్లు అక్కడ ఎవరూ లేరు. గం. 9:30ని. అయింది. వాళ్ళలో కొందరికి ప్రశ్నలు మొదలయ్యాయి. ఇంటర్వ్యూ ఎన్నింటికండీ? చెప్పిన టైముకు గంట దాటింది. ఆ బయట బురదేంటో? ఓహెూ, ఇండియన్ పంక్చువాలిటీ గదా! ఇలా. మరి కొందరు నిశ్శబ్దంగా పుస్తకాలు చదువుకోసాగారు. కుర్చీలు లేక కొందరు అటూఇటూ తిరగసాగారు. 10 గం. లు దాటింది. కొందరి ముఖాల్లో విసుగు మొదలైంది. ఒకరిద్దరు ఇంకా వస్తుంటే, వచ్చిన కొందరు “ఛీ,ఛీ” అనుకుంటూ, చిరాగా కనిపిస్తున్నారు. ఒక్క ఫ్యాను గూడా లేదు? అసలెవరయ్యా ఇంటర్వ్యూ చేసేది? ఇంకొకరి ప్రశ్న అసలు ఇంటర్వ్యూ ఉందా? లేదా? మరొకరి ప్రశ్న ఇవన్నీ లోపల ఏసిలో కూర్చుని సందీప్ గమనినున్నాడు. అక్కడి వారి మాటలు వినపడుతున్నాయి. ఏమి జరుగుతున్నా తన ప్లాను ప్రకారం అప్పుడే బయటకు రాదలచుకోలేదు. సమయం గం.10:30 ని. దాటింది. ఓ10 మందికి పైగానే వెళ్లిపోయారు. కానీ, కొందరికి జీతం గుర్తు వచ్చి ఇంకో అరగంట చూద్దామని అనుకున్నారు. గం. 11:30 ని. దాటింది. సగం మంది విసుక్కుంటూ వెళ్ళిపోయారు. నవ్వుకుంటూ ఉన్నాడు. చివరికి, తను కోరుకున్న విధంగా ఇద్దరు వ్యక్తులు కనిపించారు సందీప్ కు. ఆ ఇద్దరినీ తీసుకోవాలని అనుకున్నాడు. లోపల నుండి హాలులోనికి వచ్చాడు. అప్పటి వరకు అక్కడ ఆ ఒక్క గది మాత్రమే వుందనుకున్న వాళ్ళు, సందీప్ రాకను చూసి షాకయ్యారు. ఉన్న 15 మంది ఆశ్చర్యంతో లేచి నిలుచున్నారు. ఇంతలో సందీప్ ఆ ఇద్దరి వ్యక్తులను చూపిస్తూ "యు అండ్ యు ఆర్ సెలెక్టెడ్" అని అన్నాడు. ఆ మాటలు కూడా వాళ్లకు షాకిచ్చాయి. ఒక్క క్షణంలో తేరుకున్నారు. అంత జీతం వస్తున్న ఉద్యోగం పోతుండడంతో కొందరికి ఆవేశం, కోపం పెరిగి పోయాయి. బాధ తట్టుకోలేకపోతూ, “ఏంటి సార్! సెలెక్టెడ్? ఇక్కడ ఇంతమందిమున్నాము. ఇంటర్వ్యూ కాలేదు, ఏమీ లేదు. సెలెక్షన్ ఎలా చేశారు? ఒకరి ఆక్రోశం. "వాళ్లేమన్నా మీ చుట్టాలా?" మరొకరి ఉక్రోషం. “ఉదయం నుంచీ ఇక్కడ ఇంతసేపు వెయిట్ చేస్తూవుంటే, ఏం పిచ్చి వాళ్లలాగా కనపడుతున్నామా?" ఇంకొకరి ఆవేదన. ఇలా రకరకాల ప్రశ్నలతో ఒక్క 5 నిముషాలపైనే ఆ హాలు కేకలతో దద్దరిల్లింది. వాళ్లందరి ప్రశ్నలను పటాపంచలు చేస్తూ, సందీప్ ఏమీ మాట్లాడకుండా తన చూపుడు వేలును పై భాగాన కనబడకుండా బిగించియున్న సిసి కెమెరాల వైపు చూపించాడు. అప్రయత్నంగా అందరి చూపులూ, అతని వేలును అనురించాయి. ముడుచుకున్నవారి నుదురులు విచ్చుకోసాగాయి

interviewpic"ఇక్కడికి మీరడుగు పెట్టినప్పటినుండీ నేను లోపల గమనిస్తున్నాను. వీరిద్దరూ ఉదయాన్నే ఇంటర్వ్యూ సమయానికి 10 ని. ముందే చేరుకున్నారు. హాలులోపలికి ప్రవేశించేటపుడు కాళ్లకు అయిన మట్టిని శుభ్రంగా జాగ్రత్తగా కడుక్కున్నారు. చెప్పలు బయట వదిలారు. కాళ్లకు అయిన తేమను పట్టకు చక్కగా, నిదానంగా తుడుచుకున్నారు. ఇక్కడ వున్న పుస్తకాలు, పేపర్లు తిరగేశారు. కానీ, తర్వాత చక్కగా అసలా పేపర్లు ఎవరూ తీయలేదేమో? అన్నట్లు ఉన్నవి ఉన్నట్లే పెట్టారు. పేపరు చదివి లేచినప్పుడు వీరు కూర్చున్న కుర్చీలను ఇతరులు ఆక్రమించారు. అయినా వారినేమనలేదు. చిరునవ్వుతో వారినే కూర్చోనిచ్చారు. అప్పటినుండి ఓపికగా ఇంతకు ముందు వరకు నిలబడే ఉన్నారు. వేరేవారు వెళ్లాక కూర్చున్నారు. కాబట్టి, మంచి క్రమశిక్షణతో పాటు నేను అనుకున్న అన్ని లక్షణాలు వీరిలో వున్నాయి." వివరణ ఇచ్చాడు సందీప్.

సందీప్ చెబుతున్నంతసేపూ, అందరూ సంభ్రమాశ్చర్యాలకు లోనయ్యారు. మాటలు ఆపగానే తేరుకున్నారు. విషయం అర్థమవడంతో ఇంక ఎవరినోటా ఒక్కమాట కూడా రాలేదు. తాము చేసిన పొరపాట్లను గుర్తుకు తెచ్చుకుంటూ వెనుదిరిగి వెళ్లిపోయారు.

సెలెక్టయిన రమేష్, మహేష్ లు ఇద్దరు ఆనందంతో ఉబ్బితబ్బిబ్బయ్యారు. అప్రయత్నంగా రెండు చేతులు జోడించారు. సందీప్ తన ప్లాన్ ఫలించిన ఆనందంతో క్రొత్త బట్టల షాపును ప్రారంభించాడు.

సందీప్ ప్లానూ, నమ్మకం రెండూ వమ్ము కాలేదు. మంచి లక్షణాలున్న ఇద్దరూ శ్రద్ధగా పని చేసుకోవడం ప్రారంభించారు. అనతి కాలంలోనే షాపు పేరు మునుపటికంటే మారు ఫ్రెమోగసాగింది. రామలక్ష్మి శిల్క్ ప్యాలెస్ మూడు పువ్వులు ఆరు కాయలుగా వెలిగిపోసాగింది.

మరో రెండేళ్ళ కాలం తెలియకుండా ముందుకు పరిగెత్తింది. ఎంతో నమ్మకంగా కష్టించి పనిచేసే రమేష్ మహేష్ లను పెటుబడి లేకుండా తన వ్యాపార భాగస్వాములను చేసుకున్నాడు సందీప్.

రచయిత: - మద్దిరాల శ్రీనివాసులు, 9010619066

3.00235294118
మీ సూచనను పోస్ట్ చేయండి

(ఈ పేజీ లో ఉన్న కంటెంట్ పై ఏమైన వ్యాఖ్యలు / సలహాలు ఉంటే, ఇక్కడ పోస్ట్ చేయండి)

Enter the word
నావిగేషన్
పైకి వెళ్ళుటకు